𝐙𝐈𝐑𝐍𝐀 𝐔𝐀𝐑 𝐓𝐀𝐊 𝐓𝐀𝐊 𝐀 𝐇𝐔𝐍 𝐓𝐀

Mizoram Christian College a ding ta chu mi tam zawk min tiphur ngei mai. Kohhran lian ber din ngat a ni bawk si. Beisei a va sang em! Hnam dang thian pakhatin ‘Mizoram kohhran hi khawtlang tan a inseng tam lo em mai,’(a hre dik tihna ni lovin) tia min chhuahchhalna kha kawng khatin hma kan sawnsak chu a ni leh ta. Kan ram leh hnam hi kil tin atanga kan vei a, kan sut rawn sup sup a tul ta a nih ber hi.

 

Inbawl hlim mai lovin kan nihna pawm ila

 

Ziak leh chhiar thiam tam tehna (literacy rate)ah India ram pumpuia 2-na kan hauhna a rei tawh hle a. Chapopui tham a ni. Amaherawhchu, he dinhmun hi kan luah rei tawh dan ngaihtuahin engnge kan ramin a sawtpui em em na aw? Literacy rate hniam zawkte kan tluk lo viau reng a ni lo maw? Kan lehkhathiamna hi kan khawtlang siam tha turin a tling tawk lo a niang e. A tangkai lo va, kan thatpui lo chu ka ti hauh lo. State dang nena kan danglamna pawh ka sawi zung zung thei ang. Mahse, hei hi chu a chiang. Ram hnuk khawih khawp thiamna a la thleng lo a ni. A chhan pawh ram hnuk a la khawih che tlat lo. Ei bar zawnna leh hmasawnna kawngpuiah min la hruai kai lo a ni. Literacy-a 1-na chu Kerala a ni a, 2-na chu keini kan nia, kan ram leh hnam dinhmun a la inthlau deuh rih a ni e.

 

Tunlaia veitu tam takin IAS leh Central Service-a thangtharte an lut tlem ta lutuk hi an vei. Vei tur tak pawh a ni ang. Mahse hmanah an lut zung zung chung khan tuna kan awmnaah hian kan su tluih tluih mai a nih tho hi. Central Service mai ni lo, kawng engkima thiamna tak tak puak chhuah hi vei tur a ni. Han luhchilh tak tak chuan a fung chelh hneh viau khawpa mahni subject thiam Mizo zingah an la tlem pharh pharh viau a ni awm e. Entirnan, Income Tax leh Foreign Donations lamah sorkar a strict deuh a, Charter Accountant an pawimawh zual a, kan lo awm mang reng reng lo a lo ni a. Doctor thiam avanga  state danga mi tunge Mizorama inenkawl tura rawn pan tawh? Software Engineer lar tham khawnge kan awm? He state chhunga institution pakhat tal hi state dang zirlaite hip khawpa tha a awm em? Mi thiam kan neihte hnualsuatna ni lo sela kan la ‘outstanding’ hleithei lo chu a nih hi. Employment generation ni mai lo, pasaltha kawng sat thei tur kan kan zirtir chhuah a hun tawh tak zet e.

 

Kan talent tihpun a tul

 

Hetiha lai hian Mizote hi lehkhathiam chi kan ni tih hi chu ka pawm reng. Thiam hle tur kan nih laiin khawiah emaw tikhawlhkhamtu a awm tlat a ni. Chu lai tak chu hmu chhuak thiam awm se a va tha dawn em aw! Khawvel kan chhin theihna awm chhun chu Zirna hi a ni tih ka hmuh thiamna a la rei lo. Pathianin a hnam anga talent min pek pawh niin ka hria. Miss leh Modelling lama lar viau tur hian min ti lo a ni mai thei! A nihna takah chuan Sports lam te pawh hi han ti viau thin dawn mah ila kan pianphung a ruakhau tawk lo tih kan hria. Lehkha thiamna erawh chu kan sut fuh phawt chuan el phak loh bik kan neih ka ring lo. Kan talent a ni tlat.

 

Hman deuh lawka kan neih Mizoram University hi a kal fuh dawn riauvin ka hria. Mawhphurhna chelhtu zawng zawng hi tang fat fat teh se. Zirna kawngah chuan kan ram lui hnar pui a ni a, min chawm zo mai ni lovin hmun dangah pawh luang chhuak chur chur rawh se. Digital khawvel a nih tawh avang hian lehkha zir hi a awl ta sawtin a hriat ve tlat mai. Internet neih that chuan khawpui zawka mite hmuh phak hi kan lo hmu thei ve zel a. Library tha neih harsa si, pawimawh em em thin kha, internet lamah hmuh theihin a awm ve zung zung tawh a. Khawvel changkanna hian thil a tiawlsam nasa. Peih tan chuan kawng a awm a ni. Zoram hi Silicon State tih theih khawp turin Software Engineering lamahte tan han la ila aw...Chutiang tur chuan zirtirtu tha leh internet facility tha bak a ngai tam vak dawn mi aw? (Hre zawkten la sawi se ka ti)

 

Zotawng nge Saptawng

 

Zirna tha nei tur leh khawvela dak chhuak thei ve tur chuan Saptawng kan thiam hle a ngai a. Thangtharin Mizotawng an thiam loh palh a hlauhawm bawk si. Hei hi engtia tih tur nge, tih hi kan mithiamten uluk taka an ngaihtuah a ngai a ni. Mizote hi Saptawng thiam lo chi hi kan ni deuh emaw ni. Kan hmang pangngai tak tak thei lo a nih hi. Khawvel kan chhin ve dawn chuan Saptawng hi kan ‘conquer’ hmasak a ngai dawn a ni. Working knowledge han neih ve mai chu a theih a, mahse midangte tana ngaihnawm khawpa thiam leh command that hi a pawimawh zual zel dawn a ni. Hei hi a chhan ho te – khawvela Mizotawng hmang kan tam tawk loh vang leh zirlaibu tha zawng zawng deuhthaw Saptawnga inziak deuh vek a nih vang mai a ni.

 

Shillong khu Sapram ang deuhthawa Saptawng uarna leh thiamna ram kha a ni a. Kan naupan lai atanga ‘Pitar te te pawh Saptawngin an tawng zet zet mai,’ an tih thin kha a nia. Tunah chuan he dinhmun hi a tla hniam tawh hle tih a hriat. Shillonga piang leh school kal ngat pawh Khasi school chhuak Saptawng thiam tha lo an awm tih ka hria. Hmannia Architech Firm pakhatin an thawktu an rawn tirh chu Saptawngin a biak theih loh pek a! Shillong khawpuia an Biak Inah te hian Saptawngin thu sawi ila, Khasi tawnga lehlin a ngai zel tawh mai. Hei hi mahni tawng uar chin tawk hriat loh a pawi theihna niawm a ni. Kan hriat reng tur chu, Mizo hi hnam tlemte kan ni a, keimahni chhung leh kan tawng chinah chauh hi chuan kan thleng thui dawn lo a. Saptawng kan thiam telh telh a ngai a ni.

 

Zirna kalphung thar

 

Synodin College a han din fel a, National Education Policy tharin a rawn zui mai te hi chung lam remruat a tel a ni mai ang em? Kan mithiamten an la zir chiang zel turah ngai ila. Kan han hriat theih mai chinah pawh thil chu a danglam chho viau dawn e. Pawl X hlutna kha Pawl XI ah an sawn chho ang a, Graduate turin kum 4 a ngai tawh dawn a ni awm e. Chu mai bakah Arts leh Science tih anga inthliar fel then mai hi awm lovin subject combination pawh duh dan zelin a thlan theih tawh dawn ni awm tak a ni. Entirnan, Maths-a major la chungin History leh Political Science te nen pawh a kawp thei dawn ni awm tak a ni. Bakah, kum 1 chauh zir te, kum 2 zira zir tluan chhuakte pawhin an zir chhung ang zel kha Certificate hmuh zel dan tura duan a ni bawk. Kum hloh a awm thei vak tawh dawn lo a ni awm e.

 

Tunhmaa mi ti ti ka hriatah phei chuan College pangngaiah hian MA/M Sc hawn zel tur a ni tawh dawn a. Tichuan, College Lecturer tur pawh hian MA passed-a NET neih mai mai a tawk tawh dawn lo va, Ph D ngat zel lo chu lak tawh loh tur, tih te pawh hi University Grant Commission belbul hnai takte titi ka hre tawh a, hetiang thilin min nanchin hun a hla vak tawh lo mai thei a ni. Chuvangin Collegea thawkte pawh hian MA zirtir tura inbuatsaih a tul tawh pawh a ni mai thei. Kan college hmunhmate pawh chutiang tura kan thlir lawk deuh te pawh a tha mahna.

 

Mizoram Christian University

 

Hman zanah Whatsapp group pakhatah he thu hi vawrh deuh hlut a ni a. Suangtuahna ram thlir ni mai mahse sawi ringawt pawh nuam kan ti tlang tih a chiang hle a ni. Thangthar an phur a ni! Council of Baptist Churches in North East India (CBCNEI) hian North East Christian University din tumin tan an la nasa hle a. Tunah hian bul an tan chho mek a ni. Shillongah hian Martin Luther Christian University a awm bawk a, hei phei hi chu hlawhtling angreng takin zirlai pawh an nei tha viau zel a ni. Subject lamah pawh ‘Job-oriented’ an tih mai kan hriat tlanglawn loh ang chi hi an pe hlawm a, hna an hmu thei angreng phian a ni awm e. Tunah hian MLCU chuan Shillong atanga km 15-a hla Smit an tihah ram an nei thar tawh bawk a ni.

 

Kan suangtuahna kha thil ni thei lo a ni hauh lo. Zoram kohhranten a pawimawhna kan chian a, lungrualna tha kan neih phawt chuan thil har lutuk a nih a rinawm loh. Thangtharte an tui a hal a, rual an awt a, lehkhathiam an duh a, hmun hma leh zirna tha thleng phak lo tam tak an awm si a. A theihna siamsak hi kan mawhphurhna a ni lo maw? Project hlu tak kan neih ho chuan Kohhrante zingah innelna leh inpawhna a lo pung ang a, kan suangtuah thatthum ngam loh ‘Church of Mizoram’ah hian kan la insuihkhawm lovang tih pawh sawi theih a ni lo hial a ni!

*****