TUNGE BIBLE DUHTAWK LO?

     

 

Mizo Kristiante zinga thil lawmawm tak pakhat chu, ‘Bible-in a ti,’ kan tih tawh chuan hnial hleihtheih lohva kan la ngai tlang hi a ni. Hei hian kan Kristianna duhawmna leh kan la thatzia a lantirah ngai ila. ‘Bible-in lo sawi mah se…’ kan tih bai bai hun leh sawi pial phet kan tum hun a thlen palh chuan a pawi khawp ang. Mahse Bible kan pawm dan inang lo thei viau a, kan hriatthiam dan a dang viau bawk a. Zawl thupuan, inlarna, adt., thil pawh hi a tangkai kan tih viauna lam aiin ‘Bibleah pawh a awm’ tih vang a ni chawk awm e. Ngaihtuahna i han seng teh ang.

 

Bible pawn lamah Pathian Thu?

                 He zawhna hi kan chhan tura pawimawh chu a ni ta. Thenkhat chuan la inpuang zel turin an duh ngawih ngawih a, thenkhatin dawn an la chak bawk a. Eng vang nge ni ang aw? Bible hi an duhtawk loh vang a nih ngei ka ring. Tunlai khawvel buai taka Pathian Thu ‘thar’ dawn chu an ngai ropui hranpa riau a ni awm e. Dawng nia inchhal te lah hmuh thlarau an awl bik a,  thlarau nuna sang bika hriat an awl a ni mai thei. Ngaihtuah chian a ngai ngei mai. Bible-a an hmuh Pathian Thu te chu nung tawk lovah an ngai a, mite rilru tawk tur chuan thu danglam deuh belh tulin an hria ni awm tak a ni. Pathian rilru leh a duhzawng hre tur hian kan Bible hi tling tawk lo deuha hriatna te hi a awm hial nge maw ni dawn ni? Pathian Thu a bua kan kawl theuh hnuah pawh han dawng thar deuh thei nia kan ngaih chu kan ngaisang huam huam mai a ni. Bible hi kan pass ta vek pawh a ni si lo va! Heng hi a Bible zawk ngaihsan tawk loh vang a ni zawk lo maw?

Mamawh tawh loh Thlarau thilpek?

                 Zawlnei nihna leh Bible piah lama Pathian la inpuang zel nia pawmtute chuan Bible behchhan tha tak neiin an inngai a. Thlarau thilpek list-a(I Kor 12:28; Eph 4:11) a tel avang hian mi thenkhat chu hetiang tur hian Pathianin a la ko thin niin an ngai a ni. Pathianin a la pek leh pek loh hi sawi theih kan nei hauh lo. Ama thu thu a ni ang. Amaherawhchu, Bible piahlama Pathian inpuanna an awih avangin mi tam tak chu hruai sualin an awm tawh tih kan hre thung. Kan hriat atana tha chu Thuthlung Thar bute hi Kohhran din tirh, Thuthlung Thar bu apuma an neih hmaa ziak vek an ni a, Kohhran ding tir kal chho nawk nawk hun lai mamawhte mai piahlama Pathian hnathawh an hmuh chungchang ziak a ni tih hi a ni. A tira Kohhran insingsak laia ziak tam tak hi kalhmang a fel huna tul tawh lo a awm thin. Hmuh leh neih ve zel tum vanga hruai sual nih theih dan pawh a awm awm e. Entirnan, Thlarau thilpek zinga ‘Apostle’ tih chuan Isua zirtirte bik kha a kawk a nih chuan tunah an awm tawh lo. Apostle neih la tum phet ila a pawi thui thei ngawt ang. Chutiang zelin Bible zir mi tam takin chhinchhiahna hmanrua (sign gifts) an tih Apostle, zawlnei leh tawnghriat loh te hian pek an nih chhan an hlen tawh avangin Pathianin heng thilpekte hi a pe tawh lova ngai an awm. Sign gifts-in a tum tak chu Isua Krista chanchin hriattir leh tihngheh a ni a. Chu chuan a tum ber Thuthlung Thar-ah bu 27 kan lo neih tak hnu hian kan mamawh ta lo niin an ngai hmiah a ni. Tihdanglam theih lohvin a fiah tawk tawh si a. Kan hnawl lo a nih pawhin ‘mena thlak’ chi a ni tawh a nih chu.

Biblea mi sawi bona?

                 Sign-gifts te hi tunlai khawvelah Pathianin a tih tawp tawh leh tawh loh chungchang hi khel ka tum a ni lo va. Bible-in a sawi fak lo bawk nen, thu mum tak a chhuak kher awm lo ve. Kan hriattur zawk chu heng sign-gifts te hi la awm pawh ni se, ‘Eng ang taka sawtpui tur nge kan nih?’ tih hi a ni. Hei hi chaltlai ang deuhvin lang mah se thu lian tak a ni a. Hemiah hian eng ang fakauva Bible hi ngaisang nge kan nih tih a lang dawn bawk a. “Bible-a inziakte hi Pathian Thu kan tana famkim a ni a, hei bak hi chu kan mamawh lo ve. He thu hriat tuma beih leh a thupek zawm hi kan tum ber tur a ni,” ti mai thei leh “Bible chhunga mi kher lo pawh Pathianin a zawlneite a la hriattir zel alawm,” ti tlat hian tunge Bible hi ngaisang zawk le? Bible-ah hian i mamawh a kimin i hria a i bel chiang dawn nge,  thu dang dawn tumin i phili zel anga, i rin zawng miten an sawi i awih huam huam dawn?

Bible a tawk lo?

                 Rinna kawnga kalsual kan tihte hi inlarna leh ‘dawn’ lam an uar luat vang a ni deuh vek awm asin. Pathian Thu- Bible hi ‘dik lo thei lo’ mai ni lovin ‘a tawk a, a bak a awm lo’ bawk a ni tih pawm hi a lo pawimawh ngei mai. Siamthat hun laia Thurin zepui pawimawh em em ‘Pathian Thu tawk zia’ (The Sufficiency of Scripture) hi kan kalsan tep tep thin a. Bible piah lam beisei a awl. Inlarna emaw Pathian hnena atang thu dawn (zawl thupuan) emaw hi awm tawh miah lovin, Pathian Thu hi a hranpa takin hre tawh lo mah ila kan Kristian nun a buaina chhan tur a vang khawp mai. Bible hi Thlarau Thianghlim thawk chhuah, a pek a ni tawh a. A tawk a ni. Thlarau Thianghlim chuan Bible hriat thiam theihna te, kan mamawh hun lai taka min tihfiahsak te, zawm leh awih thei tura min tanpuite hi a hnathawh a ni zawk a. Bible kuah run chunga a dang la beisei hi kan tihtur ni awm lo tak a ni. Khawkhat nula hmeltha nupuia nei  tawh hnuah ngaihzawng hlui chhe ve te te te kha a la buaipui fo ang maw?

Bibleah belh tur?

                 He zawhna hi pawimawh tak a ni. Hebrai 1:1-3 i chhiar chuan kawng tinrenga zawlneite hmanga thu sawi thin Pathian chuan a Fapa hmangin thu a rawn sawi tawh a, Ani chu vantirhkohte ai pawha ropui zawk a nihzia i hmu ang. Hebrai ziaktu hian ‘tun hun hnuhnungah hian’ a ti kher bawk a. Zawlneite tangkaina a hniam tawh hle awm e. Bung 2-na kai chhoh phei chuan, thu thar dawn leh zel lam aiin thu dawn tawhte pawisa tura infuihna a ni a. Vantirhkohte thusawi mah a ngheh chuan Isua hmanga puan chhuah tawh chu a nghet ngawt ang, tiin A Fapaa a sawi hi ‘Pathian meuh pawhin chhinchhiahna te, thil mak te leh thiltih ropui tak te tiin, Thlarau Thianghlim thilpek chu tul a tih ang zela sema a rawn nemngheh tawh thu a sawi bawk a ni. A chiang kelhkawlh viau mai. Zawlnei hi an la awm a nih pawhin an tih theih ropui ber chu Isua leh a zirtirna sawi chhawn mai hi a ni zawk awm asin.

                 Paula khan Pastor junior zawk Timothea fuihin Pathian Lekha Thu zawng zawng Pathian thawkkhum hi intihdik nan, insiamthat nan leh nun dan dik inzirtir nan a tangkai em em a, chutianga hmang chuan Pathian mi chu hman tlak a lo ni a thil tha tinreng ti thei tura thuam a lo ni thin a ni. Hei bak hi mamawhin kan inhria em? ‘Pathian Lehkha Thu’ a tih hi, a loh berah, Thuthlung Hlui leh tuna Thuthlung Thar bu thenkhat te hi niin an ngai a. Tun hunah phei chuan Thuthlung Thar bu zawng zawng angin ngai ila a dik awm e. Paula sawi tum chu heng bute hi Pathian thawk-chhuah ngat, intihdik, insiamthat leh nun dan dik inzirtir nana tangkai em em, miin Bible hi a hman chuan thil tha tinreng ti thei tura thuam a lo ni thin, tih hi a ni.

                 Hetiang thu an hriat vang a ni chek ang a, Westminster Thurin duangtute chuan Bung 1:6-ah “Pathianina kan hriattura a tih zawng zawng, ama ropuina tur, mihring chhandamna, rinna leh hringnun chungchang thu hrim hrim hi Bible-ah chiang taka puan emaw, chuta tanga hriatthiam theihin emaw a awm vek a; chumiah chuan engtik hunah pawh engmah, Thlarau inpuanna thar emaw, mihringte tihdan phung emaw pawh ni se, belhchhah tur a ni tawh lo,” tiin 1647 khan thu an lo dah kalh tawh mai a ni. Bible kan ngaihsan dan tur chu heti hian a ni dawn lawm ni?

Engtin zel?

Miin inlarna a lo hmu emaw, Pathian hnen atangin thu thar a lo dawng a nih pawhin amah mimalah tawp mai se a him ang. A dawngtu leh Pathian inkar chu sawisak thiam an har khawp ang, Bible thu an kalh loh phei chuan. Tin, Pathian pawlna leh kaihhruaina pawh chan theih a ni chiang tih hriat tur a ni. Amaherawhchu, mi thu dawnin mimal leh midangte chunga thu a neih lutuk hunah a him lo thuai thin tih hriat a tha. Innghahna leh zawm tlak an ni ve lo! Kan zavaia chunga thuneitu chu Bible hi a ni zawk daih si a. Ziah belh ngai lova Thuthlung Thar an lo khawrpum tawh avangin inlarna dang emaw, Pathian thu thar dang emaw, ‘zawl thupuan’ emaw kan mamawh tawh lem lo a ni. Bible ngaihsan vang liau liauvin a dang hnawl ngam zawk ila.

 

*****RE17042020*****