𝐑𝐀𝐋 𝐈𝐍𝐊𝐇𝐀𝐖𝐌 (𝐎𝐍𝐋𝐈𝐍𝐄 𝐖𝐎𝐑𝐒𝐇𝐈𝐏) 𝐔𝐀𝐑 𝐀 𝐇𝐔𝐍 𝐄𝐌?

 

Hripui chu a ninawm ta hle mai. Kum chanve zenzawn chu kan buai ta a nia, eng chen tak la buai ang maw? Damdawi an hmuh chhuah nghakhlel pawl tak ka ni awm e. Keini mimawl tan beiseiawmin han lang ruak ruak thin mah se han zir chian deuh chuan hun la duh deuh dawnin an sawi leh thin. Mi thenkhatin ‘hetiang hripui hi chuan kum 2/3 a daih thin alawm,’ an la ti ta deuh deuh. Chutianga rei chu a daih tak tak ang tih ka hlau khawp mai. Mahni hna thawh theih mumal loh hi a hrehawm, thianthate nena inventhawnna tel miah lova inkawm bawrh bawrh a chakawm, duhna hmun apianga zalen taka kal a nghahhlelhawm, mask vuah leh sanitizer nuai a ninawm tawh em a ni. Tuna pawimawh ber chu kan nun leh thiltih dan phung her rem thiam a ni mai rih si a.

Chung lam thiltum hai hawn

Engkimtithei Pathian hnuaia hetiang thilte hi thleng vek a nih si avang hian thiltum nei lo chuan a che mai mai dawn lo tih a chiang a. Khawvel pum huap hian eng tak tih tum ang maw? Kan hmuh phak chin kan ram tan hian eng thil danglam tak rawn thleng dawn ni maw? Thawm na tak tel lova tihdanglam theih loh thil he hripui hmang hian min tihdanglamsak a tum emaw ni dawn le? Keini ho hian a thiltum hi kan haihawng thiam rih lo pawh a ni mai thei asin. Khawtlang huapa thil a danglam dawn hi chuan na deuha min sut dawrh hi a ngai a ni mai thei asin. Chu lai tak han hmuh fuh chat a tha khawp ang le. Mimal leh huho nuna Pathian thiltum hriat tuma ngaihtuahna sen a hun hle awm asin. Khawtlang nun hona hlu tak (communitarianism) hloh tam si lo leh a taka pungkhawm chuang si lovin thil tam tak a tih theih tawh a ni tih hriat a, a hlawk thei ang ber tura inherrem hi kan zir thiam a ngai mek a ni.

Nih dan ngai nge ram thar zuan

Heti taka social life awm thei mumal lo - intlawh pawh nuam halh lo deuh leh mipui pungkhawm thei lova awm, school leh huau huau khap tlat, Biak In inkhawm phei chu hla tak a la nihna hunah hian engtin nge kan lo tih than tawh tam tak atanga pen chhuaka kawng thar kan sah theih ang, tih hi ngaihtuah thiamte ngaihtuah tur ni se. Kan khawtlang nun zalen leh nuam tak mai te hi thatpui loh chin kan nei tawh a ni mai em le? Lehkha thiamna kawnga tlahniam a, hriselna kawngah pawh a state anga kan mualpho mek lai hian eng hi nge dik lo, eng hi nge her rem ngai? All India competitionah kan lang pha mang lo leh mipat-hmeichhiat nuna kan mualpho tlat mai hi kan khawtlang zalen luat rah a ni thei ang em? Chhiat ni that ni-a nula leh tlangval zalen lutuk te, pawn lam program Kohhran leh khawtlangin a ngah viau mai te hi siam tha turin min duh emaw ni dawn le? Chhanna hre fak lo mah ila ngaihtuahna sen chu a ngai a ni. Kan tih dan pangngai kha kan thlak danglam loh chuan kan nih danah hmasawnna a awm dawn chuang lo tihna a nia. Kan nih dan mek hi a tha tawk e, kan tih theih chuan thu dang ni se.

Kal khawm si lova tihkhawm

Hmanlai atang rengin Mizote hi khawtlang zah hnam leh ngaihlutu kan ni a. Zawlbuk kha a lal em em a, tlangvalte khan naupang thuawih lote pawh an zilh mai a. Hmeichhe awm tha duh lo chungah pawh, ama zalenna a nia, ti liam mai lovin hmalak dan an nei mai thin a nih kha. An nunphungah naupang khawlai leng rual tan ina tih tur vak a awm chuang lo a, pawn lam an hun hman tamna a nih avangin chhungkuain hmun a chang tam lo viau awm e. Chutiang dinhmunah chuan khawtlanga innghah leh thil tam taka khawtlang rin mai a awl viau ang. Naupang enkawlna rilruah pawh khawtlang an ring deuh mai niin a hriat theih. Hei hi tunah pawh kan rilru a la ni deuh roh tlat mai a. Kan fate hi keimahni enkawl leh zirtir tur tih inhre tawk lovin, khawtlang leh kohhran hian min enkawlsak tura beiseina kan nei deuh tlat niin a lang. Nu leh pa zawng hian kan chhungkua theuh vei thar a tul a, mahni in ngeiah ro tha kan rel a tul tih hi Covid-19 hian na takin min hriat thar tir teh se. Khawtlang leh Kohhran tih dan phung pangngai te hi culture-a bei nghet tawh a nih avangin chutianga dan siam a, tihthat ngawt theih a nih loh chin a awm. Chhungkuaa insorkarna dan siam that a, chutiang tam tak rah chhuak chuan khawtlang culture chu a siam danglam mai dawn a ni. Hripui atang hian chung lam khian lockdown boruak leh internet facility hmang tangkai thiama ‘kal khawm si lova tihkhawm’ dan min zirtir a tum a ni mai ang a, ka ti thin. Hei hi tunhmaa thil tih theih miah loh, tunlai changkanna vanga tih theih si a ni. Mahni ina awm reng chungin kan ‘inkhawm’ theih tawh a nia.

Ral inkhawm (online worship)

Kan thil sawi mek hi kan tualchhung kohhranah bul kan tan thei. Inkhawm chhir kim mi tan chuan thla 6 chhung tak zet Biak Ina han lawi tak loh chu a khawharthlak vawng vawng tawh mai. Engtikah nge kan inkhawm theih dawn tih pawh hi a chiang lo viau lehnghal a. Ngaihtuah ngun ngai tak erawh chu kan memberte kohhranin a chawmna thu leh hlate kan dawng lo rei ta lutuk hi a ni a. Tualchhung kohhran tin hian ‘ral inkhawm’ (online worship) buatsaih dan kan ngaihtuah theuh a tulzia a lang chiang hle tawhin ka hria. Biak In chhung boruak te chu tluk em lo mah se tih loh ai chuan a tha dawn hrim hrim a. A lo fuh viau phei chuan chin chhunzawm atan pawh tha tak a ni thei ang. Kohhran din chhan chu thlaraua memberte chawm a nih miau avangin engtin nge kan chawm ang tih kan vei a ngai a. Kan memberte hi whatsapp leh facebook vela tu tih hriat loh ziah leh sawi vel mai maia an inhnangfak tur phal lovin, tualchhung kohhran hruaitute thahnemngaihna a lanchhuah a tul ta a ni lawm ni? TV, Youtube, facebook velah chuan mi thu sawi ngaihthlak tur a tam khawp mai. Chhiar tur pawh a tam narawh. Mahse, tualchhung kohhran mawhphurhna hlu bik leh tangkaina kan hriat pawh a ngai. Memberten hmelhriat loh thusawi ai chuan an Kohhrana thuhriltu ngei, an kohhran hre chiangtu, anni pawhin an hriat chian te thu sawi chu a danglam ngei ngei ang le. Member te chawm hi tualchhung kohhran hna a ni a, midang kuta dah mai chi a ni lo. I lawina kohhran ngei kha humhim rawh.

Tualchhung kohhran insanphek

He pandemic hi internet, phone, computer leh tv tel lo hian hmachhawn dawn ta ila engtin tak nung hlawm ang i maw, i ngaihtuah ve thin em? Mahni ina tawm ngawr ngawr harsatna a sukiang nasa a nia. Zoom, Google, Youtube adt hmang hian pun khawm si lohva tih ho a theih ta tlat a. Kal khawm si lovin Pathian biak inkhawm a theih tihna a ni a. Hemi kawngah tak hian Pathian biak nan tunlai technology hman tangkai thiam a hun tawh a ni lo maw? Biak In thleng kher lova Pathian Biakna hun hlawk tak, kohhran pumpui inhmantawnna(community) tel si pawh a theih tlat mai a. A hman tangkai dan zawn a va duhawm em. Ral inkhawm (online worship) hi a tula ka ngaihna chhan chu mahni chhungkuaa tih hian inkhawm puitling ang tak taka muk a har viau mai hi a ni. A hun chungchangah inthlahdul a awl a, mahni duh dan ang anga tih a awl viau mai. Online worshipah chuan Zoom, Google Meet, adt hmangin kan Biak In pulpit leh maicham ngei atangin Chairman leh Thuhriltuin hmun hmang se. Tantu pawh a tul chuan kan nei thei ang a, zai hruaitu tlem nen. Tichuan, Chairman hla thlan apiang kha a hun inang zelin mahni in theuhah kan lo sa mai dawn a ni. Khami hun bikah khan chhungkaw tin kan lo inring thap mai ang a, online-live in kan ti ho mai dawn a ni. Kan kohhran thuhriltute hmel hmu ngeiin Pathian Thu kan ngaithla bawk ang a, a remchang ngaihthlak tawp ai chuan kan hlawkpui ang ka ring tlat. Tualchhung kohhran min phuarkhawm tha bawk ang. Hetianga kan tih hian mi zawng zawngin an zawm vek ang tih beisei chi a ni lo a. Urhsun taka lo hmang thin tam tak an awm ang tih erawh chu a chiang. Thla 6 chhung engmah kan pe si lo a, kan memberte chawm turin tualchhung kohhrante hian engemaw tak chu kan tih a hun tawh a nih hi.

*****