HEI HI A PAWIMAWH BER

 

Khawvel pum huapa hripui leng karah mi tam takin Pathian Thu kan ngaihven thar niin a lang a. Hei hi thil lawmawm tak pakhat chu a ni phawt mai. Kan tih fuh chuan tun hma zawng aia awmze nei zawkin ram pumin Pathian Thu-ah hma kan sawn thei dawnin ka hria. Chhungkua bila mahni inchhung ngeia kan tawm theuh lai hian kan chhungkua-in Pathian Thu kan mamawhzia leh pawn lam rawngbawlnaa kan ‘pass’ hmain keimahni chhungkua theuhah kan ‘pass’ hmasa tur a ni tih te hi intuh fuh thei ila a duhawm ngei mai. Pathian Thu hi kan hnaih ber, kan chhungte, nena buaipui tur a ni tih i hre mawlh ang u.

 

Rawngbawlna hmun harsa ber

            Chhungkuaa rawng bawl hlawhtlin hi a harsa a ni ang. Mi pakhat fiamthu phei chuan, “A har bawk a ni, Pathian pawh a hlawhchham a nia. A fa hmasa Evi leh Adamate kha an khawlo ve em!’ a ti hial a ni. Biblea mi ropui tam tak chhungkaw enkawla hlawhchham ve der an awmin a lang. A naupan lai atanga Pathian aw hre ngat Zawlnei Samuelate kha a faten a kawng an zawh der lo. Lal Davida pawh a ropui tehlul nen inchhung enkawlah chuan a ‘fail’ nasa. A fapain a farnu a pawngsual a, a fapa dangin a fapa chu a that a, a fapa chu ani lakah a hel a, thah tumin a um a, a pa nupuite pawh a uiresak a nih kha. Isua te chhungkua Mari leh Josepha fate zingah pawh Isua ring duh hauh lo leh tihel hialte pawh an awm ve bawk kha mawle!

Zep ruk a awm thei tawh lo

            Chhungkuaa rawngbawl a harsat em em chhan chu kan nihna engkim a lan fiah em em vang a ni a. Kan nihna mi laka kan zep tang tang thin pawh mahni inchhungah chuan zep sen a ni tawh lo a. Chhungkuaah chuan tawngkam thiama intlan a theih loh. Mihring sualna leh chak lohna chu saruak leh inhawngsain a inpho ut mai a ni. I chhungte chuan i chak loh lai ber, i lungngaih lai, i pachhiat, i thinur lai, i hlim lai, i rilru a chauh lai bera i awm dan an hre vek. Chutah chuan Pathian lakah i rinawm leh rinawm loh an hria. A va pawimawh tak em! Chuvang chu a ni ang he hmuna rawngbawl hi heti taka harsa kan tih thin. Revival Speaker te chu kar 2/1 an rawn cham a, thu tha deuh deuh thiam takin an rawn sawi, mahse an nun zawng zawng kan hre hauh lo. Pastorte chuan kum 5 vel min awmpui a, an chak lohna pawn lamah an thup tlang thei a ni mahna. Mahse, chhungkuaah chuan 24X7 kan awm a, kan thinrim lai, kan hlim lai, kan mood fuh loh lai, kan nat lai, kan hah lai, kan inthlahdul lai engkim hriat a ni tawh si a. A serious zia leh a pawimawhzia a chiang em em a ni. He hmun taka i rawngbawlna i hlen ngat chuan rawngbawlna dangah chuan a ngaihtuahawm lo ve.

Hmun pawimawh ber a ni si

            Kan inchhung theuh hi kan rawngbawlna hmun pawimawh ber a nihzia hi kan pawm thiam em aw? A tlangpuia kan ngaihdanah Kohhran leh khawtlanga kan rawngbawlna hi a pawimawh zawk lo maw? Nupui/Pasal fanaute kalsan ngam ngata rawngbawl ngam tur kan ni dawn lawm ni? Chan huamin a ni dawn lawm ni? He ngaihdan hi ‘hmanlai style’ niin a lang. Kan khawsak dan phung leh kohhran dinhmunin a zir loh avangte pawh a ni anga, rawngbawltu hmasa zingah mahni inchhung ngaihtuah hman vak lo a rawngbawlnaa inhmang mi tam tak an awm. An inpekna a ropui kan ti lo thei lo. Mahse, tunlaiah chuan khatiang kha a lo tha ber lo tih hriat a ni tawh a. Tunlai mi thiamte  thusawite leh an lehkhabu ziaktute lehkha ziakah te chuan chhungkaw dah hmasak hi an thupui ber a ni fo. Midangte tana thahnem an ngaih em emna chu anmahni chhungkua ngeiin a lo tuar thin vang a ni.

Kan sukthlek fuh tawk lo

Mizo khawtlang nun nuam leh tha lutuk hi kan tuarpui chin a awm thinin ka hria. Hman laiin khawtlang inkaihhruainain thu a nei hle a. Naupang leh thalaite pawh kha tlangval hovin an thununa an enkawlsak turin an ngai deuh niin a hriat theih. Zawlbukah khan zilh ngai chu an zilh thin a nih kha. Tin, nula te khawsak dan chungah pawh Val Upa leh tlangvalho khan thu an nei viau a nih kha. A tul chin a awm pawh a ni ang. Mahse, tunlai khawvelah pawh hian keimahni inchhunga inzirtir lam aiin pawn lam chakna hian kan fate pawh hi rawn zirtir se tih hi kan duh dan a ni deuh tlat. Sunday School zirtirtute kan ring, Kohhran kan ring, KTP kan ring…Camping te, Crusade te hi kan fate min siamthat sak turin kan papek a, keimahni ‘kel e awl’ kan tum tlat thin. Pawn lama an zir zawng zawng hi a dikna kan inchhung ngeia a taka an hmuh loh chuan a ‘effective’ tawk thei lovang.

Hlu zawk a awm thei ang em le?

            Chuvangin, Chhungkaw nunah fimkhur rawh. Engtinnge sum i lak luh? Eng ang takin nge Pathian i hmangaih? Eng chen nge Pathian leh a rawngbawl nan i inphal? I faten an hria. I kawppuiin a hria. I chhungkua en la – a aia pawimawh engnge awm le? Hausa chhungkua nih a duhawm thlawt e, mahse kan fate kan chan si chuan kan hlim chuang ang em? Miin min fak sup sup ta se, kan fate bo tlat se kan hlim ang em le? Thlarau hmahruaituah miin min ngai se, a lam nasa saah tang ila, kan chhungkua rawih telh telh si ila, a rah a tha chuang ang em? Lungawina a tawpah kan nei chuang ang em? Kan nunah Lalpa a lawm ang em?

Lock-down hi inenfiah nana Pathian remruatah ngai la. I chhungkua aia ngaih pawimawh i neih chuan thlah turin tan la ang che. Chhungkua ngaihsak hman lo khawpa thil dangah i buai a nih chuan i nunphung, i hna, i rawngbawlna thlengin ennawn a tha lo vang maw? Mi dang ngaihsak vanga i chhungte i thlahthlam a nih chuan a pawi theihzia dawn chiang ang che. I chhungkua ngei enkawlna chuan i nun pumpui rahka tina i tihdik a phut tih hriain he rawngbawlna hi thil awlai tak a nih lohzia ngaihtuah thar la, I nun pumpui kaihhnawih tlat, rawngbawlna tak tak a ni tih hriain Lalpa lam hawi thar rawh aw.

*****RE02042020*****