KAN MAMAWH THAWHLEHNA CHANCHIN THA

  

Corona Virus buaina hian kan thlarau nun min enfiahtirin kan Pathian Thu kalpui dan leh pawm dan thenkhat thleng thleng hian min her danglamsak se a va duhawm em! Harh tharna lo thleng mup mup sela, Good Fridaya-a kan aia a thihna hlimpuina atangin ‘Thawhlehna Chanchin Tha’ ngei mai chu a nih dan tur ang takin han tuipui suau suau mai ila aw! Kan ram chu a kang zawt zawt ngei ang le. Mahse, kan Kristianna hian Zirtawpni-a cham a, Kalvary tlanga inbenbel hi a la tuipui tlat si a.

Isua Kraws kan tuipui leh hriatthiam tlukin a Thawhlehna Ropui hi kan ni tin nun atana a hlutna hmuh thiam a har fo thin. Ringtute nuna a sawhkhawk tur pawh haihchhamin kan awm fo niin a lang. He thawhlehna hian khawvel a lo tihdanglam vek tawh angin vawiina kan nun ngei pawh bin leta lepse vek tur a ni awm e. ‘Ni sarih ni a lo ral’ tuka Mari Magdalini te thil tawn mak danglam tak a ni satliah ngawt lo a, lei leh van sawi danglamtu thil mak danglam ber – ni ropui ber ‘Easter Sunday’ a ni si a. Isua thawhlehnain kan nun atana awmzia a neihna tur ki hrang hrang thenkhat i thlir ho lawk teh ang.

1. Sual ngaihdamna: Thawhlehna chu chunglamin ‘Aw le,’ a tihna a ni. Kan sual zawng zawng Kristan krawsa a phurh Pathianin a lo pawmna leh a ‘result’ a ni. I Kor.15:17-ah, “Krista chu kaihthawha a awm si loh chuan, in rinna hi engmah a ni lo va, in sualnaah in la awm reng a ni ang,” tih kan hmu. Thawhlehna hi thleng lo sela chuan Isua tuarna kha pawm a ni lo tihna a ni ang a, kan sual vangin kan la tuar ang a, sual thiltihtheihna chu kan la hneh thei dawn chuang lo tihna a ni. Sual leh a theihna ata min tithiang tawh si a.

2. Mihring nihna pumpui pawimawhzia. Isua thawhlehna chuan mihring pumpui (taksa, rilru, nunna leh thlarau) hi Pathianin a ngai pawimawh tih a lang chiang em em. Then hran theih a ni lo. A pumin a tho leh miau si a. “Krista chu…mitthi thawh hmahruaitu a ni,”(I Kor. 15:20). Kan thlarau chauh a chhandam lova, kan taksa chu pawmchilhin a thihpuia a thawhpui leh ngei a, vanah Pa dinglamah a thutpui a ni si a. Pathianin kan nihna pumpui a buaipui ang hian he khawvela kan cham chhung hian kan nun pumpui khawih danglam tur  Chanchin Tha a ni e.

3. Ni tin nun atana chakna: Ringtuten ‘fa nihna Thlarau’ kan dawn hian Isua Thlarau (Thlarau Thianghlim) kan dawng tihna a lo ni a, chu chu Tholeh Krista, Pathian nung fapa chu a ni.  Pathianin thih hnu khawvel chhandamna min tiam hi vawiina Tholeh Krista zawm chauha neih chi a ni si a. Isua ringtu kan tih pawh hi Krista zawmtu tihna a ni. Paula meuh pawh in, “Ka thil duh chu…a thawhlehna thiltihtheihna chan...”(Phil. 3:10) a ti a nih kha. He thiltihtheihna chang lo leh chak si lova ‘mi hlim,’ ‘thlarau mi,’ ‘mi tha,’ ‘rawngbawltu,’ ‘hruaitu,’ nih tumna hi a va ninawm tawh em! Khawvelin a mamawh leh kan Lalpa’n min duhna chu he ‘thawhlehna thiltihtheihna’ lantir hi a ni. A aiin a te thei thlawt lo!

4. He lei piah lam nun: Sakhaw zirtirna eng dang mah, finthuril khawia mi mah hian thih hnu khawvela taksa thar, thinlung thar leh rilru thar pek tiam thei leh tiamtu an awm lo. Krista thawhlehna avang hian chu thutiam tha danglam tak mai chuan ringtute tan awmzia a nei thung. Paulan, “Kristaa beiseina ka neih hi tun dam chhung atan chauh ni ta se, mi zawng zawnga khawngaihthlak ber ka lo ni ang,”(I Kor. 15:19). Thawhlehna thutiama innghat Kristiante hi, eng vang tak ni maw, khawvel thil te hian min phuar ngheh em em thin? Inenfiah a ngai e. Vana ro khawl kan zir thiam em? Van lam thlirna atanga hringnun khawvel thlir kan thiam em? Nge van lam dinhmun chu ngah saa ngaiin leiah engkim neih belh tumin hun kan hmanhlel thin zawk?

5. Eden thar inhawng: He thawhlehna avang hian Krista chuan Adama hnuhnung zawk nihna chu a luah ta. Hmana Eden huana mihringin felna a hloh tawh avanga, sual chhungkhung kan lo nih tawhna chu thiaha awmin Krista’n Lalram a rawn tungding leh ta. A famkimna la chang rih lo mah ila, Adama pahnihna chuan Eden huan tharah chuan lalna a chang tan leh ta a ni (ref. Matt. 28:18, 19; I Kor. 15:45). Chu Pathian Ram ringtu-a thleng tawh chu a zauh zel theih nana tang chungin a famkima a thlen hun nghakhlel takin kan thlir a ni. Chu thuruk chu kan vawng a, kan nihna chuan khawvel tan rah duhawm a chhuah reng thin tih zep rual lohvin i lantir ang.

6. Kohhran a piang: Thawhlehna chuan thil siam thar a hring a, chu thil siam thar, chawlhkar ni hmasa bera lo indin tan, ringtu inpawl khawm chu Kohhran a ni ta. Ama kohhran chungah chuan amah chu Lal a ni nghal bawk a ni (Kol. 1:18). Chu Kohhran chu ‘Mithianghlimte inpawlkhawm’ kan ti. Heti hi a nih avang hian mimala Thlarau thilpek zawng zawng pawh, mahni dinhmun siam nan ni lovin, Kohhran chhungah Kohhran tihchaknana hman tur a ni a. Kohhran inkhuahkhirhna dai zuankhahlen a, chansan tumna ram leh ropui taka rawngbawl tumna hian hmun chang tawh lo sela. A bung chu a pum aiin a lian thei lo angin ringtu chu Kohhran aiin a lian thei ngai lo vang. Kohhrana rawngbawltute pawhin a neitu leh lu ber Krista Isua hnuaiah an awm a ni tih hre reng mawlh rawh se.

7. Hlawhchham thei lo Rawngbawlna: Isua hi thihna hnehin tho leh lo sela chuan kan rawngbawlna zawng zawng hi a thlawn vekah a chang thei a, kan hlawhtling ngei dawn tih hriat theihna kan nei lo. Krista hnehna changa a thawh leh tak avang hian harsatna neuh neuh tawkin, daltu lian tak pawh lo awm thin mah se, a tawpkhawkah chuan hnehna chu kan chang dawn tih kan hria. ‘Thupek Ropui’ an zawm theih chhan kha a Petu kha thihna hnehin a thawh leh miau vang a ni! Thihna hnehtu’n a duh dan taka a tirh nih chuan awmzia a nei em mai! Kawlkil thleng pawha Chanchin Tha an vahvaihpui theih tak chhan chu thihna hneha thawhlehna avang hian an rawngbawlna a thlawn dawn lo tih an hriat ngheh vang a ni si a (Mt. 28:18-20).

                        Thuthlung Thar zirmiten an hmuh danin Tirhkohte Thiltih Bu-a an thusawi leh sermon zawng zawngah Isua thawhleh thu hian 100% a luah a, tuarna leh thihnain 88%, ngaihdamna thuin 63% a luah thung. Hei hian ringtu hmasate hriatna leh nuna Isua thawhlehnain hmun a luah sanzia a tilang(Kristian Hlabu-ah thung chuan a tuarna lam hla 38 kan khung laiin Thlawhlehna lam chu 8 chauh kan khung thung). Apostle-te chuan Isua thawhlehna hi Kristian thurin innghahna – Kristian zirtirna leh nunphung zawng zawng fan chhuaktu a nihzia an hmu. Martin Luthera pawhin, “Isua kha a tho leh a ni tih thu rin mai a tawk lo a…thawhlehna awmzia leh thlarau nuna a ken tel … zawng zawng hi kan ring tel tur a ni,” a lo ti a mi.

                        Good Friday-a cham reng lovin Easter Sunday thleng theuh ila ringtu hmasate angin ‘A tho leh ta’ tih thu hi lawm leh huaisen takin i nunpui kan va mamawh tehreng em.

 

 

*****RE09042020*****