BIBLE CHHIAR UAR ZUAL ILA

  

Lockdown hun awl Bible chhiarna hun atana hmang tangkai a, Holy Bible chhiar chhuak ta ka hre nual a. Hetiang hun harsa kara thil lawmawm thleng pakhat a ni ngei ang. Ringtu tam tak hian kan nunna bu atana kan pawm Bible meuh pawh hi chhiar kan harsat fo a ni awm e. Lehkha zir mi nih loh phei chuan a hautak lehzual mai thei. Amaherawhchu kan Pathian hian a Thu chu lehkhabu hmanga a puan miau avangin kan chhiar tam a tul a ni tih erawh chu chiang sa a ni. Mi tawngkam thiam leh sermona inawitlei leh midangte dawna inhnangfak mai lovin Bible ngei mai bih leh zir chiana thlarau nuna than zel i lo tum dawn nia.

 

Bible chhiar chhuah nawmna

 

Tun hma chuan Bible chhiar chhuah hrim hrim hi ka ngai pawimawh vak lem lo a, chhiar tam lam aiin chik zawka chhiar uar ka tum a. Mahse, thil kalkawp tur chi ni zawkin niin ka hre ta thuai a. Chuvangin, kum engemaw zah chu kum khat chhunga vawi khat tal chhiar chhuah hi ka ching ta a. Thlarau nun pawh a chawm tha tawk khawpin ka hria. Kum tin kan tih theih chuan kan lo chhiar chhuak tam duh ve khawp a lo ni a. Kei ve pawh hian Pathian tanpuinain kum 20 chuang lai chu ka lo chhiar chhuak ve der tawh a. Dam chhung thil thlenga thil hlu tak a lo ni reng tawh mai a ni. Chhunzawm zel ka tum bawk a. I duh ve a nih chuan a awlsam dan ka sihhmuh ve dawn che a ni.

 

Chhiar dan kalhmang tha a pawimawh

 

‘Bible chhiar chhuak’ han tih hian Genesis atanga Thupuan a indawta chhiar chhuah hi a ni kher lo tih hriat tur a ni. Hetiang ngaihdan avang hian mi tam takin an pamtul thin. Genesisah an han tan a, an la phur a, a thu a lo ngaihnawm deuh bawk nen an kal zung zung a. Exodus-ah pawh an la che tha viau. Leviticus, Number velah chuan a thu a lo har deuha, phurna a tla hniam deuh tawh bawk nen, zuzi ral mai a awl khawp mai. Deuteronomy-a pel hleithei lo an tam a ni.

Bible i chhiar chhuah dawn hian a indawt kher ngai lovin i chhiar chin kha chhinchhiah mai la a tawk. A nihna takah chuan ni tina Thuthlung Hlui leh Thuthlung Thar lam in-balance tawka i chhiar hian i nun atan pawh a tha tih hria ang che. He thila tanpui tur che hian Bible Reading Chart te pawh a tam a nia. Thenkhat phei chuan kan thlarau nun chawm tur hian Thuthlung Hlui, Thuthlung Thar, Sam/Thufingte/Thuhriltu hi ni tina chhiar zel tur an ti a ni. Kum khat chhunga Bible chhiar chhuak turin ni tin minute 15-20 i pek chuan a tawk thei ang. I chhiar loh ni a lo awm palh a nih pawhin hun pek tam deuh ni i nei ang a, a fel mai ang. A bung zawnga sawi chuan ni khata bung 4 ang vel a ni awm e.

Smartphone kha hmang tangkai la

 

Bible Reading Chart hi internet lamah pawh hmuh mai theihin a awm teuh mai a. Tunlai Study Bible-ah chuan an dah deuh vek bawk a. Hei hi zui mai a awlsam. Tin, Saptawng devotional lehkhabu lar tak Our Daily Bread hian fel takin ‘The Bible in One Year’ tiin a dah thlap bawk a. Chhiar a, chhinchhiah zel a ni mai e. Smartphone i hman phei chuan a awlsam lehzual a nia. Youversion Bible App hi download la. He app hmang Bible version zawng zawng a download theih a. Mizotawng Bible Lehlin Hlui leh Thar pawh a awm ve ve. Bible Reading Chart pawh a awm sa nghal a. He app-ah hian i Bible chhiar tawh leh la chhiar lohte a in-record nghal thlap bawk si. Hmun tina i ken thin i phone ngei khan Bible  chhiar kawngah a tanpui nasa thei hle che a ni. Mit a hah changin a ngaihthlak(audio) theih bawk a nia! Smartphone-a Bible chhiar te chu dalau ti deuh a awm theih a. Chuti a nih pawhin phone-a mi kha a chart leh chhinchhiahna atan hman a, kan Mizo Bible ngei mai kha chhiar mai tur a ni. Tumna i neih chuan Pathianin a tanpui ngei ang che.

 

Youversion ai mah a tha nia ka hriat chu DJ Bible Reading Plan App hi a ni. Hei hian ni tina kan chhiar tur hi hlawm 4 – (i) Thuthlung Hlui Historical & Zawlneite, (ii) Sam/Thufingte/Joba/ Thuhriltu & Isaia bu, (iii) Chanchin Tha, leh (iv) Lehkhathawn/Tirhkohte Thiltih te a rem sa thlap mai a. He Plan hian thlatinin ‘make up day’ ni 5 lai a dah ziah lehnghal a. Chhiar loh palh ni i nei a nih pawhin ni 5 chhungin i cover leh thei zel dawn tihna a ni. Audio a awm nghal bawk a. Mahse DJ Bible Reading Plan-ah hi chuan Saptawng ESV version chhiar zel a ngai thung dawn a ni.

 

Bible Chhiar ABCD

 

Bible chhiar chhuah hrim hrim hi ropuiin hlu viau mah se, Pathian Thu hi thatpui tham tura hriat kan tum tak tak a nih chuan chhiar liam tlang puat leh mai thin hi a tawk lo nasa a. Rilru senga hun tha pea a zira kan zir (study) tak tak a ngai thin. Chumi atana tihdan awlsam ber nia ka hriat chu Bible Chhiar ABCD hman thiam a ni a.                                   

 

A.    A Title (A Thupui):  I Bible chhiar thuhlawm kha nangma irawm chhuak ngei title (thupui) pe ang che. Bible-a thupui awmsa kha hman awih loh a ni ang. Hei hi thil hote anga lang awlsam miah si lo a ni. Nangmah ngeiin a thupui i pek theih chuan i thil chhiar kha a awmzia i man thawkhatah a ngaih theih dawn a, i chhiar liam puat venna tur a ni.

B.     Best Verse (Belh chian tur chang tha ber): Tum khata i chhiar zawng zawngah khan nangmah hnehtu ber che chang kha thlang chhuak la, chhinchhiah rawh. Underline a pawi lo.

C.    Challenge (Chona): I Bible chhiarah khan Kristian nuna cho thartu che engnge awm? Thui zawk kal tura turtu che a awm em? I la hriat ngai loh hriat thar i nei em? Chungte chu chhinchhiah thlap la.

D.    Difficulties (Dah mai mai loh tur thu harsa): Bible kan chhiar hian kan hre thiam vek lo. Khaw hming leh ram chung changah buaina, Hebrai leh Greek hriat thiam loh, a thuchah hriat thiam loh leh pawm harsa te pawh a awm thei. Chung zawng zawng chu i buaipui zel chuan hmasawnna mai lo chu hmuaktu che a awm lovang.

 

Hemi ABCD step 4 te hi hlu tak an ni a, i zawm vek thei lo a nih pawhin ‘A’ chauh pawh khi ti thei ta la, thatpui tham a ni e. Tin, Bible i chhiarin map te, bible chart te, Bible dictionary te, Hrilhfiahna bu te han hmang thei lehzel phei la chuan i tui telh telh mai ang. Pathian Thu hi belchiang turin tan la sauh sauh ang aw.

 

 

*****RE07052020*****