MOTOR KHALH ATANGA HRINGNUN ZIRLAI

  

Puitlin hnuah motor khalh zir ve chauh ka ni a, a nawm zia mite hriat fe tawh hnu ka’n  han hre thar ve lehzel a. Chutia khalh paha ngaihtuahna ka kawm rauh rauh lai chuan ka hringnun zawh mek leh motor khalh chu a inan riau dan ka ngaihtuah chhuak ve tlat thin. Hringun zirlai pawimawh tak tak a zir chhuah ve theih a ni awm e. Khai le aw:

Tlan chak chu an thleng hma zawk tlangpui.

Thu dik chiang sa a ni. Han tlan vik vik mai chu nuam tak a ni. A bik takin bike khalhin a nuam zual. Kawng mam leh ngilah, mi tam loh lai tawn fuh tuma duh tawka kan han inphin phei hi chu mipa tan chuan a nuam thlawt a ni. Pa pakhat la upa bik vak lovin chutiang kawnga min phurh tuma 20 speed vela min phur ka kham loh zia kha aw! Speed thrills! An thleng hma deuh bawk.

Hringnun hi intlansiakna angin an sawi thin. Tlan chak chu an thleng hma deuh a, mi an pel tam thin. A hahthlak deuh avangin fit a ngai hle bawk a. Chuvangin tlan chak tura exercise lak sauh sauh a pawimawh. Chu exercise chu hun hman thata, ngaihtuahna senga mahni inzir zelna a ni. A fit leh tlan chakte chu midangte aiin an thleng hma ang. Sap thufing pakhat chuan, “The early birds get the worms,” an ti. Mi ngurchuaite chu mi zam tha ten an thlen khalh ang. Chu chu a chiang a ni.

Mahse, tlan chak an che sual tam zawk fe thung.

Tlan chak a nawma a hlawk viau laiin a ‘risky’ zawk fe. Accident tawka thi leh hliamte hi han chhiar chiang ila tlan chak vang a ni tlangpui. Hringnunah pawh hian chu chu a dik hlein a lang. Tlan chak tum luata khaw hawi hman lova tlan te hi che sual an ni chawk. Lam kawiah an brake hman lo, midang lo lang thutah ‘bur’ a ni mai. Muang taka tlan chingte chu vawi tam tak buai lovin an insaseng hman tlat thin thung a ni.

Tlan dan tawk thiam a tul hle tihna a ni. Muan huna i muan loh chuan i tan a that loh theih ang bawkin chak huna i chak loh chuan i hun tha i hloh dawn si. An hma kawng ruak huai chung sia muang em ema tlan, kan hmaa tlan laklawh si an ngeiawm thin em hi! Tlan thuak thuak chauh a pawi lo, i tlan muan viau khan midangte tan harsatna i siam thei a nia! Hringnunah i ngaihtuahna seng la, i mit meng la, speed deuh hun leh hun lo hre ngei ang che.

Hmanhmawh poh leh fimkhur a tul lehzual.

Hmanhmawh avanga motor ngat hman a tul chang a awm chawk a. A chang phei chuan thinur deuha khalh changte pawh a awm bawk a. Chutiang huna ka rilrua ka inhrilh ngut ngut thin chu ‘Fimkhur takin, fimkhur takin tih hi a ni. Kan hmanhmawh poh leh, che rup rup lo va, fimkhur a ngaihna a zual thin.

Hlawhtlin thuai thuai chakna te, hausak thuai thuai duhna te hian mi tam tak a pawt na hle. Chumi kawnga an tlan lai chuan khawhawi lo leh inngaihtuah fim lo leka hma la ta mai an awm thin. Nawm duh luata damchhung hrehawmna tura inbarh lut thalai an tam bawk. Hringnunah hian i hmanhmawh poh leh fimkhur ve rawh. Khamah i liam zuai palh ang e. Electric ban sut bur a hlauhawm.

Traffic Point-in min hrut rual vek.

Motor han khalh takah chuan mite khalh motor pawh kan lo thlek nasa lehzual a. A man tam deuh te, a pian mawi kan tihzawng te, a rawng kan duhzawng te, nalh kan tih lohzawng te, a hlui leh thar deuh te chuanpuite hnena comment zung zung a awl hle. Mahse, hei erawh hi chu a chiang – Traffic Point-ah chuan hrut rual vek kan ni. Ding tura min tih hunah din a ngai a, kal tura min tih hunah chauh kan kal thei. Tin, Traffic Point-ah hian a chang chuan tlan tlang chiah turin kan vannei a, a chang erawh chuan a ding chiahah kan tang thung. Hei hi motor khalh a ni a, hei hi hringnun a ni. Chu mai a la ni lo, chak taka tlan leh muang te a tawlh del del hi a vanduai theih ve ve tho. Fimkhur tawpa tlan pawh fimkhur lo vangin a thi thei tho.

Hringnunah hian vanneih hun leh vanduai hun hi a awm ve ve a. Tumah an vannei reng lo a, an vanduai reng bik lo. Engkima vannei fai vek an awm lo a, vannei ber anga lang pawh vanduaina ruam an nei thin. Famkim lohna khawvel a ni si a. A changin traffic pointah kan tang chiah a, a changin kan tlang chiah thin a nih kha. Vanduaina a lo thlen chuan a chhan leh vang hriat phak loh pawh a ni thei. Nupa pakhat bikea inphur chu chak lem lo taka an tlan laiin lehlam atangin Bolero pakhat hian road divider meuh dan zawh lohvin a rawn su riap mai. Nu zawk a thi nghal. Vanduai thil hrim hrim hi chu a awm a ni, hringnuna hian.

Uihawm thin mah se Insurance tih zel hi a him.

Motor han neih vea ninawm tak chu insurance hi a ni. Tul lo taka insen vak vakna thil niin a lang thin. Mahse, chhiat tawh ni chuan hlu tak a ni lawi si. Accident nikhuah chuan insurance ti tha apiang an vannei a ni mai awm e.

Hringnunah pawh hian insurance tih nachang hre lo chu mi fing tak an ni thei ngai lovang. He intlansiakna bei vek vektute chuan khaw hawi hlek lova beih mai awl tak a ni. Mihringin kan insurance chu then leh rual te, khawtlang leh kohhran, chhungkua te hi an ni. Thlarau lam nunah pawh Pathian hriatna leh rawngbawlnaa inhman te pawh hi a ni awm e. Hengte hi kan ‘life insurance’ pui ber an ni a, induhthawh lai chuan ngaihthah mai chakawm rum rum thin mah se ngaih pawimawh tlat a fin thlak thlawt a ni.  Hringnun kawng i zawh hian a pawimawh zual asin. I motor chu accident miah lovin lo hluihlawn thei mah la, hringnun chuan e….tawp hun a nei ngei ngei dawn a, a hun leh hmun lah chu i hre der si lo.

 

*****RE24012020*****