𝐒𝐀𝐊𝐇𝐀𝐖 𝐃𝐀𝐍𝐆 𝐁𝐄𝐓𝐔𝐓𝐄 𝐇𝐈

 

Hman deuha kan PM zahawm takin zan dar 9 leh minute 9-a mombati chhit theuh a rawn rawt tum khan kan lo la fuh lo nge kan la fuh lutuk zawk, kan lo hel nasa rep rep hle mai. A rawt hmasak zawk thawm neih zawmtu kan thathnem vei nen a hnuhnung zawkah kha chuan lo tih ve ngial duh awm mah se a ngamawm lo hial awm asin. Bati chhi duh lo tan torch-light, phone pawh chhit theih, mahni Pathian hnena tawngtai theih, tih thua delhkilh a ngenna pangngai mai a siam a ni chung khan Hindu sakhaw thil inburbun tumna angah kan ngai tlat a nih kha. Khami huna kan Pathian hnena tawngtai pawh kha dik kan ti lo!  Sakhaw dang lakah kan rilru a inkharkhip nasa hle tih a lang a ni.  

 

Ram khat emaw, hnam khat emaw Kristian an nih vekna hmunah chuan mahni sakhua chauh dik nia hriatna hian harsatna a thlen vak lo a. Amaherawhchu, inpawlhsawpna hmun, sakhaw hrang hrang bia an awm nukna hmunah chuan ngaihdan a dang deuh thin. He sakhaw inpawlhsawpna hi ‘religious pluralism’ a tih chu a ni a, ngaihdan chi khat sawina ‘Pluralism’ (sakhaw hrang hrang hlutna intluk tlanga ngaihna) nen ngaihpawlh loh tur a ni. India ram hi sakhaw chi hrang hrang tamna ram a nih avangin keini pawh hian hetiang lam hi kan ngaihtuah fo a tul hle a ni.

 

Sakhaw dang hmuh dan duhawm tawk lo

Kan Lalpa Isua Kristaah chauh Chhandamna a awm tih ring tlat mah ila, sakhaw dang kan thlir danah Kristian lem lo tak, Kristianten kan lo nihpui tawh thin a awm. Chu’ng zinga mi chu:

Hmuhsit. Sakhaw dang betute hi Setana hmanraw tha lo tak angin kan hmu a, nuihzatin kan hmusit chawk a ni. Hei hi a dik lo hlein a hriat theih. A betute hi kan vengte an nih miau avangin Bible thu kan zawm dawn a nih chuan kan hmusit thei lo vang. Sakhaw dang betute zingah tawi ve tak tak an awm thin. Chungte chu thur chhuaha hmuhsit tum hram emaw, sakhaw dang zuitute tih dik loh leh zirtir dan dik loh chang a, hmuh veleh lawma Chanchintha ang maia tlangaupui vak  chi a ni lo. Kristian zingah pawh chhuanawm lo tak tak kan tam em hi.

Ngaihnep. Sakhaw dangte hi ngaihnep chi an ni lo. I thenawmpa/thenawmnu-in a nun pum a hlanna kha a ni ve a. Thil nep tak an ni lo tih hria ang che. Tin, Kristianna aia sakhaw hlun zawk leh thang chak zawkte pawh an ni fo. Hinduism chuan sakhaw upa ber niin a inchhal a, philosophy pawh an nei ril khawp mai. Islam chuan sakhaw pung chak ber niin a inngai ve thung (a dik chiah em tih erawh chu kan hre lo). Muslim Jihadi hovin an sakhua avanga thih an ngamzia pawh kan hria. Ngaihnep ngawt chi zawng an ni lo ve.

Hnawl. Sakhaw dangte pum hnawl tawp mai hi kan tih tur a nih hmel lem loh bawk a. Nun dan tha tam tak an inzirtir a. Khawtlang leh midangte tan thil tha lo hlir an inzirtir bik lo tih hriat a tha. Pawng hnawl tawp mai chuan hmangaihna aiin huatna, duhsakna aiin ngaihnepna a lantir zawk a ni. Ram a la lo hle ang tih a hriat mai.

Huat. Thenkhat chuan sakhaw dangte hi an haw hlur mai a ni awm e. Sakhaw dang haw tura inzirtirna phei chu Thuthlung Thar zirtirnaah hian a awm lo hial mai thei. Huatna chuan a betute a hnawl a, chu chu Chanchintha hrilna hmanrua atan a tha ber lo a ni. Tin, huat hi Kristian sakhua nen a inhmeh bawk lo va, haw miah si lova Chanchintha hrilh hi kan zir thiam tur chi a nih a rinawm.

 

Theologican-ten engnge an sawi?

Sakhaw hrang hrang inpawlhsawp (religious pluralism) hi tunlai khawvel dinhmun a lo nih tak avangin theologian-te pawhin an ngaihtuahna an seng nasa hle a. Sawifiah dan chi hrang hrang an neih zingah: (i) Mi zawng zawng chhandam (Universalism); (ii) Sakhua zawng zawng hi chhandamna kawng an ni vek (Pluralism), (iii) Ringlo pawh mi tha chu chhandam an ni ang(Inclusivism), (iv) Dam chhunga Isua Krista ringtu chauh chhandam (Particularism/Exclusivism), te hi a lar deuh awm e.

 

Kohhran Pawl Hrang Hrang Ngaihdan

Roman Catholic te chuan Krista tlanna avangin ringlo mi thate chu chhandam ni ve tho turin an ngai tlangpui a. A chunga kan sawi inclusivism hi an kohhran official position a ni e, an ti. Lutheran ho pawh a tlangpui thuin inclusivist an ni a, mahse theologiante zingah thuthlukna tlak rualna deuh a awm mawh khawp a ni awm e. Reformed/Presbyterian ho pawhin harsatna an tawk ve tho a. PC(USA) chuan, “Kan inchiahpiahna khawvelah hian Isua hi Thutak a ni a, Pathianin amah kaltlangin nunna a pe a ni tih kan puang a. Isua chuan Thutak min kawhhmuh a ni lo va, amah kha Thutak a ni,” an ti. Tunlai khawvel atan chuan an rum khawp mai. Mahse, sakhaw danga Thlarau Thianghlimin hna a thawhzia pawh an sawi tho a. Sakhaw dangte chhandam nihna chungchangah chuan an ‘silent’ a ni deuh ber awm e. Baptist kohhrante hian a pawlpuia hemi chungchanga thuchhuah an la nei lo a ni mai thei. US-a Protestant pawl lian ber Southern Baptist Convention te khu chu conservative taka particularist a ni tih erawh chu a hriat a ni.

 

Evangelicals leh Ecumenicals

Evangelicals leh Ecumenicals ho chungchang kan sawi hian Kohhran ni lovin Mission kalpui dan inang lo deuh group hnih kan sawina mai a ni a. Evangelical chhungkuaah pawh ngaihdan inang lo deuh hlek a awm thin. Evangelical Thurin ang deuhthawa an ngaih Lausanne Covenant (1974) chuan particularism hi a puang a, Manilaa Inkhawmpui Lian 1992-a an neihah chuan an dam chhunga Isua Krista rinna lantir lote tan chhandamna kawng a inhawn leh hawn loh (inclusivism) thuah chuan, “Lungruala thuthlukna kan nei thei rih lo va. Zir chian lehzual a ngai kan ti,” an ti thung a ni.

Evangelical chhungkuaah hian pluralist awm lovah a ngaih theih a, particularist an ni tlangpuiah ngai ila, inclusivist ten hmun an chang zau sawt viau a ni mai thei. Ecumenical (WCC) lam thung chuan keini ho ngaihdana, “Ringlo chu meidil tla tur,” han tih hlawm tawp mai hi an tim thin a. WCC Mission and Evangelism thuchhuak Unity Today (2000) chuan: “Isua Krista lo chu Chhandamna kawng kawh hmuh tur kan nei lova; chutih rualin, Pathianin  chhandam tura a thiltihtheihna hi ramri kan lo kham sak thei ngawt lovang. Sawi fel theih rih loh thil pahnih a la awm” a ti. “Heng thil pahnih inkawlkalh awm tak takte hi tha kan ti ve ve a, sawifel pawh kan tum ber chuang lo,” tih thu 1998-a WCC lehkhabu chhuah Called to One Hope: The Gospel in Diverse Cultures tih chuan a sawi bawk.

 

Sakhaw dang thlir dan tur tha zawk

Khawtlanga kan nun honaah sakhaw dang kan thlir dan tur tha nia hriat theihte han sawi lang ila:

Zah. Sakhaw dangte hi zah takin kan en thiam a tha a, an phu tlangpui bawkin a lang. India ramah phei chuan Hindu sakhaw betute hi 80% lai an ni a. Kan rama (Central) a fawng chelhtute hi an ni deuh vek bawk a ni. Chuvangin, zah thiam a finthlak tih a lang. Tin, kan sawi tak ang khan sakhaw hlun tak, huap zau tak a ni bawk. Chutiang bawkin, Islam, Buddhism, Jainism, hnam sakhua leh a dang dangte pawh hi hun rei tak lo awm tawh leh miten an lo thih chilh thak thak tawh, mi tam takin an thih hnu khawvel atan thlenga lungawina an hmuhna sakhua a nih avangin zah tur an ni awm e.

Hriat. Midangte sakhua hi kan hre chiang lo hlawm hle mai. Kan pawng hnawl tawp fo thin. A pawi hle. Khawtlanga kan nun honaah te, Chanchintha kan hrilhna kawngah te awmze neia kan thawk dawn a nih chuan kan hriat chian a ngai ang. Hre chiang lova ngaihdan nei saa awm hi buaina tul lo tam tak tawhna a ni. Hre chiang lova haw tuktute hi an han hriat chian hnua an rinna meuh pawh pawmpui thui thei taktute an ni fovin ka ring. Chhandamna kawng anga kan hnawl dawn a nih pawhin hre chiang takin kan hnawl ang chu.

Ngaihhlut. Sakhaw dangte hi kan ngaihhlut thiam a pawimawh hle mai. Sawi tawh angin Kristianten kan thlir dan tam tak chu ngaihnep a ni thin. Mizoramah hian Kristian lo 13% vel an awm a, India ramah 97% vel, khawvelah 68% vel an awm bawk a. Heti chunga ngaihhlut nachang hre lo va kan ngainep a nih chuan a finthlak lo hle dawn a ni. Ngaihhlut tih hian  an zirtirna ‘pawm vek’ kan sawina a ni lo. Kan pawm loh chin pawh a awm ang, amaherawhchu, fing taka kan ngaihhlut thiam a pawimawh a ni.

Biangbiak. Hei hi tunlai tawngkamah chuan ‘dialogue’ an ti. Sakhaw dangte nena inzahtawnna, hre bik leh tha bika inngai chuang lova inbiakna a ni deuh ber mai. Inbiangbiaknaah hi chuan mahni induh bik a awm thei lo. Khawtlang nun sual do ho chungchang emaw, ram hnuk khawih pha chin policy emaw, sakhaw dangte nena kan inkar thu emaw sawiho turin hei hi a ngai thin. Fimkhur erawh chu a pawimawh khawp mai. Bible dahsang leh Chanchintha laimu thlahdul hauh lova rilru zau leh inngaitlawm taka tih chi a ni a. Midangte tumtlakna boruak nen chuan a inmil lo hle a ni.

Ngheh. Mi thenkhat thung chuan he sakhaw inpawlhsawpna hi an la run lutuk a, mahni nihna leh rinna laimu an phatsan hial thin. Nghet taka awm tur a ni ang. Chu chuan midang zah thiam te, ngaihhlut thiam te, biangbiak te a kalh lem lo. Nghet taka awm tur chuan mahni rinna leh midangte rinna hriat chian a pawimawh ber awm e.

 

Fin leh fimkhur

Mizo kohhrante chuan a chunga kan sawi Particularism/Exclusivism khi kan pawm dan tlanglawn ber a ni a, a dang chu kan ei lo viau rih a ni. Kristian history leh Bible zirtirna nen pawh a inmil berin a hriat a. A him pawh a him ber a ni. Universalism leh Pluralism te hi ngialngan tak han pawm tawp mai hi chu kan awm meuh a rinawm loh laiin Inclusivism hi chuan mi tam tak a hneh tawhin ka ring deuh. Inclusivism-ah hi chuan ringlote hnena Chanchintha hril tulna lam kan hriatna a tlahniam thei hle dawn tih a lang mai. Kan inven a tulna ruam pawh a ni mai thei. Chutih lai chuan Ram leh khawtlang dinhmun, Bible zirtirna leh Chanchintha hril pawimawhna hre rengin sakhaw dang kan hmuh danah fing leh fimkhur taka kal a pawimawh telh telh dawn a ni.

*****