APOLOGIST RAVI ZACHARIAS A CHAWL TA

 

‘Vai paah chuan ka ngaihsan ber a ni,’ ka lo tih thin Ravi Zacharias (kum 74) chu May 19, 2020 khan Lalpa hnenah a lo chawl ve leh ta a. Amah lo hretute zawng zawng thin a thawng a, kan uiin khawvel huapa rawngbawltu ropui berte zinga mi kan chan a ni tih kan chiang a ni. A la upat chhiat loh avanga  kum engemaw zah chu rawng la han bawl bawrh bawrh se kan duh em em laiin a hun a lo tawp ve ta. A pawi hle mai. A hmun ruak hnawh khah a har dawn tih a lang reng a ni.

 

Tunge Ravi Zacharias chu?

 

Mizo zingah pawh Ravi-a ngaisangtu hi kan tam hle a lo ni a. Kerela mi, Tamil Nadua piang, a pa chu Indian Civil Service, a pa pension hnua Canadaa pem a, tuna US-a inbengbelta a ni a. Ani chu khawvel pum huap thuhriltu lar, University leh zirna hmun hrang hranga mi thiamte zinga Krista Chanchin Tha au chhuahpui a, ringlote debate thin a ni a. Tunlai khawvela Kristian rinna humhim (Apologetics) tilartu pawimawh ber pakhat a ni hial awm asin. Word Publishing hotupa Kip Jordan-an tumkhat a hmelhriattirnaah chuan “1940 chhovah Kristian Rinna humhimtu CS Lewis kan nei a, chumi hnuah mi hrang Francis Schaeffer a lo chhuak leh a, chumi hnuah Ravi Zacharias hi kan nei ta a ni,” a ti. Hetah hian miten an dah sanzia a lang chiang hle a ni. Mithiam leh khawvel finnate chu su-in a thiamna tlang chhipah thu pha mah sela ‘Krista Chhandamna Chanchin Tha’ hi a thupui ber a ni reng. Krista hnena hruai thlen hi a rawngbawlnain a tum laimu leh a thuhril zawng zawngin a tum a ni.

 

Ka hriat tan dan

 

Hostela kan awm thin laiin tum khat chu test turin ka inbuatsaih a, ka thawkkhat nin tawh lamah chuan hnam dang thian pakhat roomah ka va tei lut zauh mai a. An dawhkanah chuan Ravi Zachariasa sermon cassette, a kawm pawl deuh chu a lo let bal a. Rilrua ‘Vai preacher pakhat a ni leh maw? An tam angreng ngawt mai,’ ti chungin ngaisang lem lo tak hian ka thlek vel mai mai a. Ani chuan, ‘Va ngaithla chhin la’ a tih avang chuan ka room lamah ka hawn ta a ni. Han ngaithlak meuh chuan chang dang kan a har ta hle mai a. Saptawng a thiam em em mai a lo ni a, chutih rualin sap tak tak ho anga awphawi hriat harsa a ni bawk si lo. A thuchah lah chu a hmel ena ka beisei lawk loh lam daih (mak deuh ruai tel lo) a lo nia. Thu ril tak tak a sawi laiin fiamthu lah chu a thiam em em mai bawk si a, ka atchilh deuh roh ta a ni. Khawvel finna zira hun kan hmanhlel lai khan ka nunah Ravi Zacharias hi Pathianin min rawn pe ngei niin ka hria. Chanchin Tha hlutzia min zirtir a, rinnaah min tinghet a, hriatna a tizau thlawt a ni. Internet leh Smartphone awm hma khan a thu sawi cassette zawng zawng leh a lehkhabu ziah zawng zawng neih ka tum thin kha a nia, ka ti thei ta chiah lo a ni mai thei e. Lehkhabu rotling 30 lai a buatsaih hman a, chhuah mai tura peih tawh sa a nei nual bawk. Mak ve deuh chu a thusawi thiam a larpui laiin, ‘Lehkha ziah hi nuam ka ti zawk,’ zu ti teh tlat a. A degree zawng chuan B.Th, M. Div., a ni ve mai a, Honorary Doctorate erawh 10 lai a nei thung.

 

 

Zirtirtu ropui

 

A thusawi ka ngaithlak hmasak pawl chu nupui-pasal inzawn chung chang a sawi ‘I, Isaac, Take you, Rebeccah’ te, Pathian chungchang ‘Who are you, God’ tih te, khawvel chanchina Pathian rin loh pawizia a chhutna ‘What Happened After God’s Funeral?’ leh Atheism a duh lohzia a sawina ‘Why I am Not an Atheist’ tih te ni tain ka hria. Billy Grahama pawlin khawvel Evangelist ho inkhawmpui lian an buatsaih Amsterdam ’83-ah khan kum 37 mi chauh niin ‘The Lostness of Man’ tih a sawi a, a lar phahin kei ngei pawh mi hneh ngei mai, Rawngbawlna chung chang a sawina ‘Is There Not a Cause?’ tih te, ‘Is there not a Cost?’ tih te ka bel hle a ni. ‘Dancing to a Different Drummer’ tih phei kha chu tun thlenga ka nun hruaitu pakhat a ni awm e.  A lehkhabu ziah hmasa ber, Atheism a vuak thiat nasatna, A Shattered Visage: The Real Face of Atheism, kha byheart tep khawpin ka chhiar zing a, Deliver Us From Evil kha ka tuipui em em bawk. Evangelical Christian Publishers Association ten an pek thin Christian Book Award a dawnna pahnih Can Man Live Without God leh The Logic of God te hi tha ka ti dun khawp mai.  Ravi hian Hotel Management pawh zirin chu lam hawi sumdawnna te pawh a lo ti ve zar zar tawh a. Ei siam chu nuam a ti hle a niang, “Dam chhunga kan thil tih chak kan tih theih lem loh hi a awm a ni. Kei pawh Restaurant siam hi ka la chak reng a ni,” a ti nih chu! A inan loh theih ngei mai!

 

A pianthar dan ngaihnawm

 

Chhungkaw changkang taka sei lian ni mah se, amah tak chu a ropui nghal em em bik lo hle a. Lehkha zir lam chu a taimak lohna lam tak leh cricket khelh nilen mai mai chu a buaipui zawng a ni thin a. Sikul lamah a titha ngai meuh lo a ni. A pa beisei a phak loh hle avangin ‘Engmah tak tak i ni dawn lo ve,’ tia a an khum hial hnuah, ani pawh a nun a lo beidawng leh hmalam beiseina nei ta lo chuan intihhlum tumin tur a ei ta hial a. A thih hmain an hmu hman hlauh a, an chhan hman hram a ni awm e. Damdawi In khuma che thei lo leh chau taka a awm lai chuan a nuin mi Bible pek atangin Johana 14:19, “…kei ka nun avangin nangni pawh kan nung ve ang,” tih kha a chhiarsak a. Chu thu a hriat chuan, “Hei chauh hi beiseina awmchhun, nun dan thar, nunna petu sawi anga nun,” tiin a rilruin, “Isu, hringnun awmzia hi nangmah chauh pek theih a nih chuan ka duh e. He hospital atanga dama min chhuahtir a nih phawt chuan chu thutak buaipui chuan eng pawh tih ka huam e,” tiin a lo tawngtai ta a ni. Chutia kum 17 a nih kuma a pianthar hnu chuan mak tak maiin lehkha zir te a tui ta a, nun danglam tak neiin Pathian awm ring lo (Atheist) te hnialfungte chu, ‘An va sawi ho thei si ve le!’ tiin Krista Isua chanchin hlutna a lo puangdarh ta a ni. A testimony-ah hian beidawnna khur thuk bera awmte tan pawh Pathianin thil ropui a tih theihzia hi a lang chiang a ni.

 

Thusawi thiam tawp

 

Thuhril theihna danglam tak pek bikte zinga mi a ni a. Thenkhat style chu bass leh drum anga rik deuh dum dum a nih laiin a ni chu guitarist thiam takin a lead a zut zaih zaih ang hi niin ka hre thin a. A sawi rang a, mah se a fiah em em a; a aw lian lo mah se a dam thung. A pianthar hnu, a la naupan viau laiin thalaite tan thuhril intihsiakna Asia Youth For Christ ten Hyderabad-ah khuan Youth Congress an buatsaih a. A tel tur zawk a thianpa a theih loh tak thut avangin ani an teltir ve ta a. Pakhatna a la ta hial a ni. Chumi tum chuan endiktute zinga mi rawngbawltu lar tak Sam Kamaleson chuan ‘Kan hmaah hian Pathianin a kut a nghahna a awm e,’ a ti hial a ni awm e.

 

Sapho rilru man phaa sapram behchhana rawngbawl a nih laia Indian hmel a put tho si avangin remchanna tam tak a awm bawk a. Sakhaw dang zirtirtu leh Atheist ho a debate nasa a, Evangelistic meetings a nei reng bawk. Kum 1984 khan Ravi Zacharias International Ministry (RZIM) a din a, tunah hian office ram 12 laia neiin khawvel hmun hrang hrangah an luang chhuak a ni. Kum 2000- Calcutta hmuna ‘Defending and Confirming the Gospel’ tih intawhkhawm an buatsaiha ka zu tel ve tuma ka chibai paha, “Sir, I thank God because of you…How I wish you’d come to Mizoram,” ka’n tih ve hnap leh, ani’n, ‘Oh, I’d love to…such an important state,’ tia polite mi chhan te kha ka la hre chiang hle a ni.

 

Rawngbawltu ropui…mangtha le

 

Ravi-a thupui chu ‘rilru hmang mite ring tura puih leh ringtute rilru hmang tura tanpui’ tih te, ‘Ka thinlunga ka duh hi ka rilruah awmzia a nei tur a ni,’ tih te a ni a. A thuchahah Kraws-in hmun lailum a luah a, “Krista kraws hi khawvel innghahna a ni a, kraws tel lo chuan khawvel hi a sawifiah theih lohva, a siamthat theih bawk loh,” a ti bur mai a ni. ‘Chanchin Tha in ram a lak chak lohna chhan lian ber chu a thu-a kan sawifiah theih leh theih loh lam aiin Kristianten kan nunpui zawh lohna hi a ni zawk tih hi rinhlelhna pakhat mah ka nei lo,’ a ti bawk. ‘Miin Pathian awm a rin loh chhan hi chu a finna vang a ni lo va, Pathian awm rinna tur chhan tha a a hriat loh vang pawh a ni lo va; Pathian hi awm lo se tih a duh vang hrim hrim a ni zawk,’  a ti thin. A hmuh chian em em: “Kan mutan ber chu kan fin leh fin loh, kan thiam leh thiam loh ni lovin kan thlarau pachhiatna zawk hi a ni a, chuvangin Chhandamtu kan mamawh a ni,” tih hi a zirtirna laimu ni rengin, “Khawvel sakhaw hotute chuan midang siam that an tum thin a, Isua erawh chu mitthite minunga siam tura lo kal a ni,” tih khawvel hriattir chung zelin a lei zin kawng a lo zawh chhuak ta a ni.

 

Awle, Rawngbawltu ropui…Mangtha…Nunna Petu angchhungah chuan thlamuangin chawl ang che.

 

*****RE19052020*****