𝐓𝐔𝐀𝐑𝐍𝐀 𝐊𝐀𝐑𝐀𝐇 𝐊𝐇𝐀𝐖𝐍𝐆𝐄 𝐄𝐍𝐆𝐊𝐈𝐌𝐓𝐈𝐓𝐇𝐄𝐈𝐀?

Kum 1945 chho velah khan America ramah tleirawl Evangelist pahnih Chuck Templeton leh Billy Graham an lâr chhuak rual a. Lar zawk tura ngaih Templetona chuan rinna bansanin Pathian awm a hnawl ta a, a rawngbawlna pawh a chawlhsan nghal a ni. A pawi hle. Pathian a hnawl tanna chu Life magazine kawma African nu pakhat, tam pui an tawrh lai a, a fa nausên pawm chunga beidawng taka vân lam hawi thla a hmuh atangin a ni a. Engkimtithei Pathian a nih si chuan engtin nge a thlir mai mai theih? Zawhna chhan awlsam a ni lo.

 Pathian awm an rin loh phah hial

         Kum 7 chauh a nih kuma a thih hma daiha Arunachal Pradesh CM ni thei Kalikho Pul khan Pathian awm a rin lohzia a sawi thin a; “Pathian awm se chuan ka thil tawrh tawh zawng zawng kha a phal lo vang,” a ti tlat. Nu leh pa thihsan, rethei bakberha sei lian a ni a, a hlawhtlin hma chuan hrehawmna kawng a zawh hnem hle a ni awm e. Tuarna, hrehawmna, thil tha lo, khawvela thleng reng si hi miten Pathian awm an hnawl nachhan lian ber a ni, an ti. An tanfung chu heti hian han sawi dawn ila: “Khawvelah hian Tuarna a awm. Pathian engkim tithei leh hmangaihna famkim nei a nih chuan tuarna tibo ang. Tuarna hi tihbovin a awm lo tih kan hria. Pathian chu hmangaihtu a ni lo emaw, a awm lo hrim hrim emaw a ni mai,” tiin. Mi tam tak ngaihtuahnaah chuan hmangaihtu Pathian engkim ti thei bawk si a awm chuan he khawvelah hian heti em ema tuarna nasa hi awm awm lo tak niin an ngai thin.

Theologianten sawifiah an tum

             Theologian leh Philosopher ni kawp, mi ropui hmasa St. Augustine khan tuarna chungchang hi a lo chai nasa a. A sawi dân hi Mizote pawm dan tlangpui a ni awm e. Pathianin thil engkim tha takin a siam a. Chutah chuan sual (tuarna) chu a lo lut ta a ni. Chu tuarna lo luh theih chhan pawh angel leh mihringin zalenna (freedom) kan neih hman sual vang a ni a, he khawvel tha êm êm hi tihchhiata awmin tuarna chu a lo awm ta a ni. Augustinea ngaihdan chuan tuarna reng reng hi sual rah a ni vek mai a ni. Augustinea hma daihin St. Irenaeusa pawhin zirtir dan dang a lo nei a. Ani thung chuan mihring hi tha famkima siam a ni lo va. Famkimna kawnga thang chho zel tur a ni zawk a, chumi atan chuan zalenna leh tuarna hi kan mamawh niin a sawi. Augustinea sawi dân kha chuan mihring that famkimna chu hun kal tawh (Eden) a ni a, Irenaeus-a erawh chuan famkimna chu kan than tawpah, hmalam hunah a dah thung a ni.

Tunlaia thenkhat zirtirna phei hi chu kan Pathian Thu pawm dan pangngai nen a inhlat hlawm hle awm e. “Pathian chuan Tuarna chungah tih theih engmah a nei bik lo a. Engkimtithei a nih loh avangin mihringte tuarnaah hian a tuar ve tlawk tlawk mai a ni. An harsatna atanga chhanchhuak tura tanpuiin, an duhthlanna ngeia an buaina chinfelpui chu a tum a ni a. Khuarel chu thunun thei lo mah se a tanpui thei thung a ni,” tiin. He ngaihdan hi âwm lo viauin lang mah se tuarna mawhphurhna atangin Pathian a la hrangin, a hmangaihna a sawifiah a; Pathian chu mihringte tuarna hriatpuitu a nihna a tilang a, Pathian Fapa tuarna a hmang tangkai thiam bawk a ni. Thenkhatin he ngaihdan hi tuipui mah se Pathian hi a ti-Pathian lo riau thung.

Atheist ho an chiang em?

 He khawvela tuarna a awm avanga Pathian hnawltu tam takten an hnawl chhan han bihchianin ngaihdan an vawn sa tlat a awm a. Pathian hi engkim ti thei a nih chuan thil a ti zung zung mai tura ngaihna leh Pathian hi tha a nih chuan tuarna tel lo khawvel a siam mai tura ngaihna hi a ni a. Hei hi an ngaih fuh lohna tak a ni awm e. ‘Pathianin engkim a ti thei,’ kan tih hian kalphung awm lovin a duh duh a ti zung zung thei tihna a ni lo a. A zia leh a dan kalhin engmah a ti thei bik lo. Entirnan, mihring zalen (free) a siam dawn chuan a thunun (control) vek loh chin a awm tih a chiang sa mai a ni. Chutiang bawkin ramhuaite pawhin zalenna an nei ve a nih chuan tihchhiat theih chin an nei ve pawh a ni ang. Tin, thatna leh tuarna hi thil awm kawp thei lo anga an ngai tlat hi an man fuh loh chu a ni awm e. Nu leh pa uluk taka fa enkawl mek te leh Doctor (a bik takin surgeon) te chuan thil tha zawk duhna avangin tuar hmasak a ngai fo tih an hria. Heng thu te hi Pathian awm ‘proof’ a ni hran lo va, Tuarna leh Pathian a inkalh bur lem lo tih sawina mai a ni.

            He thil aia harsa zawk mah an la hmu cheu a. ‘Pathian a awm chuan tuarna a awm thei lovang,’ ti bur lovin tuarna hleihluak lutuk leh rapthlak tak tak avang hian Pathian hi a awm lo a nih hmel zawk, an ti a ni. Thatpui awm tawk velin miin lo tuar deuh mah se thil awm tak a ni thei a. Mahse, khawvel chanchinah hian tu thatpui tura ngaih theih loh rapthlak eltiang tuarna te, vanduaina nasa ber berte hi Pathian a awm si chuan a enliam mai mai hi a mak a, a awm lo a nih hmel zawk, tiin an sawi thin. Tuarna chu engemaw atan a awm a tul a ni mai thei, mahse tuarna hleihluak tak tak (tu thatpui lem loha ngaihtheih) te hi engtinnge hmangaihtu Pathian nen kan hmer kawp tak ang? an ti a ni. Paul Draper phei chuan Pathian kaihhnawih lo hian hrilhfiah awlsam zawk feah a ngai hial a ni.

 Kristian zirtirnain engnge a sawi?

         Mi zawng zawng tana pawmnahawm takin a sawifiah vek thei tihna ni lovin Kristian Thurin pumpui atanga thlir chuan tuarna leh hrehawmna hringnuna lo awm thin te hi Pathian chatuan thiltum leh hringfate a siam chhan atanga chhutin awmze nei takin a hrilfiah theih zawk awm e. Natna leh hrehawmna tel lo khawvel neih kan chak lai hian mihring dam chhan ber chu nawmna leh hlimna ni lovin Pathian hriat a ni zawk si a. Tuarna hi Pathian kan hriat theih nana thil tul ber pakhat a ni mai thei e. Mihringte chu Pathian leh a thiltum laka hel tawh kan ni a, chu chuan kan khawvel hrim hrim hi a tichhe nasa em em a ni tih pawh hre tel ila. Pathian thiltumah chuan thih hnu piah lama Chatuan nunna a tel a. He khawvel hi Pathian khelmual awm chhun a ni lo a, chatuan ‘field’ pawh a la tel a ni tih hre bawk ila. He lui kamah hian chan fel vek tur a ni rih lo a nia. Chuvangin, Pathian hriatna hi engkim dang zawng aia tha a ni a, chu chu mi tinin kan nei thei zawk a ni.

Tuarna hi a awm ngei a. Hemi avanga Pathian hnawl ngawtin awmze thui tak a nei chuang lo a. Tuarna kan pumpelh phahin, kan tuar a nep phah chuang miah lo a. A nihna tak zawkah chuan Pathian a awm loh chuan tuarna chu tuarnaah tawpin a piah lama beisei tur engmah kan nei thei lo tihna a ni dawn a ni. A thlawnin hringfaten kan tuar mai a nih chu. Kristianna erawh chuan, engkim tunah la hre fiah vek lo mah ila, mihringte tuarna luhchilha, hneh a, chumi piah lama beiseina nung leh tak petu Pathian a chhawp chhuak a. A tawpkhawkah chuan Tuarna hian Pathian awm hi hnawl lovin, Pathian awm tulzia a tilang hlauh zawk a ni. Tuarna zawng zawng tithlawn lo a, thiltha zawka chantir theitu chu Pathian chauh a ni si a. Heng thute hi Corona Virus vanga khawvelin a tuarna nasa tak karah hian ngaihtuah tlang ila.

                                                    *****RE140520202*****