KHAWVEL A SUTNA RUAM THENKHAT

Kan nghahhleh Krismas leh Kum Thar chu a liam leh ta. Kan boruak nu but a reh fel ta bawk a, kutpui kan hman zawh tak kan hman chhan leh a awmze thuk tak kha ngaihtuahin, he khawvel leh a kalphung Kristan a rawn sut dawrh dawrhna ruam thenkhat thlir kir zawk ila a tha awm e.

Ropui lo ropuina

            Isua lo kal hma chuan ‘hnuaihnung’ tih tawngkam hi lal leh mi ropuite tana inhmeh lo leh hman ngai loh a ni a. Hnuaihnung taka chet leh lan chu mi ropui tan a inhmeh hlawl lo. Mahse Krismasa thil inkawlkalh rawn thleng ta chat, Krismas tiKrismastu ber chu ‘Pathian hnuaihnung,’ khawvel ngaihsan kawng ni miah lo, tlawmna kawng zawh duhtu Pathian kan nei ta hi a ni. Engkimtithei Pathian chu meipui emaw, thawngaleivir emaw atanga inlar lovin thingtlang nula (an veng Miss ni pha hauh lo!) chhulah a rawn insiam tan det det a nih kha. Krismasa rawn inpho lang lal kha a ropuina chu a inngaihtlawmna a ni ta tlat! Khawvel tan ropuina danglam tak a ni.

Mi ropui chu che sang deuh, induh thiam tak, ropui taka lang, midangten a rawng an bawl, mi chunga leng, mite hnehchhiah deuh tura an beisei thin laiin a ni chu ‘Min chhandam turin a inngaitlawm’ tiin kan sa thei ta a. Ropuina dik chu tlawmna hmunah, midangte tana intihhnuaihnun ngamnaah, mi hnuaihnung berte zingah a awm ta tlat a ni. He mihring rilru hian hriat fuh a va har thin em! Ropuina leh sanna, len leh challan kan hmerkawp laiin ani thung chuan thil hnuaihnung berah Ropuina chu a rawn dah ta si. Ropui kan tih hi a ropui ber lo tih min hrilh hre mawlh sela, a ropuina chu ropuina chidang a nihzia i fiah ang u.

Zei lo zawk pawimawh zawk

Mihringten a thei thei, a zei zei, a ngah ngah, a nalh nalh, a hmeltha tha kan ‘Hero’ laiin Isua kha mi hmuhsit leh hnuaichhiah, rah beh zawk lamah a tang tlat thin tih hriat a va pawimawh tak em! Khawvel chu ‘winners’ te ta a ni a, ‘losers’ ten chanvo an nei lo. Mahse ani chuan a zei lo zawk a zawng tlat thin si a. A chak zawk lama tan chu vanneihna, a thiam zawk teama tel chu kan tum, champion thin ‘fans’ kan nih laiin kan Lalpa ber chuan a tlawm zawk team a thlang tlat thin a nia!  Ui insual se a tawpa a bawhbettu zawk chu kan chawimawi thin a, Isua erawh chu a bet zawk lamah a tang thin a ni. Arpa huai insuala a chak zawk chuan a thla khawnga  hnehna hla do a chham hlerh hlerh laiin Isua chu a mei khupa in hnuaia tlanchhe lut hnenah chuan a awm thin a ni. A bet zawk lam zel hi ‘an lam’ a ni tlat. Chuvangin, mi i lo hmusit palh a ni mai thei, Isua chu i hmuhsita hnenah khan a awm tih hre reng rawh. Mi chak lo zawk chu i nuihzat a ni mai thei, Isua chu kha mi hnenah khan a awm si. Mi chhumchhe zawk te chu i ngaihthah a ni mai thei. Isua chu khatiang mite lamah khan a tang thin asin! A zei zawk i ngaihsan lai khan Isua chuan a tawi zawk kha a ngai pawimawh zawk tlat thin si a nih hi!

 

Chak zawk tlawm, tlawm zawk chak!

Zawh awm tak kan inzawh fo chu ‘Eng vangin nge Pathian hian a Fapa krawsa thih ngai kher lo a min chhandam mai loh?’ tih hi a ni. He khawvela a lo pian ve kher hi a tul em ni? Ama thu thu a nih chuan awlsam takin a tithei vek lo em ni? Chhanna pahnih awm thei chu –Pathianin sual a tenzia kan ngaihtuah chiang lo emaw, Pathian nihna man fuh loh kan nei emaw a ni thei ang. Pathian hi Engkimtithei a ni kan tih laiin a duh duh her kuala tidanglam zung zung tura beisei chi a ni bik lo a. A nihna kalhin thil a ti thei bik lo! Ama zia leh nihna mil zela a tih kha kan beisei tur zawk chu a ni a. Chuvangin mi sual ngaihdam mai chu Pathian thianghlim a nihna atanga thil theih loh a ni a, dikna Pathian a nihna atangin sualna chu hrem ngei ngei tur a ni bawk si a. Engtin nge Pathian chuan a hmangaihna kalh miah si lova sual a hrem ang? Engtin nge a Dikna kalh miah si lovin sual a ngaihdam ang? Engtin nge a thianghlimna leh a hmangaihna lan kawptir ang? Chung zawng zawng chhanna chu Isua Krawsah kan hmu rual vek a ni. Isua thihnaah chuan sual chu hrem a ni a, dikna a dingchang a, hmangaihna vawrtawp a lang a, thianghlimna chu pawlh dal miah lohvin a awm a ni.

            Isua nunah khan thlarau khawvela sual leh tha inbeihna a awm reng a, Krawsah a vawrtawp a thleng a ni. Khawvel mitah chuan krawsa khenbeh kha tlawmna nasa ber angin a lang thei ang. Huatna, thikna, chapona, nun rawnna, leh tha rum ten ro an rel a, sualin tha chu a sawp ta emaw kan tih lai khan tha zawkin sual a hnehna a lo ni daih zawk si! Sazu chuan hlim rilru taka inneitupa sarep a pehsak emaw a intih lai takin a mangkhawng kamin a delh per chawt! Rome sorkarin a lu an tihthitlin lai khan ani chuan rul lu a tithitling a nih kha! A tlawm zawkin a hneh! Sual leh a theihna zawng zawng hneh tura lo kal a ni a. Tin, chu a hnehna chu amah ringtute nuna lang chhunzawm tur a ni. Kristian hmasate kha tlem te ni mah se ‘ropui taka ngamtu kan ni’(Rom 8:37) tih kha an thupui a ni tlat a. Khawvel an su eng duai duai mai a nih kha. Vawiinah hian ‘ngamtu’ nun kan va mamawh tak em!

A din duh awmchhun

             Isua lo kal chhan zawng zawng hi sentence khat: “A rawngbawlna, a thihna, a thawhlehnaa- a kohhran din turin a ni,’(ref. Mk 10:45; Lk 19:10) a tih theih awm e. He khawvel a lo kal chhan khaikhawmna chu a taksa kohhran din a ni deuh ber awm asin. Isua khan lehkhabu a ziah kan hre lo a, sikul leh college a din kan hre lo a, chhungkua a din pawh kan hre bawk lo. A din kan hriat chhun chu kohhran a ni. A rawngbawlnain a rah chhuah mita hmuh theih chu kohhran bak a awm lo niin a lang. A din tur thu a sawi ngat chu kohhran chauh kha a ni a. Lungphum a phum awmchhun chu a kohhran lungphum kha a ni. Chu kohhran chu khawvel thim su dar tura a din chu a ni.

             Thuthlung Thar zawng zawng thu vuak thlak rawn chu Krista taksa, kohhran hi mihringa lo chang Krista rawngbawlnain a hrin chhuah a ni tih hi a ni. Chanchin Tha bu liten an tiam a, Tirhkohte Thiltihin a ruangam a lantir a, Lehkhathawnten a nihphung chipchiarin an sawi a ni. Matthaia 1:21-a ‘a mite chu an thiltih sual lakah a chhandam dawn si a,’ a tiha ‘a mite’ hi kohhran a ni. Chu chiah chu Paulan Tirhkohte 20:28-ah “…Pathian kohhranho, ama thisena a leite…,’a tih chiah kha a ni. Kohhran thlarausan tum te, Kohhran pawna chhandam nih tum tlat te, mahni chauha lo intih ‘kohhran’ tum em em mai te hi a va pawi dawn em aw! Kohhran hi mahni inhaivur leh lal hrawt na hmun emaw, mahni sual thup mawina leh a hming mai maia rawngbawlna hmun tur a ni lo tih a lang bawk!

            Heta tang hian thil tam tak a lo lang chiang ta tih kan hria. Kohhran hi mahni hmasialna hmanruaa hman ngawt chi a ni lo, a ‘serious’ em mai! Lo hmuhsit ngawt chi a ni lo, Isua thisena lei ngat a ni. Kohhrana mi rinawm nih hi hlimpui tham a ni, Isua rawn kal chhan a ni si; Kohhrana thawhrim chu lawmpui tham a ni, Krista thiltum tihhlawhtlinna kawnga tel vena a ni si; Kohhran tana chan neih theih hi a va hlu em, Pathianin a theihnghilh dawn der si lo a. A thil din duh awmchhun ni miau hek.      

 

*****RE02012020*****