LO TITLANG SE CHUAN AW

 

Vawiin October 18-ah hian North East India Christian Council ‘Day of Prayer’- Kohhranten NEICC tana kan tawngtai hona leh a rawngbawlna atana thilpek kan lak khawm ni a lo thleng leh ta a. Kum tinin he hun hi October Pathianni vawi thumnaa hman thin a ni a. Kuminah hian hripui leng avangin hman dan a danglam vek dawn a. Unit thenkhatin a theih ang anga hmang tura tualchhung kohhran a fuihte hi a lawmawm hle a ni. Thupui pawh ‘Thupek Thar(Johana 13:34,35) thlan a ni nghe nghe. Kum danga Pulpit Exchange kan tih thin hlimawm leh kan sawtpui angreng tak thin chu a tih theih dawn loh a, a uiawm ngawt mai. Pulpit Exchange-ah hian kohhran hrang hranga rawngbawltute inkalthelhin midang kohhranah thusawina hun an va hmang thin a nih kha.

Kohhran inpumkhatna

NEICC-ah hian India hmar chhak kohhran hrang hrang 35 leh para-church 17 kan thawk ho mek a. He Councila lungrual taka kan awm ho hi inpumkhatna chi khat pawimawh tak a ni tawh hrim hrim awm e. Mahni kohhran bilah han ti tak tak thin mah ila a pum huapa tihho a ngaih chin kan hre thiam a ni ngei ang. Kohhran inpumkhatna hi kawng hnihin a sawi theih a. Pakhatnaah chuan thlarau lama inpumkhatna hi a ni a. Hetah hi chuan Mizo Kristiante kan tha fu. Khawi lai kilah emaw han insu bap bap thin mah ila kohhran dangte va hmu sakhi tak hi an tlem khawp mai. A kawi herh zual lo chu kan awm lo mai thei. Kan rilruah hian sual donaa tang tlang vek kan nih hi a lian thawkhat hle a ni awm asin. A pahnihnaah chuan pawl khata awmho vekna a ni a. Chu erawh chu kan la pha lo hle thung. Mihring hi rilru danglam leh duh dan hrang theuh, sei lenna hmun danglam azira rilru pawh danglam angreng tak kan nih hlawm avangin pawl hrang hranga awm ngai pawh kan ni mai thei. Amaherawhchu, thlaraua inpumkhat hle chunga pawn lam ruangamah pawh hmun khata awm ho tluk chu a awm awm lo ve.

Pawl pakhata awm tura hmalakna a lo thui tawh hle.

Kum 1960 chhoah khan North East-a Protestant kohhranho hi kohhran pakhata lawiho duhna a lian hle a. NEICC pawh hian a lo buaipui hrep tawh a lo ni a. Thlen pawh an thleng thui khawp mai. Church of North India (CNI) zawm leh zawm loh chungchangah pawh zawm lo va ‘Church of North East India’ din an lo duh a. CNI lam pawh chuan rilru zau angreng takin an pawl zawm sa Eastern Himalayan Church Council (UCNI) leh CIPBC(Church of India, Pakistan, Burma and Ceylon) Assam Diocese te chu Church of North East India a ding dawn a nih ngai chuan an zawm an lo phal lawk nghal der bawk a ni. Faith and Order Conference tum 2 leh Church Union Conference tum hnih 1963 hnuah neiin, May 6-10, 1970 chhunga Shillonga an inkhawmpui chuan ‘Plan of Church Union and  Outline Constitution of the Church of North-East India’ an ziah pawh chu ‘on principle’ in an lo pawm thei ta hial a ni. Mahse, member kohhranteah sem nawnin May 1971 Sessiona rel fel turin an lo dah a.

Church of North-East India(CNEI)

Tichuan, ‘Plan of Church Union and Draft Constitution of the Church of North-East India’ first edition chu 1970 khan tihchhuah a lo ni tawh a. He draft hi India hmar chhak kohhran hrang hrang- Council of Baptist Churches in North-East India (CBCNEI), The Presbyterian Church of North-East India, Baptist Church of Mizo District, North Bank Baptist Association, Tripura Baptist Christian Union, Eastern Himalayan Church Council, Northern Evangelical Lutheran Church, Lakher Independent Evangelical Church, Church of India, Pakistan, Burma and Ceylon(CIPBC), Church of God, Salvation Army, Church of God(Ka Turoi Gospel), Christ National Church leh Goalpara Baptist Union- aiawhte draft-ho a ni nghe nghe. Tunah chuan kohhran hmingte pawh hi a danglam deuh nuk tawh awm e. An lo inlungrual thui hle ni tur a ni a, ngaihnawm ta ber chu heti taka kohhran inpumkhatna an lo thleng thui leh ngai pawimawh hi a ni a. Thangtharte hian kan tluk lo viau zawk awm asin!

CNEI ruangam tura an lo duan

He draft constitution hian kohhran hming turah chuan ‘Church of North-East India’ tih a thlang a. Member tur te chu ‘Pathian duh dan leh thiltum ang zela rinna avanga piang thar, Pa leh Fapa leh Thlarau Thianghlim hminga tuia baptisma chang te’ an ni. Nausen baptisma leh puitling baptisma hi a pawm ve ve a, mahse chan nawn turah an ngai lo. Minister te pawh duh dan zawk zawka baptist mai tura remruat a ni a, thenkhatin a engemaw dan kha an lo ti hreh deuh a nih pawhin, a ti thei minister dang ruai mai turah an ngai a ni. Kohhran inrelbawl danah hian episcopal(Bishop nei chi), Presbyterian (inkhawmpui rorel) leh congregational (tualchhung kohhran lalna) ang chi hi a pawm vek mai a. Rawngbawltu bik – Upa leh Deacon, Pastor leh Puithiam, Bishop te awm turah a ngai. Tuna kan hriat thiam dan nena a danglamna tak chu Bishop neih hi a ni mai awm e. Ram bial zau tawk huapin Church Council emaw, Synod emaw, Diocese emaw a awm ang a, chu chu Bishop thuhnuaia awm tur angin an lo ruahman a. Bishop chuan Council/Synod/Diocese inkhawmpuite chu a kaihruai anga mahse inkhawmpui rorelte chu a tidanglam thei lo thung ang.

Lo pass thei ta se chuan maw

He draft constitution hi lo kal tlang ta se chuan tunlai miten kohhran kan hriat dan  hi a dang daih awm si a. An sawi danin Mizoram kohhrante zingah duh lo an awm lo a ni awm e. Khawi dang kil atangin emaw pawm thei lo an awm tak avangin he draft constitution hi a zuih ral ta a, sawi zui pawh a hlawh ta vak lo a nih hmel. Han suang tuah chhin ta la, CNEI hi lo ding ni ta se, Mizo Kristian 90% dawn hi kohhran pakhatah lo awm ta mup mai ila, a pui dawn mep mepin i hre ve lo maw? Kan thil sawi leh tih neuh neuh tam tak hi chu a thleng hauh lo dawn tihna a ni a, ram leh hnam tan a tha awm asin. Chung zawng aia pawimawh chu kan Lalpa Isua Krista hi chawimawi a ni nasa lehzual tur hi a ni.