AW KRAWS!

 

He zawhna hi i inzawh chhin tawh ka ring: “Pathian chuan engkim a ti thei si a, engvangin nge kan sual ngaihdam nân a Fapa Krawsa a thihtir kher le? Ngaihdamna chu puang se ni mai alawm, Ama chung thu nei tunge awm? A thu thu a ni lawm ni?” tih hi. “Hrehawm taka Krawsa thia inchhandam kher hi a ngai em ni? Pathian chuan engkim a ti thei si a?” tiin keimahnia ‘theologian’ chuan a zawt thin a ni. Kraws hi pumpelh kan duh thin. Pumpelh a chakawm bawk a. Isuan Krawsa a thih tur thu a zirtirte a hrilh rawk a, a zirtirte zinga senior ber Petera chuan a zilhhau hial a ni tih kan hria. Kraws zawng a rapthlak em a, pumpelh theih chuan kal tlang loh kan duh ngawih ngawih a ni.

Kraws atang khan lo chhuk rawh

Krawsah hian thil pahnih kan hmu - Ringtute tana Krista Isua tuarna leh ringtute khenbeh telna te. Kan tana thihna hi a ropui, misual tana a tuarna hi pawm a nuam. Mahse, chu Kraws chu ringtute inkhenbehna hmun a ni tih erawh chu hmaih a awl viau si a nih hi. Kan Lalpan kan tana a zawh chhuah tawh avangin chu kawng chu kan zawh ve a ngai tawh lovah kan ngai a. Chutiang chu a ni hauh si lo. Chu kawngah ngei chuan kan kal ve theih nan Krawsah a tuar a nih zawk kha. Krista chu chatuan hremna kan pumpelh theih nân a thi ngei e, mahse Kraws kan pumpelh nan a ni hauh lo. Chawimawia kan awm ve theih nân a nun a hlan, khenbeh kan pumpelh theih nân a ni lem lo. “Mi tupawhin mi zui a duh chuan nî tin a Kraws puin mi zui rawh se,”(Mt 16:24). Ringtu tan chuan Krista Kraws chu kum 2000 hmalama kan aiawha Krista thihna hmun a ni mai lo. Ni tina thihna hmun a la ni reng.

Sir khat hmuh fiah a tawk lo

Pastor pakhat hian a tia lawm: “Facebook-ah Kraws awmzia sawi diat diatna tur kha a awm a, tuman thih thlenga tuar ngawih ngawihna angin an sawi miah lo, a mak a ni,” a ti. Mipui hian kraws kan thleng em? Rawngbawltu ten kan nun leh kan thuhril pawh hi kan ennawn a ngai tawh em le? Kan miten Kraws awmzia an theihnghilh dawn a ni lo maw? Kraws chu kan tana thil thleng, Kristan a tuarna thil ang chauha kan ngaiha, keimahni tuar ve tur leh kan kalkawng tur a nihzia kan hmuhfiah loh chuan a dik kim dawn lo va, a dik kim lo mai ni lovin, Kristian nun awmzia dik tak kan chân dawn a ni reng mai. Kristian nih hlutzia kan hriat a, chhandamna thatzia kan hre chiang dawn a nih chuan hlimna leh lawmna lam chauh buaipui lova Kraws nihna tak kan pawh a ngai. Kraws hi Lalpan min tuarsakna hmun a nihzia kan hriat hmain keimahni vang chiah a ni tih kan chian a ngai a ni. Sir khat hmuh fiah a tawk lo va, a hmai hnih entawn loh chu a kim lo chhiava a ni.

Krawsin kraws min pe

“Kei erawh chuan kan Lalpa Isua Krista kraws lo chu ka chhuan loh turzia mai chu, chu mi zarah chuan khawvel hi ka tân khenbehin a awm ta, kei pawh khawvel tan khenbehin ka awm a ni.” (Gal. 6:14). Krawsah chuan khawvel chu keima tan a che thei tawh lo va, keipawh khawvel lamah ka che thei tawh bik lo. Chu tak chu Kraws nun, Kraws thiltihtheihna, Kraws awmze dik chu a ni. Krawsa Lal Isua thihna avanga kan neih chu a ni a. Isua Kraws chuan kan thihna tur Kraws min pe ta a ni. Mihring rilru chu Kraws pehhel rilru a ni a, mihring thiltum chu Kraws pumpelh a ni. Puithiam lalte leh lehkhaziaktute, Isua Krawsa inkhaikang entute nen kan danglamna a tam lo hlawm viau awm e, “Kraws atang khân rawn chhuk la, kan ring ang che,”(Mt 27:42) kan ti thin. Krawsa khenbeh vûng mai Krista kha rin harsa kan ti. A awm e. A rapthlak em bawk a ni. Tlang chunga thusawitu Krista kha kan duh a, tidamtu Krista kha ka ngaina, uain tipungtu Krista kha kan lawm a, mipui 5000 hrâitu Krista kha ropui kan ti ber. Mahse khenbeh Krista chungchangah chuan, ‘rawn chhuk phawt se, kan ring ang,’ kan ti fo a nih ber hi.

A rawn chhuk dawn lo!

Mahse lei leh vân lal chu a rawn chhuk si lo. Kraws atangin ro a rel a la ngai tlat. A nihna dik tak chu Kraws lerah a chiang ber. Hetah hian chhandamna, tlanna a thawk chhuak. Hetah hian ‘A kin ta,’ a ti. Hetah hian a ni mi zawng zawng tan a thih a, mi zawng zawng tan a tuar a, khawvel thar a hawn tak ni! He Kraws tihbaiawm atang hian a chhuk lovang. Mihring tan chuan rapthlak teh mah se, he Kraws atang lo hi chuan Kristian thuruk hlimawm leh lungawina hi chan theih a ni lo va, Krawsa Krista nena inkhengbet lo tân chuan, eng ang fakauvin iak iak mah ila, Pathian nena inpawlna nun duhawm tak leh ropuizia chu pawh theih a ni lo. Tawngkam mawi berin puang chhuak mah ila a duplicate a ni tho tho. Kraws chu Kristiante ropuina hmun, Kristiante power awmna hmun a ni tlat. He hmunah lo hi chuan a fiah zo lo a ni tawp mai.

Kraws i ngaina tak tak em?

Krista chu nangmah aia Krawsa thi turin i duh tak tak em? Ka duh tak tak dawn em ni? Kraws atanga rawn chhuk turin kan duh zawk lo maw? Ka tana Krawsa a thih dawn chuan ka ba hnem dawn em asin. Thuhriltu pakhat chuan, Kraws awmzia hrechiangtu chu theologian a ni lo, hre chiang bertu chu mi sual a ni. Mi sual, sualna pawm, a sualna avanga sual nei lovin a tuar tih hrethiamtu chauhvin chu Kraws awmzia chu a hre thin. I sualzia chu Krawsah a lang a nia. Lei leh van lal ber, Pathian nung fapa chu an khenbeh reng saw. Chuti taka ka sual chu pawi leh rapthlak a nih si chuan ka va ba hnem em em ti raw. Ka nun pumpui hian ka rul zo lo. Ka neih zawng zawng hian a rul seng lo. Chuvangin ‘Khenbeh Krista chu a tha lo ve, khenbeh loh Krista ka duh zawk’ tih a va awl em! Kraws tel lovin min tlan se, kraws tel lovin chhandamna chan theih ni se aw! Ka aia khenbeha laka ka bat hi tlem deuh se maw!

Sual chungchang a ni a sin

Krista chuan sual a huat êm avangin a rawn thihchilh thak a, sual sutchhiat nân Kraws thirkhen chu ama taksa ngeiah a rawn hmang a, thih thlengin a pawmchilh a ni. Chutiang khawpa sual hua Pathian chu i duh dawn em ni? Sual nawmna chen tum reng tan Khenbeh Krista hi a duh theih loh, ‘rawn chhuk la, kan ring ang che,’ an ti mai a ni. Ka sualin Krista a khengbet a, a thih phah hial a, heti khawpin a duh lo a ni, tih hi pawm har tak a ni. Isua hi Kraws atanga lo chhuk turin kan duh thin. A awm thlawt e. Kraws chu a rapthlak em mai. Kraws chu – ‘mahni inphatna,’ ‘chânna,’ ‘nat ngawih ngawihna,’ ‘sual tihchhiatna,’ ‘tlawmna,’ ‘hmuhsitawmna,’ hmun a ni si a. A tawi zawngin, Kraws chu na tak tuara sual sutchhiatna a ni. Chu chu mihringin a duh loh zawng tak a ni. Mahse, Pathian khawngaihna changtute erawh chuan duhawm lo ber chu duhawm berin an hmu ta tlat si a ni.

Khawngaihna tak

Khawngaihna avanga Chhandamna kan sawi hian ‘Kristan krawsah a tuarsak tawh che, a thawhsak vek tawh che, chu chu ring mai rawh,’ kan ti a ni mai lova. ‘Khawngaihna chuan mihring chaknain a tih rual loh Kraws put theihna chu Kristaah a pe che,’ kan tihna a ni. Krista ring lo chuan Kraws chu a pu ve ngai lovang tih a chiang. Khenbeh Krista rin awmzia chu ‘ka tan khenbehin a awm’ tih ni mai lovin, ‘Kei pawh amahah khenbehin ka awm tel ve’ tih pawmna hi a ni. Krista chu Krawsah misualte tana a thih khan, ka tan ka tih theih rual loh (sual ngaihdamna) chu a ti ta, ni mai lovin; chhandama ka awm theih nân mahni inphata, mahni nawmna tur laka thih thlenga tuara Kraws pu tur ka nih min entir a ni. Krawsah chuan Krista Isuan,

Heti khawp hian i sual asin, a ti a

Heti khawp hian ka hmangaih che asin, a ti bawk.

Heti khawp hian sual ka hua asin, a ti a

Heti khawp hian i huat ve a ngai asin, a ti bawk.

Heti hian sual ka hneh asin, a ti a

Heti hian i hneh ve thei asin, a ti bawk.

Heti tak hian a harsa asin, a ti a

Heti taka harsa hi a theih asin, a ti bawk.