𝐙𝐀𝐁𝐈 𝟐𝟏-𝐍𝐀 𝐊𝐇𝐀𝐖𝐕𝐄𝐋𝐀𝐇 𝐊𝐑𝐈𝐒𝐓𝐈𝐀𝐍𝐓𝐄

Mizo Kristiante hi mahni induh tawk angreng tak, kan kawtkai bâk chu hmu thiam mumal lo, inhmu lian leh thil ti thei taka inngai kan nih dan a awm a. Kan Kristianna kalphung leh Chanchin Ṭha hril dan te phei hi chu kan duhtawk hlerh hlerh hlein a lang ṭhin. Hnam dang zingah phei chuan ‘Mizo Christianity’ hi kan chhuang hle a ni. A nihna takah chuan chhuan tlak kan nih chhan hi tam tak a awm tlat tih hai rual a ni lo. Chutih rualin panna ruam zau thawkhat tak kan nei a ni tih hriaa kan insiam ṭhat zel a pawimawh ngei ang.

 

Khawvel hi danglam reng a nih avangin keini pawh kan danglam zel a. Khawvel boruak chuan min nêk renga, a inher rualin min zial tel zel bawk tih kan hriat a va ṭul em. Mi tin rilru leh nunphung tlem tlemin a danglam hret hret a, khawtlang pawh a danglam lo thei lo. Chutih rualin rawngbawlna pawh a inher rem a ṭul ṭhin a ni. Kan buh chi kan hre chiang ang thovin kan thehna tur hmun pawh hriat chian a ngai ang.  Chuvangin  tun kum zabi thara khawvel dinhmun min tuam mêktu boruak hi kan theih angin i han thlir teh ang u.

 

1. New Atheism leh a sawhkhawk. 

Kum 2001 September 11-a Muslim firfiak hovin World Trade Center thlawhna hijack-a an sut chhiat vek aṭang khan sakhaw thil hmuh tleuna a rawn lian thar em em a. ‘Pathian hi thil awm lo, mawl lai thurin, inhuatna atan phei chuan hman miah loh tur’ tia ṭhahnemngai taka sawitu an lo tam ta. Richard Dawkins, Sam Harris, Christopher Hitchens, Daniel Denneth te hi a lar pawl an ni. Ṭhangthar tam tak an hneh tih a hriat a, movement angin a kal hial a ni. Hengho hian scientific worldview an chawilar a, Pathian tel lova ṭhat leh hlim theih a nihzia (Pathian ringtuho hi sual zawka puh hial) te, Kohhran ngaihnepna te leh Sakhaw  Lehkhabua (Bible, Quran, etc.) a thuziakte awihawm lohzia leh puithuna atthlak thil a tamzia an sawi nasa hle. Ṭhangthar lehkhathiam an thuziak chhiar phak mi tam tak an hip a, an hip a nih loh pawhin an tibuai a ni.

Kum 2000 AD hnu lama puitlin hun rawn hmang ṭan, 1980 hnu lama piang te kha ‘Millennials’ tia sawi bik an ni a. An nunphung leh rilru sukthlek pawh X-Generation an tih 1960 chho-a piang te nen khan a danglam viau a ni awm e (Millennials ho hi Y-Generation an ti bawk). Information leh Communication ṭhat zual tak tak tawh hnu, Computer Age-a awm tawh an ni a. Sakhaw lam pawh a ‘affect’ lo thei lo a ni. X-Generation-ho ang lo takin mahni inah an awm tam a, lehkha zir an uar a College rap pha pawh an tam zawk daih an ti. Hnam leh sakhaw thilah an ûte aiin an zau zawk daih a, midangte an pawm theihna a sang. Sakhaw lamah erawh chuan an tlahniam hle thung a. Atheist an tam a, thlarau khawvel a awm ring lo an pung a, hmuh theih piah lam khawvel awm ringho zingah pawh Kristianna hlut bikna hria hi an tlem telh telh a ni.

Hetiang dinhmun aṭang hian Mizote pawh kan him chuang lo a. Social media-a sawihona chi hrang hrang chhiarin tun hma deuha miten ‘Pathian’, ‘Kohhran’, ‘Bible’ leh ‘Sakhua’ an ngaih ang ngawt chuan mi tam takin an ngai tawh lo tih a chiang hle mai. Mithiam tam takin New Atheism an chhanna te a rawn chhuak ve zel a, an boruak pawh a dai zel dawna ngaih theih a ni ang. Pathian awm ngei zia te phei chu an sawi bo zo miah lo vang. Amaherawhchu, he thilin a hnutchhiah tur chu- Bible thuneihna cho(challenge) te, kohhran zia hmuh fiah tawk loh te, sakhaw dang thurin pawmpui chin neih te, Kristian sakhua hlut bikna hmuh thiam tak loh te, Pathian sawi tel kher lova hringnun hmang nuam leh hmang ṭha theia inngaihna te, a ni dawn a ni.

 

2. Christian Ethics. 

Kohhran thuneihna te, Bible thuneihna kan pawm dan te a danglam hret hret dawn a ni a. Chu chuan ngaihdan inang lo a hrin hmasak tur chu Chhandamna chungchang emaw, Kristian thurin pangngaiah emaw ni lovin Christian Ethics lamah a nih thung a rinawm. Pastor atana hmeichhe ordain leh ordain loh chungchang kan khel mek tawh hi na lehzualin kan khel chho zel ang a. Mahni intihlum (suicide) chungchang pawh hi tunah hian ngaihdan a inang lo nuai tawhin a hriat. Homosexuality (neih inang inkawp) issue hian min deng na ngawt ang. Khawvel media-in a chhanzia leh pawi ti lo tura ṭhangtharte a zirtir nasatzia leh fuih thiamzia hi hrethiam hlawm tak ang i maw? Tunlai film siam thar leh serial-ah reng reng hian mahni anpui kawp hi an awm ngei ngei tih thei zu nia! An tumah an  hlawhtling thui hle a ni ang, Gospel Camping tam takah chuan ‘hmeichhia leh hmeichhia’ emaw, ‘mipa leh mipa’ inkawp te hi counselling pek tur an awm fur tawh a ni! Zohnahthlak zinga Pastor fa pakhat meuh pawh mipa aṭanga hmeichhiaa inlet (sex-change) an awm tawhin an sawi.

Isua Kristaah chauh Chhandamna hi a awm a, chumi bakah chuan mihring tu tan pawh beisei tur a awm lo, tih te hi ṭhangthar ho zingah sawifiah a har telh telh ang. Mi thiam tam tak chu khawpuia sei lian, hnam dang kara lehkha zir puitling, uluk taka Kohhran zirtirna dawng mumal lo, thiamna lama sang viau si, te an ni zel dawn si. Ṭhenkhat in Hindu ho thila kan ngaih mai mai ‘Yoga’ te lo sawimawi chamchi pawl kan awm bawk a. Hetiang a nih mek avang hian Pathian Lehkhabu pawmdan dik leh him kan va mamawh dawn em! ‘Bible-in a sawi a ni’ tia a thuneihna kan pawm fak theih loh chuan thangtharte zawhna kan chhang thiam lo mai ang tih a hlauhawm. Bible hi Pathian Thu a nihzia kan sawifiah theih loh palh (emaw, kan sawi buai deuh a nih chuan) chhanna fumfe kan pe thei lo ang tih a hlauhawm tlat.

 

3. Thlarau nun dik tawk lo. 

Hei hi ringtu chhungkuaa thil hlauhawm tak awm thei a ni. Harhna tih te, Thlarau hnathawh tih te uar luatna hian Pathian Lehkhabu hlam chhiahna leh ngaihhlut tawk lohna a thlen thei tlat. Bible-a Thlarau Thianghlim hnathawh dik tak leh a thu uar ber ber kal kânin hlimpui tur zawn lama ramṭan daih a rah chhuak duh khawp mai. Chu hlim-phurna chuan Bible thuchah fiah tak a hliahkhuh thei tlat mai a, fimkhur a ngai takzet a ni. Bible piah lamah Pathian Thu a awm thu an khukpuiin, inlarna chi hrang hrang leh thlaraua hriatna nia an chhal te pawh kan buaipui ruai mai ṭhin a nih hi. Africa ramah te Kristian number an pun thu ngaihthlak changa kan hlim viau laiin ṭhenkhat  chuan ‘Africa ram Kristianna dil mêl khata zau inchi khata thûk’ tiin an lo sawi ve mêk bawk a. Bible thuchah ngaih pawimawh ber a nih loh palhna hmun Kristian nun chu ngaihtuah awm tak a ni ang.

Hei hi Mizo Kristianten kan tuar mek em ni ang? Harhna kan tih lo thleng ṭhin kan lawm em em te hian rah duhawm danglam a chhuah zo lo ta deuh hlawm a ni lo maw? Kan dawn zin ang hu hian kan ramah danglamna kan hmu meuh lo em ni? Kar hnih khat aia rei min chamchilh hleithei lo a ni tawh lo maw? Boruak thar zawn hrim hrimah ringtute kan ramṭang nge Thlarau Thianghlim hnathawh dik tak Bible-a inziak ang hi kan zawng? Hlim hlut leh boruak neih nata inawi tlei hi kan duhtawk lek fang em ni? Bible, Pathian Thu hi min khawrha min lepse turin kan duh tak tak em? Pathian Lehkhabu-a mi hi zawm zo si lovin ‘thu’ dang kan zawng ruai ta mai em ni dawn zawk le? Bible hi ‘Pathian Thu’ a nihna hi kan inzirtir thar a ṭul  hle tawh tih a hriat theih a ni.

 4. Khawtlang thilah.  

Kan ‘Pathian Thu’ rin hian kan ram hmelhmang leh eibar zawnna a khawih pha em? tih hi khawvelin min tehna a ni dawn a. Khawsakna tidanglam zo lo Kristianna kan pawm reng chuan miin an ngaihhlutna a hniam telh telh ang. India rama Kristian tamna state deuhte dinhmun miin an en ang a, chu kan Kristianna chuan engmah sawhkhawk nei bik lo ‘chawm hlawm’ ngai reng leh hnam hnufual anga min ngaih reng chuan kan sakhua leh kan ‘Pathian Thu’ pawmdan te chu duh ve tlak leh pawm nahawmah an ngai mawh ngawt ang. He challenge hi tunlai khawvelah a lian tak meuh a ni tih hriaa kan ṭhan harh a va pawimawh tawh tak em!

Heti hian han sawi ta ila. Mizoten Chanchin Ṭha kan dawn tirh lai kha chuan khawvela ram changkang apiang hi Kristian ram an ni vek tih theih a ni a. Kristian ram ni ve lo te chu ram hnufual an ni tlat. Keini pawhin ram changkang zawk leh hausa zawk aṭanga an rawn sawi kha chu kan bul hnaia mi rethei leh ṭhuanawp zawk te sawi ai chuan pawm a lo nuam a. Hetah tê mah ila, khawvel pum huapin kan lian tih kan hre tlat a ni. Tunah chuan khawvel dinhmun a inthlak ta daih mai. Tunhmaa Kristian ram kan tih te kha khawvel changkanna leh nawmchennain a ei zo kan ti thei ang chu, Kristian rama chhiar tlak pawh an ni tawh meuh lo a. Sakhuana an la run tawh lo a ni. United States khu la chak deuh hrâm hrâm mah se a tlahniam sawt em em bawk a.

Khawvel ram zinga thawm nei na deuh leh hmasawn chak ber chu China a ni a, chu lah chu official taka ‘Atheist’ ram (40-49% atheist) a lo ni leh zel a, a ṭhenawm Japan pawh 30-39% Pathian awm ring lo an ni. Russia ram lah Kristiana inchhiar 70% lai ni mah se Atheism hnuhma chuti maia reh thei a ni bik si lo. Russian Orthodox Kohhran member zinga mi nuai tam tak chuan Pathian awm an ring chuang lo, tiin Operation World 7^th Edition chuan a sawi a ni.

India ramah hian Hindu nationalist party-in chak takin ro an rel a. An tum ber pakhat chu Hindu sakhua ṭhat tawkzia leh ram dang sakhua India ramin a mamawh lohzia pholan a ni. Prime Minister Narendra Modi te, India ram state zinga mihring tamna ber state Uttar Pradesh Chief Minister Yogi Adityanatha te hian inpekna pumhlum nen Hindu taka ram siam ṭhat an tum mek a nih hi. An tum anga an hlawhtling a nih ngat phei chuan ṭhangtharten Kristian nih hlutna an hmu thiam lo telh telh ang a. Kan Chanchin Ṭha hril leh kan hlimpuite hian ‘weight’ an nei lo telh telh dawn a ni thei ang.

Tlangkawmna

Mizo Kristian, Lal Isua ringtu, Kohhran ṭhan zêlna tur ngaihtuah, Chanchin Ṭha hril vei leh khawtlang hmasawnna ngaihtuah mêktu tân chuan chuan buaipui tur a va tam em! Chawlh hun a awm lo va, inthlahdah theih a ni lo. Beng chhi kar leh mit meng fiah kâk chunga kan awm a ngaihzia a lang chiang awm e.

 *****

*