THLARAU MALSAWMNA TAK – SIMNA

 

Tunlai khawvelah simna dik tak a va vang ta em! Sim aiin sawi mam kan uar a. Sual kalsan aiin palzam kan ti nasa. Pathian lam en aiin mihring lamah kan inteh thin. Zakaia han tluk deuh thuak chu mi pakhat chiah ka la hria. Kan thianpa MA a zirlaiin a ni a. Matric certificate-ah a kum a lo ziak tlem chu pawi a tihnuhnawh khawp mai a. Board-ah a han kal a, a kum dik tak ziah a han dil leh ngat a ni. Ngaihsanawm tak a ni.

Sim lo tan vanramah seat an dah lo!

Simna tel lovin Chhandam a nih theih loh. Simna tel lovin Vanramah hmun i chang lovang. Beisei duh ting suh. Pilatan a nunrawn chhuaha Galili mi thenkhat thisen leh sa chawhpawlha inthawi nân a hlan kha a rapthlak thlawt a. A ngaihdan hriat tumin Isua hnenah an rawn sawi a ni awm e. Ani chuan Siloam in sangin mi 18 a delh hlum takte chungchang sawi kaiin, “An vanduai….Pathian rem ruat a ni e…kan hre thiam phak lo,” keini anga ti nem duai lo hian, “…In sim loh chuan nangni pawh chutiang bawkin in boral ve ang,” a ti hmiah mai a ni(Luka 13:1-5). Mi sual bika rin chi an ni lo, mi sual vek kan ni. Sim loh hi boralna, kan Lalpa sawi chu a ni tlat. A hlauhawm teh a nia.

Simna tel lovin sual ngaihdamna a awm lo.

Pathian chuan amah dotu mi sual chu ngaihdam a inpeih reng. Eng anga sual tenawm leh huatthlala pawh ni se, Krista hminga Pa hnena a tlukluh phawt chuan ngaihdam a ni ngei ngei ang.  Lalpa Isua Krista chuan a lo lainat ang a, a lo ngaihnathiam ang a, a lo chhawk ang a, a lo sil ang a, a lo tithianghlim ang a, vanrama dah tlakin a lo siam ang. Mahse, chutiang a nih theihna turin mi sual chuan a sual a ten a, a duh lohva, ngaihdamna a duh ve a ngai a ni. Thiam chantir zawng zawng chu inchhira sim an ni zel.

Simna tel lova hlimna chu hlimna suak a ni.

Sual simna nun tel lo leh kuah ru reng chungin Pathiana hlimna leh lawmna, lungawina tak tak a neih theih loh a. Tunlai khawvelah mahni leh mahni inbum kan tam viau awm asin! Mi hlim lai chuan a hlim theih, a phur ve viau theih, rawngbawlna eng emaw pawh kan lo chelh a ni thei. Mahse, Thlaraua hlimna leh lawmna, lungawina tak hi a neih theih loh a ni. Mihringa awm chhia leh tha hriatna rem loh thil i nuna a bet tlat a nih chuan Krista pek malsawmna chu i chang ngai lovang. Chang emaw i inti a nih pawhin a der mai a ni i chan. Chu khawngaihna hlimna chu simna nun nen a kal dun si a. Thlarau Thianghlim hnathawhin Simna a zuankhahlen ngai lo.

Kawng nuam ber

Mi tam tak tan chuan simna hi phurrit ni lova, kawng hlimawm tak a nih zawk tlat hi thil mak a ni. Zu nghei harsat ve tak pakhat chuan he nun hi a chang ve ta a. “I chhungte an lawm awm mang e aw,” a bula ka han tih chuan, “An lawm ngawt ang. Mahse kei ka lawm ber,” tiin min chhang. A simtu a lawm ber thin a ni. Sual sim hi a harsat chin awm mah se tih theih a ni a, Pathian tanpuina avangin mi tam tak nunah a lang tawh a, a lang mek zel a ni. A then chuan an sual buru tak an sim nghal mai a, thenkhat thung chu Thlarauvin a hriattir ang zelin simna kawngah an kal. A pawimawh ber chu Krista avanga sual kalsan zel hi a ni. Sual thiltihtheihna leh tihhreawmna laka fihlim zel hi Kristian nun tinuamtu a ni.

Simna thatzia

Simna dik takin rah a chhuah hi a tha em a, he thu hi hril loh chi a ni lo. Simna kaltlangin Pathian Ram mi kan lo ni ta a. Pathian Ram chu vawiin leh nakin thil a ni a. Simna dika simtute chu, chu Ramah chuan an lut ta a, a ram mi nihna dik tak an nei ve tawh a ni. Vawiina Pathian Ram memberte chauh nakina Vanram member an ni dawn si a. Simna avang chuan Pathian thutak kan hrethiam ve ta bawk. II Timothea 2:25-ah, “…thutak hre turin Pathianin an rilru a lamlettir(sim) mai thei a ni…” a ti. Pathian thutak hre thiam tak tak tur chuan sim hmasak a ngai a nih chu. Sual ngaihdamna kan chang. Simna leh ngaihdamna hi a inzawm reng a. Tirhkohte Thiltih 2:38-ah, “Sim ula, in sualte ngaihdam nân Isua Krista hmingin baptisma chang theuh rawh u; tichuan, he thil pek, Thlarau Thianghlim hi in dawng ang,” tih kan hmu. Simna avangin harhtharna hun a lo thleng thin (Tirh. 3:20).

Vana mite lawmna awmchhun

Mihring thiltih avanga vana mite an lawm em em hi a vang khawp mai. Bible record awm chhun chu Luka15-ah vana mite leh vana vantirhkohte lawmna chu mi sual pakhat sim chungah a nih thu Isuan a sawi. He thuah hian kan chian a pawimawh a ni. I sual i sim khan an lo haw haw hluah hluah a, kut an lo beng dur dur a ni awm e. Kan ngaihhlut thil hrang hrangah hian van lam khi an lawm leh lawm loh sawi a ni lo. Taksa malsawmna kan dawn te, kan hlim viau te hian an lawm thu kan hre chuang lo. Camp chhuak kan hot viau hian lawm tih thu sawi a awm lo, kan zai tui viau hian an lawm tih a awm lo. ‘Crusade an nei a, i lawm ang u’ an tih kan hre lo. Amaherawhchu, mi sualin a sim meuh erawh hi chuan an lo lawm hle thin a ni. A chhan chu, thlarau nuna awmze nei tak tak chu he simna chauh hi a ni tih an lo hre chiang a. Simna tel lo chuan van mite leh vantirhkohte hian an awmna van ramah min hmu ve dawn lo tih an chiang em a ni.

Simna Model

Chhiahkhawntu Zakaia, mi sual, eiruk hmang hnenah Isua a lawi lut tlat mai. Juda mi zawng zawngin an thinhrik a, an ensan a ni a. Felna Lalpa chu a inah a lut tlat si. Zanriah a ei dawn. Isua a hnenah a luh meuh chuan Zakaia a inhmu chhuak. A sim chiang hle a ni. “Ka sum zat ve pachhiate hnenah ka pe ang; tin, tu lakah pawh thil engpawh lo hlepru ila,  a leh liin ka rul leh ang,” a ti. A sim hneh hle. Hei hi simna chu a ni. Sual leh a rah duh tawh lohna hi. Sual nun hnawlna, sual kalsan hi.

Chhandamna Thupuan

Hemi zana Lal Isua thupuan chhuah ropui tak, ‘Isua Chhandamna Declaration’ chu Zakaia simna thu puan hnuah chiah a lo thleng a ni a: “Vawiinah he inah hian chhandamna a lo thleng ta, ani pawh Abrahama fapa a ni si a.” Isuan zanriah a kilpui avang ringawt khan Chhandamna a thleng lo. “Ka rawn kilpui che chuan Chhandamin i awm a ni mai,” a ti lem lo. Zakaian a sual sim thu a puan chiah khan Chhandamna thu chu puan a ni ta a nih kha. He khawngaihna ropui avanga Chhandamna chang kan sawi theih chu Simna thu puangtute chauh hi an ni e.

*****RE24042020*****