HRINGNUN DAMDAWI

Tunlai khawvel vir chak lutuk leh changkanna kan tihin a hrin nia sawi theih duhawm lo tak chu rilru lam natna tam ta lutuk hi a ni a. Thil chi hrang hrang tam ta lutuk leh rual elna tha lo phur zawh loh avangin vanduaina a va thleng hnem tawh tak em! ‘Depression’ tih te kan tawng ang maiin kan hre tlanglawn tawh a. Mi hlawhtling nia kan hriat leh awhawm kan tih te pawh hi an beidawng bang bik lo. Hmanni lawk khan vai film star pakhat chuan ama nunna a lo la der mai! Arunachal Pradesh CM thin Kalikho Pul lo inawkhlum ringawt te kha mak tiin ka ngaihtuah rauh rauh thin. Khawvel tehfung atang chuan mi hlawhtling tawp a ni a. Kum 47 a nih hmain CM ni thei a nih laiin a hringnunin awmzia neiin a hre lo a ni ang. Pathian awm a ring lo. He khawvelah hian a khawvel a tawp a ni.

 

Chu damdawi chu khawnge?

 

Mihringin kan hmuh leh kan khawih theih chin chauh hi thil awm a nih chuan hringnun hi a chhumbung em em a, awmzia a nei tlem hle a ni. Kan nih ang ang hi kan nihna chu a ni mai dawn a ni. A ho dawn em mai. Pathian awm rin lohna (Atheism) thu ken tel pawi tak chu hei hi a ni. Pathian a awm lo a nih chuan mihring hian hlutna kan nei lo. Atheism hian mihring hi a dah sang emaw an ti a, a dah hniam thlawt tih hriat a tha. Atheist ho sawi hi dik ta se, an ni ngei pawh rawn tlak an ni ang em aw? An thusawite hi awih ngam an ni dawn em ni? Engmah lo atanga lo zi chhuak ringawt a lo ni ang a, rilru pawh hi thisen zam kal vel mai mai a ni dawn si. Kan thluak pawh lungtum nena a  danglamna chu a pian hmang chiah chauh hi a ni ang. Hringnun pawh hian awmzia a nei dawn lo. A awmzia sang ber chu Existentialist ho sawi angin ‘A awmzia keimahnin kan pek apiang,’ a ni mai dawn a ni.

 

Chutiang thil ringawtah chuan mihring hi a lungawi zo ngai lo a. Kan ‘rilru pianphung’(psychical make-up) hian a tlin lo niin a lang. A tirah fuh awm takin lang mah se a tawpah a heng tho tho thin. Hei hi hringnun makna pakhat niin ka hria. Kan tleirawl chhuah lai ve chuan damdawi ruih theih zingah Phensydil kha a lar khawp a. Kan thianpain a han rui tak tak chu ‘A nuam lutuk hi ka ning a ni,’ te a ti hial nia! Heti ringawt hi chuan ‘ninna’ kan thleng mai thin a nih hi. A chhan chu keimahni chin chauhah hi chuan kan lungawi zo lo a ni. Catholic Philosopher lar Peter Kreeft chuan, “Hmanlai chuan ‘thihna’ an hlau ber a, hun laihawl (mediaeval) hunah chuan ‘Hremhmun’ an hlau leh a, tunlai khawvelah chuan ‘nun awmze nei lo’ hi an hlau ber a ni,” a ti. Hei hi mi tam zawkah a dik a rinawm. Atheism tih angreng hi chuan hringnun awmzia hi a pe lo vang vang hlein ka hria.

 

Spiritualism ringawt a tawk lo

 

Thenkhat chuan Pathian thleng lovin ‘Spirituality’ ah an inhnem a. Kan hmuh theih khawvel chauh hi chu a tawk lo tih an hria, mahse ‘Pathian Thu’ an awih chuan chan hnem dawn lutukin an inhre si a, spiritualism-ah an tuan ta a. Chutiang chu ‘nun danglamna’(moral life) tel lova ‘thlarau’ hlawkna neih tumna a ni a. Tha lo tak a ni. Hinduism zirtirna thenkhat hian hetiang hi a promote hle awm e. Yoga te hi chutiang chi khat chu a ni a. Meditation kaltlanga Pathiana inchhun luh tumna a ni a. Thlarau khawvel i pawh ang a, i nihna zawng zawng kha a ral vek ang. Thlarau lipui (Universal Consciousness)-ah chuan i mimal nihna ‘far khat’ kha a far keuh ang a, i nihna kha a ral vek dawn a ni, an ti a ni ber. Atheism ang thovin he thil hi chuan ‘mihring, mimal’ hlutna leh zahawmna hi promote lo chiang hle mai. Awmze awm lohna hmunah tho min hruai luh a tum niin ka hria. Atheism te, Spiritualism te hian mihring hlutna tibovin, a tak ram min hmaih tir a, a suak (duplicate) hmel mawi angreng tak min zawrh thin a nih hi.

 

Mizo Kristiante zingah pawh hian Spiritualism-a inhnang fak ta mai mai hi kan tamin a hriat theih a ni. Mi tam tak hi chuan thuawihna nun kan zawh loh avang hian thildang tha ve awm thova langah intihlungawi chawp kan tum a. Chan san ngaihsanna ramah kan lut a, intihthlarauna sualah kan cham mek a ni awm e. Chu chuan thlarau thil min hmuh thelh tir a, ngaihsan tur dik min ngaihsan tir lo va, a tak pawh lovin a penhlehah min tuitir fo a nih hi. Thuawihna leh felna te chu kan thlarau nun tehfung ber atan kan hmang hleithei tawh lo a. Sawi ‘tak’ aiin a sawi ‘nung’ (kan duhzawnga sawi thiam) kan zawng a; mi fel ziktluak aiin mi sual dam leh ten hmu fuh zawkin kan hre tlat a; mahni hnaa rinawm taka bei fat fat ai chuan rawngbawlna chhuanlama office tlanchhiatsan zar zartu chu kan ngaisang zawk thei tlat zu nia.

 

Hei hi a pawimawh ber

 

Pathian min kohna hmuna awm leh chuta rinawm taka din hi kan rilru leh thlarau hriselna atan a pawimawhzia a lang zual zel dawn. Chu hmun chu kan tana pawimawh ber leh hlu ber a nih avangin mi ngaihah hniamte pawh ni se chatuan hawlh tlang phaka hlu a ni si a. Hetah hi chuan mahni hna zahpui emaw, lungawi lo taka thawh emaw a awm thei lo vang. Martin Luther King Jr. khan: “Tual hmun phiat faitu atana koh chuan Michelangeloa lemziak anga nalh leh, Beethovena rimawi anga mawi leh Shakespearea poetry anga mawiin tual hmun chu a phiat fai mai tur a ni. Tual hmun a phiah fai em avanga van mipuiten ‘hetah hian tualhmun phiattu tha a awm e’ an tih theihna tur khawpin a phiat fai tur a ni,” a ti. Hna lian leh hlawh tam deuh te chu a awm zel ang a, mi zawng zawngin kan thawh theuh theih lohzia pawh a chiang zel ang. Mahse tam tak pek chu tam tak phut a ni bawk tih pawh a awm kha maw. Kan phak tawk leh phu tawka rinawm tlat hi a kotu lama kan nih dan tur ber a ni e.

 

Kristian thuruk a dik ber lo maw

 

Czech Republic President lar tak leh Philosopher ni bawk Vaclav Havel chuan, jail bang zuta ngaihtuahna a sawr bing tak tak hnuah, “mihring nihna tichiangtu ber chu mawhphurhna kan nei tlat hi a ni,” a ti chhuak ta a nih kha. Jail run thima a tan laiin rinna chungchangte, hringnun awmzia, sakhaw atchilhna leh political power chungchang thuk tak tak a ngaihtuah a, “Tu pawh hian eng dang zawng aiin keimahni, ‘Ka’ hi kan ngai pawimawh ber…A tawpkhawka ‘Ka’ hi kan neihchhun a ni bawk…mahse, mihring maktaduai tam tak zingah hian engtinnge ‘Kei’ tehlul hian hlutna leh tangkaina ka neih ve le?” tih zawhna hi chhan a tum a.

 

A ngaihtuah chhuah tak chu, “...mihring thuruk chu mawhphurhna a nei hi a ni,” tih hi a ni. Tumah hi famkima lo piang kan awm lo…tumah hi mahni finna leh chakna hmanga mahni leh mahni intilian thei kan awm miah bawk lo…Keimahni pawn lam thil kan hmachhawn dan ang zelin kan thanga kan puitling thin. Chutah chiah chuan midang emaw, khawtlang emaw, chhia leh tha hriatna emaw, kan thlahtu thisen (genes) emaw, kan hmachhawn vek a, mahse chutah chuan a tawp mai lo. Chutiang chu hote ho te zawk an ni a. Mihring kan nihna tak takah chuan khawvel piahlam thil kan hmachhawn zawk a ni,” tiin he hnam hruaitu ropui leh intellectual tling bawk hi a tawng chhuak ta a ni.

 

Havela chuan, ‘Kan mawhphurhna theuh hi kan nihna leh kan hlutna kan kher chhuahna chem te a ni, a ti. Hringnun chu keimah ‘Ka’ leh min en rengtu ‘Thlirtu’ inkar thil a ni a. Chu thlirtu chu engkimtithei, khawi kipa awm, thuneihna pumhmawmtu ang a ni. “Thlirtu chu a chatuan thil ruih mai a, keimah pawh chatuan miah min siam hial a ni,” a ti. Havel Vaclav-a chuan, tu lakah nge, eng lakah nge chu mawhphurhna chu ka neih? Ka mihring nihna tihlutu chu? Pathian a ni mai em?’ tiin a lehkhabu Letters to Olga chu a ti tawp a ni. “Ka mihring nihna chu ka mawhphurhna chuan a tichiang ngei a; mahse mihring ka nih vanga mawhphurhna nei ni lovin, mawhphurhna chuan mihring nihna min pe zawk a ni,” a ti ta deuh deuh. A sawi awmzia chu: mihring tihlutu chu ama pawnlam thil a ni a, hlawhtlinna tak leh nun awmze nei chu keimahni pawnlam ami nena kan inkar thil a ni, tihna a ni awm e.

 

Damdawi tak chu

 

Havel Vaclav-a thu leh hla hi a pawimawh hle mai. Mihring nih hlutna chhan chu mihring pawn lama awm a nihzia a sawi chiang a. Ringtute tan phei chuan kan nun pumpui hi Pathian atang chauhvin awmzia leh hlutna a neihzia a tichiang hle a ni. Pathianin min kohna theuh a pawimawhzia a tilang bawk. Kohna hian tunlai miten hriat an tum ber mihring nihna leh hringnun awmzia a sawi fiah em em a. Pathian min kohna hmun leh rinawm taka a kohna kan chhannaah chauh chuan lungawina tak leh awmze tak tak neihna kan nei a ni si a.

 

 

 

*****RE03072020*****