𝐒𝐀𝐊𝐇𝐀𝐖 𝐙𝐀𝐋𝐄𝐍𝐍𝐀 𝐀 𝐊𝐈𝐀𝐌 𝐙𝐄𝐋 𝐄𝐌?

 

Mahni awmna hmun atanga khawvel thil thleng mek zu hriat chian viau hi thil har tak a ni a. Zirbingna (research) chhuak lo phei chu rin ngam tak tak a ni duh lo viau mai lehnghal a. Amaherawhchu, data lakhawm a, zir chiang thei an lo awm zel hi a vanneihthlak thin. An thil hmuh chhuah atangin kan ram leh a chhehvel dinhmun han thlir ila, ngaihtuahna thawng deuh deuh a awm nual awm e.

 

Kristian tihduhdahnain zual lam a pan zel         

America rama data lakhawmtu pawl Pew Research an tih chuan hman deuh khan khawvela sakhaw tihduhdahna tuar nasa ber chu Kristiante an ni tih hi a lo hmu chhuak daih tawh a. Ram 198 zinga 102 ah sorkar emaw, khawtlang emaw tihbuai an tuar thin a. Kum 2019-a a nasatna ber ram te chu nasat dan indawtin (1) North Korea, (2) Afghanistan, (3) Somalia, (4)Lybia, (5) Pakistan, (6) Sudan, (7) Eritrea, (8) Yeman, (9) Iran, (10) India, te an ni.Tunhnaiah China rama Kristiante tihduhdahna a zual tlat khi thin tithawng pakhat a ni bawk a. 

Keimahni min hual veltu han thlir ila. World Watch List (WLL) 2017 atang tawh khan South Asia (Asia khawmualpui chhim) lam ram te chu sakhaw tihduhdahna hluarna ram top 50 chhungah an awm vek a ni. Yami Ravindran, Director of Religious Liberty Commission, Asia Evangelical Alliance chuan Asia chhim lama sakhaw thil thleng thar a sawi zingah chuan hengte hi a hmu chhuak:

 

·       Sakhaw zalenna a kiam telh telh.

·       Sakhua leh hnam chawhpawlhna leh firfiak taka kalpuina a thang chak.

·       Dan leh hrai hmangin sorkarin sakhaw thenkhat a zim tawt zel.

·       Khawtlangah sakhaw zuitu tlem zawkte huatna a pung.

·       Dan lek kawhna lam a chak lo sawt a, khawih ngam loh chin an awm ta fo.

·       Social media te sakhaw dang huatna thu thehdarh nan an hmang nasa.

 

                       

Hriat nuam fahran lo

Kristian tihduhdahna zir chiangtu Open Doors ho sawi hi a dik a nih chuan India ram chhung ngeiah hian hriat nuam fahran lo a tam hle mai. Tihduhdah nasatna list-ah hian kum 8 vel kal ta kha chuan India hi 31-na a ni a, 2016 khan 15-naah a rawn kai dawrh a, 2017-ah 11-na rawn hauhvin,  2018 & 2019-ah 10-na a rawn ni ta a ni. A chhe zawngin hma kan sawn zel a ni ber e.

Kum 2020 kum chanve kan hmang zo leh ta a. Religious Liberty Commission on Evangelical Fellowship of India Half Yearly Report pawh en theihin a awm tawh a. Corona Virus vanga lockdown leh mipui mi mir chet hleih theih lohna hian boruak a tidai viaua kan lo beisei laiin, Kristianten kan tuar hle tih hmuh chhuah a ni a. Thil report zung zung harsatna leh rilru zau zawkte tana  chhuah vah leh thiltih a harsat avang hian misualte an inlar nasa ni tur a ni. Tlang chil, khawtlang ensan, inkhawm khap leh Chanchin Tha hril dodal te tum 132 lai thlenga chhinchhiah a ni a. United Christian Forum thungin a report danin mipui kut thlakna (mob violence) bik hi vawi 95, state 15-ah a awm thung. Mob violence hluar ta leh political party tumahin hetiang kutthlak hi an demna thu na taka tihchhuah an nei lo hi, thil pawi tak lo lang thar a ni tih UCF chuan a sawi tel nghe nghe bawk a ni.

Kut tuar 121 zinga 66 hi nu an ni a, 16 te hi naupang an ni bawk. Heng zinga mi 106 te hi tribal an ni. Mi 3-in nunna an chan anga hriat a ni. Reportah hian Kristiante chunga hleilenna hi a nasa zual zel tih a lang chiang bawk a. Kum 2014 kha chuan 150 hnuai a ni a, 2015-ah 200 tep a rawn ni a; 2016-ah 200 a rawn chuang a, 2017-ah 250 pelin 2018-ah chuan 300 a ni ta a, 2019-ah meuh chuan 328 a ni chho ta dawrh a ni. Kumin 2020 January – June khan: police man tawk -5, inkhawm tihtawp – 9, Biak In hal – 1, Biak In tihchhiat – 2, dik lo taka puha man – 21, tihluihnaa sakhaw hluia inlehtir- 2, vauna  -38, bungraw tihchingpensak – 4, hate campaign – 5, tualthahna -3, khawtlang khapna -10, hmeichhia bik chunga kut thlak – tum 4, kutthlakna- 26, man leh vuak -5, an awm. Heng hi hriat theih chin chauh a ni a, tawmim pui ta mai mai an tam ang tih an ring.

Khawi state-ah te nge

Hleilenna hi state 15-ah a thleng a, mahse a thlen tam zualna state erawh chu a awm. BJP lalna Uttar Pradeshah hian kumin chhung ringawtin tum 32 a thleng hman a; kum 2019-a BJP a tlakna tribal state- Chhatisgarh leh Jarkhand-ah te a pung ve tho mai a, miin an report ngam tak vang niin an ngai.  Chhatisgarh-ah tum 24, Jarkhand-ah tum 10 a thleng a ni. Hei lo hi Tamil Nadu-ah chanchin ngaihthla nuam lo tak tak a thleng nual bawk a.

 

Kumin chhunga thleng chanchin ngaihnawm lo deuh ber chu Odisha state Kenduguda khuaa Jun 4-a thil thleng kha a ni a. Kristian rawlthar kum 14 mi chu mi thenkhat inhawrkhawmin lungin an chhu hlum a, chumi hnuah a taksa chu chan darhin hmun hrang hrangah an phum a ni awm e. A thi pa te chhungkua hi kum 3 hmalam khan Kristianah an lo inpe tawh a. Vauna pawh an dawng thin a, Pastor pawhin tum 4 lai chu Police Stationah a report hman nghe nghe a ni awm e. Mahse, nunnain a tuar ta tho a ni.

 

Engtin nge ni zel dawn?

Heti hi kan dinhmun a nih avangin tawngtaina leh thiltiha kan tan a ngai hle tih a lang a. Sakhaw zalenna humhim zel tur leh mihring dikna chanvo humhalh turin politics thlengin rilru kan hman a tul ta. Thangtharte pawh mahni inchhekarbawmna mai ni lo va rawngbawlna rilru pua sorkar office lian liana luh tum tura infuih leh tanpui a hun ta e. Eng angin iak iak mah ila a fawng miin an chelh tlat chuan a harsa tho tho thin.

Harsatna hi min thlifimtu, a tak tak paw chhuaktu a nih theih avangin hlutna tak pawh a awm thei. Amaherawhchu, thenkhat insawi hot chawp anga tihduhdahnate lo cho em em ringawt tur a ni lem lo. A lo thlen chuan rinawm leh huaisen taka hmachhawn tur kan nih laiin keini leh kan unauten kan tuar loh nana theihtawpa tan lak hi kan mawhphurhna pawimawh a ni awm e. Rinna par chhuahna daltu hi do tur kan ni tih hria ila. Ringtute intanpui tawn hi Bible zirtirna chiang tak a ni bawk tih nghilh loh tur a ni.

*****