KAN CHE THA ZEL

Ngai neih deuhthaw khawpin lockdown a rei ta. Kan nun khua hi engtin awm zel ang maw? Han buai chak chak hun leh boruak rih deuh ngut hun te chu awm mah se, a thawl tan leh deuh tawh a ang a. Nunphung pangngaia kan let hunah chuan sawi tur a tam ve khawp ang le. Harsatna karah lawmna tur tam tak erawh chu a awm. India hmarchhakah hian vei te han awm ve mah se, punlun lovin vawiin thlengin ‘green states’ kan ni deuh thup mai hi Pathian hnena lawmthu sawi mawlh mawlh tur a va ni em!

Mizo hnam ropuina an hmu e

            Hun harsaah mi ropuite danglamna a inpho chhuak thin ang hian, Mizote danglamna duhawm tak pawh a inpho chhuak at mai. Kan sorkar chet thatzia te, mipuiin hotute kan thlawp thiamzia leh zirtir kan awlsamzia te, tlawmngaia midangte humhim tura inpe te chanchin hriat a nuam tak zet thin. Mizo nih a nuam tak zet. Kan thawm pawh a thang thui ngei e. Hnam zawng zingah ropui ber kan nih loh pawhin khawtlang nunah ngat hi chuan tu hnam mah ka awt miah lo.  Heti khawpa tang ho thei leh khawtlang nuna pumkhatna kan neih that hi hmang tangkaia ram leh hnam hmasawnna pen dawrh dawrh khawpa hma la thei tur ram hruaitu Hripui len zawh khawvelah hian rawn chhuak sela aw! Mizote chakna hi kan la sawr chhuak zo lova hretu an tam awm asin.   Sorkar, Kohhran leh YMA heti khawpa luang za thei an nihna hi ram hmel thlakthlengna hmanrua ropui a ni thei a nia!                                                                                                                                                                                                                                                              

Hringnuna thil hlu ber a langsar

            Hripui a han leng meuh chu hringnuna thil pawimawh leh hlu ber te a lang chhuak zawih zawih mai a nih hi. Nunna humhim nan khawvel sumdawnna ropui ber ber a han chawl ruap mai te, intihhlimna stadium leh cinema hall te a han reh thuap mai te, kawngpui lun leh chawl lova che vel awm awm rengna te a han reh duak mai te hi chu nikumah te kha chuan thil awm theiah ngaih a ni miah awm si lo va. Kan nunna hi a lo hlu em a ni. Sum leh pai, intihlarna, hlimhlawp zawnna leh nawmsip tawlna chi hrang hrangte chu an tla chiang vang vang hle mai. Khawvel finna vawrtawp pawhina a lo awm dan a la hriat thiam theih loh ‘nunna’ kan neih hi uluk lehzuala kan vawn theuh a va pawimawh tehlul em aw! I hringnun kha palzam mai mai suh.

Kan lo mamawh tlem mang e

            Ei leh in tuihnai lutuk te hi a lo ngai vak lo. Lockdown laia mi changkang  tak pakhat chhungkaw chaw ei lai thla an rawn tilang a, an thil ei a mawlmang ve khawp mai. Sa chi hnih chi thum hmeh kher lo pawhin a lo awm theih mang e. A tui dan zawnga, ei siam mai pawh ‘art’ chi khata ngaih hialna khawvelah hian ‘ni tin kan ei khawpin…’ tih hlutna leh awmzia kan zir thar chum chum mai a nih hi. Intihnawmna atan hian kan mamawh hnem a, kan nunna tur thil chu a lo tam vak lo! Chutih karah chhungkaw hlutna hre tharin dam chhung tawitea inhmangaihtawn leh induattawn pawimawhzia hi kan va han chiang thar em! Incheina man tam pui pui kan va mamawh nasa lo em! Sports leh show hmanga hausa thur thurte ai chuan thlai hnah hring thar chhuaktute an hlutna a dang raih mai.

Thlarau lam ruai

            Lockdown hlutna leh nawmna chu thlarau lam ruai thehna ropui takin min chiah hi a ni. Mizoten Pathian Thu kan duhzia hi fiah a ni. Ram pum huapa thu sawi thiam ber berten zan tin maia hun an han inhman chhawk hi a ropui thlawt e. Tun kar hnih chhung phei chu ‘Simna’ tih thupui hmangin Mizo mipuite min au a ni a; min au eih zo lovang tih a hlauhawm hle a ni. Sim kan mamawhzia te, a pawimawhzia te kan sawi chamchi lai hian a eng ber chu nge sim tur? Eng ruam hi nge kan sut bik deuh ang? Mizoten eng kawngah hian nge kan lo tih sual tlangpui? tih lam hi chu kan sawi nasa lo deuh niin ka hria. Simna subject sawi tlawr mai piah lama kan simna tur lai tak ngalh chhuah fak fakna lam hi uar chhunzawm ila a tha mai thei. Keimahnia inzawn chhuah tur lamah an dah pawh a ni mai thei. Chu bakah, loh theih lohva chhungkua kan inkhunga ina kan awm ho thap lai hian Kristian chhungkaw pawimawhziate leh taksa leh thlarauva kan mawhphurhnate han inhrilh nawn leh ta ila, a boruakin a mil awm mang e, te ka lo ti ve mai mai thin a.

‘Awle mittui’

            Thil mak angreng tak chu ‘Awle mittui tla’ tehkhin thu hi speaker pathum laiin an sawi ka hre tlat mai(chu ai pawhin an tam mai thei e). An sawi hmaa sawitute thusawi hi an ngaithla vek bik lo emaw ni dawn ni? Nge, a pawimawh luatah sawi nawn tul an ti thin zawk? Awle-in a saseh tur a khawngaih em avangin a mittui a tla zawih zawih a, mahse seh a thulh chuang miah si lo, an tih hian kan ram dinhmun a phawk chhuak tha ni ngei tur a ni. Speaker ten kan nihna tlangpui an hmuh dan a ni chiang! Sual pawi ti ve em em, Kohhran leh Pathian lam ngaisang tak, thatna kawng pawh a hlutna hria, mahse mahni hlawkna ruama sual kalsan duh chuang miah lohna nun hi kan thanmawh bawk chu a ni a. ‘Awle Mittui’ far fap fap ang vel mai maiin sual hi kan huain Krista Isua hi kan hmangaih palh ang tih a hlauhawm thlawt a nih hi.

Sual simna hi hel phet tum lo ila

            Mi sualte hian sim kan harsat a ni ang. Simna hmachhawn siah lova hel kual tum deuh hram hram te pawh kan awm nawk mai. Hei hi social mediaa kan sawi chhunzawmnaah pawh a langsar hle a ni. Simna tel lova chhandamnaa chan policy hi kan zingah a lo intuh thuk tawh hle mai. Thuthlung Thara Pathian Thu hriltute policy hriat miah loh a ni awm asin! Miin Krista hmangaihna chu chhawr a, chhandamna huang chhunga lut tura kan duh a nih chuan ‘Simna leh Rinna’, pawisa hmai hnih anga inzawm reng, sawi hran theih loh hi tlang tak leh huai taka kan sawi a ngai. Simna tak chuan a ring a, rinna tak chuan a sim mai a ni. Chatuan nunna nei turin sual lamah chuan ‘simna’, Krista Isua lamah chuan ‘rinna’ a ni e, a eng zawk zawk pawh hi sawi hmaih leh dah hniam tur chi a ni lo.

 

*****RE01052020*****