Lehkhabu Thlirna ‘SAVUN KAWRFUAL’ BY LALHMINGCHHUANGA ZONGTE

 

College a kal laia a article ziah ka lo chhiar tawh atanga mi namai lo a nihzia ka hriat Lalhmingchhuanga Zongte-in lehkhabu ‘Savun Kawrfual’ tih a ziak tih ka lo hriat atangin ka chhiar chak nghal a.  Kum 2017 kum Book of the Year-a thlan a nih tak phei kha chuan a lar lehzual a ni awm e. A bu lei tuma ka zawn phakna chinah lah chuan ka chang thei der si lo. Tlai khawhnuah mi ta hawhin ka chhiar ve ta hram a. Beisei ang ngeiin chhiar a manhlain rilru a pawt fan nasa ngei mai. Lehkhabu rotling, Mizo in tina copy khat tal awm ngei se tih duhawm khawpa tha, puitling chin zawng zawng chhiar theuh chi, pulpit kai chin leh mi zinga Pathian Thu din chhuahpui thin zawng zawng tana textbook pakhat ni tura duhawm ngawih ngawih a ziak hi ka lawmpuiin hle a ni.

 

            He lehkhabu hian ram leh hnam hi a vei hle tih a hriat a, chu ai mah chuan Chanchin Tha hi a nih tur ang taka a nih a tulzia a vei nasa zawk emaw tih tur a ni. Thlarau thila mimal ngaihthat leh hahdamna mai piah lam, kar hnih khat kan hlim ho lek lekna mai ni lo, Pathianin hnam anga min din leh ram min pek ngeiah hian Pathian Ram dik tak lo thleng a, Lal Isua chawimawia awm a, Chanchin Tha-in min fan chhuah vek a duhzia phek tinah a lang uar uarin ka hria a. Chumi sawi chhuak tura hriatna leh thiamna lama hausa tak chuan a hmang tangkai tha hlein ka hre bawk. Mizo takin a ziak a, ram dang mi idea tha khawn khawm satliah mai lovin Mizo Kristianten kan mamawh ngawih ngawih min khawrh chhuahsak a ni ber awm e.

 

Min hneh zual lai

            He lehkhabu hian kan ram a dam loh danin bul a tan chat a, ‘data’ rintlak takin a thuam nghal thlap zel bawk. Hei hian a thu sawi hi pa titi thiam thusep rawtui ang mai mai a ni lo a, kan ni tin nun a khawih chat chat a ni tih a lantir a ni. Ram a hmangaihna leh taima taka a veina a tichiang a ni. Duhthawh tak zelah chuan kan ram dam lohna zingah hian khuarel chhiatna kan tawh nasatzia hi han belh tel sela ka ti viau. Fur tin maia lei min leh thi kan tamzia hi Khuanu hremna kan tawk ta em ni tih hialna tham a ni. Tichuan, ‘Savun Kawrfual’ tih tawngkam chu ‘Pathian Fapa Isua Krista min chhanchhuahna chanchin tha nihna dik tak leh tluantling huapzo Chanchin Tha sawi nan a hmang ta a. A tha narawh e. Sakhaw huang chhunga tha em em si, sakhaw pawnlama kan tawi viau mai hi her rem a hun takzet. He ‘Huapzo Chanchin Tha’ (Holistic Theology) hi kan mamawh ngawih ngawih leh he lehkhabuin a vei ber niin a lang. He thil hi a sawi tantu ni lo mah se ngaihnawm tak, fiahfai em em leh chipchiar taka ziahna bu a nih hi he lehkhabu hlut em em nachhan a ni, ka ti lo thei lo a ni.

            He lehkhabu ‘theology’ lai ber nia lang Bung VII-na mawlh mai hi ngaihnawm ka tiin a hlu ka tih a ni. Pianthar theology, 1960 vel atanga Mizo Kristiante min chiah hnehtu bihchianna a ni. He bung mal ringawt pawh hian a lehkhabu man hi a henin ka hria. Mizorama Kristiante “Pathian thu awih” ni thin chu “piang thar” ti zawnga sawi an lo nih tak thu sawiin, “Mi tam takin camping leh crusade nikhuaa pian thar an duh chhan han chhut hian, nun pumpuia Isua zui duhna tak tak aiin hremhmun pumpelha vanram kai duhna mai leh, a thua hriat fiahna atanga inhlanna mai hi a tam ta em ni a tih theih. Chhandamna thu ropui tak sawr zimna ang hial a nih theih lai pawh a awm awm e.”(p. 148)

“Mi tam takin hremhmuna tlak kan hlauh avang leh vanram kai kan duh ve avangin, Savun Kawrfual ha peih si lovin, sual rah langsar, saruak zahmawh khuh bo teng tenga pawnfen feng a, thlarau chhandamna ngawr ngawr chan tumin pian thar thu kan ngaihven fo thin”(p.155). He lehkhabu hian Chhandamna nihphung- chhandam tawh, chhandam mek leh chhandam tur kan nihna zinga “Kan buaipui ber tur zawk … a chhawng hnihna ‘nitin chhandam meka kan awmna’ hi … tunlai piang thar inti tam takten kan ngaihthah ber lai a ni lawi si. Ringtu nun kal zel hi chhandamnaah pawh kan chhiar tel meuh lo… Kan pian thar tum dan tam ber chu ‘hremhmun atanga vanram direct puat a, ni tin chhandam meka kan awmna tur zawng zawng thlawh khum daih’ hi a ni fo va. Hei hi atir atang renga Pathianin chhandamna a rawn ruahman dan, Savun Kawrfual a rawn siam dan kalh a nih avangin, hetianga pian thar tumte nunah hian Isua hmel a lang thei thin lo a ni,”(p. 170) tiin a thil vei a sawi chhuak a ni.

            He pianthar theology kan hmuh dan hi thangtharte zingah chuan a inangtlangpuiin a rinawm a, mahse hetianga sawi hian rual uten piantharna kan hnawl emaw tiin thenkhat rilru erawh a na deuh thin a ni awm e. He ‘piantharna’ tawngkam hmanga mi tam tak Setanan a bum mek avang hian kan ‘critique’ lo thei lo a nih ber hi. “Miin Pathian thu awih vak lo mahse, a pian thar tawh miau chuan, van ram kai tho turah kan dah tlat si a. Chhandamna bo theih tawh loh thuin kan invunhnawh zui bawk si a. Chhandamna chu thih hnua van ram kaina atan chauha pawimawh ta emaw tih turin zim te leh hahdam takin kan inzirtir ta a. Kan pian thar theology hi ennawn leh a tul tak zet ta ni,”(p. 151) a tih ang hian Piantharna lema lo piang thar awm ve mai mai hnawla piantharna tak tak Chanchin Tha hril tura kan in ‘ennawn’ a hun tawh ka ti.

 

Ka duhthawh deuhna ruam

            A bu hming hi han hriattirh phei chuan a mak deuh a, a hming atang ringawt hi chuan eng lam thu nge ni dawn tih hriat mai theih a ni lo. Subtitle awm sela a tha awm mang e, te ka ti ve mai mai a. Tin, a literary value hian ka beisei a pha lo deuh a. Amah ka lo ngaihsan tawhna atanga thlira tawngkam mawi leh  awmze nei taka inphan chhuak thlap tura ka lo beisei laiin pa titi thiam leh thil hre takin hmanhmawh taka a sawi zung zung  a ang zawkin ka hria a ni. Sawi tui laklawh vanga han pen thuina lai pawh a awm nual awm asin.

            Bung VI-naa ‘Mizoram Kristianna kalsualin YMA hi a din’ anga a ngai thei hi ka lo hmuh dan nen a inkarakik khawp mai bawk a. YMA a lo ding ta kha Kristianna atang pawhin a lo fuhin a dintute kha an lo fing ka ti hle thin zawk a. YMA-in a hma thin thil leh nihphung zawng zawng hi chu Kohhran huangah chuan remchang vekah ka ngai lem lo thin a. Ka lo hmu dik lo deuh zawk pawh a ni mai. Ani pawh hian ‘data’ famkim nena tanhmun siam a ni lem lo bawka sawiho zel tura thil tha tak a ni awm e.

Tin, phek 195-naa “ ‘Amah hi lo ring ve ula, tuna in sakhua dan ang hian Amah chu biain a thu awih ula, in tlawmngaihna te, in rinawmna te, in culture-a thil hlu in neih zawng zawng hi a lawmzawng tak a ni si a. Ama duhzawngin uar deuh deuh rawh u,’ tiin Isua kha min pe ta mai sela chuan, Kristiannaah hian neitu chan chang takin, nihna kalsana midang lem va chan kher ngai lovin kan tlangnel sarh zawkin a rinawm,” tih te thil theih tak tak a ni ang em le? tih ka ngaihtuah thin. Kan ramah hian Kristianna Mizo tawk loh hi kan tuar nge ni a, Kristianna tak kan pawh loh kan tuar zawk? tih zawhna pawh hi ngaihtuah chhunzawm zel chi a ni. Kristianna tak pawh turin tih-Mizo kher a ngai em?

He lehkhabu hian Huapzo Chanchin Tha a duh luatah kan Kristianna hi Mizo-ta viau se a huapzo dawnin a ngai niin a lang a, chu chu thil ‘automatic’ a ni em bik dawn em ni? Engemaw zawng chuan Chanchin Tha hi kan ti-Mizo leh lutuk ang tih te hi a hlauhawm tho lo maw? Mizo rilru leh Krista rilru hi hre hrang lo khawpin kan inluhthelh nasat palh te ka lo hlauthawng thin zawk a. He lehkhabu hi chuan Kristianna hi ‘indigenized’(culture-ah thun) ta ila, a huapzo(holistic) mai dawnin a hria a ni awm e. Ngaihtuah thui tham tak a ni e.

 

Tlangkawmna

            Pathian Thu lam lehkhabu hi Mizotawngin kan nei ve nual a. Amaherawhchu, sermon lawrkhawm leh Sunday School zirlai leh kohhran bil literature ni lem lo ‘theological work’ han tih theih hi chu a tam vak lo a ni mai thei. ‘Savun Kawrfual’ hi chu a class a sang hlein ka hria. Thu sep rawtui ngaihnawm leh chhiar nuam, mahse hlawkpuina tur em em awm lem lo ang chi ni miah lo; fiah kek kawka sawi tum pho chhuak lah mai; thuang tam taka sawifiahna pe zel bawk si, taksa leh thlarau nun suartluan vek lehkhabu hi an sawi dan takin ‘seminal work’ a ni thlawt e. A chhiar tlai pawl tak ni mah ila, “A copy hi neih ve ngei chi a ni,” ka’n ti hial teh ang.

 

*****RE06032020*****