KAN ROPUIZIA ENTIRNA HUN THA

 

Tunlai zet chu khawvel pumin ‘Corona Virus’ kan buaipui a nih ber hi. He virus tluka khawvelin thil pakhat a buaipui tlan hi tun hnaiah a awm lo hial awm asin. Amah tihbaiawm viau mah se a hming tak hi hi a mawi riau avang hian tunlai nau piang thar ‘Corona’ emaw ‘Covid’ tih emaw lo pu ta mai mai pawh awm ta se a mak lo vang, unau Khasi ho zingah phei chuan an awm leh nual tawh mai thei!

He pandemic (khawvel pumpui huap hripui) hian kan nunphung a tihdanglam nasat dan tur hi a la lang vek lo a, ngaihtuah thiam mai pawh a harsa rih. Sensex(India ram sumdawnna tehfung a ni ber awm e) lah chu a tla hniam duai duai a. Central sorkarah sum a tlem chuan, state lam pek tur a tlem dawn a, state sorkarin a dawn tlem chuan, kan zavaiin kan tuar ho leh dawn tih a chiang em em si a. He thu ziah lai hian India ram mihring tluk leh dingawn chuang a vei hriat 200 aia tlem a la ni a, thihpui pawh 4 chauh kan la awm a, kan a la chhe lutuk lo rih a. North East chhungah a case hriat a la awm rih lo hi a lawmawm lehzual. Hetiang hi ni zel se aw! Amaherawhchu, eng thleng nge he dinhmun hi kan chhawm theih dawn kan hre miah lo a, kan hotuten an hlauh ber chu a punlun vak palh ang tih hi a ni a.

 

Chhum kara ni eng

            Harsatna karah mihring nihna tak a lo lang chhuak angin he hun harsaah hian Mizote ropuina lo lang chhuak ngei se ka ti. Kan hnam zia ‘tlawmngaihna’ leh Kristian nun dan tha kan inzirtir ban lohte hi he khawvel hriata pho chhuah hun tak a ni dawn a. Khawtlang nuna kan tan ho that thin zia leh Mizoten ‘social consciousness’ kan neih thatzia hi ‘unique’ a nihna lan chhuahna hun tha leh pawimawh a nihzia hi ka hmu chiang ve a ni. Sorkar thuchhuah zah a, kohhranin a puan tawh chuan zawm mai, YMA hmalakna chu pawm mai thin kan ni a. He hripui pawh hi hlawhtling takin kan do theih beiseina hi a sang hle a ni.

            Mi tam takin an sel hman deuha buhfai leh eichawp thil mamawh theih tur kan han inchuh sung sung leh chheprelh lo awm te engemaw zawnga chhut chuan kan ‘social consciousness’ that vang zawk a ni a. Harsatna lo awm thei tur kan hriat thiam dan leh ‘information’ hi a tha khawp mai a, khatianga chet kha a finthlak dan tam tak a awm. Sapram kan ngaihsan Italy meuh pawh a che chhe viau a nih si hi. Thenkhat chuan han hlauh viau te hi thil awm lo leh rinna lama hniam vangah an ngai hial a. Mahse, hetiang thilah hi chuan intihthaih deuh anga lang hial a kan hlauh tlan a tha a. Kan hlauh nanana chuan kan ngai pawimawh zual dawn si. Chu bakah, a hlauhawm hrim hrim bawk.

 

I entir ang u

            Thlarau mi kan ngaihsan em avangin ‘thlarau mi nih competition’ nei nasa ber kan ni hial awm asin! Mihlim zinga a ruka kal reng (undercurrent) a ni hial awm e! Mi aia chang sang, hmu leh hre thei nih kan chak hi a bo thei tak tak lo a nih ber hi. Mi aia lawr bik nih chak em emna thlarau hi ‘Thlarau Thianghlim’ atanga chhuak a ni lovang tih a hlauhawm khawp mai. ‘Thiltihtheihna,’ ‘hmangaihna’ leh ‘rilru fel tak’ neihna thlarau (II Tim 1:7) ang chi kha tun huna kan mamawh tak chu a ni a. Paula phei chuan chutiang chu ringtute neih Thlarau a nih zawk thu a puang a nih kha. Pathian Thu zawm tura thiltihtheihna nei, hmangaihnain a kaihhruai, fel taka ngaihtuah thin thlarau hi kan mamawh tak tak tur chu a ni, Thlarau nu but mai leh rinhlelh theih tak lam ni lovin. Thuawihna thlarau mamawhna a sang dawn hle.

            Kan hotuten kan inven that theih dan ber tur han ngaihtuah sauh sauh sela. A hre zawkte rawn awl lo se. Sorkar leh kohhran lungrual takin an kal thlap bawk ang a. YMA leh pawl dangten tual chhung chinah uluk takin an han kengkawh ang a. Mizo mipuite hi sorkar, kohhran leh YMA laka intulut thin kan ni a, heng pawl pathum tangkhawm han kalh duh khawpa benghawng lo kan awm mang lovang. He virus do tura ‘model state’ nih theih dan a awm hialin ka hria. Chutiang kan ti thei ngat a nih chuan kan hming a lo mawi zual ang a, kan thawm khawvelin a hre hial dawn a ni. Kan khawtlang nun special-na kan hman tangkai a, kan lantir hun tha a ni awm e. Hetiang hunah hian a ni dawn lawm ni kan entir tur?

 

Thlarau mi tak tak chet chhuah a hun dawn

            ‘Fel taka tih’ hi a thlarau tlat avangin tha bera kan hriat dana hmalak mai hi rinna neih tlem vang a ni hauh lovang. Hetiang hunah hian thil ‘over-spiritualize’ hun a ni lo a, ‘under-spiritualize’ hun pawh a ni lem lo bawk. Biak In ngeiah kan lo inkhawm thei ta rih lo a nih pawhin kan theih leh hunah inkhawm hlutzia leh nawmzia kan chiang lehzual ang a, harhna ropui tak pawh a thleng hial mai thei asin! Chubakah khawvel chanchina harhna thlengte hi ‘crisis’ (harsatna runpui) nena inzawm a ni thin. Tunlaia harhna kan tihte hi harsatna tel lo leh mahni pawh inkhawrh chhuak lem loa neih chi deuh a ni a, a tlo lo reng a ni.

Chu bakah Mizote hi inkhawm zing hnam kan ni hrim hrim a. Bible chuan ‘Lalpa nia in lo kal khawmin’ tih a ni a. Kar khatah ni khat a sawina ni awm tak a ni. Zan tin deuhthaw inkhawm hi kan theih chhung chuan a thaah ngai ila, mahse Bible-in a phut tak Lalpa ni(Chawlhni) kha a nih deuh mai hmel a ni. Chuvangin, in lama tawm tam deuh a lo tul a nih pawhin lehkhabu tha te inchhawp a, Christian movies te chhungkuain en ho a, naupang Bible chang by-heart tirna hun remchang tak a ni ngei ang. Chhung inkhawm neihna boruak tha tak a ni dawn tih a lang reng mai a ni. Bible chhiar chhuah i tum thin, i pamtul fo kha i hlen theih nan Pathianin hun remchang a siamsak che a ni mai thei a nia.

Khawtlang huapa kan inven nasat viau lai hian mahni mimal  himna pawh kan ngaih pawimawh hleihtheih loh hun a lo awm thei ang a. Kristian leh tlawmngaihna avanga risk kan lak a ngaih hun pawh a awm hial mai thei. Heng zawng zawngah hian hmangaihnaa rawng kan inbawlsak tawn a ngai dawn a. Nunna hial thap a ngaih palh pawhin martar nun nei tura inbuatsaih a va ‘thlarau’ dawn em! ‘Thian chhan thih ngam’, ‘sem sem dam dam, ei bil thi thi’ tih Mizo hnam thupui ni thin kha nasa lehzuala thar thawh a hun dawn e. Chutiang ti tura ‘thiltihtheihna’ nei tura ‘thlarau chang’ te kan ni si a.

 

Zawlnei mawlh mai hi

            Mizote hian zawlnei kan ngaisang mah mahin ka hria. Kan thil sawiah zawlnei nia kan hriat thu leh hla hi a tam thin a. Tu pawhin (Pastor a ni emaw, Evangelist a ni emaw) hma lam hun hi lo sawi ta se, ‘Chhura um pui mu hriat’ bak a thleng tak tak lo! An sawi dik emaw sawi dik lo emaw a ni mai dawn tho tho a ni. Keini ang te pawh hian han sawi ila, dik ve kurh thei a ni tho a, dik lo thei a ni tho bawk. ‘Rin thu’ a ni vek mai. Chuvangin innghahna tlak leh chaw tak khuka khukpui tur pakhat mah a awm lo. Mi zawlnei thupuan hi a sawi pawh sawi chhawn tawh lo a tha. Pathian Thu zirmi tam takin ‘prophesy’(zawlnei) nihna hi, thil lo thleng tur hrilhlawk zawngah chuan, Thlarau thilpek ‘tihban’ tawh zinga tel tawhah an ngai. Isua Kristaa Pathian inpuanna Bible-in a lo record bak hi kan mamawh  tawh lem lo a. Hriat lawk ai chuan, eng pawh lo thleng se Pathian ring tlat nun neih hi Pathian min duh dan zawk a ni. Bible-a inziak bak hmalam hun tur hriat tum lutuk te, hre thei bik deuh anga inngaih emaw, hetiang mi an awm bika hriat tlat hi a him lo fo. Hre lawk thei ni lovin ‘rinawm tlat’ tur kan ni.

            Zawlnei hna kan ngaisang a nih chuan dikna leh felna kalh thil kan khawtlang nuna awm sawi chhuah te, Pathian leh thianghlimna kawng sial te, tuar huama thuneitute do a ngaih pawha do mai te pawh a ni ang. Kan boruak tawn chhoh mekah hian he hna hi a pawimawh viau dawn pawh a ni zawk mai thei.