TEMPLE, BIAK IN LEH KOHHRAN

  

Tunlai mi tam tak, Kohhrana mi rinawm tak tak pawh telin, Kohhran nihna hi kan hre chiang lo thin hle niin a lang. Mimal leh Kohhran danglamna te, rorel leh inkhuahkhirhna chungchangte, leh Kohhran leh Thlarau Thianghlim inzawmna te hi kan hre buai chawk a ni.

Temple nge Biak In       

Mizo Bible-ah, “Pathian in in nih leh Pathian Thlarau nangmahniah a awm reng tih in hre lo vem ni?” (I Kor. 3:16) tih te a lo awm avang leh I Kor. 6:19-ah “Thlarau Thianghlim in,” min lo tih bawk avang hian keini ringtu mimal theuh hi, “Kohhran in ni,” min ti ta mai emaw tia hriat sual a awl fo mai. Paula hian a sawi tum tak zawk chu, mimal hi Kohhran kan nihna lam aiin, ringtu zawng zawngte hi Thlarau Thianghlim chenna in kan nihzia a ni. Midang kaltlang lova mahni ngeia Pathian pawh a, Pathian nena inkungkaihna tha neih thu  sawina a ni.

Thuthlung Hlui hunah chuan chu thil chu a thleng hauh lo va. Pathian awmna chu Temple a ni, Pathian nena an inkarah puithiam rawngbawlna, Temple khan awmzia a nei a, chumi kaltlang chauh chuan Pathian an pawh thei a ni ber. Chu thil chu Thuthlung Tharah chuan thiah a ni tawh a. Kuta in sak temple-ah ni lovin, ringtu-ah chuan Thlarau Thianghlimin hmun a khuar a, a chenna hmun atan a hmang tawh zawk a ni.

Heti lai tak hi mi tam tak hriat sual thin a ni. Ringtu mimal hi ‘Pathian in’ emaw, ‘Kohhran’ emaw an ti ta mai thin a ni. Bible-ah ‘Pathian in’ emaw, ‘Thlarau Thianghlim in’ emaw ti mai mah se Paula sawi tak kha chu vawiina kan Biak In ang hi ni lovin temple kha a ni zawk a. Vawiina kan Biak In ang hi chu Paula hunah khan a la awm lo hrim hrim a. Biak In-a inkhawm hi Isua thih hnu kum 200 vela an chin tan chauh a ni. Hmun remchang changah an ‘inkhawm’ mai thin a ni awm e. Vawiinah hian Pathian Biak In (temple) kan nih tawh avangin Biak Ina kal a tul ta lo, a ni lo va; kan Biak Inah hian ‘Thlarau Thianghlim chenna in’ te kha kan rawn kal khawm a, kan Lalpa chawimawiin chibai kan buk ho thin zawk a ni. Chu chu Thuthlung Thar a nih tawh avanga thlahthlam theih a ni chuang lo –‘Inkhawm bansan mai lovin’ (Heb. 10:25) tih a nih kha. A huhova awm a, rawngbawl ho va, intichak tawn turin Pathianin min ruatsak a ni.

Mimal nge Pawl

Kan zinga mi thenkhat chuan mimal tinte hi kohhran chu kan ni mai a, kohhran kan han tih tak pawh hi intichak leh intihlim tawn tura awmkhawm (fellowship) angah ngaiin chutiang intiphur awm khawm apiang chu kohhran angah an ngai mai a ni awm e. Chuvang chu a ni ang kohhran rorelnate, inkhuahkhirhna te, leh a thuneihnate hi an hrethiam thin lo niin a lang. Kohhran chu intihchak tawn aia lian fe a ni a, intihhlim tawnna mai a ni lo. Pathian Thu-a innghat pawl ropui tak a ni a, chutah chuan thil chi hrang hrang a awm-

1.    Thurin: Bible zirtirna dik tak a ni em? tih hi a enfiah reng a, zirtirna dik lo chu a hnawl thin. Do a tul a nih pawhin a dotu tur a ni ang.

2.    Rorelna: Kohhranah hian rorel a ngai tih chu a tir atangin Bible-ah kan hmu a, chumi pawimawhzia chu Pastoral letters (Timothea & Tita) ah te hian a lang a ni. Paula lehkhathawn dangah pawh hian chu thil chu kan hmu a ni. Kohhran memberte pawh he rorelnaa intulut tur an ni.

3.    Inzirtirna leh Inthununna: Kohhran chhungah hian Pathian Thu inzirtirna hi a tam em em a. Chhandamna chang tura inthlemna mai ni lovin, chhandamte nun dan tur inzirtirna hi a tam a, mi tam takin an hmu ‘thlarau’ lo mai thin. Thlarau Thianghlim hian kan duh zawng leh lawm zawng chauh sawi turin an ring emaw ni dawn ni? Inpawl, indawm, intanpui, inkhuahkhirh, inzilh, inthunun, leh inhnawhchhuah thleng pawhin a awm vek tih Bible-ah kan hmu chiang em em a ni.

            Thenkhat chuan kohhran hi pawl anga sawi an tim a. Ringtu awmkhawm na na na chu pawl a nih dan a awm. Mahse khawvel pawl mai ni lo Pathiana inthlung pawl a nih zia i hria ang u.

Hmuh theih nge hmuh theih loh

Thenkhat chuan rorel, invawn, inkhuahkhirhna leh inhumhalhna an zui zawh thin loh avangin “Hmuh theih loh Kohhran” lam sawi uarah an ramtang a, an ngaih a la tha ta fo a ni. Chumiah chuan tel ve thovin an inhria a ni ang. Hmuh theih loh Kohhran hi ‘ringtu zawng zawng sawina a ni,’ tih hi Kristian pangngai chuan a pawm thlap a ni. Mahni Kohhran bika awm te chauh chhandam tur anga inzirtir hi chhiar tham pawh an awm meuh lo. Hmuh theih loh kohhran memberte chu Pathian chauhvin a hria. Amaherawhchu, mahni awmna Kohhranah pawh intulut zo lo khawpa nun pawlawh leh chapo kan nih chuan  hmuh theih loh kohhran member dik tak kan ni chiah ang em? Hmuh theih loh Kohhran chu Isua Krista ringtu, Lal leh Chhandamtu a nihna pawmtute an ni mai. Hmuh theih kohhran atanga tlan chhiatna tur thil a ni lo. Hmuh theih kohhran memberte chuan hmuh theih loh kohhran an siam thin. A inzawm reng a ni. Hmuh theih Kohhran tel lovin hmuh theih loh kohhran a awm lo a ni.

Rev. H. Zalawma leh Rev. Vanlalzuata te chuan, “Mi thenkhatte chuan hmuh theih Kohhran hi ngainepin, hmuh theih loh Kohhran mi leh sa an nihna chu an duh tawk mai thin a. Chutiang mite chuan hmuh theih Kohhran chu an hmu khawvel a, thingzai rem khawm chhunga mihringte inpawlhona mai mai angin Kohhran hi an ngai bawk a….Hmuh theih Kohhran leh hmuh theih loh Kohhran hi a hrangin a awm lo va, rinna leh thiltih a inzawm tawn ang hian a inzawm tawn tlat a ni ….Hmuh theih loh Kohhran member dik takte chuan hmuh theih Kohhran an ngainep thei lo. Lal Isuan Kohhran a din khan hmuh theih loh lama amah ringtute zawng zawng chu hmuh theihin an inpawlkhawm a, hmuh theihin rawng an bawl a, hmuh theihin Kohhran hruaitute an thlang a, inrelbawlna hna zawng zawng pawh hmuh theihin an kalpui vek a ni,” tiin an sawifiah a ni.

Tlangkawmna

          Ringtu mimal chu Kohhran ni lovin, Thlarau Thianghlim in (temple) a ni a, he Pathian in, Thlarau Thianghlim chenna hi amah chauhva chetla mai tur a ni lo va, kaihhruai leh zirtir zel leh dawm ngai a nih angin rawngbawl zel tur a ni bawk a. Chuvangin, ringtu inpawlkhawm Kohhranah ringtu chu Pathianin a dah a, chu Thlarau Thianghlim in/Pathian in te chu Kohhran hovin Pathian biak ho nana an serh hran in, Biak Inah, Pathian in dangte nena Pathian Engkimtithei chibai buk ho turin an kal khawm thin a ni. Chu Kohhran ‘Krista Taksa’, ‘Hmuh theih Kohhran’ ah chuan an  intulut a, Thlarau Thilpek an dawn zawng zawngte chu chumi hmuna hmang tangkai zel tura koh a ni e.

 

*****RE30012020******