𝐓𝐈𝐌 𝐓𝐄𝐁𝐎𝐖-𝐓𝐄 𝐍𝐔𝐅𝐀

 

Pathian rawngbawltu ropui kan hriat thinte an her liam mek lai leh an thachhang daltu tur tunge ni ang tia ngaihtuahna a kal reuh reuh laiin beisei loh lam atangin mi ropui chhuanawm tak tak an rawn lang chhuak leh hlawl thin. Kristan ram lak a thulh thei lo! Pathianin a rawngbawltu tur a chher zel a ni. An zik chhuahna leh an thiam zawng inang vek lovin, a hmel lan dante pawh danglam hle mah se an thahnemngaihna leh Pathian an hmangaihna a danglam si lo. Chutiang mi zinga chhiar tel loh theih loh chu American footballer (Rugby), feet 6.3 a sang, hleitling leh hmel tha, nungchang mawi si, sports lam a chawlhsan hnua rawngbawltu pawimawh tak ni chhunzawm ta Tim Tebow hi a ni ngei ang.

 

Kristian tlangval lar

Tim Tebow chu August 14, 1987 khan Philipines-ah a nu leh pa missionary inkarah a piang a. Unau panga zinga naupang ber a ni nghe nghe. Rawngbawltu chhungkua ngang an ni bawk a, naupangte nunah pawh Kristian inzirtirna a strict theih ang ber phut a ni thin a. An unau hi panga an nih a, infiamna lam an tui hlawm em avangin, enkawl pawh an ngai nasa hle a ni awm e. Strict taka inenkawl hlutzia pawh hetah hian a lang a ni. An chet that deuh changa insawitheih deuh ringawt pawh nu leh paten an khap bur a ni. University of Florida teamah American Football khelin 2007 khan mite ngaihsan tak Heisman Trophy chu dawng ta hial a ni. He trophy hi College football-a Best Player an pek thin a ni mai awm e. Heta tang hian a rawn lar tan ta hle a. Professional Football leh Baseball-ah lutin ringtu a nihna pawh a chhuang zawk emaw tih turin a au chhuahpui thin a, hei hi a lar zual phah hial a ni awm e. Tunah hian Tim Tebow Foundation enkawlin naupang vanduai bikte tan an thawk thin a, Philipines-ah missionary 40 chuang a chawm bawk, an ti. Thangtharte Pathian hre tur leh Krista hnungzui tura thangtharte fuihtu Speaker lar tak a ni mek a. Isua Krista neih thatzia hi a thupui ber a ni awm e. Lehkhabu tha tak tak 6 lai a ziak tawh nghe nghe a. Kristian film tha tak Run the Race tih an siam tawh bawk.

 

Tawngkam thar- ‘Tebowing’

Boruak nei hat chi a ni hrim hrim tih a hriatna chu Saptawng tawngkam thar ‘Tebowing’ tih an chher phah hial chhan kha a ni ve a. Khelmual mipui hmaah thingthiin, a kiu a khup chunga nghata a tawngtai thin dan an sawina a ni a. Chu lo pawh, Footballer ho hian an hmai (mit hnuai) ah engemaw tawi te ziah hi an ching a. A tirah chuan Philipi 4:13 tih a ziak a, chumi hnuah Johana 3:16 a ziak leh ta a. Hemi ziaka an inkhelh hmasak ber tum phei hi chuan ‘Johna 3:16’ tih google-tu maktaduai 94 an awm an ti. Chumi hnu kum 3 chiahah Tebow hian a football throw zawng zawng hi yard 316 a ni a, chawhrualin yard 31.6 pass zel ang a ni a, CBS rating pawh a san ber tumin 31.6 a ni lehzel an ti. Mak ve tak chu a ni. Ani phei chuan Pathian thiltih mak ni ngeiin a ngai. Mit hnuaia thu ziah hi an khap ta nghe nghe a, chu khapna dan pawh chu ‘the Tebow rule’ an la ti lehzel a nia! A nunah hian Pathian a dah hmasa thin ni ngei tur a ni, “Eng pawh thleng se, ka Lalpa leh Chhandamtu Isua Krista ka chhuang zel ang. Kan chak emaw chak lo emaw, Krista hi a pawimawh ber si a,” a ti thin a; “Pathianin min hriat dan hi midangten min hmuh dan aiin a pawimawh zawk fe a ni,” tih hi a sawi zin pawl tak a ni awm e.

 

A lal duhawm a zahpui lo

Tebow-a a lar viau chhan hi a inkhelh thiam piah lamah a rin Isua Krista a zahpui loh em vang a ni pakhat a. Lawmthu a sawina leh interview-ah te Krista hming a lam awl lo a. Tum khat chu TV an interview laiin nula a ngaih tawh leh tawh loh an zawt thut mai a, zam map lovin a la virgin thu a sawi mai bawk. Thawm a nei ring laih laih hle a ni. A nupui duhzawng an zawh pawhin ‘Kristian a ni ngei tur a ni, a chhan pawh ka Kristian nihna hi ka ngaih pawimawh em vang a ni,’ tiin tlang takin a sawi. A bialnu thin Kristian nula ve tho South Africa mi Miss Universe 2017 Demi-Leight Neil Peters nen an inhmehzia kha aw! Nikum January 20-a an inneih dawn pawh khan sex chungchang an zawhin, inneih hma chuan hman an tum loh thu an sawi mai ngam a ni. Tebow hian Pathian a hmu chiang hle a ni ngei ang.

 

Chherna pum tha

Heti taka tlangval chhuanawm hi khawi atanga lo zi chhuak nge a nih tih zawhna hi awm lo thei lo a ni ang a, zawhna chhan nuam ber pawl a ni ngei ang. Tebow vang hian an chhungkua pawhin hriat an lo hlawh ve ta zel bawk a. Tebow-a pa Bob Tebow hi rawngbawlnaa tui leh inpe zet mai, Philipines-a missionary hna thawk ngat ngat a ni a. A nu Pam Tebow hi nu fel leh Pathian tih mi tak a lo ni bawk. A fate a enkawl nasa hle tih a lang mai. Kum 2018 khan lehkhabu hriat hlawh leh hlu tak Ripple Effects tih a ziak ve ta a. Pathianin a hruai dan leh kan thiltih te ber leh tangkai lo anga kan ngaihte pawh hian ‘effect’ (sawhkhawk) a neih vek zia a sawi a. Lam hlimpui leh harhna ropui lam a uar ve lo. Chhiar manhla tak a ni. Tim Tebow-a ngei pawh hi a pai laiin harsatna tam tak an tawk a. A hriselnain a tlin loh avangin a naupai chu chhiatpui theih a nih an hria a, titla mai tura Doctorte meuh pawhin thurawn an pek laiin Pathian hmingin an hum tlang ta a ni. Chunglam thiltih hi chu a mak teh e, a fa zingah pawh piantha ber leh khawvel huapa an chhungkua ngei pawh vawrh lartu a lo ni ta. Chung zawnga aia ropui chu an rawngbawlna vawrh sangtu pawimawh leh chhunzawmtu tha a ni ta chu a ni. Chungte chu an chanchin tingaihnawmtu thaah an lo chang ta vek a. Pro-life (nau tihtlak dotute) lamin sawi nuam an ti char char hle a ni.

 

Ripple Effects

Tim Tebow te nufa hi Speaker lar tak leh lehkhabu ziaktu pawimawh tak an ni mek a. Lal Isua hming an chawimawi nasa ngawt mai.  Pam Tebow hian ama nun ngei atangin thil tereuhte anga kan ngaihte hian awmzia a neih thukzia a tlangaupui nasa a: “Pathianin thilpek leh hun remchang min siamsak anga A nihna kan nuna kan lantir hian dila tui kan vawm thlak ang kan lo ni a, tuifawn a siam chuan kan hmuh phak leh phak loh thlengah hnuhma tha a nei thin a ni,” a ti. Hei hi a fate a zirtir nasa viau thin a ni awm e. Pam Tebow hian heti takin mi hriat a la hlawh dawn tih a ngaihtuah pha ngai miah lo. National TV-a a fapa nen an kawm hmasak ber dawn vel chungchang chu: “Ropui ka ti a, mak tihnain ka khat bawk. Kum sang tam pawh dam ila hetiang hun hi a la thleng ang tih ka suangtuah pha dawn lo hrim hrim. Pastor harsa ve tak nupui ve mai leh ka ni tin mawhphurhnate hlen tuma buai chung reng thin; thian tha leh chhungkhat lainaten atthlak taka fa ngaha an ngaih; ‘homeschool’ tih tawngkam a pian hmaa skul kal tir lova fate lo ‘homeschool’ thin; tu hriat loh rama missionary, tu ngaihven loh chhungkua; ka pai naute nena thi rual tura ngaih khan hetiang dinhmun hi ka thleng ang tih ka suangtuah pha ngai lo,” a ti. Mi hriat hlawh lo leh hmuh phak lohna hmuna Krista hmangaihna leh rinawm taka a lo dinna ‘hnuhma’ kha Pathianin mi zawng zawng hriatah a rawn vawrh chhuak a ni ber mai.

 

‘Harhna ropui’ a ni ber lo

Tebow-a nu hian ani leh fapa celebrity a nihna chu a ngai ropui ta hle lam ni lovin, thil lian beiseina nei miah lova thil te tak te tea an rinawmna hlutzia an sawina a ni awm e.  “I lar a ngai lo va, i hausak emaw hlawhtlin viau emaw a ngai miah lo. Social mediaa follower ngah emaw, lehkha thiam degree neih that emaw i mamawh lo. Khawi ram mi nih emaw, kum eng emaw zaha upa nihna  emaw, khawi hmuna awm emaw, eng hna emaw thawh emaw, kawppui tha neih leh neih loh lam emaw a ni lo. Tu emaw-ah tal tan a tha zawngin hnuhma hlu i nei thei a ni,” tih thu hi a sawi tui ber pawl a ni awm e. Tim Tebow ngei pawh hian, “Ka nu hian (min titla lovin) nunna chance min pe a ni mai lo va, ka theih tawpa thaa nun theih dan tur a nunin min zirtir a. Isua a hmangaihnain kan unau panga min enkawl a. Bible chang thluk siama sain kan thinlungah Pathian Thu a tuh thin. Kan retheih lai berin mahni inphatin min hmangaih a. Ka nu chuan kotlang atangin min lo tan a, min lo au kaltu a ni a; kan chak loh tumin fuih a, kan chak tumin min dah hniam a thiam thin a ni. Kei leh ka unaute nuna ka nu hnuhma lenzia hi sawiin a siak lo a ni. A hmangaihna, a nun entirna ropuizia, a thlarau nun chakzia, a thinlung mawizia, rinna leh thiltihah Pathian tana a inpekna thukzia sawi nan tawngin a daih lo hial ang,” tiin a nu chungchang a sawi. Revival leh Thlarau hriattirna mak danglam hranpa taka dawn lam a ni ber lo, ni tina rinawm taka nun lam a ni.

Tim Tebow hi a ngaihsanawm a nih chuan a nu leh pa, Pam & Bob Tebow atangin an ngaihsanawm daih tawh tihna a ni lo thei lo.

 

*****RE19032021*****