𝐓𝐇𝐈𝐋𝐌𝐀𝐊 𝐂𝐇𝐔𝐍𝐆𝐂𝐇𝐀𝐍𝐆𝐀 𝐓𝐇𝐔𝐑𝐀𝐖𝐍 𝐒𝐀𝐖𝐌


 -         

Tunlai ringtute hi thilmak (miracle) dawnsawn dan chungchangah kan buai deuh niin a lang a, Bible zirtirnaa khawrh chhuah tum tlat leh ngaihtuahna fim tak hmang chungin a hnuaia mite hi min hruaitu atan ka rawn chhawp chhuak a. Kan hlawkpui hlawm ka beisei. Thupek em chu ka tih ngam loh avangin Thurawn ka ti ta a. Ngaihtuahna seng chhunawm theuh turin kan insawm nghal bawk a ni.

 

  1. Ringtu nihna (identity) hi Thlarau Thianghlim hnathawh (miracle), ama tel lova kan neih theih hauh loh a ni tih hre tlat ang che. Kristian nun dik tak chu ‘miraculous life’ (nun mak) a ni a, chu chu sual hnehna (mihring chaknaa thil theih loh) nun leh Thlarau hruaina mak hlimna thlentu a ni. Hei hi Kristiannain a tum a ni.
  2. Pathian hi i dawithiam (magician) anga hman tum suh. Pathian Engkimtithei ringtute tan thilmak hi hnawl theih a ni lo tih a chiang a. Amaherawhchu, thilmak anga lang apiang bawh huam huama thilmakah chauh hmanga Pathian hnathawh awm anga ngaih chu Pathian hi dawithiam (magician) anga chhuah tumna a ni thei a, kan duhzawng zawng min petu chhiahhlawh anga hman tumna a ni thei bawk. Fimkhur a tha.
  3. Pathian inhriattirna hi thilmakah ringawt a awm lo tih hre rawh. Bible chhunga Pathian inpuannaah thilmak tel lovin a inpuang tam zawk tih hriat a tha. Nunphung pangngaiah Pathian hnathawh hmu thiam zeltu chu ringtu puitling a ni. Pathian thiltih ropui chu lei leh van a siam hi a ni a, chumiah chuan kawng tinrengin hna a thawk chhunzawm zel a ni.
  4. Ringtute thatna turin engkim a hmang thin (Rom 8:28) tih hriat a hahdam thin. Khawvel inher vel leh nunphung pangngaiah hian Pathianin ro a rel a ni tih hriatna hian ringtu nun a tihahdam a, buaina tam tak a pumpelhtir. Entirnan, taksa damna atan doctor/damdawi te pawh Pathian hmanrua vek a ni tih hriatna chuan damna tak chu Pathian hnen atanga dawn a ni tih a hre thiam a, damdawi tel lova tawngtai damna nen a lawm dan a inang reng.
  5. Bible hi Thilmak chhuina bu a ni lo tih hriat a pawimawhzia hria ang che. Lal Isuan nu chhul chhuak zawng zawng zinga ropui bera a sawi Baptistu Johana pawhin thilmak (miracle) pakhat mah a ti lo a ni (Jn. 10:41). Thlarau thila ropuina hi thilmakah a awm chuang lo a, Krista tlanna mak leh misual chhandamna makte hi buaipui mai tur a ni.
  6. Pathian hna thawh pawn lamah thilmak a thleng thin tih hriat a tul. Aigupta dawithiamten tiang rulah an chantir thei ve tho (Ex. 7:8-8:18) tih kan hria a. Sakhaw dangah pawh thilmak a awm ve tho avangin Kristian nun hi thilmak buaipui a ni ber lo tih hriat a tha. Kan nunphung pangngaiah Pathian duhzawng kan tih tur a tam hle a ni.
  7. Thilmak buaipui luatah Pathian thil tum i thelh phah daih thei a ni tih vawng rawh. Chanchin Tha bu 4-te hian thilmak mipuiin an phut a, Isuan an hnawl sak vawi tam tak an sawi (Matt. 12:38-45; cf. 16:1-4; Mk. 8: 11-12; Lk. 11:16, 29). Krista thihna leh thawhlehna aia buaipui leh tuipui loh tur a ni. Tin, hril nasat loh tur a ni bawk.
  8. Thilmak hi bumna hmanrua a ni thei tih hriain inveng fimkhur rawh. Thuthlung Hlui tirah (Dt. 13:1-5) fimkhur tura zirtir an ni daih tawh a. Pathianin amah kan hmangaih leh hmangaih loh fiah nan a hmang thin a ni. Setanan lawmna tur dik leh um tur dik atanga min hruai pen a tumna hmanrua a ni thei tih hriat a tha.
  9. Thilmak tihin Isua rawngbawlnaah hmun lai lum an chang lo tih theihnghilh loh tur a ni. Thilmak tih kha a Pathian Ram thu hril leh zirtir hnaah khan a bet ve mai chauh a ni a. Lal Isua tum ber chu tihdamnaah ni lovin a zirtirna zawk kha a ni zel (ent., Mk. 1:14-15, 21, 35-39;) a. Bible zirtirna – Chhandamna Chanchin Tha leh Kristian Nun dik hi ringtu zawng zawng hnena puan tawh, kan kawl leh kan zavaia kan hril theih leh hril tur a ni.
  10. Thuawihna nun a ropui ber tih hian i nun vawng rawh se. Chu chu Thuthlung Hlui leh Thar thuchah pangngai reng a ni (I Sam 15: 22,23; Matthaia 7:21-23). Thil dang zawng hi chu  a derin a thleng thei vek. Pathian thu awihna dik erawh chu a lem chan theih a ni lo. Chu chu Pathian leh ringtu inkara thil pawimawh ber a ni.

 

*****RE09072021*****

 

 

Comments

Post a Comment

Popular posts from this blog

Engtinnge Kristian Nun Nghet kan neih theih ang le?

             Chak lo bera inngai tan pawh Kristian nghet tak a neih theih. Beidawn mai tur a ni lo. Thil dang ang bawkin Thlarau lam dan (Krista Isuaa Nunna Thlarau dan, Rom 8:2) a awm a, chu chu kan zawm ve a ngai ang. Kristian nun nghet kan neih theih nan a hnuaia mite hi ngaihtuah ho ila: 1.        Kristianna awmzia hriat chian a ngai. Thenkhatin Kristian sakhua hi – misual pianthar, a hnua theih ang tawk tawka rawngbawl, tlin lohna laite Pathian khawngaihnain a hliahkhuh vek thin- angin an hria. A dikna chen chu awm mah se he theology hi a puitling lo hle a ni. Kristian nihna chu nun puma Krista vuantu tihna a ni. A khawthlir, a ngaihdan, a nun pumpui hi Krista tarmit atangin a thlir tawh a, Krista zuitu (disciple) a ni tawh tihna a ni. Kan thlarau nun hriltu ber nia kan hriat thin ‘piangthar’ tih tawngkam hi Bible-ah a lang tam lo hle a. Thuthlung Thar chuan ringtute sawina tawngkam atan  matheteuo  a hmang tlangpui. Chu chiah chu Matthaia 28:18  ‘Thupek Ropui’ kan
Read more

CHANCHIN THA NIHNA TAK

Naktuk March 15 hi Presbyterian Kohhranin ‘Chanchin Tha Thlen Ni’ tia an serh thin kha a lo ni leh ta a. Hemi ni denchhen hian Chanchin Tha nihna tak hi ngaihtuah thar leh ila. Thil hlu apiang a lem (duplicate) a tam ang hian Chanchin Tha duplicate deuh hi lo tuipui chiam a awm theih avangin ngaihtuahna sen tam a pawimawh hle dawn a ni. Tumahin Chanchin Tha avanga malsawmna kan dawnte  hi an chhut sen a rinawm lo va, sum leh pai zawnga han chhut theih chi pawh a ni awm lo ve. Theih pawh ni se phal chi pawh va ni suh, a ngaihna a awm dawn si lo. Chanchin kan dawn tawh zawng zawnga tha ber leh hlu ber chu he Isua Krista Chanchin Tha hi a ni a. Chu chu kan lawmna a nih laiin khawvel su sawn dawrh dawrh khawpa thil ti thei chanchin a ni.   Chanchin Tha chu Bih chiang zawkten Chanchin Tha(Gospel) kan tih laimu tak hi hriat tumin an chhut thin a. A tir atanga ringtuten Chanchin Tha anga an lo hril leh hriat tlan nia lang chu Tirhkoh Paulan I Korinth 15:3,4-a a sawi, “ Krista chu Lehk
Read more

ISUAA DAMNA

Lal Isua nihna tam tak zinga pawimawh em em chu ‘Tidamtu’ a nihna kha a ni. Taksaa harsatna nei, natna tuar, dam lote a tidam thin a. Natna enganga dam harsa pawh a tihdam thin avangin mi rintlak, Pathian hnen atanga lo kal ngei a ni tih a tichiang em em a ni. Natna hi mihringte tihrehawmtu, kan harsatna lian ber pakhat a ni a, min tihrehawmtu leh tinuam lotu a nih avangin kan Lalpa chuan a rawn bitum chat mai a. A kalna apiangah dam lote a tidam thin tih kan hria a ni.   A lainatna vangin a tidam thin   Lal Isua dam lote a tihdam thin nachhan chu a khawngaihna leh lainatna vang a ni a. Na tuar a hmuhin a khawngaih a, rilru hrehawm a hriatin a lainat a, tidam theitu a nih avangin a tidam ta thin a ni. Tupawh a hnena lo kal chu a tidam zel a ni tih kan hre bawk a. Chuvangin natna khuma mu mek leh dam hleithei lo inenkawl reng te hi Lal Isuan in natnaah khan a lainat ngawih ngawih che u tih in lo hre dawn nia. Hrisel tha pangngaite pawhin natna tuarte hi kan Lalpa a rilru latute
Read more