RE Ralte

  Mizo Kristiante hi boruak thar zawng reng mai kan ni a. Eng emaw tak a awm loh rei deuh hi chuan kan lung a leng a, boruak thar tawn kan chak ngawih ngawih thin. Chutiang boruak lo thlen thei reng reng chu kan hmu thlarau viau zel mai lehnghal a. A dik leh dik loh lam chhut chian aiin kan hlimpui tur lamin min kaihruai nasa a. Midangte vei luatah tui fim leh tui nu pawh thliar hleithei lo khawpin kan tang a. Pathian ring lo, Communist-ho, thupui hman rim, “The end justifies the means,” (a hmanrua dik leh dik loh chu a rah chhuah atanga teh a ni) tih Pathian ringtute duh loh em em thin chu hman kan chak fo a, kan fimkhur zo lo thin lo niin a lang. He kan panna lai tak hi a nuam kan tihna lai a ni a, Setanan hman tangkai a tum nasat tak leh kawng tam taka a lo hlawhtlinna ruam a ni tawh awm e. Word of Faith chu eng nge? Hetiang hi kan dinhmun a nih avangin Kristian zirtirna dik pangngaite chu kan hne hma hle a. Hmun dang ram danga mite sawi dan mak deuh deuhte pawh chawk luh tum

Kan tleirawl chhuah tirhin ka u fapa hi a beng a baw thin a. A dam mawh hle a, tih ngaihna vak pawh kan hre lo va. Tum khat ka ram vak haw chu ka u hian hlim deuh maiin, “A mak lutuk, a dam daih,” tiin mi lo hrilh a. A chhan ka zawh chuan, “A ni hian a tawngtai dam a,” tiin kan mikhual pa chu a kawk a. Phawk deuh hlekin ka ngawi chat a, “A mak lo ve,” ka ti chhuak a. Mikhual pa chu a hlim hle, “A ni chiah mai. A mak lo a ni,” tiin a lo tuihnih a. Khami hunah khan tawngtai dam theihna chungchang hi ka lo ngaihtuah ve fo tawh thin a. ‘Damna dil a, kan tawngtai hian dam ta nghal pawh ni ila thil nih dan tur pangngai a ni mai dawn lawm ni?’ tia Pathian thiltihtheihna ka lo chhut fo tawh thin vang a ni. Ni engemaw zat liam hnu chuan kan naute beng pawh chu a rawn tui leh tan ta a. Mikhual pa kha a la cham tho bawk a. “A na leh si a ni maw…” ka’n ti chu, mikhual pa chuan ka u chu puhin, “A tawngtai chhunzawm lo vang a ni,” a ti ve leh mai bawk. Ka u chuan a chhang lem lo, a tawngtai chhunzaw