𝐓𝐡𝐮𝐩𝐞𝐤 𝐑𝐨𝐩𝐮𝐢 𝐈𝐈: 𝐇𝐍𝐈𝐌 𝐁𝐀𝐖𝐊 𝐓𝐇𝐋𝐀𝐖𝐑 𝐁𝐀𝐖𝐊

   

Kan ram riangte hi vei lo fa kan awm lo emaw tih turin kan phu suau a, pate thinthawk an sawi ang maiin kan thin a han ur meuh chu kan che rem rem mai a ni a. Awmzia pawh a nei ngei thuk ngei e. Thil awm lo a ni lem lo va; tin, kan za vaiin kan vei tlan a hun tawh tak zet tih hriat loh theih a ni lo. Chutih lai mek chuan ramri chungchanga huaisen em em chauh hi a tawk lo tih kan pawh phak a ngai. Kan fairel bel khawih che pha khawp leh kan mimal hringnun pumpui hmakhua her bawih khawpa kan inngaihtuaha thutlukna fel kan lak a tul tawh a nih hi. Pu Roluaha fiamthu a, “Neih ang ang, chem neiin chem, tuboh neiin tuboh, hreipui neiin hreipui, nei lovin nei lo…” thleng thlenga kan tan a ngai. Thu mai ni lo, a takin. 

 

I kuta mi kha eng nge ni?

He zawhna hi zawhna pawimawh leh ril ber pawl a ni ngei ang. A zawhna awmzia hrim hrim aiin a zawttu rilru leh a thiltum a pawimawh zawk mai thei bawk. Mosia hnenah Pathianin a zawt a, Mipui riltam hrai chungchangah khan Isuan a zirtirte hnenah ‘Eng nge in neih?’ a ti bawk. Thil ropui tak a thleng ve ve. He zawhna zawttute hian an zawhate thil neih, an chakna leh thiltihtheihna hre turin he zawhna hi an zawt lo tih kan hria. Thil pawimawh leh ropui a tih dawnin a hmanrua tur a kuta awm kha a hre duh mai a ni a. A thiltihtheihna lantir a tum a ni zawk a. A zawha chakna a teh lova, ama chakna kha khawiah nge a par chhuah dawn hriat a tum mai a ni. Zawhna dawngtu chu a tet poh leh a zawttu lenzia a lang dawn si a. Tun hi mi kuta sahrang hmuh hun a ni lo. Engtin nge kan kuta thil awm chu van Pathianin he ram, mite mita hmuhsitawm tak, din chhuah nan a hman theih ang? Eng tin nge he hnam, hnam zawng zawng zinga te ber, hi hnam ropuia a siam theih ang? Chu chu i kuta awm i hman dan khan a zir dawn a ni. Sum i ngah mai thei, kut bengin i awm a ni mai thei; dinhmun sangah i ding mai thei, mi hnuaia thawk ve mai i ni mai thei; i lar a ni mai thei, tuma hriat hlawh lo chi i ni mai thei bawk – engmah a lem chuang lo. I kutah eng nge awm? Engtin nge ka rawn hman tangkai dawn? Thlaler tiang pakhat leh chhangper 5 leh sangha 2 ngawt chu kan kawl lo deuh a ni lawm ni? Talent khat i dawng a nih chuan talent khat chu i tipung mai tur a ni. Tipung lo chungah a lawm lo. Mi mal piah lam thil pawh ngaihtuah rawh. He khawvel ram zawng zawng thlir hian Zofate hi zawng talent khat dawngtu ang deuh kan nih mai hi maw. A sumpui kiam hlauh vanga phum him hmiah nge pawimawh, peipun? Kan talent khat dawn hi eng ti taka hmang tangkai tur nge kan nih? Kan kutah hian eng nge awm?

 

Kan tih dan pangngai hian kan ti zel thei ang em?

A chunga mi nen khian khawi zawk nge zawhna pawimawh zawk tih hriat a har hle mai. Kan ramin hma sawn se kan duh theuh, kan hnam hian zah phur ila kan ti theuh bawk a, mahse tuna kan kalphung pangngai ang hian khawi ram nge kan thlen ang? Kan tih dan pangngai chuan kan nih dan pangngai bawk a hring dawn si a. Ram leh hnam hi amah leh amahin a inher tha ngawt dawn lo. Mipui nun danglamin danglamna a thlen dawn a ni zawk. Kan mimal rilru kalphung, kan duhzawng, kan tum leh ngaihhlutin a hril vek dawn a ni. Chhungkaw nuna kan infuihna leh kan inphutna ten hnuhma pawimawh tak a nei vek. Eizawnna kan dapna rilru, kan naupangte ‘aim in life’, khawtlangin kan thil um ho leh nuam kan tihzawngte hi kan ram leh hnam siamtu an nia. Hengte hi a danglam lo a nih chaun engmah a danglam dawn chuang lo. A vawia vawi khat na na na chu Politiciante hian term leha tlin loh ngam thakin policy tha han duang chhuak sela maw! Sorkar hna zawngtute hian mipui rawngbawlna rilru dik takin hna hi hmuin han thawk sela! Sumdawngten hlawk tam lam aiin midangte tana malsawmna, ram mipuite duhsakna tawp nen han sumdawng sela! Pathian thu hriltuten a ngaihnawm leh hlimpui tur ngawt ni lo thutak kha telh tawlh pawh ni se min han tulh lui ngam sela (naupang dam lo damdawi ei duh nachang hre si lo tulh luih ang deuh). Kan theologianten kan thlarau leh taksa hmasawnna tur han ngaihtuah chhuak chur chur sela! Thlarau miten hlimpui tur ber han hlimpui hiam hiam sela a va nuam dawn em! Nula tlangval ten vanglai hun chen ringawt buaipui lovin ram leh hnam hmakhua an suih theih nan an vanglai hun hmang tha tura duhthawhin, zirlaiten mahni inhaivur leh chhungkaw nawmna tur piah lamah ram leh hnam pumpui hmasawnna vei phakna nen lehkha han zir sela; zirtirtuten chumi hmathlir chu nei ranin han zirtir sela chuan aw - ‘Zoram Thar’ a piang ngei ang.

Ram pumpui hnim phum

Kan ngaihtuahna hi ram pum huap a nih zel a ngai. Pathian Thu pawh ram pum huap zawnga ngaihtuah thiam a tha. Isuan ti tura min hrilh vawiin thlenga Kohhranin a ngaih pawimawh em em chu ‘Pa leh Fapa leh Thlarau Thianghlim’ hminga baptis a ni. Engtia tih tur nge tih chungchangah kum za tam tak Kristiante an lo inhnial tawh– naupang nge, puitling; hnim phum nge thlawr? Heng zawng zawng hi kalsan lawk ila, a awmze pangngai hi kan paih tihna ni lovin, a awmze thar i zawng lawk teh ang. Hnimphum hi Kristian tamna ram, Mizoram angah te hi chuan kan hmang thei hle turah ngai ila. Tuia i liluh chuan i hawina apiangah tui i hmu ang. I chung, i hnuai, i hmazawn, i ding, i vei chu tui vek a ni. Kristian society-ah chuan Pa leh Fapa leh Thlarau Thianghlim hriatnain kan khawtlang kan chiah hneh  a tul tihna a ni. ‘In hawina apiangah Trinity hmuh turin awm rawh se,’ a tihna a nih hi. In khawtlang chu Pathian hriatna leh tihnain hnimphum teh u, a tihna angah ngai ang. Kristian nun tawngchham chu he baptisma hi a thleng tlem mah mah hi a ni ngei ang le. Khawvelah mi tam takin Pathian hnawksak an ti a, Pathian tel lovin hma an sawn zawk dawnin an inhre tawh; keini erawh chuan kan Pathian Thu hriat kan la nun chhuahpui lo zawk a nih hi. Zoram hi Trinity hriatnaa kan baptis a hun e. Chu chu Ram leh Hnam damna a ni ngei ang.

Kil tin chhinchhiah

Baptisma, baptizo, hi ‘thlawr’ tihnaa kan pawm a nih pawhin a tangkaina a kiam chuang hauh lovang.  Kan hrilhfiahna zulzui chuan, ‘Ringtute u, in thiltihna apiangah Pa leh Fapa leh Thlarau Thianghlim lang rawh se. Trinity hriatna chu hnawih tel zel rawh u,” tihna ang te pawhin kan hmang thei dawn a ni.  Kristianten kan tam hnehna ni lem lo, India ram pumpui leh hmun dangah te hian hman a lo remchang leh ang a. “Trinity chuan in awmna leh telna kha chhinchhiah zel rawh u,” a tihnaah i ngai ang u. A va tha dawn em! Unaute u, kan awmna hmun hi Trinity hriatnaah kan hnimphûm a nih loh pekin, kan telna apiang hi Trinity hriatnain i chhinchhiah zel ang u. Lehkha kan zirlaia kan thian pakhat BMa chuan a hming ziah hi a hrat khawp a, hostel bang leh hmun hrang hrangah a ziak zel zul mai lah taka. “Bak an perh thla a, a thlaah ‘BMA’ tih hi a lo inziak e!’ tiin an fiam thin. Chutiang aia nasa chuan kan ram leh hnam hi kan baptis a ngai. A awmzia hi thlawr huh satliah a ni lo tih pawh kan hria. CHU PATHIAN HRIATNA CHU MIN CHIAH PIL HMUK KHAWP NI SELA, KIL TIN MAIAH HIAN CHU HRIATNA CHU LANGSAR RAWH SE.

*****RE06082021*****