𝐙𝐀𝐈 𝐋𝐄𝐇 𝐋𝐀𝐌 𝐁𝐈𝐇𝐂𝐇𝐈𝐀𝐍𝐍𝐀
Mizo Kristiannaa bet nghet tak chu lam hi a ni. Kohhran pawl tin hian kan pawm thiam em em vek a. Vulh len kan tum theuh emaw tih theih a ni. Thlarau nun tehfung pawimawha kan hman rim tak mai a ni lehzel bawk a. Kan lam luih luih tawh chuan thil tha leh ropui tak changa inngaiin kan lungawi tlang a, Thlarau Thianghlimin hna thawk nasa hleah kan pawm tlang mai thin a ni awm e. Chutih rualin kohhran inkhawmah lam thlarau a thawh theih mang tawh loh chuan kan beidawng ru a, boruak thar mamawhin kan inhria a, lunglengin kan khua a har mai thin a ni. Hlim lam hi kan ngaisang hle a ni phawt mai. Zep rual a ni lo. 𝐇𝐫𝐢𝐧𝐠𝐧𝐮𝐧𝐚𝐡 𝐥𝐚𝐦 Mihring nun pangngaiah hian lam hian hmun lian angreng tak a chang ve hrim hrim a. A thlarau zawngin emaw a tisa zawngin emaw hringfate hian lam nuam kan ti hrim hrim tih chu a chiang. Culture tinah lam a awm a kan lam dan erawh a danglam hret thin mai chauh a ni. Hlim leh lam hi a inzawm tlat bawk a. Awmze nei deuhva lam dan bik a awm laiin tih dan...