𝐉𝐎𝐇𝐍 𝐂𝐀𝐋𝐕𝐈𝐍𝐀 𝐊𝐀 𝐍𝐆𝐀𝐈𝐇𝐒𝐀𝐍 𝐂𝐇𝐇𝐀𝐍 𝐏𝐀𝐊𝐇𝐀𝐓
Kan chiang lo
Thlarau
hruai nun leh ‘thlarau mi’ nihna hi kan ngaihtuah fo a tul ngawt mai.
Protestant zidingin Thlarau Thianghlim kan inzirtir dan pangngai piah lama
harhna leh hlimna kan uar luat avangin Pentecostal leh Charismatics an tihte
uar lam hian min chim hneh takzet niin a lang. Harhna kan lo dawn tawh te a
lawmawm, mahse harhna chauha intihnun kan tum hi chu a dik lo thlawt a ni.
Revival dik tak a pawimawh rualin Revivalism chuan min tichhe mek emaw tih
theih a ni thung si. ‘Thlarau mi’ nia kan kawhtir pawh insum zo lo va sapa tal
leh mi baka che dangdai ngam te hi an ni fo ta a nih hi. Kan tehfung chu
Thlarau mi tehfunga tel miah lote pawh an ni hial zawk a! Thenkhat phei chuan
an ‘thlarau mi’ nihna leh thlarau chan ropui tak te avangin an lo inchhuang mek
bawk a! A lehlamah, chutiang nei ve lote lah thlarau mi lovah an lo inngai mai
bawk si! Kan va chiang lo hlawm tak em!
Thlarau Theologian
John Calvina leh a zirtirna te hi ‘hil’, ‘hul’ leh
‘thlarau lo’ riauva hria an awm leh thin a. An Thlarau beisei dan a danglam tak
lutuk vang a ni mai thei. A nihna takah chuan Thlarau Thianghlim a uar luat
avangin ‘Theologian of the Holy Spirit’ tih a hlawh thin a ni a. A theology
(Pathian Thu zirtir dan) zawng zawng hi Thlarau Thianghlimin a luan chhuak vek
zawk hial a ni awm e. Harhna leh hlimna hmun chauhva Thlarau Thianghlim hmu
thiamtute nen chuan Calvina zirtir dan hi a inpersan em lah tak a. Kohhran siam
that (Reformation) kha Thlarau Thianghlim thiltihtheihna, pawlna leh Amah
avanga zalenna thar chan zual hun a ni e, an ti a. Thlarau thilpek tam tak kha
Kohhranah hmuhin a awm thar leh a, tawnghriatloh leh tihdamna te ni kher lovin
finna, hriatna, thupuanna, hriat thiamna leh rinna te an nei nasa em em a ni. Thenkhat
chuan “Reformed theology hian theology dang zawng zawng (Pentecostal theology
telin) aiin Thlarau Thianghlim hi a uar zawk a, a hrethiam thuk zawk a, a hre
kim zawk a, a thiltihtheihna leh nihphung zawng zawng hi a rem fel ber a ni,”
an lo ti hial a ni. Chutiang tak chu eng nge a nih le?
Thlarau
Thianghlim hnathawh
A Pathian Thu zirtirna kalhmangah John Calvina hian
Thlarau Thianghlim a dah pawimawh lawr lak a, a chang phei chuan thenkhatin an
hre thiam lo lek lek a ni hial awm e. Ringtu nihna leh nun zawng zawng hi
Thlarau Thianghlim tel lo chuan a awm lo, tih theih a ni. A sawi dan chi hrang
hrangte chu:
(i) Kristian kan nih
chhan leh Kristian nun kan nun theih chhan kan chhui tawpna chu Pathian
khawngaihna avanga Thlarau Thianghlim hnathawh vek a nihzia thu hi Calvina
zirtirna a ni a. Kristian nun chu Thlarau Thianghlim bul tan, a hruai leh a vawn
him a ni. Mihring chaknaa innghat a ni lo.
(ii)
Pathian Thlarau
Thianghlim chu khawvel vawnga, siamtha a, hruai a, enkawltu a ni. Hetiang hi ni
lo se khawvel hi a buai nuai ang. Ringlote zingah pawh thil dik, thil tha, leh
mawi zawng zawng hi Amah atanga chhuak a ni.
(iii) Calvina chuan Pathian Thu ziak emaw, thuhril emaw hi
Thlarau Thianghlim hnathawh tel lo chuan a nung thei lo, a ti. Hemi ngaihdan
hi Calvina atanga chhuak liau liau(original) niin an sawi. Pathian Lehkhabu
nihphung leh a thuneihna pawm theihna hi Thlarau Thianghlim avanga neih theih
chauh niin a sawi a ni.
(iv) Isua Krista tlanna hnathawh zawng zawng hi Thlarau
Thianghlim tanpuina tel lo chuan mihringin a sawtpui thei lo, tih hi Calvina
thupui a ni. Chanchin Tha thuchah pawimawh - kohna, piantharna, simna, rinna
avanga thiamchanna - tih zawng zawng hi
Thlarau Thianghlim hnathawh mihringa lang vek a ni. Pathian Thlarau
hnathawh tel lovin ringtu a awm theih loh va, vanram a kai theih loh a ni ber
mai. Calvinism hi Thlarauva innghat theology a ni tih kan hre thiam mai awm e.
(v)Calvina chuan Kohhran hi a lu (Krista) leh memberte
(ringtute) Thlarau pakhat hnuaia hmangaihnaa inzawmna niin a sawi. Calvina hian
Kohhran a dah sang hle mai a. Thlarau Thianghlim leh Kohhran sawi hrang ve
lovin Thlarau Thianghlim rorelna (pneumatocracy) angah a ngai a ni ber mai.
Hmuh hmaih a awm em
Mihlim
thenkhat chuan, “Tunlai khawvelah hian Thlarau Thianghlim hnathawh in hmu ngam
tawh lova, Pathian hi a hring a hrana hna thawk turin in beisei ngam tawh lo a
ni,” an ti fo a. An ‘Thlarau Thianghlim’ hriat hi a te mah mah niin ka hre thin.
Engvangin maw? Mak danglam leh rik huk hun chauha Thlarau Thianghlim hmu
thiamte hi chuan Thlarau Thianghlim nihna leh a hnathawh dan an la man chiang
tawk lo a ni ngei ang.
Pentecostal/Charismatic
ho pawm dan ai daih hian Calvina zirtir dan hian Thlarau Thianghlim hi a hre
thiamin a hre thuk zawkah ka ngai a; Thlarau Thianghlim hnathawh leh
thiltihtheihna pumpui chu kan man ber zawkin a lang. Anni ho hian Thlarau
Thianghlim hnathawh hi an uar lutuk a ni lova, an uar lo lutuk zawk a ni. An
khawhawi a zau tawk lo. Thlarau leh thilsiam chungchang, Thlarau leh Bible inlaichinna,
Thlarau leh Kohhran leh Sakramen te, Thlarau leh Kohhran kalphung te, Thlarau
leh Kristian nun inkungkaihna zawng zawng an hmu thiam lo. Mimalin a harh thar
pui vuk thil chauh an uar a, thil engkima Thlarau hnathawh leh hlutna hi an
pawh pha lo zawk fo niin a lang.
Thenkhat
chuan ‘Calvina’ hming lam rik ringawt pawh an nin em em lai leh, uluk taka
Kristian nun leh zirtirna kalpui tumtute an hmuh ro em em lai hian John Calvina
nge nge hi a lo rilin Pathianin hriatna a lo pe thuk mang e. Thlarau Thianghlim
chungchanga a zirtirna phei hi chu ram leh hnam thatpui tham, ka ngaihsan em em chhante zinga pakhat a ni ngei mai.
*****RE05032021*****
Comments
Post a Comment