𝐏𝐑𝐎𝐒𝐏𝐄𝐑𝐈𝐓𝐘 𝐆𝐎𝐒𝐏𝐄𝐋 𝐋𝐀𝐊𝐀𝐇 𝐈𝐍𝐕𝐄𝐍𝐆 𝐑𝐀𝐖𝐇

Sap ngaisang ta reng reng Mizote hian Pathian Thu leh rawngbawlna lamah pawh Sap style kan entawn nasa hle a, American Evangelicalism hi min hnehtu ber a ni awm e. Entawntlak tam tak a awm laiin a hleihluak deuh, khu lama mi pangngai deuhin an duh miah lohte thleng thlengin lo tih ve kan tum ta thin a. An thiltih dan leh zirtirna kan thlit fim thiam tak si lovah chuan, mipui hip tam thei nia kan ngaih tihphung leh thuchahte pawh kan lo copy ta zel mai a ni. A hralh a tlak phian phei chuan Thlarau hnathawhah kan ngai zui mai bawk si a. Kan ramah pawh hian bu a khuar ngheh a hlauhawm dawnin ka hria. Hriatna thlarau kan mamawh takzet a ni.

 

Benny Hinn-a nau Henry Hinn-a fapa Costi Hinn

 

Mizote ral ngaihsan hlawh tak pakhat chu Benny Hinn hi a ni a, hman deuh khan a nau Henry Hill pawh kan chah chhuak tawh a nih kha. Mahse tum ang erawh chuan a hit ta vak lo niin ka hria. Mizote beisei dan nen a inmil kim chiah lo pawh a ni mai thei. Tunah hian Costi Hinn, Henry Hinn-a a fapa hian hriat a rawn hlawh chho leh ta a. Amaherawhchu, a ni hian a pate thiltih dan, rawngbawlna an kalpui dan leh an theology hrim hrim a rawn do nasa hle mai a. Lehkhabu a ziak nual tawh nghe nghe. Pawn lam atanga anmahni dotute sawi ni lo, a chhung ami ngei leh an rawngbawlnaa lo tel, lo chen vetu ngei sawi a nih tak avang hian mite rilru a la lehzual nghe nghe a ni. Costi hian a papuia ‘Benny Hinn’ leh a pa ‘Henry Hill’ ten ‘Prosperity Gospel’ an hril thinin Chanchin Tha a hlatzia a sawifiah thiamin, a hlauhawmzia a tlangaupui nasa ta hle mai le.

 

Prosperity Gospel chu eng nge?

 

He gospel hi chuan ‘Retheihna te, natna te hi ringtute nuna lang tur a ni lo va, kan tuar fo chhan  chu kan rinna chak tawk loh vang a ni,’ a ti thin a ni ber a. Chuvangin, ngaithlatute chu an rinna chak ang zela  Pathian hnen atanga sum leh pai beisei tur te, an rinna mila an natna atanga damna chang turin an nawr thiam hle a ni. Dam duh leh hausak lehzual duhte chuan an neih ang ang an phal tak mai thin avangin, hetiang speakerte hi hausak pawh an hausa chak hle thin bawk. Dam leh hausak duh vang chauha mi thilpek tling khawma Millionaire/Billionaire an lo ni a, nuam tawpa an khawsak pawhin ‘Pathian malsawmnaah’ an ngai mai thin. He thu hi Costi Hinn hian Benny Hinn hnung a zui laia an khawsak dan chungchang a ziak, God, Greed, and the (Prosperity) Gospel: How Truth Overwhelms a Life built on Lies (2019) tihah a ziak chiang hle. Prosperity gospel hi chuan beiseina dik lo pein Chanchin Tha hi mi sum sawr chhuah nan a hmang a ni deuh ber. Pathian atanga damna leh hausakna beisei leh dil ngawr ngawr, a lo thlen loh chuan mahni rinna chak tawk loh vanga ngaih zel mai…chutiang thu hmanga mi tam tak an han bum ngam hi thil mak tak a ni zawk e.

 

Ngaihdan mak angreng tak

 

Benny Hinn-a rawngbawlna chu a unau, a vua leh vangte enkawl a ni ber a. Mihring khawsakna lamah pawh an che sang rep rep viau a ni awm e. Mi hausa tawntawte nun dan phunga an khawsak thu Costi hian a zep lo. Tin, an chhungkua chu nat loh tur a ni tawp mai. Chutih lai chuan Costi-a ni pasal, rawngbawlnaa puibawmtu pakhat chu a cancer ta tlat mai a, hun engemaw hnuah a thi ta nghe nghe a ni. Costi-a mi ngainat em em a nih avangin amah pawh a rilru a buai phah hle a ni awm e. An zirtir dan zawng zawng nen a inkalh si! Costi-a chuan ‘Chhuanlam fahrahte te kan zawng a, a tawpah chuan dam lo hi tihdam a nih loh nachhan point lian zual 4 an chhawpchhuahte laka a lo fihlim loh vang niin an hre ta a,’ a ti. Chungte chu: (i) A tha lo zawnga ngaihtuah thin – i taksa dinhmun chungchangah ngaihtuahna leh tawngkam tha lo lam i hman thin chuan damna a thleng thei lo; (ii) Tihdamna awih tha duh lote bula awm thin –i taksa dinhmun chungchang an ngaihdan midangte i sawi tir fo chuan damna a thleng mawh; (iii) Rinna neih chak tawk loh – Pathianin a tidam dawn che tih i ring tawk a ni tih lantirna i nei nasa tawk lo emaw, sum i pe tam tawk lo emaw a nih chuan damna a thleng meuh lo; (iv) Lalpa hriakthih sawisel – Pathianin a hriak a thih mihring sawisel emaw, kalh emaw hian damna a thlen duh lo hle. Heng point 4-ah hian Pathian Thu tluantling a awm miah lo a ni hial awm e Ngaihtuahna  seng thiam tan chuan nuihzatthlak mai a ni.. Mahse, keini zingah pawh hetiang deuha ngai leh zirtir kan awm ve leh tlat thin a ni.

 

Prosperity Gospel dik lohna

 

He gospel danglam tak nawmna lo chen vetu Costi Hinn hian a dik loh leh hlauhawmzia hi a hmu chiang khawp mai a. Ani pawhin Pastor a nih anga a kohhran enkawl mekah chuan a zirtirna a thlak ta hlawk a ni. Evangelical theologian tam tak he ‘gospel’ lo sawisel tawhte hnungzuiin, a bu puia lo tal ve tawh ngei chuan: ‘Prosperity gospel chuan Biblea kan hmuh Gospel hi her danglamin mihring duhzawng neih tumna thilah a chantir a. Pathian chu dawi thiam (duh duh neihna hmanrua) ang mai maiah a chhuah a. Isua tlanna ropui ngei pawh he leia kan hausakna thlentu atana an hmang tlat mai thin hian tlanna thu an man fuh lohzia a lang a. Isua Krista nihna ngei pawh zah lovin kan thil duh leh chakzawng neihna hmanrua angah an ngai a ni ber a. Pathian Lehkhabu te hi an sawi tum mil luih tirin an la kawi thin. He gospel suak hi sum ngainatnain a nawr kal a ni a, chuvangin piangthar suak a siam teuh bawk. Rinna a hrilhfiah dik ngai lo va, thiltiha innghat tlat rinna a zirtir avangin nun a tihah thin a ni. Prosperity gospel hian hausakna a ngaihsan em avang hian khawvel hmaah Krista Chanchin Tha hmel a tichhe nasa a. Tin, mi chak lo zawkte a bum thin a ni,’ tiin a sawi miah miah mai a ni. He gospel suak hi kan lo tuipui ang tih a hlauhawm ngawt mai. Social gospel kan tih mai thin hi ‘liberal’ deuha ngaiin tuna kan sawi ang chite hi ‘evangelical’ lam tangah kan han ngai deuh ngawt thin a. Mahse, he Prosperity gospel ngat hi chu America chhul chhuak dik tak, tuna Africa ram tuam mek leh Asia ram hmun hrang hranga lar tawh tak, Evangelical theologiante lu tihaitu, an think-tank pakhat Lausanne Movement pawhin a lo hnawl tawh (condemned) a ni. Chhiar duh chuan lausanne.org/content/a-statement-on-the-prosperity-gospel chhiar theih reng a ni. Pu Trump-an President a tlin tirha lawmluhna inkhawma Prosperity Preacher lar Paula White-i a hman pawh kha Evangelical chhungkuaah sawisel a hlawh viau a nih kha.

 

Mizote zingah Prosperity Gospel hril kan awm em?

 

He Chanchin Tha suak (Prosperity Gospel) hian Mizote thlarau nunah eng angin nge hnuhma a neih tawh? tih hi hriat duhawm pakhat a ni a. Kohhran zirtirna pangngai nen a kar a inhlat em avang hian min la hneh lutuk lo chu a ni mai thei. Amaherawhchu, tuipui kan tam sawt viau niin a lang a. Tihdam theihna nena rawngbawlna hian he thil hi a hnaih zual a, ngaihdan chin kan neih thiam loh palh a hlauhawm hman thin. Prosperity gospel hriltu larte hi ‘tihdam theihna’ nena kalkawp an ni deuh vek lehnghal a. Kenneth Hagin, Kenneth Copeland, TD Jakes, Crefo Dollar, Benny Hinn, Joyce Meyer, leh Joel Osteen, Paula White, Andrew Wommack te hi a lar pawl an ni a. Tun hnu hian Benny Hinn leh Joyce Meyer te hi an inhmu chhuak deuh a ni awm e.

 

Kan sawi tak ang hian thilmak hmanga rawngbawlna leh tawngtai dam theihna lam uar te hian an fimkhur viau loh chuan Prosperity Gospel hi an hnaih duh a. Pentecostal theology chi khat anga ngai pawh an awm a ni. Tun hma deuha El- Bethel Camping vela an uar tak ‘Rinna Thlaichi’ tih kha Prosperity gospel hriltu hrang hlui Oral Roberts-a hman thin tih dan phung pakhat a ni a, kan rinna a chak chuan dam mai tura inngaihna ang hi hetiang Chanchin Tha suak hi a ni a. Tunlai thangthar zingah Breakthrough Ministry an tih hian Prosperity gospel hi a uarin a hril nasa viau a ni awm e. Tuipui tam tak an awm lehnghal. Fimkhur a ngai ngei mai.

*****RE05022021*****