𝐓𝐡𝐮𝐩𝐞𝐤 𝐑𝐨𝐩𝐮𝐢 𝐈𝐈𝐈 : 𝐙𝐈𝐑𝐓𝐈𝐑𝐀 𝐒𝐈𝐀𝐌 𝐓𝐇𝐄𝐎𝐋𝐎𝐆𝐘
Tawngkamin min bum fo
Tunlai Kristiante zinga tawngkam
lar ber leh kan thlarau nun tehfung atana kan hman rim ber chu ‘piangthar’ tih
hi a ni a. Piantharna dik tak chu duhawm, hnawl theih loh leh pawimawh tak a ni
zel ang. Amaherawhchu, tunlai khawvelah hian he tawngkam leh a nihna hriatsual
avangin mi tam tak inthlahdahna leh ngaihthatna dik lo-ah a hruai lut tih kan
hria. Kan uar ang hu hian Bible-in a uar nasa lo tih hriat pawimawh tak a ni. Han
chik deuh chuan ‘piang thar’ tih hi tum 3 chiah a lang tih kan hre mai a. Isuan
tum khata vawi 2 a hman kha a ni mai. Chu pawh chu theologian, mi puitling,
thil hrethiam china ngaih Nikodema hnenah a ni nghe nghe. Mipui zinga thu a
sawiin ‘piangthar’ tawngkam a hman kan hre lo. A tul lo a ni mai thei. Apply
fuh loh a awl deuh avangin a ti ve vak lo a ni mai thei. Hmangtu dang awmchhun
Petera phei hi chuan ringtute nihna sawi nân a hmang mai zawk a ni. Pianthar
testimony nei ropui tak Paula khan ‘piangthar’ tih lam a buaipui lo a niang, a
tawngkam a hmang miah lo a ni awm e. Tin, ‘kristian’ tih pawh hi Thuthlung Thar
bu pumpuiah tum 2 chiah kan hmu bawk a. Kan nihna hriltu tawngkam kan ngainat
tak takte leh ngaihthatpuite hi Bible hian a uar tehchiam lo a ni ber e. Thu
ril tak inphum a awm em ni ang?
Zirtira siam
Chutih rualin ‘zirtir/zuitu’
(disciple) tih erawh chu tum 269 lai a awm an ti. Mizotawnga Isua ‘zuitu’ leh a
‘zirtir’ tih hi Grik tawngah tawngkam pakhat a ni a, Thuthlung Tharin ringtute
nihna atana a duh leh a tawngkam pawh a hman uar lawr lak a ni awm e. Tunlaia
tawngkam dang kan chher tam tak chhan hi he nihna tak hi peh hel hram kan duh
vang a ni thei ang em? Theologian-Philosopher
hriat hlawh tak Dallas Willard chuan, “Thuthlung Thar hi Isua zuituten Isua
zuitu nihna chungchang Isua zuitute tana an ziah a ni,” a ti hial. Isuan ‘Thupek
Ropui,’ a pêk khân, ‘Kristian ka ni,’ ti mai mai, ‘Ka piangthar tawh,’ ‘Ka
thlarau chan a sang em!’ ti mai mai, kha a rilruah a awm lo; A zirtirte siam
tura a tih chu ‘Amah Zuitu, A Zirtir’ kha a ni. ‘Nangmahni ang hi in siam zel dawn nia,’ a ti a ni ber. Kha tlangah
khan kan Lalpa chuan hmalam hun a thlir vang vang a, a duh ang tak a hre chiang
- ‘Amah Zuitu/ A Zirtir’ a ni.
Zirtir nih awmzia
Isua Zirtir chu Isua hnena zirtu
leh Isua zuitu, tihna a ni a. Isua rilrua awm chu a chiang mai a, “Thu ka pêk
zawng zawng che u pawm turin,” tih hi a ni. Isua zirtir, a mi ni tura Isuan a
zawn chu a thupek zawng zawng zawmtu tur a ni. Chu chu Galilee rama rawng a
bawl thin lai khan a sawi chiang khawp mai: “Tupawh ka hnena lo kal chuan, a pa
te, a nu te, a nupui te, a fa te, a unau te, a farnu te, ama nun nen lam pawh a
huat loh chuan ka zirtir a ni thei lo vang. Tupawh mahni kraws pua mi zui lo
apiang chu ka zirtir a ni thei lo vang.” “Tupawh a kraws pua mi zui lo chu, ka
mi ni tlâk a ni lo,” Isua khan a hnungzui tur a uluk khawp mai, ‘Ni tina thihna
khawpa tuar huam lo chuan min phû lo,’ (worthy of me) a tihna a ni awm e. Kan
sawi awlsam fo ang ngawt hi chu a ni lo.
Rinna dik tak
Tlangval hausa kha Isua bulah a
rawn kal a, “Zirtirtu tha, chatuan nunna ka neih theih nan engnge ka tih tur?”
a rawn ti a. Isuan, “Dan chu i hria alawm…” a lo ti mai a. Tlangval chuan, “Ka
naupan têt atangin chutiangte chu ka zawm thin alawm,” a ti leh a. Isuan amah a
ring tak tak em tih a test dawn ta a, “I neih zawng zawng hralh la, pachhiate
pe la, tichuan lo kal la, mi zui rawh,” a han ti ta a. Chu fiahna chu a nawmna
turin a hausakna zawng zawng nge a rin zawk Isua Krista? tih kha a ni. He
testah hian he tlangval hausa hi a fail chiang hle mai. Isuan, “Mi hausa
Pathian Rama luh ai chuan sabengtung hriau benga luh a awl zawk,” a ti zui.
Isua hi chuan zêp lovin a sawi rawng mai thin. Kan ngaihdan tlangpuiah chuan mi
nunnem, zaidam, tawngkam hriam phuh chhuak ngai lo, tumah sawisel ngai lo a ni
mai thei a. Mahse, han chîk teh, “…ka mi
ni tlâk a ni lo…” a ti thak mai a nih hi.
Thilhchilh ngam nun
German theologian leh martar
Dietrich Bonhoeffer chuan, “Isua zirtir chu mahni lawng hâlral a, amah zuitu hi
a ni e,” a lo ti a. A sawi fiah thlawt a ni. Mahni chuanna lawng pawh hal hmiah
ngam khawpa zui tumtu leh zui ngamtu chu Isua Zirtir a ni a. Mahni neih zawng
zawng kalsana zui ngam chu Isua Zirtir dik tak a ni. Thliarkar beih dawn chuan
lawnga kal a ngai a. Chu thliarkar chu sipaiin lâk an tum tak tak chuan an kaina
lawng kha an hal hmasa ber thin a ni. Kîr leh chance an siam lo a, tlanchhiat
theih a ni tawh lo. Thihchilh nun a ni tawh ang. (Chhandamna bo theih leh theih
loh chungchangah an inhnial vak vak lo mai thei a ni). Chu chu Isua Zirtirte
nihna, Isuan a duh chu a ni a; Thupek Ropuiin a sawi midangtea kan din tur leh kan nihphung tur
chu a ni.
Ngaihtuah
chiang rawh aw
Kohhran leh Kristian nun kan
ngaihtuah hian eng nge kan beisei le? Nuam tih tlan lam kan ngaih pawimawh
chuan brake awm miah lovin min tihlimtu thlarau apiang kan um ang. Vanram kai
hrim hrim kan khelh chuan piantharna suaka luh a awl. ‘Chawm bawk hawp bawk’ an
tih anga lei malsawmna tela Kristian nih kan tum phei chuan ‘prosperity gospel’
kan tih ang chi kha tuipui kan tam telh telh dawnin a rin theih. Amaherawhchu,
Lal Isuan Thupek Ropui a peka a rilrua awm langsar ‘Ama zuitu tak nih leh A
zirtir ni tura a tam thei ang ber siam’ hi kan thupui a nih chuan kan ngaih
pawimawh tur leh hril tam ber tur chu ‘thuawihna’ a ni tih a chiang hle a ni.
*****RE26022021*****
Comments
Post a Comment