𝐙𝐀𝐋𝐄𝐍𝐍𝐀 𝐙𝐈𝐊𝐓𝐋𝐔𝐀𝐊

 

Mihring nihnaa inphum nghet tlat pakhat chu amah phuartu apiang atanga tal chhuah a duh zelna hi a ni a. A zalen hma chuan a tang tang tang thin a ni ber. Hmasawnna leh changkanna kan tih zawng zawng pawh hi engemaw phuartu atanga tal chhuah tumna thil vek a nih dan a awm. Mahse thil lungchhiatthlak tak erawh chu zalenna tak a thleng mawh em em si hi a ni a. Thil pakhat atangin zalen mah se, thil dangin a lo bawih bet leh thin a ni si a. Zalenna hi duh ang anga awm theihna anga ngaih dawn phei chuan mihring hi zalen thei a ni lo tih a chiang a, zalenna famkim a awm lo a ni mai dawn a ni. Tumah hi duh dan dan leh duh ang anga awm theih a ni si lo. Chutianga awm tum chu kawla ni chhuak thu hnuaia kan awm chhung hi chuan ‘rilru buaina’ chi khat a ni zel dawn a. A chhan pawh zalenna famkim chu Pathian chauhvin a neih vang a ni.

 

A pawh a na

 

Duh dan dana awm chu kan chak a, mahse chutiang nun chu duh loh dana awmna a lo ni leh si. Thangtharte zingah nu leh pate thurochhiah emaw, thuneitute dan leh hrai, sakhaw zirtirna leh khawtlang inkhaihhruaina chi hrang hrangte hnawk ti riau a, chutiang laka tal chhuah tum phet te pawh an awm thin. Khawthlang, ram zalen leh changkang zawka kan ngaihah phei chuan an tam hle tih kan hria. A siper kan lo dawng ve awl lo bawk a. Sorkar chu sawi loh Kohhran te hial pawh hi inrahbehna hmanrua anga ngai te pawh an awm hial! Tunhnaiah phei chuan ‘Pathian a awm lo’ tih atanga sakhaw thil hrim hrim vuak chhiat vek a, mihring finnain chher chhuah liau liau nia an hriat ‘Science’ hmanga inkaihhruai duhna sawi vungtu pawh an rawn chhuak nual a nih hi. Thangthar intivengva deuh zingah hian a hralh a tla phian emaw ni teh reng ni! Chutiang dinhmun chu lo thleng ta sela Pathian tel lova nun tumna chuan bawih bettu dang a hrin chhuah hnemzia a rawn lang dawn si a. Hringnun hrim hrim hi kan chunga roreltu chi hrang hrang, kan do zawh si loh, laka insiamremna thil ni mai zawkin a lang. ‘Kan zalen a, kan zalen si lo’ a ni ber.

 

A famkim?

 

Pathian a awm chuan duhzawng a nei ngei ang a. Duhzawng a neih chuan mihringte zawm a phut ngei dawn bawk a. Zawm a nih loh chuan a thiltihtheihna ken kawh a tum ngei dawn bawk si. He thu hi mihring ngaihtuahna chuan a hre kar a. Chuvang chuan alawm mi tam takin Pathian an nin em em; “Pathian hian min hmu lo se ka ti a ni,” tia rawlthar khawvel chen tum tak pakhat a tawng chhuak ka hriat kha a awm hle a ni. Kan chungah hian thuneitu tumah awm lo se kan duh ngawih ngawih thin a nih hi. Mahse keimahni kan awm a, Pathian a awm loh chuan chu zalenna chu a hla telh telh dawn a ni tih kan hai palh zawk thin a lo ni a. Hmuh phak chin chauh hi thil awm a nih chuan kan rilru ngaihtuahna leh duhna zawng zawngte pawh thunun sa vek a ni tihna a ni dawn a. Khawl ang chauhvin mimal zalenna awm miah lovin kan taksa hnathawh angin kan awm tihna a niang a, zalenna a awm miah lo tihna a ni zawk daih dawn a ni. Chutiang a nih loh pawhin Pathian awm lohna khawvelah chuan mihring chu ‘a tlak tlak vanduai’ tih ang deuhvin awmzia leh kalphung pawh awm lo, lui luangin chhawl a len ang chauha tawn fuh fuh tawn fuh a ni mai mai dawn a, duhthlanna leh zalenna chu a awm lo chiang vai vai khawp ang. A nihna takah chuan lui luang pawhin kalphung eng emaw chu a la nei zawk a, chu pawh chu a awm dawn lo tihna a ni. Chuvangin, mihring hian zalenna kan duh tak tak chuan Pathian hi a kawk vang zawk a ni. Chumi piah lamah chuan zalenna zalen lo tak bak a awm dawn lo a ni. Ama dan leh a duhzawng hi zalenna hnar a lo ni zawk daih tih kan hmuh phak a tha.

 

Zalenna dik

 

Kristianna chanchin kum 2000 chuangah hian Kristiante zalenna chungchang hi hriat sual nasat ber pawl a ni hial awm asin! Tirhkoh Paula te hun lai atang reng khan Kristaa zalenna hman sual leh Dan uar luat thu kha an buaipui tawh a. Hemi kar velah hian mimal tin hi kan buai ru vek emaw tih mai tur a nih hi. ‘Thiltih vang a ni lo ve,’ an tih laiin ‘Thiltih tel lo chu thi a ni’ an ti leh roh si a. Hriat fuh a har bawk a nih hi! Thuawihna tehfunga kan tlin loh avangin Khawngaihna a nihzia an sawi a, Khawngaihna a nih avanga thu awih turin min ti leh tho si a! Helai taka kan hriat tura pawimawh ta chu - Kristiante zalenna hi duh dan dana awm theihna zalenna ni lovin Dan leh Sual thiltihtheihna laka zalenna a ni tih hi a ni. A chhan pawh duh dan dana awm theihna thil awm thei a nih loh avang leh mihring mamawh a nih loh vang a ni. Kan pian chhuah chiahin leilung danin min phuar nghal si a. Nihna hrang nei mihring kan nih chuan chu chu a nihphung tur a ni tawp. Chu chu tihbo theih mai a ni lo va, tih bo pawh a tul chuang lo. Mahse, Kristiante zalennaah chuan Pathian khawngaihna avanga chauha inremna an neihna leh sual thununna laka an fihlimna lai tak hi ‘Zalenna’ a nihna lai chu a ni. Mihring nun dan a ngai pawimawh tawh lo ni lovin chumi zulzui chuan ro a relsak tawh lo va; nun dika a nun theih nan bawihbettu sual lakah chuan a chhuah zalen a ni zawk. Duh duh tih theihna tura phalna an hmu ni lovin, an tih tur an tih theih nan chakna an nei ta daih a ni. Chu nun chu zalenna tak tak nun chu a ni.

 

A laimu

 

Khawvel finna chuan zalenna chu mihring tihrehawmtu–retheihna, hnam leh hnam inhalna, chi leh chi inhmelhuatna, inrahbehna, leh chutiang thil chi hrang hrang laka fihlimna angin a ngai thin. Dik chin awm mah se chutiang chu a tuamtu kawr ang chauh a ni ngei ang. Zalenna laimu chu thil pawimawh ber ti thei tur leh nihna pawimawh ber ni tura zalenna hi a ni lo thei lo a. Pathian ta ni tur leh a duhzawng ti tura zalenna leh chumi avanga hlim leh lawmna dawn theihna chu Zalenna laimu chu a lo ni a. Amah Nazareth Isua ngei mai kha hemi nun lantirtu chiang ber a ni bawk. Thu tha leh ngaihnawm, rilru tawk leh ngaihtuahna tithar leh pawt fan thei sawi mai ni lovin ama nunah zalenna tak tak awmzia chu kan hmu a. Damchhung khawsak ngaihtuahna atangin a zalen hneh hle a, khawvel ropuina leh dinhmun tha itna therte a nei lo va; lei lal te leh an thiltihtheihna zawng zawng hmaah chhete pawhin a zam lovin, thiltihtheihna nasa zawk hnuaia lo inhampuar ve mai mai an ni tih a chiang; mihringte phuartu natna leh thihna te hial chunga leng a nihzia a entir a, hringfate tlanna turin chu thihna kawng chu zawh mah se a tuk lawkah hmelma hnuhnung thihna laka a zalenzia puan a ni ta a nih kha. Isua Krista hian Zalenna tak tak hi a thua sawi mai duhtawk lovin, a takin kan zaa hriat atan a lo paltlang reng tawh a lo ni. Chutiang zalenna chu ringtute zalenna chu a ni e.

 

*****RE27082021*****