𝐏𝐑𝐎𝐒𝐏𝐄𝐑𝐈𝐓𝐘 𝐆𝐎𝐒𝐏𝐄𝐋 𝐂𝐇𝐔𝐍𝐆𝐂𝐇𝐀𝐍𝐆 𝐁𝐀𝐖𝐊

 

Hman deuh khan Prosperity Gospel chungchang ka ziak a, facebook lamah kan sawizui nual bawk a. Kan zir chian tawk loh vang nge maw ni dawn ni he fake gospel hi thudik ber anga tantu an lo awm nual mai. ‘Biblical’ em ema an hre tlat hi thil mak a ni. Doctrine thilah ngaihdan hrang hrang a tam tih hretu zinga mi ka ni ve a, thil tam takah mithiamte pawh an lungrual vek lo fo; mahse he zirtirna hi chu biblical scholar tih tlak tumahin an pawm ka la hre ve lo a. Liberal leh Evangelical scholars ten an hnawl rawn a ni a. Dik nia kan ngaih luih tlat chuan kan rilru kan hawng lo hle a nih theih ka ring.

 

Health and Wealth Gospel

Tunlai khawvela thil duh huam huamna leh nawmsak zawnna ringawt hmunah hian ‘Health and Wealth Gospel’ (Prosperity Gospel hming dang) chu duhtu tam awm tak a ni ve hrim hrim a. He fake gospel hril nasatu ber pakhat Kenneth Copeland-a nupui Gloria Copeland chuan, “Pathian Thu chuan chiang takin tlakchhamna leh reitheihna te hi Pathianin ama thu awihtute tana a thiltum a nih loh thu a sawi a...Hausakna hi Pathianin i tana a thiltum ngei a nihzia thutak hi i hriatfiah hma loh chuan Thlarau Thianghlim inzirtir ang che,” tiin a ziak a ni. Ani hian thlarau lama hausakna aiin lei hausakna lunghlu, car, in ropui, adt., a sawi a ni tih hria ila. A thu sawi hian Evangelical Pastor lar Edwin Lutzera thin a khei na ngei mai: “He chanchintha hi hmanlai Rome ramah khan hril theih a ni lovang, tunlaiah pawh ram rethei Haiti, Belarus, leh Angola ram angah te pawh hril theih loh tawp a ni mai. Martar hmasate kha hausakna leh hmuingilna kha Pathiana an chanvo a ni tih hrilh an har awm mang e, sakeibaknei ka atang leh khandaih hriam atangte kha pumpelh thei dawn sela khawsak harsa taka nun hram hram pawh kha an thlan zawk awm vei nen...Engtinnge Isua thusawi ‘Sihalten kua an nei, chungleng savaten bu an nei, mahse Mihring Fapa hian lunghahna a nei lo,’ (Mt. 8:20) tih te, Paulan, ‘Engkima lungawi ka ching tawh si a,’ (Phil. 4:11)  a tihte hi kan pawm thiam tak ang?” ti mauh mai.

 

An Bible hrilhfiah dan a dik em?

He fake gospel hriltute hian Bible thu la chhuakin an duh ang angin an hrilhfiah a ni deuh ber a. An hmin theihte chuan ‘biblical’ riauvin an hre ta thin a. Hrilhfiahna changtlung tak an hman loh leh Bible zirtirna pumpui atanga an thlir thiam loh thin avang a ni thei awm e. Tin, an pawm thiam zawng leh tuipui ang chite piahlam an ngai pawimawh lovin, ‘Thlarau hriakthih’ bikin an sawi dan chu an thupui tlur tawh thin si a, a pawi a ni. An chang sawi uar thenkhat han thur chhuak ila:

Johana 10:10 ‘nun tam’

Prosperity preachers te chuan Lal Isuan, “Nun an neih nan, tam taka an neih nana lo kal ka ni,” a tiha ‘tam tak’ah khan sum leh pai hausakna leh taksa hriselna te an telh tlat a. Heta ‘nun tam’ hian ro thil neih tam lam a kawk lem lo tih chu a chiang hle thung a ni. ‘Nun’, ‘chatuan nunna’ tih Johanan a sawi thin hi Chanchin Tha bu hmun danga ‘Pathian Ram’ tih nen a inang a, chu chu hun lo la awm tur nun sawina a ni a, ringtuten chu nun chu tun hunah an chang tawh a, a famkimna erawh chu Isua ke bul an thlen huna nei tur an ni. Vawiina rinna chak leh chak loh mila neih chi a ni lo. Khawvel rosum neih tam lama thluk chi a nih lohzia pawh Johana ziak leh Isua zirtirna pumpui zir chianin a chiang hle a ni.

III Johana 2 ‘thlarau malsawmna anga taksa malsawmna leh damna’

He chang hi an chelek nasa viau a ni awm e. Kenneth Copelanda pek chuan ringtute chu kan hmuingilin (prosper) kan hrisel tur a ni, tiin a sawi (Laws of Prosperity, p. 14). Helai Bible changin a sawi tum a thelh nasa viau a ni awm e. Ringtute hausakna emaw, hriselna emaw hrim hrim hi a sawi tum a nih hmel loh va, ‘tur a ni’ tizawnga lak phei chu a chi loh hle ang. Hei hi chibai bukna tawngkam a ni tih kan hria a, hetianga induhsakna hi hmanlaia an chin thin a ni. Sum leh paia hausakna a kawk lem lo. Hetianga induhsakna leh tawngkam tha hi a pawmawm rualin ‘Kristiante chu kan hausain kan hrisel tur a ni’ tih theology chher nan chuan a hmantlak loh deuh a ni awm e.

II Korinth 8:9 ‘Krista retheihna avanga hausakna’

Tirhkoh Paulan Makedonia ram kohhranho tan thilpek a khawnsak a, Isua retheihna avanga an lo hausak tak dan thlengin a sawi kai ta a ni a. Literal taka chhut chuan helaia ‘hausakna’ (plouteo) hian lei rosum hausakna a kawk ve thei ngei a. Mahse, a sawi tum tak zawk chu thlarau nun hausakna a nih hmel zawk. A chhan pawh Paula hian I Kor 1:4-5 ah ‘engkimah, thusawi tinrengah leh hriatna tinrengah’ tihhausak an nihna a sawi daih tawh a, I Kor 3:22-ah ‘Paula emaw, Apollova emaw, Kipha emaw, khawvel emaw, nunna emaw, thihna emaw, thil awm sa emaw, thil lo la awm tur emaw, a zavaiin in ta vek a ni,’ tiin a lo sawi tawh bawk. Ephesi 1:3 ‘thlarau lam malsawmna tinreng’ a sawi te, Peteran ‘rochan chhe thei lo, bawlhhlawh kai lo, chuai thei lo, vana in tana khek chu…’ (I Peter 1:4) a tih te ngaihtuah chuan Krista kan tana tuarna avanga hausakna kan chan hi lei rosum leh pai ngah lam aiin thlarau lam malsawmna chatuan daih a ni zawk daih a ni tih a chiang hle awm e. Johana pawh khan kan chhandamnain a tum chu ‘Amah anga awm’ (I Jn 3:2) a ni zawk si a.

 Isaia 53:5 “A vuakna vualtea tihdamin kan awm ta”

Taksa tihdamna chungchangah he chang chi an hmang rim hle mai. Kan Lalpa Isua Krista thihnain a lak kian tawh avangin tun hunah hian kan rin ngam chuan kan taksa natna engkim atanga fihlim tur kan ni tawh, tiin an sawi thin. Chu ‘damna’ chu kan rinna chak leh chak loh ang zela ringtuin kan chan tur a ni a. Chuvang chuan damna chang lote chu rinna hniam deuh an ni ta zel mai a nih chu. Hei hi Pathian Lehkhabuin a tum a nih hmel loh hle. Thuthlung Thar mithiam hriat hlawh berte zinga mi Gordon D. Fee-an he chang Isaia 53:5 hi Matthai leh Peteran an hman dan a zir chian hnuin ‘rin ang zela damna’ ang zawng chuan an hmang lo hlein a hria a. Taksa damna lam hawi zawngin Matthaia (8:16) hian sawi mahse Isua dam laia a tihdam rawngbawlna kha a sawi chu a ni a; Petera (I Pet 2:24,25) thung chuan ‘sual natna’ atanga tihdamna angin a sawi bawk. Gordon Fee hian Isua tlanna khan taksa na tihdamna hi a huam lo angin a ngai. Peteran Isaia ziak a sawifiah danah pawh khan ‘taksa natna’ ni lovin ‘sual natna’ laka tlan kan nihna a sawi a nih kha. Engpawh ni se, damna famkim, thlarau leh taksa damna a thlen ngei anga kan ngaih pawhin taksa damna hi chu tuna kan chan vek tur a ni rih lo a ni ngei ang, Paulan a taksaa ‘hling’ a la buaipui nasa ve hle a, Timothea pawh a pum a that loh avanga uain tlem hmang tura fuih a ngai lovang a, Jakoban ‘damlo tawngtaisak’ lam a buaipui lo tur!

 

Ringtute tan engkim a phal

Hetianga kan sawi hian Pathianin hausakna leh hriselna hi a phal ta lo anga sawi angin a lang thei ta daih a. Ka sawi tum tak nen chu chu a inkalh hle ang. Pathian malsawmna chu beisei theih a ni teh meuh mai. Mahni mamawh thawhchhuah leh midangte pui thei khawpa ringtute kan tan mar pat pawh hi thil duhawm a ni. Ringtu tak takte chu mahni invawng leh taima an nih thin avangin an hmuingil fo bawk tih kan hria. Amaherawhchu, Prosperity Gospel thuken hi chu, kan sawi nawn fo angin, hausakna leh taksa damna hi rinna hmanga kan sawr chhuah theih mai, rinna chak tawk kan neih chuan chiang sa leh awm mai tur, tih lam a ni a. Hei hi chu a ‘biblical’ lo hle a ni.

*****RE19022021******