𝐑𝐈𝐋𝐑𝐔 𝐓𝐈𝐇𝐋𝐈𝐌𝐓𝐔

 

Corona Virus hripuiin min delh rih em em belhchhahna niawm taka chanchin duhawm lo tak tak hriat sen loh min rawn deng leh dawt dawt thin karah rilru tihlimtu a vang duh hle mai. A awm tawh dawn lo emaw tih theih hial laiin chung Khuanu chuan chutiang ringawta kan awm chu a phal bik lo ni tur a ni. Ram, hnam, vun rawng, adt., avanga inerna piah lam inthian thatna, lar leh thlen san piah lama midangte veina rawn par chhuakte han hmuh hian rilru tihlimtu thil mawi leh duhawm, a hlutna tehfung awm thei lo hial te pawh a la awm zel tih a rawn lang thin a ni.

 

Mittui kara inthianthatna duhawm

 

Tun tum Copa America meuh chu rilru tihlimtu a tam ngei mai. Messi te an champion mai piah lamah thil thleng hmuhnawm em em mai chu Messi leh Neymar te inthian thatna kha a ni. Champion zawk nih leh nih loh piah lama a tawpa an han inkuah ngawih ngawih mai khan rilru a hneh. Khawvela football thiam ber tih theih pahnihte hian Barcelonaah an khel dun thin a. Argentina Messi hian a nau zawk Brazil chhuanvawr Neymar hi a enkawl thiam hle a niang, a ngaina chhunzawm em mai. Tichuan, Messi chu khawvela football thiam ber nihna hauh thin mah se a ram Argentina tana No Mawi chawi hlei thei ngai lo, Neymar pawh Brazil mipui beiseina innghahna, No Mawi la chawi miah bawk lo. Final an han khel dun ta a nia. Tan pawh an tang dun narawh e. Mahse, Messi leh a pawlte chu a vannei zawkah an tang ta a nih kha. Neymara mittui a dir zung zung zung a, Copa America No Mawi chu engtikah nge a chawi ve ang tih a suangtuah pha tawh lo pawh a ni mai thei. Messi rual pha lo mah se, chawi lovin a awm thei tak ngial dawnin a inhria pawh a ni mai thei. A nihna takah chuan a team ang zawng chuan team tha zawk pawh an niin a lang. Mahse a chak lo zawk an ni tlat. Mittui sur zung zung a han thawkhatah chuan a thian pa lawmpuina rilru a lang a niang chu mipui zingah a pan phei a, Messian thiante lam mup mup karah a lo hmu, a pan ve nghal. Khawvel hmuhah an inngaina tawn tih hrat tak mai hian an inkuah ngawih ngawih mai a nih kha. Hei hi football piahlam a ni! Ram leh ram inerna piah lam a ni a! Thiam zawk leh chak zawk boruakin a chim phak loh a ni. A va hmuhnawm tehreng em! Neymar hian a thianpa kuah ngawih ngawih pahin a beng bulah, “Zawnga, min han hneh vei chu le!” te pawh a ti a ni awm e. Mahse, a va han huatthla la lo si em! Hetiang thil hian rilru a tihlim veng veng.

 

Phu ngawih ngawih hi chu an awm

 

Lionel Messi hi football khelh thiam tawp, mahse hruaitu nih (leadership) thiam hlawl lovah an ngai thin a. A mizia han en hian a ni tak tak emaw tih theih a ni thin. Mi ngawichawi leh zakzum, mize na tak nei lo a nih hmel thin. Indian Cricketer Sachin Tendulkara ang deuh kha a nih mai awm hi, ka lo ti ve fo. Mahse, a el pha deuh ber tura mi ngaih hlawh tak Neymar-an heti taka a ngaisang leh ngaihnat chhan hi eng emaw tak chu a awm tih a hriat. A Kristian nun te hi hriat a chakawm ngawt mai! Eng pawh ni se, tun tum Copa America kha chu Messi an tan tlang thup mai a nih kha. Champion ve se tih chu an khingpui te hial pawhin an duhsak a ni awm e! He lam thleng thleng hian mi puitling tak takten an tawngtaisak hial tih ka lo hria! Copa America final vawi 2 penalty-a vanduai tawh leh World Cup final vawi khat chak zo lo tawh a nih an hria a niang e. Heti khawpa thiam si ram tana tum khat mah No Mawi la chawi lo a nihna te pawh hi an khawngaih rawn a ni mahna! Thil chiang ta chu ‘thil awm tak hi a awm mai a ni’ tih hi a ni. A nihnain a phur thlu ngang a ni ang. A thiam lutuk a, Champion nih loh a inhmeh lo a niang e! World Cup hnuhnung berah pawh khan a team mate Angel Di Maria khan “Messi hian World Cup lak hi a ba a ni lo va, World Cup hian Messi lak nih hi a ba zawk a ni,” a lo ti a nih kha. Khawvelah hian thil awm ngawih ngawih, an nihnain a phu ngawih ngawih hi a lo awm. Mahni tlin loh thleng thlenga nihna leh dinhmun chuh thinte nen chuan an dang mang e. Mak ka tih chu – Brazil fans tam takin an ram aia Messi-te an tan zawk ta mai kha a ni. Brazil Captain pawh a vui viau a nih kha. Hetiang thil hi a vawi khatna a ni hial lovang maw? Brazilian footballer lar Dani Alves pawhin hmanni lawk khan, “Tun tum kha chuan Messi te kha champion se ka ti reng a ni,” a la ti ta fan a nih kha. A phu aniang e!

 

Pumbilh aia dawn dun

 

Barshim leh Tamberi te hi pian leh murna hmun Km 5272 aia tama inhlat; pakhat hi Qatar mi dum, pakhat hi Italian mi ngo a ni a, midum zawk hi Barshim, mi ngo zawk hi Tamberi a ni. High Jump (zuan san) an theih em avang hian tun hma reng pawhin inelin an intihsiak fo a, an inngaina ta viau ni tur a ni. Tokyo Olympic 2021-ah an intihsiakna hmunah hian an zuang sang dun fal leh hle a. An pahnih chuan an inbitum leh ngar ngar mai a ni awm e. Feet 7.7 an zuan khahlen tawh hnu chuan feet 7.8 chu an zo lo ve ve a. A chak zawk zawn nana chance pek an nih laiin Barshim chuan Gold Medal chu mi pahnihin a dawn mai theih leh theih loh a zawt a, phal a nih thu an hrilh veleh he thian dun pahnih hi an inkuah ngawih ngawih mai a ni. An iner lo dun hle mai.

 

Infiamna khawvel hi thei ber nih tumna hmun a ni tih kan hria. Thenkhat sual deuh phei chuan elpuite aia tih that tumna rilru thianghlim put aia a pawha pawh hniam tum phet pawh a awm thei fo a ni awm e. Tin, mahni ram tana thahnemngaihna leh chak fal bik nih duhna te pawh a sang uchuak hle thin. Mahse, Barshim leh Tamperi chanchinah erawh chuan inerna boruak a bo a, a theih zawk nih tum phetna boruak a dai a, thiante nena lallukhum khum dunah an hlim em em mai a nih hi! Mihringah hian rilru dik, inthianthatna boruak hlu em em, thei ber nih aia theih ho nuna hlimna hmutu a lo la awm a ni tih a lantir. Tokyo Olympic-a sawi hlawh ber pawl a ni awm e. An thian dun hi tunhma pawhin an lo intanpui fo tawh thin an ti lehnghal. Hetiang hi kan va mamawhin rilru an tihlim tak em!   

 

Medal mi dang tan

 

Poland nula, Maria Magdalena Andrejczyk chanchin hi a va ngaihnawm leh em! Tokyo Olympics-ah fei khawh (javelin throw) intihsiaknaah Silver medal dawngin a ram tan a thawh hlawk hle a. Hmanni lawk khan mipa naupang thla 8 mi, Miloszek Malysa, United States-a zai pui hmachhawn tur atan a medal dawn chu lilama sum tuaksak a tum ta a. Mite rilru a hneh hle mai. Zabka Company, Polish dawr company pakhatin Dollar 125,000/- (Rs. 9,301,681/- hu vel) an lo leisak ve thung a. A hlu hle mai. Zabkar hian a thiltih hi ropui an tih em avangin a medal hi an pe let leh nghal bawk a ni. An chhuanawm dun hle a ni.

 

Andrejczyk hi kum 25 chauha naupang, nula hmel fel tak a ni a. Bone cancer lo tuar hrep tawh a nih avangin Malysa tuarna hi a hriat thiamsak viau a ni awm e. A thiltih ropui tak hi chhinchhiah a ni reng tawh dawn a ni. Tam zawk chuan kan theihna, kan thiamna, kan chakna leh zeina te hi mahni inhaivur nan hlira hman kan tum chawk thin. Thil awm tak pawh niin kan hria a. Amaherawhchu, mi ropui zual mi tlem te an ni ang, chutiang rilru pu lo an lo awm leh thin. Hlawhtlinna leh chawimawina an dawn piah lamah midang vanduaina tuartute an hre fuh a, mahnia pumpilh piah lamah midangte tana malsawmna nih an thlang thin. Maria Andrejczyk chanchin hian rilru a va tihlim tehlul em! Miloszek Malysa leh a chhungte hian an hre rei dawn mang e.

*****RE20082021*****