𝐊𝐀𝐍 𝐍𝐈𝐇𝐍𝐀 𝐓𝐇𝐔𝐊 𝐁𝐄𝐑

 

Tunlai khawvel mite hian nihna (identity) hi kan buaipui nasa ta telh telh a, tawngkam hman rim ber zingah a tel hial awm e. Chutih rualin, Kristiante hian kan nihna (identity) awmzia hi kan chhut thui lem lo hle niin a lang. Hemi sawifiahna atan lehkhabu han rawn tur pawh a vang pharhin ka hria. Kristian nih awmzia eng nge ni? tih zawhna, zawhna bulthut, hi hriat tumin tan kan la tam lo a ni awm e. Hriat tumin han buaipui ila chuan rinaiin thin a thawngin kan tui mai thei a ni. Kan Kristian ‘identity’ hian kan rin thin dan ai daihin a lo kaihhnawih thui mai thei bawk a.

 

𝐓𝐡𝐥𝐚𝐫𝐚𝐮 𝐦𝐚𝐥𝐬𝐚𝐰𝐦𝐧𝐚 𝐭𝐢𝐧𝐫𝐞𝐧𝐠 𝐝𝐚𝐰𝐧𝐠𝐭𝐮

 

Ringtute nihna bulpui hriltu chu, ‘thlarau lam malsawmna tinreng’ tiin Paulan a sawi a. Chu chuan Pa leh Fapa leh Thlarau Thianghlim a rawn kaihhnawih ta chat a ni. He thlarau lam malsawmnaah hian an tel vek a; malsawmna hi a te lo hle mai. Thlarau malsawmna chi hrang hrang hi buaipuiin sawi thin mah ila, Isua Krista ringtu kan nihna hi ‘malsawmna tinreng’ kan dawnna leh chu nihna chuan a ken tel vek a ni tih hriat hmasak a pawimawh hle awm e. He thil hi leilung pian hma daiha Pathian hnathawhah hmuh a ni. Pa Pathian leilung pian hmain mal min sawm a (ch.3); a hmangaihnain min thlang a (ch.4); a fa ni turin min ruat lawk a (ch.5); khawngaihna thilthlawn pek min pe a (ch.6); a duhzawng leh a thil tum chu min hriattir a (ch. 9,10); ama remruat ang ngeiin thil engkim a tihlawhtling a ni (ch.11). Ringtu nihna kengtu hi a pui rem rem! Malsawmna dang dang buaipui lo hian kan ‘nihna’a Pathianin malsawmna tinreng min vur hi buaipui mai ila kan tifuh ang ka ring.

 

𝐋𝐞𝐢𝐥𝐮𝐧𝐠 𝐩𝐢𝐚𝐧 𝐡𝐦𝐚𝐚 𝐚𝐰𝐦 𝐭𝐚𝐰𝐡

 

He Krista ringtu nihna hi kan rin veleha lo intan a ni lo va, sual kalsana kan sim hnua lo intan ta pawh a ni lo. Isua Krista, rinna nunga zawmtu zawng zawngte hian Pathian khawngaihna malsawmna kan dawn tanna chu leilung pian hma daih tawh khan Pa Pathianin Chhandamna chang turin min thlang daih tawh a ni tih hi Bible-in a sawi chiang hle a ni: “…hmangaihnaa thianghlim leh sawiselbovin ama hmaah kan awm theihna turin leilung pian hmain Kristaa min thlan ang khan…”(Eph 1:3) Chu khawngaihna thilthlawnpek chu min pe daih tawh a. Pathianin Chhandamna chang tura min thlan chhan hi misualte hian sawi tur engmah kan hre lo. A  chhan keimahniah engmah a awm lo; sual reng a theih loh laiin  min thlan hi kan that vang a ni lova; ringtu chan a nih rualin min thlan hi kan rin vang a bawk lo; simna nun a tul ngei ngei rualin kan sim vang pawh a ni lo. A khawngaihna vang chauh a ni. Tuisik kan nih hma atangin kan nihna kha a lo intan daih tawh a lo nia.  Ringtute hi leilung pian hma pawhin kan lo awm daih tawh alawm! Pathian rilruah kan lo awm daih tawh a lo ni. Hei hi mihring suangtuahna vak vel mai mai a ni lo tih pawh hriat a tha. Pathianin a Thu Thianghlima a puan a ni (cf. Rom. 8:29-33; 9:6-26; 11:5,7,28; 16:13; Kol. 3:12; I Thess. 2:13; Tita 1:1). Pathian min thlanna chu sual zel tura phalna (min thlang tawha kan sual pawhin min thlanna a bo chuang lo, tih lam) ni lovin, kan thianghlim zel theih nan a ni a. Min thlan chhan chu, “thianghlim leh sawiselbova a hmaa kan awm theih nan,” a ni zawk a. Thlante chu hemi kawngpuiah hian, harsa the mah se, an kal mai a ni. Kristian nihna hi chatuan kaihhnawih a ni – kan pianhma chatuan, kan thih hnu chatuan.

 

𝐌𝐚𝐧 𝐭𝐚𝐦 𝐥𝐚𝐰𝐫 𝐥𝐚𝐤

 

Pa Pathianin a thlan zawng zawngte chu Fapa Pathian chuan a thisenin a rawn tlan ta a nia  (v. 7).  Chu tlanna man chu Krista thisen a ni a( I Pet. 1:18), Kristian kan nih man hi a va han tam em em ve le! Pathian rilruah chuan kan va han hlu vet vet em! Kan man atan a Fapa thisen a pe phal a nia! Tlanna avang chuan Mosia Dan atangin kan fihlim a (Gal. 5:1); sual bawih ata kan chhuak (Rom 6); Setana leh khawvel ata kan zalen (Gal. 1:4; Kol. 1:13-14); Chu tlanna avang chuan kan bawhchhiatna te ngaihdam a ni (v.7); Krista-ah chuan Pathian ro tura siam kan ni (v. 11); A fapa chu Pathianin hmangaihnaa min pek a ni a, ringtute hi Pain hmangaihnaa a Fapa a pekte chu kan ni bawk(Jn. 17). Pathianin hetianga thil a tih chhan chu engkim hi Krista nena inrema siam a duh a, chumi hmanrua atan chuan ringtute hi min chhawr a duh vang a ni a. Keini chuan vanram kan kaina tur ngawr ngawr hi Pathianin a buaipui emaw kan ti chawk, ngaihtuah thui deuh erawh chuan chu chu a ni hauh lo mai. Pathianin a Fapa thisena min lei chhan hi Ama tan, A ropuina hmanrua atan min duh vang a lo ni zawk. Chu chuan kan mimal chhandamna hi a keng tel a ni mai zawk a ni. Pathianin Ama tan min chhandam tih kan hriat thiam a tul takzet.

 

Chhinchhiah bik

 

Paulan a uar em em chu he nihna hlu, khawngaihna malsawmna kan dawn hi ‘Thlarau lam malsawmna a ni’ tih hi a ni.  Thuthlung Hluia malsawmna chu hmuh theih thil lam a ni tlangpui a (Deut. 28:1-14). Thuthlung Thar malsawmna danglam tak erawh chu Pathian dan chu kan thinlungah Thlarau Thianghlimin a ziak a, Pathian hriatna kan neih a, kan sualte ngaihdamna kan chan hi a ni (Jer. 31:31-34). Ringtute chu Thlarau Thianghlimin min chhinchhiah vek a, chu chu kan roluah tur zakhamna a ni. ‘Zakhamna’ tih hian Hmar tlangval nupui tur biak danah a fiah hle. Palai an kal a, an inbiak fel vek tawh hnu, inneihna chiah a la thlen hma pawhin innei ngei tur an nitih chian nan ‘thirdam’ an tih chu mipa lamin hmeichhe inah an dah thin. Chutah chuan inneihna kha chiang ngei ngei anga ngaih a ni. Chu chuan hril famkim lo mah se Chhandamnaa Thlarau Thianghlim hnathawh chu ‘zakhamna’ a ni. He Chhandamna hi a bul a tan tawh a, a tawp a thlen dawnzia tichiangtu chu Thlarau Thianghlim kan nei tlat hi a ni. Chu chu Khawngaihna vang chauhva kan dawn a ni e.

 

Chatuan nunna neitu

 

Heng zawng zawng khawikhawmna chu ‘Chatuan nunna’ a ni a. Mihring tana lei leh vana hlu ber a ni thei hial awm e. Chu chatuan nunna chu Biblein a changin ‘chhandamna’ a ti a, a changin ‘Pathian ram’ a ti thung. ‘Van ram’ tia a sawi chang a awm a, ‘nunna’ a tih mai chang pawh a awm. Chatuan nunna chu Krista nena lak hran theih a ni lo va, chu chatuan nunna chu Krista a ni a, chumi nei tur chuan Krista neih a ngai tlat. Krista thlauthlain ‘Vanram’ neih theih a ni tlat lo. Tunlai tawng takin Chatuan Nunna chu Isua Krista DNA-a inzial tel vek a ni. Chatuan nunna nei nun chu Krista nena inpumkhat nun a ni a. Nun mak, khawvel hriat thiam loh a ni. Chu chatuan nunna chu vawiina kan neih a ni a. Mi tam tak ngaih sual anga thih hnua intan chauh tur a ni lo. Chumi neitute chu a thlarauva Pathian zawmtute an ni a. Mite hmuh phak lovah an Pa an zawm tlat avangin hriat thiam phak rual loh nihna an chang a, an lungawiin an hlim tlat a ni. A nei ve lote nen cheng ho reng mah se, an nun chu an hriat thiamsak ve lo va, an tehfung a inang lo va, an hmuh dan pawh a inang lo a ni. Chu nun chu ‘Krista nena inpumkhat’ nun, miracle nun a ni tawh si. Khawvel hriat thiam theih chi a ni tawh lo, a chhan pawh khawvel tehfunga the theih a nih tawh loh vang a ni. Chatuan nunna neitu chuan Krista aia mawi leh duhawm a hmu thiam tawh lo a, Krista tana thawh aia hlu a tan a awm tawh lo. Krista hnaih lovah chuan lungawina a hmu tawh lo a, Krista a neih avangin tumah a awt tawh lo. Vanram kai leh kai lohva buai lovin, Vanram mil nuna nun tumin a buai zawk a. Midangte a thik a tul tawh lo, a hlu ber Krista a nei tawh si. ‘I ram lo thleng rawh se,’ tia tawngtai zelin hringnun kawng engkimah Krista thu lo hre ve pangngai mai mai ni lovin Krista Thuhriattirtu a ni tawh a; khawvel chu a Lalpa ropuina puan chhuahna hmun pawimawhah a chang vek tawh si a.

 

𝐊𝐚𝐧 𝐧𝐢𝐡𝐧𝐚 𝐡𝐢 𝐤𝐚𝐧 𝐩𝐡𝐮𝐫 𝐜𝐡𝐡𝐮𝐚𝐤 𝐳𝐨 𝐞𝐦?

 

Hei tak hi kan thu pawimawh dang chu a ni ta a. Kristian nihna sawhkhawk hi khawia awm tur nge ni ang? Eng thila hmuh tur nge ni ang? Mimal hlimna leh lungawina chin chauhva hmuh kan thiam chuan a beidawnthlak ngawt ang. Thih hnu vanram kaina thil ang chauhva I ngaih chuan a tum i thelh chiang ngawt ang. Kan dawn san leh nawm ruamah chauh ringtu nihna (identity) hi kan buaipui dawn a nih chuan kan Kristianna a tawngchham hle ang a, kan nihna tak tak kan pawh lo hle tihna a ni bawk ang a, chu nihna min petu duh thu kan tlin lo hle tihna pawh a ni bawk ang. I Kristian nihna petu che chuan Van chauh thlir turin kha nihna ropui tak kha a pe lo che a, khawvel pawh thlir tel turin a buatsaih che a nih kha.

 

Ngaihtuah teh – Kan nihna tak tak hi phur chhuak zo ta ila, hei leh thleng hi chawmhlawm state kan ni reng ang em? Kan nihna tak  hi phur chhuak zo ta ila, tlang chunga khaw awm, India ramah entu state hlu lutuk kan ni lovang em ni? Kan nihna hi phur chhuak zo ta ila kan Kristian nun hi heti tak hian a bet reng ang em? Kan nihna tak phur chhuak zo ta ila midangte tan malsawmna kan va ni nasa dawn em! Pathianin chatuan ata min buatsaihna hi Mizo hnam hi a va han vawrh sang thei dawn tehlul em! A la vawrh sang tawk lo hi a va zia lo si em! Pathianin nihna min pek hi kan la man fuh tawk lo em ni ang?

 

*****RE13082021*****