𝐓𝐇𝐋𝐀𝐑𝐀𝐔 𝐓𝐇𝐈𝐋𝐏𝐄𝐊 𝐂𝐇𝐔𝐍𝐆𝐂𝐇𝐀𝐍𝐆

Tunlai Kristianten ngaihtuahna fim tak hmanga kan hriat chian pawimawh berte zinga mi chu Thlarau Thilpek chungchang hi a ni. Kan chian tawk loh avangin Kristian nuna ngaihsan tur dik kan ngaisang lo fo va, zawn tur dik kan zawng lo fo a ni. Hmanlai atangin mi tam takin Pathian hming chhalin thil mak tak tak an lo ti tawh thin a, Thlarau Thianghlim hming an chhal miau avangin sawisel leh lo inhawn loh takngial pawh kan tim deuh thin a ni. Tin, Thlarau Thilpek awmzia kan hriat chian loh avangin rawngbawltu theuh theuh ‘thlarau bik riau’ anga ngaihna kan nei fo hi a Petu rilru a nih hmel loh tak zet.

Thlarau Thilpekte

Thuthlung Tharah hian Thlarau Thilpek hrang hrang ziah chhuahna hmun nga, Rom 12:6-8; I Korinth 7:7; 12:8-10, 28; Ephesi 4:11; I Petera 4:11, ah te a awm a, khaikhawmin thilpek 22 angin a chhal theih a ni. Thenkhat han sawifiah ila:

1.    Tirhkoh (Apostle): Greek tawnga apostolos hi ‘thuchah kengtu’ tihna mai a ni a. Thuthlung Tharin kawng thumin he tawngkam hi a hmang a ni. Miin a palai atana a tirh hrim hrim hi a ni thei a, tirhkoh kan tih pangngai ang chi Chanchin Tha sawi tura kan tih mai te hi a ni thei bawk. Tin, Lal Isua thlan bik mi 12 te (Paula telin) sawina atan an hmang. Vawiina kan hman dan tlanglawn ber chu a chi thumna hi a ni a. A bik an nih avangin a dang an awm thei leh tawh lo a ni.

2.     Thuhriltu/Zawlnei: Hei hi Sap Bible-ah chuan thuhriltu pangngai ‘preacher’ tia dah lovin, ‘prophet’ (zawlnei) tiin a dah zawk thin a. Mizo Bible lehlin thar pawhin ‘zawlnei’ a ti mai. Zawlnei hna leh nihna hi kawng hnihin a sawi theih leh a. Pakhatna chu Pathian hnen atanga thu dawn a, puan chhuah a ni. Hei hi Thuthlung Hlui zawlneite leh Thuthlung Thar zawlneite chan a ni a; Kristian Bible, kan rin leh innghah tlanna tur Pathian Thu chu ziaka a awm tawh avangin hetiang tak hi chu an awm tawh lo va, beisei tur pawh a ni tawh lo. Thu dawng thara inngai an lo awm a nih pawhin Bible mil a ni zel tur a ni tawh zawk ang. Zawlnei nihna dang leh chu sual hai lana Pathian duhzawng sawi chhuah hi a ni. Khawvelah hian sualna a pung thin, chumi hunah chuan Pathian thuchah huai taka sawi ngam hi zawlnei hna a ni. Hei hi a la awm reng a, Kohhran hna pawimawh tak a ni.

3.     Chanchin Tha hriltu (Evangelist): Evangelist tih hi Thuthlung Thar-ah tum thum chauh kan hmu a, mimal sawinaah phei chuan Philipa chiah kha he ‘chanchintha hriltu’ title hi pek a ni. He evangelist hna hi pek bik, midangte Krista hnena hruai thei riau an awm tih a chiang hle. Rawngbawlna ki hrang hrang kal tlanga tih thin ni mah se a thuchah laipui chu Krista thihna leh thawhlehna, lo kal leh tur a nihna leh mi zawng zawng hi sual sima, Krista chu ring tur kan nihzia hi a ni bik deuh a ni.

4.     Kohhran Chawmtu/Zirtirtu (Pastor-Teacher): Hei hi mi thenkhat chuan an then hrang thin a, amaherawhchu, a ziakna greek tawng kalhmangah leh Paulan hmun danga a hman danah te then hran loh hi a awm zawkah ngai ila. An hna chu kawng tinrenga Kohhran ho kaihhruai leh Pathian Thutaka chawm a ni. Pastor hna Ephesi 4:11-a sawi hian zirtir hna nen a sawikawp tih kan hria a Tirhkohte 20:28-ah chuan he hna hian hotu niha rorel te pawh a keng tih a lang bawk.

5.     Rinna: Chhandam kan nih theih nana Isua kan rinna hi nge, Kristian nuna rinna nasa tak mi thenkhatin an neih bik ni ang tih a chiang lo va. Eng pawh ni se, rinna hi a tawpkhawkah chuan Pathian atanga chhuak a ni tih kan hria a. Mi thenkhat chuan he laia rinna a sawi hi Thuthlung Thar hun laia Kohhran din a nih chhoh lai huna Pathian thilpek danglam niin an ngai.

6.     Thlarau hriat dik theihna: Bible-in hun hnuhnungah zirtirtu leh zawlnei dik lo tam tak an rawn chhuak dawn tih min hrilh chamchi a(II Kor. 11:14,15), thlarau hriat dik theihna hi a pawimawh hle. Hei hi vawiinah chuan Pathian Lehkha Thu zir chian, rilru hman thiam, leh Pathian hmangaihna tak thinlung nen a neih theih a rinawm. Sakhaw lam thilah hian thenkhat chuan rin duap tak takte pawh sawisel an tim thin. Sakhaw thil a nih vang tak hi fimkhur a ngaihna lai tak a ni zawk a. Mi thusawi, rawngbawl dan, thuchah, thil tih dan zawng zawng hi fimkhur taka zira, chian a tha. Hetiang ti thei deuh hlek tura thilpek dawng pawh an awm tihna a ni. Tin, he thilpek hi awm tawh lova ngai an awm bawk a, a chhan chu Thuthlung Thar ziak lai huna thlarau chi hrang hrang awm nuai nuai kara Thlarau dik hriat theihna Pathianin a pek, chutiang vanga Thuthlung Thar lo awm ta nia ngai an awm.

7.     Tanpui theihna: Hei hi chuan thilpek dang dawngte lo tanpui zelna a kawk a. Rawngbawlnaa midangte thlawp tlat hi a hlutna, ropuina leh pawimawhna a sawi chiang hle a ni.

8.     Rorel thiamna: Bible chuan ringtute inrelbawl a ngaih thu a sawi mai a, chumi atan chuan Thlarauvin rorel thiamte a dah thin a ni. Apostle-te kalna apiangah hruaitu an ruat thin a, Paula leh Barnaba pawhin, “…kohhran pawl tinah chuan upate an ruatsak a,” (Tirh. 14:23) tih a nih kha. Kohhranah hian ‘rorelna’ a awm a ngai tlat a, ‘roreltu’ tura ruat an awm tih kan hriat a pawimawh hle.

9.     Tihdam theihna leh thilmak tihtheihna: Hei hi kan ngaih ropui pawl tak leh a thawm na ber pawl a ni awm e. Vawiinah pawh hian he thilpek neia inchhal leh ngaih theih tam tak an awm. Rawngbawlna pawh an nei nasa viau thin. Amaherawhchu, fimkhur a ngai a ni tih hria ila. Billy Grahama meuh pawhin, “Ka rilruah hian tihdam theihna thilpek hi a awm a ni tih chhete pawhin ka ringhlel lo - rinnaa tawngtaina chhanna atanga dawn damna chu. Tin, tihdam theihna dang pawh a awm, mihringte inkungkaihna na tihdamna te pawh. Fimkhur a ngaihna tam tak erawh chu a awm. Tunlai khawvelah he tihdamna chungchangah hian lemchang leh a suak an tam tawh em em a ni. Thlarau dik hriat theihna kan mamawh hle dawn a ni,” a ti.

10.  Tawnghriat loh leh a hrilhfiahna:He thilpek chung changah hi chuan inhrilhfiah lehzual vak ngai lovin Mizo Kristianten en dan tawk kan thiam hle a ni. Kan sawi tak ang khan Kristian tam tak, Thlarau Thianghlima khah chhinchhiahna nia ngai tlat an awm thin. He ngaihdan hi chu kan hnawl tlangpui a ni. Pathian pawlna chang nasa mi thenkhat hlim zual deuhvin an chan thin ni maia ngaihdan tha tak kan nei.

 

Thlarau Thilpekin a tum

Thlarau thilpek kan sawi hian mi tam tak chuan mak danglam deuh (miracle) leh mite aia chungchuanna deuh a kawkin kan hre thin. A chunga kan tarlan bakah hian – tawng chi hrang hrang sawi theihna, finna, hriatna, rawngbawltu, zilhtu, thil petu, mi khawngaih theitu, nupui-pasal neih leh neih loh- te pawh a la awm a. A tam zawk hi chu nunphung pangngaia inzial tel ve mai (eg., Zirtir, fuih, thilpek leh mite tanpui) ‘miracle’ ah kan ngai vak lem lo. Finna leh hriatna pawh hi mak danglam zinga telh kher turah ngai bik lo ila. Thlarau thilpek tih hi greek tawngah chuan charismata tih a ni mai a, chu chu ‘khawngaih thilpek’ tihna a ni. Pathianin a khawngaihnaa a Kohhran thuamna tura amah ringtute a pek theuh a ni a, chung zawng zawng chu ngaihsana, ngaih pawimawh vek tur a ni ang. 

      Paula chuan Thlarau Thilpek chu, “…rawngbawl hna thawk tura mi thianghlimte tihfamkim nan Krista taksa siam tha turin..” (Eph. 4:12) pek a nih thu a sawi. Tin, kohhran ho tih pumkhatna atan a nihzia a sawi bawk: “Chutichuan, inngaihtlawmna leh thuhnuairawlhna zawng zawng nei a, hmangaihnaa indawh tawn chunga dawhtheihna neia remna phuarnaah chuan Thlarau inpumkhatna chu vawng tura bei a, a kohna che u phua awm turin, kei, Lalpaa mi tang hian ka ngen a che u. A koh chhan che u beiseina hmunkhata koh in ni ang bawk khan taksa pakhat leh Thlarau pakhat chauh a awm a; Lalpa pakhat, rinna hmunkhat, baptisma hmunkhat, engkim Pathian leh Pa pakhat chauh a awm a; ani chu engkim chungah a awm a, engkim fang chhuakin a awm a, engkim chhungah a awm bawk a ni. Nimahsela, athlawna Krista thilpek tehna ang zelin khawngaihna chu kan hnenah theuh pek a ni.” (Eph. 4:3-7). Ringtu zawng zawng hian he thilpek hi chi khat tal chu kan dawng theuh a. Thlarau thiltum ringtu inpumkhatna a thlen lo a nih chuan ngaihsana, buaipui chi a ni lo tih hriat mai a tha. A pawi ber chu phirsina te, mahni indah ropuinate a thlen mai thin hi a ni. Chhut chian chuan Pathianin Thlarau Thilpek hi mimal ni lovin a Kohhranho hnena a pek a ni zawk awm asin.

 

*****RE02072021*****