𝐅𝐎𝐎𝐓𝐁𝐀𝐋𝐋, 𝐌𝐄𝐒𝐒𝐈, 𝐋𝐄𝐇 𝐑𝐎𝐏𝐔𝐈𝐍𝐀

World Cup 1986 hre pha viai viai te kha chuan Maradona leh Pele te tluk pha tur footballer piang leh thei tawh lo turah kan ngai titih a. Tum khat emaw tal football lo khel ve tawhte chuan ‘khalh tlang’ harsatzia kan hriat laiin Maradona kha chu World Cup-a ‘khalh tlang’ thei ngat kha a nia. Hei vang hi ni ngei tur a ni khawi sports magazine-ah emaw ‘The Messiah’ tih thupui hmanga ‘Argentina ramah football Mesia chu a lo piang leh ta,’ tia Lionel Messi chanchin an rawn sawi tirh pawh khan ka bengkhawn vak lem lo. Pele leh Maradona te ang chu a ni pha chuang lovang tih rinna kha a lian a ni. Brazilian Ronaldo rawn lar tirh a Pele nen an khaikhin vel pawh kha ho ka lo ti a, a pha meuh ta lo reng kha a nia. Mahse, tunah erawh hi chuan Argentina footballer  ropui Lionel Messi hian kal hmasate zawng zawng a khum vek anga ngai te pawh an tam ta. Hmuh dan chi hrang hrang a awm thei laiin heng mihrang pahnihte dinhmun ropui luahlan anga sawi theih nih ringawt pawh hi ropui tak chu a ni.

𝐆𝐎𝐀𝐓?

Zankhaw tairek thleng thlenga football khel en ka peih ve meuh loh avang leh match khat pawh ka en chhuah peih meuh loh avang hian (highlights ka duhtawk hle) football fan ka ni lo tih a chiang a. Amaherawhchu, Messi fan erawh chu ka ni chiang hle thung. A chanchin hi ngaihnawm ka ti a, miten an fakna thu te, a chet that report te hi ka lo lem duak duak thin. Social media leh internet khawvelah te hian a chanchin ni tinin ka zawng chu a ni ber mai. Football fans tam tak chuan “Messi football khel en theia kan piang hi lawm hle tur a ni,” te an ti hial thin a. Dikna chin a awm ang. Kumkhuain a khel dawn hauh si lo. Hman deuh khan football commentator pakhatin, “Footballer piang tawhah chuan Lionel Messi hi a la thiam ber mai; he thu hi Pele leh Maradona te inkhel en phatu thu sawi a ni e,” a lo ti ngat kha a nia. 

A Argentinian-pui football mi ropui Diego Maradona nen an khaikhin fo thin a, Maradona World Cup ’86 teammate Jorge Valdano khan, “Maradona kha chu Maradona a ni zeuh zeuh chauh a, Messi erawh hi chu kar tinin Maradona a ni thei e,” a ti hial a nih kha. Sawi thiam tak a ni. Argentina coach thin Jorge Sampaoli-an khami tum khan Messi leh World Cup chungchang sawiin, “Messi hian Argentina tan World Cup lak hi a ba a ni lovin, World Cup hian Messi lak nih hi a ba zawk a ni,” a ti mauh mai. Twitter-a Messi fans te zinga mi thusawi mak ka tih ber zawk chu, “Ka nupui hi Messi hian lo mutpui ta se, a fa a pai theih ngei na turin a condom ka pir ther sak ang,” zu ti hial a! A chanchin han belh chian hian football khel tawh zawng zawnga ropui ber GOAT (Greatest of All Time) anga ngai pungin a tinghet zel dawn a ang a ni. FIFA meuh pawhin a ngaisang a (football a tihhlut leh tihlar em avang hian ngaihsan lo chi ni nghal lo chuan) an official twitter-ah GOAT a nih thu an puang rup mai. Mahse, remchan zawkna avangin an lakiang leh a nih kha.

𝐋𝐚 𝐩𝐮𝐥𝐠𝐚, 𝐭𝐡𝐞 𝐅𝐥𝐞𝐚

Messi hi feet 5 leh inchi 7-a sang, European standard-ah chuan pa tawi te a ni. A sa a pan bawk a footballer ruakhau tak tak tan zuamawm tak a ni. Mahse, a thiam em a! Fans ten a hming lemah ‘La pulga’ ‘the Flea’ ‘Uihli-a’ an phuah sak. Uihli ang maia che rang leh zuan zang, per nelh nelh thei, an tihna a ni ngei ang. A ni ngei tak a, a ke bula football awm a han tlanpui leh mi 3/4/5 kara a han put zung zung mai thin hi chu a rapthlak lam deuh chu a ni. ‘Unstoppable’ (dan rual loh) tih te, ‘Unplayable’ (khelhpui ngaihna awm lo) tih te hi a khingpuite sawi duh dan a ni thin. English footballer lar Wayne Rooney khan “Messi hi chu tih ngaihna a awm thlawt lo. Min bawl a ni ringawt e,” a ti tawp mai. Maradona ngaisang lo lui thin English player ten Messi an ngaisang em em thin hi a mak dangdai ve riau. 

FIFA World Player of the year leh Ballon d’Or te pawh lo dawng tawh Hristo Stoickov pawhin, “Ka vanglai kha chuan ‘pistol chauhvin a dang thei’ min ti thin a, Messi dan nan erawh puak rang (machine gun) a ngai a nih hi,” a ti hial a nih kha. Messi sialna em em chu a football khel hi football fans lo tan pawh a hmuhnawm tlat hi a ni. A pet goal lai a hmuhnawm a, a passing a hmuhnawm bawk a, a ball chawk a turu a, a free-kick thlengin thaw dep depa en tur chi a ni vek mai. Keini ang Messi fan ruhkawl te hi chuan a khelh loh chu kan en peih meuh lo a nih hi maw. A ni lo pawh hi talent nei tha tak tak an lo chhuak tawh, thiam hrim hrimah chuan a ni aia tha pawh lo ni fa hming, ani anga tha rei (kum 20 dawn) chu an la awm ngai lo a nih hi. Kum 35 a nih kumah World Cup Nomawi ‘Best Player’ niin a chawi riap mai, mimal chawimawina dangin a deng chur chur lehnghal a. A la dawng dawn chauh pawh a ni mai thei.

𝐄𝐧𝐠 𝐚𝐧𝐠 𝐭𝐚𝐤𝐚 𝐭𝐮𝐫𝐮 𝐧𝐠𝐞?

Infiamna han tih mai sawifiah har angreng tak a ni a. A then chu pakhat leh pakhat intumna (tennis, badminton), a then chu a pawl pawla inelna(football, basket ball), a then chu midang nawk miah lova mahni chauha tih chi (athletics), adt., an ni duah mai. Mimal thiam ber sawi theihna hnai chu Tennis ang te hi a ni a. Mimal khelh a ni miau a. Football angte hi chu team game a nih miau avangin mimal tha tur pawhin team that tel a ngai tlat thin a. Thiam ber leh ropui ber sawi dan pawh a danglam thei ang. Chuti a nih avang chuan footballer ropui kan tehna tur pawh mimal chawimawina lawmman dawn tam te, Nomawi chawi tam te, a ni thui hle a ni. Chuti kawngah chuan tun thlengah chuan Messi hi a lawr hle a ni. 

A rawlthar tirhah khawvel pum huam under -20 World Youth Championship 2005-ah an champion a, Best Player a ni nghal. Beijing Summer Olympics (2008) Gold medal a la tawh bawk a, heng bakah ram tan Copa America 2021 an champion a (Best Player a ni nghal), Finalissimma 2022 an chak a (Best Player leh bawk), World Cup 2022 a chawi bawk. World Cup final tum 2 thlengin, tum hnih Golden Ball (Best Player) nihna a chang a a ni. Ani chauh hi chutiang ni thei awmchhun a la ni. Club lamah a che turu hle bawk a. UEFA Champions League Nomawi vawi 4 a chawi tawh a, La Liga 10, Copa Del Rey 7, Supercopa de Espana 8, Ligue 1 tum 1, UEFA Super Cup 3, FIFA Club World Cup 3, leh adang te. Mimal chawimawina phei chu sawi sen a ni lo hial ang – Footballer chawimawina sang Ballon d’Or 7, European Golden Shoe 6, FIFA World Player of the Year 1, The Best FIFA Men’s Player 1, FIFA World Cup Golden Ball 2, FIFA World Cup Silver Booth 1, FIFA Under -20 World Cup Golden Ball & Golden Booth 1….sawi sen a ni lo….Tunah hian Nomawi 44 chawiin, record a break ta. Football a chawlhsan hmain 50 chawi hman se a duhsakawm a ni. Mimal chawimawina a dawn tawh zawng zawng hi 55 lai a ni tawh a (a pung zel ringawt), goal 817(ka ziah mek lai hian a lo danglam leh tawh mai thei!). ‘Hetiang record nei thei hi an piang leh mai thei ang em?’ tih zawhna hi zawhna mawl tak a ni lo. Tin, Messi hi Greatest of All Time (GOAT) angah miin a ngai a nih pawhin a tawngvai lem lo tih a hriat theih mai a ni

𝐄𝐧𝐠 𝐚𝐧𝐠 𝐭𝐚𝐤𝐚 𝐭𝐮𝐫𝐮 𝐧𝐠𝐞?

Ka sawi tum tak chu football piah lam thil zawk a ni a. Ropuina chuan thuam vel mah se a hringnunah harsatna laka fihlim a ni bik lo. Keini ho tam tak ai hian a tawk tam zawmah mai thei a ni. Football chu thiam hle mah se a pianphung a chawrche leh a than theih loh avangin damdawia enkawl a ngai hial a. Chhungkuain an tlin ngang loh avangin a ti thei tur club an zawng zak zak a ni.  A miziaah mi zakzum leh inthlahrung chi a ni bawk. Rosario, Argentina atanga ram hla Barcelona, Spain- pem daih mai hi naupang chumchiap, mizia renga mi zakzum leh inthlahrung chi tan thil awlsam a ni lo. A football zin kawngah diriamna anka pawh a dawng hnem narawh e. Goal khung theiin khel mawi thin viau mah se, team hruaitu nih tlin hlawl lo (leadership quality nei lo) ah an ngai a; a teammate midfielder bawn lutuk 2, Xavi leh Iniesta tel lo chuan engmah vak sual chhuak thei lo angin hun rei tak chu an sel thin a nih kha. 

Copa America finalah vawi 3 a tlakpui a, World Cup finalah vawi 1. Na ngaih ngaih tak chu a ni. Vanduaina mak takin a tlakbuak ve hrim hrim tih theih a ni. Final penalty petah te a thelh vel thul. Heti a nih avang hian Argentina fans tam takin an hua a, an media te pawhin ram hmangaih tawk lo leh theihtawp chhuah tawk lovah an sawi hial a. A limte halin a jersey te pawh an hliau alh zuai zuai mai a nih kha. Beidawnna te pawhin a tlak buak ve lo thei lova, Argentina national team atang pawhin ‘Ka bang e,’ tih hun te pawh a nei a nih kha. Amaherawhchu, heng chak lohna leh selna zawng zawng hi huaisen taka hmachhwnin a hneh vek tih theih turin a taksa a thununin a fit em em a, Argentina tan cup lak theih zawng zawng a la tawh a, leadership a neih thatzia hi miten an hrilhfak tawh a nih hi. World Cup 2022 an chak lawmna Buenos Aires khawpuia mi maktaduai 2 pungkhawmte thawm khan selna anka te kha a chhilh hneh hle a ni. Engkim mai hi zir theih leh hmasawn theih a ni tih hi a lo ni chiang khawp mai.

𝐓𝐚𝐰𝐧𝐠𝐭𝐚𝐢 𝐜𝐡𝐡𝐚𝐧𝐧𝐚 𝐭𝐥𝐚𝐢

Kum 2014 World Cup khan Messi kha kum 26 a ni a, a vanglai tak a ni bawk a beisei a sangin duhsakna pawh a na hle mai. Kei pawhin thin phu dep depin ka en a nih kha. Messi leh Argentina ka tan si, an chak ka ring ngam chiah si lo. Engtin tin emaw final an thleng chho ta. An tumpui Germany team kha an tha si a, huphurhawm tak a ni. Khami boruakah khan inthlahrung takin Messi te an chak theih nan ka tawngtai tih ka la hre reng. Awm lo deuhvin hre mah ila ka duhsak miau sia le! Tichuan ka tawngtaina pawh chu chhanin a awm ta mai lo tih kan hria. Messi te chu German ral lian hmaah an tlawm ta a nih kha (Ka rin ai tak chuan an khel tha thung a). 

Kha tawngtai chhanna erawh chu kum 8 hnu December 18, 2022 zan khan a ropui thei ang bera hmuhin a awm ta. World Cup Nomawi chu a chawi ta vung mai. Messi pawh Qatar World Cup chu Messi World Cup tih theih khawpin a che tha a. Argentina team chu amaha innghat an ni a, innghat lo thei pawh an ni lo, amahah innghah kha an thatpui miau si a! A teammate pakhatin ‘Kan team hi chu 99.9% Messi a ni e’ a ti thlawt. Goal pawimawh a khung a, pass pawimawh a siam reng bawk. A naute a ho hneh hle a nih kha. Tournament chhunga goal khung tam ber dawttu (Silver boot)  leh Tournament chhunga khel tha ber (Golden Ball) a dawng mauh mai a nih kha. Kha baka duhawm beisei ngaihna vak pawh a awm tawh lo a ni. Kan tawngtainate a chhan hunah hi chuan a chhang hneh thin mang e maw, tih min ngaihtuah tir. Kum 2014 khan lo chhang mai ta se chuan – 2015 an treble te, Ballon d’Or a dawn belh zawng zawng te, Copa America leh nomawi dang an chawi zawng zawngte hi a thleng lo mai lovang maw….ti te pawhin ka ngaihtuah neuh neuh a ni. Chung lamin hun a tih hun tak hi a tha ber a lo ni e.

𝐓𝐥𝐚𝐰𝐦𝐧𝐚 𝐥𝐞𝐡 𝐫𝐨𝐩𝐮𝐢𝐧𝐚

Argentina Football hero pahnih, Maradona leh Messi te zia hi a danglam hle tih kan hria ang. Maradona kha team kaihruaitu tha (leadership nei), huaisen leh khelmuala che tha tak thin a ni a, tlawm zawka awm thiam meuh lo mize nei a ni. Messi thung chu zakzum, inthlahrung leh mi chungtlak zawnga en thei lo, ‘pau zo lo’ kan tih ang chi deuh, mite kaihhruaina lam (leadership) zia nei nasa lo ve tak niin a lang thung thin. A tet lai a football khelh thiamzia a uten an hrilh pawhin an bawl emaw a ti tlat zel a ni awm e. Interview vawi tam tak a pek tawh hnu hian chapo leh mahni indahsang taka thusawi hi a la nei ngai meuh lo va. “Khawvela football player tha ber niin i inhria em?” tia an zawhna pawh, “Chu chu keima sawi tur a ni lo va, midangte sawi tur zawk a ni. Khawvela thiam ber anga min lo ngai an lo awm a nih pawhin ka tan chuan lawmawm tak a ni,” a ti mai thin. Thenkhatin ‘Khawvelah ka thiam ber,’ an tih pung pung laiin rilru a hneh bik hle. Mi rilru tha tak a nih a rinawmna chu a khelhpui footballer turu Neymar Jr., leh Luis Suarez te  hian an ngaina em em mai hi a ni a. An vanglai intawng theuhvin lar tum theuh mah se erna emaw, chaldelhna emaw a nei lo ni tur a ni. Neymar phei hi chu Messe el pha tura ngaih khawpa thiam kha a nia. Messi fan ropui ber a ni ta daih zawk. Copa America-a Brazil Neymar te an hneh tuma inkhelh zawha inpana an han inkuah ngawih ngawih mai te kha Sports history-ah rilru khawih ber a ni thei hial awm e. Rilru thatna, inngaih tlawmna leh mite duhsakna nun hian ram a la a, a tlo thin a nih hi maw. 

Khelmual pawnah pawh hian a nun a mawi viau zel niin a hriat. South American footballer tam takin an lar leh hausak tuar lova khawvel an chen thin laiin Messi hi chu mawi takin ama chhungkua a la ngaihsak viau zel a nih hi. A thlarau nun tak tak chu va hre pha tehchiam lo mah ila Pathian hming a lam thin hi a ngaihsan awm a. World Cup an lak hnua a interview hmasak berah pawh, “Vawi tam tak hlawhchhamin beidawng dawn dawn mah ila ka thinlung rilah hian Pathianin he Cup hi min la pe ngei dawna rinna nghet tak ka nei reng,” a ti a nih kha. Nikum World Cup hmaa an champion leh champion loh tur thu an zawh pawh khan, “Kumina World Cup nomawi chawi leh chawi loh maw? Engmah ka tiam thei lo. Pathian thu thu a ni tih ka hria e. Ani chuan a hun dik tak chu a hre bawk a. Chutih laiin ka chunga thil thleng tawhteah hian ka lungawi em em a ni. Thil ni tur chu a rawn ni mai ang,” a ti sam et mai a nih kha. Football chauh lo pawh eng eng emaw chu a hre ve nual a nih hi.

*****