𝐌𝐀𝐍𝐈𝐏𝐔𝐑 𝐁𝐔𝐀𝐈𝐍𝐀

 

Buaina hi Manipurah chuan thil thar a ni lem lo va. Tun tuma mi erawh hi chuan kan rilru a la zual deuh bik anga  a ngaih theihna chhan chu Mizote, tun hmaa kut tuar leh buai pawla la tel ngai loten kut an tuar ta tlat mai hi a ni a. Thil pawi leh duhawm lo tak a ni. Engtin nge a inher chhoh zel dan tur ngaihtuah thiam a harsa a. Mizoram zahawmna avanga him hram hram thin Mizote chu an him zo ta lo phawt chu a ni a. Zoram chhunga Mizote hian ngaihtuahna fel tak kan neih a tul zual zel dawn a ni.

 

Manipura hnam inthensawm dan

 

Mi tam zawk chuan Manipur state hi Meitei tawng hmang Manipuri te ta angin an ngai fel maiin a rinawm. Official taka ngaihtuah chuan chu chu a nih dan tur tak ni mai awmin a hriat theih a. Amaherawhchu, sap ho hun hma daih leh tun dinhmun thlir chian pawhin thil fel tawk lo tak a hmuh theih a ni. State ramri an lo siam khan thil a la buai theih dan kha an hmu pha bik lo ni tur a nia. Buaina a thlen nasa zual zel dawn a ni mai thei e.

 

Manipur ram khi Mizo nu buh den thinna sum ang hian han ngaihtuah ila a chiang ber awm e. A lai khuar hi te tak te a ni a, a tlang mar zawng chu lian tak zawk a ni. Chutiang deuh chuan Manipur state chu a laiah Imphal phai awmin chutah chuan Meitei leh Pangal (Muslim) ho an khawsa a, a ram neitu anga inngai an ni a. A hual veltu tlangramah chuan tribal-ho an cheng thung a. Heng tlangramahte hian Meiteite hi hmasang atangin an la cheng ngai lo hrim hrim a ni. Hmar lamah hian Naga leh Thado-Kuki an tam deuh a, chhim lam Mizoram nena inzawm chho rengah hian Hmar leh Paite te an tam thung. Chuvang chu ni ngei tur a ni a Mizo hnahthlak rau rauah Hmar leh Paite te rilru leh ngaihtuahnaah hian Mizoram a hnai zual a, Mizona pawh an hriatthiam viau laiin Thado-Kuki group lam hi chuan an hlat deuh emaw tih theih a ni thin. Engpawh ni se, Mizo vek kan nihna erawh hi chu hre reng thung ila. Kan nunphung, ngaihtuahna leh duh dan danglam lo tak vek kan ni.

 

Manipura Mizote

 

Mizoram dinhmun ang lo takin Manipura Mizo hnahthlak zawng zawng chu mahni hnam bila inhung hrang deuh vek an ni a. A pawi hle a ni. Mizo tih hming chawitu chu Mizoram lam atanga pem lut leh an thlahte Mizotawng hmang leh YMA leh Mizo People Convention, Manipura inziak lutte an ni ta chauh a ni. Hemi huang chhunga mite hi chu tam lo tak an ni a, Mizo hnahthlakte zingah ‘minority’ dinhmun an chang pha chauh a. Amaherawhchu, Mizoram leh Mizo mipuite zahawmna avang liau liauvin Mizo tih hming chawitute chuan midangte zahderna leh duhsakna pawh an dawng thin thung.

 

Mizote hian khawtlang nun leh ram leh hnam thilah pawh hruaitu chanvo leh ban phartu nihna pawimawh tak tak te an chang tawh thin a. Thil harsa angreng tak hmachhawn ngai fo erawh chu Mizo hnahthlak, Mizo theuh theuh zingah inmihranna deuh roh awm thei tak hi a ni a. Hei hi Mizo hnam inpumkhatna atana chona nasa ber a ni hial awm e. Zoram lama mite hian hei hi kan hmuhfiah a pawimawh takzet. Mizona kan chawi nuna kan vulh thiam a tha dawn. Mi tam tak rilruah Mizona rilru aia hnam bil rilru dah sanna a awm thei thin niin a lang. Inpui nghaktu nih dawn chuan rilru zau tak leh thil phalna thuk thak neih a tul dawn a ni.

 

Buaina zung

 

Mizo nih zahawmna avang chauhvin Mizo People Convention, Manipur leh YMA memberte hi chuan tunhma chuan kut pawh an la tuar ngai meuh lo a ni. Tun hnai thil thleng tha lo tak mai chu Mizo nihna meuh pawh palzut a ni ta mauh mai hi a ni a. Hnam thilah bung thar a inher chhuak a ni ber e. Manipur stateah hian Meitei leh Tlangmi (Tribal) kan tihte hi inzat thuak kan ni a. Thenkhat sawi dan chuan Meiteite hi 53% an ni a, Tribal zawng zawng 47% an ni thung. Meitei hi phai chinah chengin a ram pum 10% chauh an luah a, tribal ho erawh chuan thawl takin tlangramah 90% an luah a ni. Tribal ho khawsakna (hill area) ah hian Meitei tan hmun nghet (permanent settlement) neih phal a ni lo va, Meitei ho khawsakna phai (plain) ah thung chuan tribalte pawhin an nei thei thung si a ni. Heti a nih avang leh mihring an pun tak zel avang hian thangthar Meiteite chuan hma lam hun tur thlirin tunhmaa an ngaihzawn ngai miah loh tlangram thlengin an hmu tai ta a ni ber awm e.

 

Hriat tura tha chu Meiteite hi kan mongoloid-pui, thumal pawh tam tak inang la hmang kan ni a.  Heti a nih avang hian hmasanga khaw khat chhuak chu kan ni ngei awm e. Amaherawhchu, Hindu missionary ten an lal kha an pathian Vishnu thlah angin an lo han hmin a, an sakhua Sanamahi kal sanin Hinduism-ah an lut ta a ni. Chu chu hriain tunlai thangthar zingah an sakhaw hlui tun din duha Hinduism kalsan mek tam tak an awm. Hindu sakhua kal san a, an tribal sakhua zui a, Scheduled Tribe-a inziah luh a, tribal ho chanvo chan ve zel tumna leh chumi duh lova dodalna chu he buaina zung a ni awm e.

 

A pawi thui dawn hle mai

 

Tun tum buaina hi a sawhkhawk a thui dawn hlein a lang thei a. Tlangmi leh Phaimi inkarah inrin lohna leh intihthiam lohna thuk tak a inphum nghet lehzual ang tih a hlauhawm khawp mai. Meitei tam tak Tlangmi ho kara khawsaten an tuar a, chutiang tho chuan Tlangmi tam tak Meitei bubitna hmuna khawsaten an tuar bawk tih hria ila. Mahni mi leh sate chu rilruah lianin an tuarnate chu tuarpui nasa teh mah ila thu lai zawn thiam hram hram a pawimawh dawn a ni. Remna leh muanna a awm thuai theih nan i tangin i tawngtai sauh sauh ang u.

 

A bik takin thingtlang khuaa khawsa Chanchin Tha hriltu missionary-te an khawngaihthlak zual a. Ralti dep depin mahni inah pawh awm ngam lova ramhnuaia riak ta mai maite pawh an awm a. Meiteite vekin an hum, an ina an thuhruk te pawh an awm. Lawmawm tak a ni. Mission hmun Biak In leh sikulte an bitum zel mai hian tum thui tak an nei tih pawh hai loh tur a ni ang. RSS movement hi anni ho zingah thui tak lo awm tawh a ni a, an sorkar BJP sorkar a lo ni bawk nen Kristian mission sutchhiatna hun tha takah an ngai pawh a ni mai thei. Chumi kawngah chuan an hlawhtling hle dawn pawh a ni mahna. Engtikah nge Biak In, sikul leh Evangelist quarters te hi tun din leh a nih tak ang? Ngaihtuahna a tithui hle mai. Hindutva hlauhawmzia kan lo sawi thinte pawh a takin a lang chho zel a ni ber hi maw.