𝐀𝐒𝐈𝐀 𝐑𝐀𝐌𝐀𝐇 𝐂𝐇𝐀𝐍𝐂𝐇𝐈𝐍 𝐓𝐇𝐀

Rawngbawlpuite duhsakna changin January 9-13, 2023 chhung khan SEANET XXIV Mission Conference on ‘Diaspora: Opportunities and Blessing’, Chiang Mai, Thailand-ah ka han tel ve hlauh mai a. Ka hlawkpuiin nuam ka ti hle a ni. Chanchin Tha hril tura ram danga pen chhuak ngatte (missionaries) te leh Chanchin Tha hril dan tur zir chiangtute (missiologists) kara khawsak chu min chotu thil a tam duh hle a. SEANET inkhawmpui hi a tum 24-na lai a ni tawh a, mission lam lehkhabu rotling tak tak an chhuah nual tawh a. He South, Southeast, and North Asia Network hi pawl nghet tak anga inbun ni lovin Asia rama Buddhist khawvela Chanchin Tha hril vei thenkhatin an buatsaih thin a ni zawk a. Kuminah hian Asia mi ram hran hrana pem darh thinte chu Chanchin Tha hrilna kawnga remchanna tam tak thlentu leh malsawmna an nih dante kan ngaihtuah ho a ni ber mai.

𝐊𝐡𝐚𝐰𝐯𝐞𝐥𝐚𝐡 𝐂𝐡𝐚𝐧𝐜𝐡𝐢𝐧 𝐓𝐡𝐚

School kan kal lai chuan Asia hi khawmualpui zinga zau ber a nih thu kan zir thin a. Mahse Kristian percentage erawh chu a chhe ber tih kan hria. Europe leh America-te chu Kristian rama chhiar theih an ni thin kha a nia, mahse intihfinna leh khawsak nawmnain tam tak chu a ei ral mek a ni awm e. Tun dinhmunah hian Europe leh America-ah hian Kristianna a tla hniam nasa a ni tih mithiamten an sawi thin a, sakhua hrim hrim hian an nunah hmun a chang lian tawh lo viau a ni awm e. Chutih rualin Africa leh Asia ramah te Kristian kan pung thung a, Pathian hnathawh dan a mak hle mai. ‘Hetah lo thiat mah se, hmun dangah a din thar’ tih ang kha a ni mai awm e. Amaherawhchu, tunlai hun leh hmanlai kha a danglam hle tawh tih kan hriat erawh chu a tha. Hmanlaiah kha chuan sorkar chak ber ber leh ram changkang ber ber atangin missionary an kal a, an thusawi pawh awih a nuam deuh ngei ang. Tunlaiah erawh chuan media khawvel, engkim deuhthaw inhriat tawnna a lo ni tawh a, ram changkang lo zawk atangin changkang zawka Chanchin Tha hril a ni deuh tlat tawh bawk nen Chanchin Tha hril a hautak telh telh emaw tih mai tur a ni. Chutih lai reng chuan Loneitupa chuan thlawhhma tha tak tak min siamsak reng a ni tih erawh kan pawm thiam a ngai bawk si ang.

𝐀𝐬𝐢𝐚 𝐫𝐚𝐦𝐚𝐡 𝐂𝐡𝐚𝐧𝐜𝐡𝐢𝐧 𝐓𝐡𝐚

Asia ram hian Chanchin Tha a mamawh takzet a ni tih hi hai rual a ni lo. Kum sangbi thumna hi Asia khawmualpui ropuina hun tur niin an sawi thin a, chu khawvel chu Kristian khawvel a ni dawn em? tih chu vawiina ringtute thiltihah a innghat thui ngawt ang le. Eng ang Kristianna nge ni dawn? tih pawh ngaihtuah a ngai nghal. Africaa Kristian an pun nasat hle lai hian an Kristianna chu an duhtui hmel loh hle a ni. Thenkhat phei chuan ‘mel khata zau leh inchi khata thuk a ni’ an ti hial. Kristianna tak tak an paw chhuak tawk lo hle a hria leh vei pawl an awm. Chuti a nih avang chuan Kristian an tam leh tam loh ringawt piah lamah Pathian hnung zuitu dik tak, a hming putu pangngai mai maia lungawi lova ‘a zirtir’, ‘a thupek apiang zawm thin’ Kristian an nih theih nana kan vei leh thawh a ngai a nih hi. Chutiang tak a nih theih nan chuan ‘Eng Chanchin Tha nge kan hril?’ tih kan inzawh thin a pawimawh a, nambar tam leh report that ringawt khel lova a takna kan tuipui phak pawh a pawimawh dawn a ni. Asia ram hian Chanchin Tha fir a dawn theih nan Mizo Kristiante hi kan puanven kan sawi rem sauh sauh a ngai. Kan awmna ram a nih avang hian India ram kan vei lo thei lo va, mawhphurhna pawh kan nei a ni tih hai rual a ni lo. Amaherawhchu, Mongolian thlaha min siamtu Pathian chuan kan Mongolian-pui ho zinga Chanchin Tha thlen ve tur hian min din a ni thei ang em? Hmelhmang atang hrim hrima min en hrang lotu Mongolian-ho ram China, Tibet, Thailand, Cambodia, Vietnam, Myanmar, Laos, Malaysia, Indonesia, etc., an va tam si em! Kan hmuh tam Hindu ho hi India ram leh Nepalah bak an tam lo va, Asia ram dang zawng hi chu Buddhist ram a ni deuh vek thung. Chu chu SEANET –in an vei chu a ni. Asia hi Krista tana la tur chuan Buddhist ram vei a ngai. Mizo nula/tlangval tan heng rama missionary nih a va phurawm em! Mizo Kristiante tan rawngbawl a va chakawm em! Kan Lalpan min ruatsak a nih ngei a rinawm si a!

𝐓𝐢 𝐭𝐚𝐤 𝐭𝐚𝐤 𝐜𝐡𝐮 𝐚𝐧 𝐥𝐚 𝐭𝐚𝐦 𝐤𝐡𝐚𝐰𝐩 𝐦𝐚𝐢

Ka conference han chhim ve-a rilru tihlimtu tak pakhat chu kan resource person-ten zirna pangngai huam chhunga paper present pangngai ang ni lova thahnemngaihna leh phurna nena an tizel thei kha a ni. Mizo Kristian tawngkam takin ‘a nung’ hlawm hle. Miten Chanchin Tha hril tura an zir chian peihzia leh an beih tak takzia a lang thin. Sap missionary-te hmu pha lo tawka piang keini ang Northeast pawh la pel tam lote hi chuan sap nih leh missionary nih te chu awmang lo deuh hu-a hriatna te pawh kan lo nei tawh hial a! India ramah hian sap tourist leh mi lian deuh bak kan hmu meuh tawh si lo va, film leh tv-a kan hmuh te lah entawn tlak tak an tam bik si lo bawk nen! Chutih laia vun ngo missionary naupang te te zawkin thahnemngaia mi an zirtirna hmanrua anmahni ngei ziak te, milem leh cartoon ni awm tak taka (keini ang tan pawha holam ang taka lang) hriat thiam awlsam zawk beiseia an siam an chhawpchhuak rai maite chuan rilru a hneh hle a ni. Theih ang anga hril hi a tul a nih hi. “US-a nau tihtlak tam lutuk leh neih inang inkawp hluar chungchanga Billy Grahama mangangin, ‘Pathianin he ram hi a hrem lo a nih chuan Sodom leh Gomora lakah thupha a chawi a ngai ang,’ a tih hial kha tun thlenga a la hrem loh chhan chu missionary an tirh chhuah tam vang a ni e,” ti te pawh an awm. A ngaihnawm thin hle. Khawvela hna har ber chu Chanchin Tha hril hna hi a ni mai thei, mahse hna ropui ber leh pawimawh ber a ni tel miau si a. Keini ho tawngkama ri zing tak Chanchin Tha hril hlutna hi kan rilru leh thinlung hian a pawm tak tak chiah em le? Inzawh theih tak a ni. Mahni in leh lo kal sana hril tlak niin kan hria tak zet em?

𝐊𝐚𝐧 𝐤𝐡𝐚𝐰𝐡𝐚𝐰𝐢 𝐭𝐢𝐡𝐳𝐚𝐮 𝐚 𝐭𝐮𝐥

India ramah hian Chanchin Tha hril a harsa telh telh a ni tih kan hria. Zalenna kan neih theih nan kan tawngtai tam a, kan dikna (constitutional rights) te pawh kan humhalh thiam a tul ta a ni. Tunah phei chuan sakhaw inlehna te hi thil tha lo leh dik lo tak angah media khawvel chuan a kalpui deuh ta der a. Chu mai ni lovin Kristian rawngbawlna atana ram dang atang tanpuina hmuhte pawh a har telh telh a ni tih kan hria. Daltu mihring mai piah lamah dan leh hrai hmanga indalna pawh a tam zel dawnin a hriat theih a. Hetih lai hian kan Chanchin Tha hril tum dan rilrute pawh ennawn a tha awm e. Chutiang tur chuan kan Pathian pawhin min buatsaih a ni mahna! Missionary-te thawk tura kan beisei dan te, kan thawhrah kan beisei dan te, kan mission field nia kan hriat te, kan Chanchin Tha hril tehfung te zawng zawng hi her rem a tul deuh ta em? Missionary-te chu hlawh tlem leh khawsak har tawpkhawk tura kan ngai tlatte pawh hi ngaihtuah thar a tul lo em ni? A hna a pawimawh viau chuan hlawh pawh a tha tur a ni dawn lawm ni? Ringthar neih tam ringawt kan buaipui hian thil a tichhe tam thei zawk em? Result beisei ngawr ngawr nge kan ni ang rinawm taka Chanchin Tha hril mai? Pathian malsawmna liau liau mihring kuta hmuh kan tum nasa lutuk ta em? Chhut thei chuan chhut a ngai e. He conference-a missionary senior tak pakhat chuan, “Missionary training aimahin missionary tirtute training hi kan mamawh ta a ni lawm ni?” a ti. Ngaihtuahna ti thui tak a ni. Eng pawh ni se, India sorkar pawhin ‘Look East Policy’ atanga ‘Act East Policy’ meuha a kai san tawh hnu hian kan Mission rilru pawh hi ‘Look East’ tal chu a hun tawh lo maw?

 

*****