𝐁𝐄𝐈𝐒𝐄𝐈 𝐂𝐇𝐇𝐀𝐍 𝐒𝐀𝐖𝐈 𝐓𝐔𝐑𝐀 𝐈𝐍𝐏𝐄𝐈𝐇 𝐒𝐀

Mizo Sunday School Union chuan kumin Puitling Sunday School zirlai atan “Kristiante Rinna Vawn Him” tih a thlang a. Thangthar tam tak chu an lawm viau laiin zirlai tam tak chu an phur chiam lem lo emaw tih theih turin phun deuh niah niah an awm fo mai. Hetiang zirlai kan neih hlutna hi kan su fuh lo hlawm deuh em aw? tih a awl rum rum mai thin a ni. He kan zirlai changkanzia hi hnam dang kan Kristianpuite hnena sawi nuam khawp a ni a, a pawimawhzia hi tih tak takna nena zirtuten an la hre zual zel dawn bawk a ni. Kum chanve zet zawt kan zir hnu hian hlawkpui lehzuala kan zir theih dan tur nia ka hriatte han chhawp chhuah tum ila.

𝐍𝐚𝐧𝐠𝐦𝐚 𝐭𝐚𝐧 𝐧𝐠𝐞𝐢𝐚 𝐳𝐢𝐫 𝐭𝐮𝐫 𝐚 𝐧𝐢 𝐞

Rinna vawn him chungchang hi ringtu pangngai, rinhlelhna pawh nei lem lo tan chuan zir ve tul vak lova hriatna a lian duh khawp mai a. Chumi thangah chuan kan awk tlang deuh theuh emaw tih theih a ni. Apologetics (Rinna hum him) thil hi Pathian awm ring lote emaw, rinhlelhnain a tlakbuakte emaw chanvo bikah kan ngai nghet niin a lang. Chu chuan min titui lovin, kan tana thil tul ber ni lo zir ta vak emaw intih a awl hle a ni awm e. Hetianga i lo ngai deuh roh a ni chuan i ngai sual hle a ni tih inhre hmasa phawt la. Apologetics mamawhtu chu ringtu zawng zawng hi kan ni a, kan zir ho theuh a ngai a ni tih kan pawm ngheh tlan a tul a nih hi.

He thil hi Rinna chungchanga buaite emaw, Atheist tituai deuh emaw beih nan a ni mai lo va. Kan rinna, hei leh thleng kan lo tuipui leh hlimpui tawh; kan lo insen fona leh rin hrang nei awm tha hle hlete kan sut fo tawhna chhan; mi tam tak phei chuan an lo retheihpui thak thak chhan hi he khawvel zir thiamna leh sakhaw dangte  zirtirna atangin eng chiah nge a nih tih i thlir dawn a ni zawk. Chu chu thu ngaihnawm ber pakhat a ni lo thei dawn em ni? Khawvel mi zawng zawng atanga teh phei chuan Kristian hi tlem te kan ni a, India ramah phei chuan zaa pathum pawh kan hauh hleihtheih loh lai hian i RINNA dinhmun kha nang ngei khan i hriat chian a ngai a ni.

𝐊𝐚𝐧 𝐫𝐢𝐧𝐧𝐚 𝐜𝐡𝐮𝐧𝐠𝐜𝐡𝐚𝐧𝐠𝐚𝐡 𝐡𝐫𝐢𝐚𝐭𝐧𝐚 𝐤𝐚𝐧 𝐭𝐥𝐚𝐜𝐡𝐡𝐚𝐦 𝐭𝐢𝐡 𝐩𝐚𝐰𝐦 𝐦𝐚𝐢 𝐭𝐮𝐫

Mizo Kristiante hian kan Rinna hi kan chhuang viau rih a. A la lawmawm khawp mai tih hai rual a ni lo. Amaherawhchu, he kan Kristian Rinna chungchangah erawh hi chuan hriatna kan tlachham angreng hle tih hai rual a ni lo. Keimahni huang chhungah chuan Kristian thurin chi hrang hrang chu kan inzirtir tha viau mai, chu chu theological exercise, ring tawhtu ten an thurin an zirna a ni. Hei hi pawimawh tak a nih rualin tunlai khawvel hnam tin leh sakhaw tin inpawlhsawpna hmunah hian hei chauh hi a tha tawk ang em? I tu leh fate, khawvel thiamna lama lut thuk telh telh tura  fuih mekte kha nghet taka ding turin kaihruai thei ang em? Khawvel thiamna i duhsak em em lai khan i Rinna chungchangah an lo bil hle mai tur asin! I inbuatsaihin nang tak pawh i chiang meuh maw?

A nihna takah chuan kan rinna vawn him lam kan ngaihthah hi a pawi khawp mai. Thil tul ber ni lova kan han ngai hial deuhthaw te hi chu Setana bumna a ni thei hial lovang maw? Kan tu leh fate lehkha thiam turin kan duh theuh tih a chiang, hemi kawnga kan duh anga an awm chuan anmahniah zawhna a piang ngei ngei dawn a, Rinna hi an la phatsan pawh a ni mai thei. Tin, an milen poh leh hnam dang leh sakhaw dang karah an tal nasa mai dawn emaw tih theih a ni bawk. ‘Kan rinna chu kan rinna’ ti mawl tawp mai lo va, ‘Eng vangin nge kan Rinna hi a dik bik tlat le?’ tih zawhna fumfe taka kan sawi theih a pawimawh zual zel dawn a ni. Chu mai bakah, he khawvel media hian sakhaw inzirtirna pangngai hi a kalh a tum ngar ngar reng emaw tih tur khawp a ni tih theihnghilh hauh suh ang che.

𝐊𝐮𝐦 𝐜𝐡𝐚𝐧𝐯𝐞 𝐥𝐚 𝐚𝐰𝐦𝐚𝐡 𝐮𝐥𝐮𝐤 𝐥𝐞𝐡𝐳𝐮𝐚𝐥 𝐳𝐚𝐰𝐤𝐢𝐧 𝐚𝐰

Apologetics hi Kristianten an hun tawn ang zela an lo uar thin a ni a. Kristian theologian thluak tha berten an lo buaipui tawh thin a ni. Hun engemaw chen atang khan India ram Pathian Thu inzirtirna hian a lo ngaihven tawk lo a, mipui mimir mai piah lamah kan Pathian Thu thiam tam takte zir loh lam a lo ni tlat mai a. Chuvangin theologian kan ni emaw, layman kan ni emaw tunlai khawvelah hian kan zir ho a ngai mek. Rinna vawn him hna hi a pawimawh telh telh dawn si a. Norman Geisler, America ram theologian hmingthang tak chuan, “Sermon tinah Apologetics telh a tul tawh a ni,” a ti hial a ni. 

Kan vanneihna chu kan mithiam chhuanvawrte zinga mi Rev Rosiamliana Tochhawng, Aizawl Theological College-a zirtir hna thawk mek hian he zirlaibu tha tak min ziahsak hi a ni a. Sunday School zirlaite hriatthiam theih tawk vela a dah thiamna hi a fakawm a, zir belh duh tan kawng a hawng zau thiam hle bawk a. Fun kim hle mah se he zirlaibu te reuh te hi a kamkeuna chi khat a ni tih a chiang reng mai a. Kristiante rinna vawn him lama kan hriatna tipung tantu atan ngai ila, inzir zelna hmanrua atan i hmang teh ang u. Saptawng chhiar thei tan phei chuan lehkhabu tha tak tak a awm nual a, Mizotawng pawhin a chhuak ve nual tawh tih hriat a tha tel bawk ang.

𝐈𝐧𝐩𝐞𝐢𝐡 𝐬𝐚 𝐭𝐡𝐞𝐮𝐡 𝐭𝐮𝐫 𝐤𝐚𝐧 𝐧𝐢 𝐞

Lal Isua hnua Kohhran hruaitu hmasa ber Petera chuan, “Nangmahnia awm in beisei chhan zawt apiang che u chhang turin inpeih sa  fo vang che u,” (I Pe 3:15) a lo ti a, Apologetics pawimawhna a hmu chiang hle mai. Ringtu tin mai hi chumi ti thei tura fuih kan ni tih kan pawm a tul takzet a ni. Zirlaite tan tur bika ngai lovin Sunday School zirtirtute pawhin zir sauh sauh tur a ni a. Zirlai a har deuh tuma a thiam zualte khaikhawm tura papek mai lovin zirtir chhawng thei ngei tura kan beih a ngai a ni tih hria ila. Superintendent lam pawhin uluk lehzuala zirtirtute kan buatsaih a ngai a ni tih kan hriat a tha awm e. ‘Inpeih sa’ tih hi kan thupui ni se.

Kan tu kan fate hian phone leh thil dang atang hian keini aiin thil an hre chak tawh zawk tih pawm ngam hi tih makmawh a ni ta. Intermediate zirlai pakhat inneih inangte inkawp hi a pawina a hriat miah loh thu a sawi bal bal ka hre tawh. Ka fate ngei pawh hi NPSS zirlai an ni chungin sakhaw dangte chhandam an nih bik lohna chhan tur ngunthluk takin min zawt fo. An thiante harsatna theology leh philosophy huang atanga chhan harsa tak takte pawh min zawt chhawng thin. Kan khawvel hian Apologetics a mamawh tawh a nih hi. I beisei chhan zawttu chhang turin i inpeih em?

****28072023****