𝐌𝐀𝐍𝐈𝐏𝐔𝐑𝐀 𝐑𝐀𝐌𝐓𝐇𝐀𝐑 𝐓𝐇𝐀𝐖𝐊𝐓𝐔𝐓𝐄 𝐓𝐔𝐀𝐑𝐍𝐀

Manipur buaina hian kan rilru a luah hneh hlawm hle a. Thil dangin kan rilru a luah thei rih lo a ni ber e. Rilru tihrehawm tam zawk a awm laiin buaina leh harsatna karah beisei piah lama thawk thin Pathian hnathawh ropui tak tak hmuh tur a awm bawk. Tribal lam tan chuan Meitei-te hmuh sakhi a awl khawp mai a, chutih rual chuan Meitei-te vek te zara nung dama la awm tih theih tur an awm nuk a ni tih hre tel tho ila a tha awm e. Khawi hmunah pawh hian mi tha leh tha lo an awm a, a tha lo lam an pawngpawrh deuh hian khawvel a nuam ta lo thin a nih mai hi.

Mi bengvar lo leh thil danga buai vanglaia thleng tih takah he buaina hian ka beng a lo thlen meuh chuan kut an thlak rem rum tawh a lo ni a. Zahthlak zawkin! Imphal Pastor pakhat ka han bia a, ani chuan, “Hei kan building an rawn vawm tan a, ka chhungte chu an chhuak daih tawh a. Hnu ka han dal deuh a…Tunah chuan kei pawh ka inrelh chhuak a, ka bihrukna hmun tur ka la thleng lo…Thawm a ring sawt hle,” a lo ti a. Kha Biak In kha ka lo lawi vena thin a nih avang leh a pawn glass vel tuaknaah pawh ka tel ve avang khan ka rilru a na nghal vawng vawng mai a. Hrehawm tak a ni. An hal dawn nge an suasam vek dawn kan hre si lo. Buildingah khan Pastor Quarters, Biak In leh Field Secretary quarters awm vek a ni bawk si. Hril a hai ngei mai. Mahse tunah rih chuan pawn lama cheimawina darthlalang tih loh chu an tichhe chhunzawm vak lo a ni awm e. Pathianin a hum zel ang chu maw.

Tichuan Meitei thingtlang khuaa thawk mek kan missionary-te chu ka han phone kual ta char char a. An lo biru thup tawh hi a lo ni a. An thikthu chhiat zualna lama awmte phei chu an tlanchhe mek lo niin! He hmuna kan tirhkoh pawh ngaihthat lohna tur hmu thiam vak bik lo chi a lo ni a. Miin fimkhur turin an phone a chhan lai mek chuan thawm a lo awmzui nghal a. Meitei firfiak pawl te kutthlak tum chu dan tumin a khaw mite an lo tang ve bawk a. Chutia an innawr vel buai lai chuan Tirhkoh te chhungkua – a nupui, an fapa kum 5, kum 4 leh kum 2 chu leiletah an chhuak a, a chhak tlanga Tribal khua an thleng thei hram a ni. Anni chhungkhua hi khuaah pawh awm ngam lovin ramhnuaiah te an riak thin a. An lainatawm hle. Han inbiak erawh chuan hlim takin an tawng reng thung. Pathian awmpuina an chang nasa tih a hriat a ni.

Kan Field Secretary chhungkua thil tawn hi a hlauhawm a. Buai intan zan khan an awmna hmun ualau, misualte beih awlsamna hmunah an awm tih hriain an insaseng a. An tawmna hmun chu Meitei Kristiante awmna tho  a ni lo thei lo va. Ni tam lote hnu chuan thawm an rawn nei ta chat mai a ni. Biak In bawk an bitum leh a, an suasam fe hnu chuan an rawn zawng ta a. Thiar in (toilet) rei tak hman tawh loh, maimawm inzam deuh nuaiah an chhungkua leh awmpuitu nula nen an tawm a. In chhung an rawn lut thur thur thawm te pawh an hre vek a; daidangtu chu bang mai a ni tawh si. Hmeichhe awm nem zawkte hlau tap chhuak ngam si lo mittui tla pawh a hriatthiamawm khawp mai. Fa sen ber kum 2 leh a chanve mi hritlang lehnghal khan thawm han nei zauh sela chuan an chan a chhe ve khawp ang le. Amaherawhchu, Pathian hualhimna a lo thleng a, an dinhmun hriatthiamna mak tak a nei ni ve ngei tur a ni, a ngawi kar mai a nih chu! Pa berin min hrilh danin, “Kha mi hunah kha chuan thi ngei turin ka inhre tawh a, ‘ An himna tur duhsak luatah ka chhungte hi thi turin he hmunah hian ka lo hruai reng a ni maw,’ ka ti rilru hman a ni,” a ti. Lainatthlak tak an ni e.

Tirhkoh nula a nau nena Meitei thingtlang khuaa awm pawh an memberten hum nasat an tum viau a. Buai a intan tirhah an Biak In bungrua tha zualte an chheprelh a, an unauvin in pakhatah an thukru a. Mahse a lo rei deuh a, inhum leh inzep a har telh telh bawk si a. Chumi khuaa awmte pawh chu an chhak tlanga Tribal khuaa awmten an bei thut ang tih hlauvin an ralkhel hle tho bawk a. Tirhkohte bihrukna chhungkua pawh chuan hmun danga tawmhim an duh ta zawk zel a lo ni a: “Hetah hian awm ula, Meitei firfiak lam tumahin an rawn zawng lo ang che u a, Tribal ho an lo kal a nih pawhin nangni chu an khawih lovang che u,” tiin an la riah chhuah san ve leh chhawng a nih chu! Hemite unau hian, an bulhnai khuaa Tirhkoh awmte nen, an him rei loh hlauvin tlanga Tribal khuaa tawm him an rilruk ta a. Meitei khua leh tribal khua inkarah chuan phai leilet km 5 vel a awm a, him taka paltlang a huphurhawm hle a ni. Mahse, an awmna hmuna awm reng a him loh zawk tak miau avangin zan thimah mi 19-te an chhuak ta a. Meitei tlangval 3-in an veng a, Tribal khua an han thleng chu an lawm hle. Amaherawhchu, chung Meitei tlangvalte chu khawchhung tlangval duty-te chuan silaia tinin kah mai an lo tum ve thung a. An inkara dingin Tirhkohte chuan an han hum ve leh chhawng a ni. Inngeih takin han awm ho hle hle ila ni mai tur hi a nia.

Kan nau pakhat Rongmei Naga ho zinga rawngbawla awmte hi a tira kan ngaihtuah loh berte an ni a. Meitei khuain hual vel tho mah se Naga hmun a nih tlat avangin an rawn thlen duh kan ring vak lo tlang a. Mahse, rinaiin an rawn lang hma thung. Hal mualpho lovin an quarters leh Biak In an han chhu chhia a (Chhut chhiat har vak a ni hlawm lo bawk a). Tirhkoh nupui leh an fanu kum 8 vel mi chu an memberte inah an biru thung. Ni a lo liam leh nual hnu chuan a humtu pawh a ngaih a tha thei tawh bik lo va, “Tunah chuan in awm tih hi an hre tlat tawh a, a theih ang anga in chhuah san mai a ngai dawn a nih hi,” tiin Police escort lam te pawh an han dil sak a. Police lam pawhin tha taka an lo chhan avangin ngaihtha thawkhat takin an awm a.

Tlai lam a lo nih erawh chuan Police te pawh an contact thei ta lo. An bihrukna in neituin a kawl ngam tawh bawk si lo. Thlawhlaia riak turin an chhuak ta tawp mai a ni. Nu ber tap hawm hawm thu han hriat ringawt pawhin mittui a ko chhuak ve thei hial awm e. Rilru a va mangangin a va baihvai dawn em! Thi tura chhuak ni mai awm an ni. An chanchin hriaten kan ngaihtuah hle a, zan thimah phone pawh an chhang ngam tawh si lo. Thlam ram tawh tak an hmu fuh a, a chhuat lah lei chul mam pawh ni lo. A tuk khua lo var se engtin nge an awm tak ang? Khaw engah misualte khan an hmu anga an that mai dawn em ni ang? Rilru a hah duh hle a ni. Amaherawhchu, Pathian hnathawh mak tak a lo lang leh tlat mai. Police lam kha an duh loh reng vang ni lo, an kalkawnga inkahna nasat lutuk avanga biak theih ni ta lo an lo ni a. Zing dar 2:30 –ah, anmahni tan tak pawh firfiakho tawn hlauhawm em em, nun pawh thap hialin an va chhan chhuak ta a nih kha.  Thilmak a tling a ni. Zing dar 3 –ah ka harh a, message beiseiin ka phone ka en nghal a. Police Stationah an awm tawh thu a message mi thawn  ka han hmu chu ka thaw huai huai mai a ni. An ruang hlawm mai turah ka lo inngai hman tawh hial!

Hetiang harsatna kara lawmna riau ka neih thung chu Meitei firfiakho ral hi lianin mi tam takin tuar mah ila kan rawngbawlna hmun taka mite hian min tan em em leh kan thil neih hmun leh hmate humhim duhna lian tak an nei hi lawmna tur pakhat a ni a. Hetah hian Pathianin kan rawngbawlna hi mal a sawm ngei a ni tih a hriat a ni. Tin, an khaw mite tho, “In thihnaah chuan kan thi ang, awm rawh u, kan hum dawn che u,” tia thlamuantute pawh an awm. Ngaihnawm tawp a tling lo thei lo. Thih leh dam kara kan thawktute nui deuh sar chunga min han biate hian mihring dinhmun derthawn leh thawn loh piah lamah Pathian thuamna an chang tih a chiang a. Thlarau mit mengte chuan Pathian ropuina an hmu a ni. Ramhnuaia an bihruk laiin tirhkoh pakhat chuan, “Kan han tlan chhe ve a, ramhnuaiah te kan han riak chu kal hmasate chanchin an sawite kan hre chhuak uar uar mai alawm. Anni dinhmun atanga ngaihtuah chuan kan tawrh ve hi chu a nep hlein ka hre zawk a ni,” tiin min hrilh zawk a. Pathianah lawmthu ka sawi. Tuna hmun hima awm ta, a quarters an suasam sak vek Evangelist pakhat chuan, “Lalpa he khuaah ngei hian i rawngbawl turin min tir let leh thuai ang che,” tiin zu tawngtai a! Rawngbawlna awmzia an hmu chiangin an va han chhuanawm tak em!

Tunah hian kan rawngbawltute hi hmun himah an awm vek tawh a. An taksain a tuar lo hi a lawmawm hle. Mahse, an neih ang angte kalsana hak lai nena chhuak an ni tih theihnghilh lo ila. Eng tiang ang takin nge misualin an lo rawk ang tih hriat theih a ni tawh lo. Thenkhat phei chu hal emaw, suasam emaw an ni tawh bawk a. An hlawh tlem te te baka vawkvulha intuak te kha an ni hlawm a, an lainatthlak takzet a ni. Rawngbawlna lamah hian an rilru a hnual mai ang em? Engtikahnge hlauhna hnuhma leh rilru natna ata hi an fihlim ang? Engtin nge Kohhrante hian kan tuamhlawm dawn? tihte hi zawhna pawimawh tak tak a ni awm e.