TUI LUANG KIANGA THINGPHUN, AHUNTEA RAH THIN

May 2 kha ka birthday a ni ve a. Thil eng eng emaw ka ngaihtuahnaah a lo lut ve a, han post ta ila.....

Mi tam tak ang bawkin piancham ngai urhsun tehchiam chi ka ni lo va. Kan khawsaknain a phak lo te pawh a ni tho a, ka pa khan Biblea birthday lawm tuten an lawm niah buaina a thleng zat zat tiin lawm min khap thin. “Pian niah chuan tah zawk tur alawm,” te a ti a, a dik theih dan chu a awm tho mai. Amaherawhchu, birthday lawm te chu a pawi em emah ngai lo phawt ila. Ka birthday hma zanah ka faten ka birthday card tur an ziak (drawing & coloring) ve ve a, anmahni tawkah chuan an chei mawi hle a ni. Zing ka thawh veleh khumah phur takin, “Happy Birthday” tiin mi rawn hlan dun a, a hlimawm dan a dang hle mai. Tlaia an sikul bangin ‘birthday cake’ an tih mai an rawn hawn bawk a, kan ei ho tak hawng hawng kha....

Kumi 42 lai ka lo tlin ve takah chuan ni dang lo ang takin ka ngaihtuahna te pawh a a kal thui ve raih mai a. Rei tak dam tur pawh ni ta ila, ka hun zahve chu ka hmang tawh tih a chiang a. Ka han inen let vang vangin Pathian malsawmna ka dawn nasat zia pawh ka hria. Kut hnathawk maia ei zawng nu leh pa nei, in leh lo a suala sual chhuah ngai chhungkuaah ka seilian a. Thingtlang khua maia awm kan nih avang khan khawsakna chu a hniam tlang ngei e. Chhuanchham khawpa awm mi tam tak ka hria. Keini chhungkua erawh chuan chutiang hlauhthawnna chu vawi khat mah kan tawng lo. Thenkhat tan chuan hei hi a ho mai thei, a hrethiam tan erawh hlu tak a ni.

A AW B ngat zir tanin kan tal pawl ve mai mai kha a ni a. Ka pa khan matric pass vel kha a lo suangtuah phak chin a nih mai thu tum khat chu min hrilh a. Pathianin nu leh pa leh u leh nau vawiin thlenga an hmangaihna ka rinhlelh ngai reng reng loh, kan chhungkuaa ‘special’ bik emawa inngaih theih rum rum khawpa min duat rawn tute min pe a. Ka lawm thin. Ka nu leh pa te khan, khawvel thila an mawl ang angin Pathian tih pawimawhna leh rinawmna nun min lo zirtir a. Vannei ka inti takzet a ni.........Nupui tha tak min pe a, fanau malsawmnaa min vurin fanu leh fapa duhawm tak tak min pe tawh bawk a. Ni tin hna atan ka hna ngaihpawimawh ber, ngaihhlut ber leh thawh chak ber Kohhran ho zingah min thawh tir hi….Pathianah ka lawm a ni.

Ka hringnun ka chhut hian sum engzahnge ka neih? In leh lo eng anga ropui nge ka din? Eng tiangin nge miten min ngaihsan? tih hi ka chhut ber a ni ngai lo. Keimah ka inzawhna, chhan hrehawm tak erawh chu hei hi a ni –Pathian Ram zauna atan enge i thawh (contribute) ve tawh le? tih hi. Kum 42 lai he khawvela awm tawh hnuah pawh he zawhna hi chhan a la har cheu a, insit a la na hle zel a nih hi. Ka thawh ve hi a beitham tak zetin ka hre thin.

He ka birthday hma chiah May 1 khan ka phone-a Daily Prayer devotional chuan hei hi a rawn chhawp a, ka rilru a hneh hle mai –

And he shall be like a tree planted by the stream of water,

That bringeth forth its fruit in its season,

Whose leaf also doth not wither;

And whatsoever he doeth shall prosper .

– Ps 1:3

He Sam-a thing ang nih hi a va chakawm tak em! He chang hi a mawiin a hlu thlawt a ni. Hla phuah thiam ni ila hla ropui tak ka phuah ngei ang. Thuziak thiam ni ila essay ropui tak a hring chhuak ngei ang. Thuhril thiam ni ila he chang behchhan hian ka au khawk rum rum ang. Ka theih tawk ka tawngtainaah chuan, “Lalpa, tuiluanga kianga thing phun, a huntea rah thin, hnah pawh uai ngai lo, thiltih apianga hmuingil zel hi min nih tir ang che,” tiin ka chham ta a ni.

Ringtute hian hei aia nih chak kan nei thei dawn em ni? Hringfate tan hei aia hlu hi a awm thei dawn em ni? Thing ni ta ila, tui luang kianga din aia duhawm a awm lovang. Tui luang kianga thingphun chuan a nunna atana a mamawh ber tui a tlachham ngai lo va, hnianghnarin a hmu reng a, a nung hlap reng a ni. Tichuan, sik leh sa inher azirin rah a lo huna, a hunteah rah a chhuah thin a; a hmanhmawh hauh lova, a muang chang ngai lo. A sakruanga nem ber lai a hnah, tang thei tura feina leh khawngna nei hauh lo pawh a nih tur ang sang ber niin a vuai leh til tura uai miah lovin a hring hlap reng a ni. Tichuan, chaw tha leh dik hne na na na, a huntea rah na na na chu a thiltih apiangah hmuingil lo thei a ni lo va, Pathian Thu pawhin a hmuingil zel a ni tih min hrilh mai a ni. He mi nihna hi Pathian chawimawitu, Pathian ropuina thlentu a ni tih a chiang. Poet Joyce Kilmer hla ropui chuan:

TREES

I think that I shall never see

A poem lovely as a tree

A tree whose hungry mouth is prest

Against the earth’s sweet flowing breast.

A tree that looks at God all day

And lifts her leafy arms to pray.

A tree that may in summer wear

A nest of robins in her hair.

Upon whose bosom snow has lain.

Who intimately lives with rain.

Poems are made by fools like me,

But only God can make a tree.

Thing kung chuan nilengin a siamtu lam a thlir a, a kaute chu Pathian lamah a phar chhuak bawk thin. Nipui a lo thaw a, chung leng savaten an chenna atan bu an rawn chhep a, vur a lo tlakin a lo dawngsawng thei zel bawk si. Van ruahtui a lo tla a, inhawng takin a pumin a lo pawm thin a ni. A siamtu tan a va hlu em!

 Lalpa ‘tui luang kianga thing phun, a huntea rah thin’ min nih tir ang che.