CHHANDAMTE RINNA CHU

Rinna leh thiltih chungchanga kan buai fo chhan chu rinna awmziaa kan chian thin loh vang a ni ngei ang. A thuah ringtu dik tak chu lo buai palh pawh ni se, a nunah erawh chuan a rah dik a lang ngei ang. Hriat fiah erawh chu thil duhawm tak a ni lo thei lo thung a ni.

Tibuaitu zirtirna danglam hnaivai thenkhat

            Rinna chung chang kan sawi fiah lehzual theih nan zirtirna danglam deuh pahnih han la chhuak ila. TMEF, Manipur Zonal chuan rinna chung chang sawifiahin[1]: Rinna dik tak chu (i) Isuaa awm, Isua hnena mi, Isua nun; (ii) Mihring chhungril thlarau nun rawn nung; (iii) Pathian thilthlawnpek, tiin an sawi. Tin ringtu pawh, “Ti ve lo, chawlhtir, chawlhtirtu nei, tihsaktu neih avanga hah ve lo,” an ti a ni. TMEF Founder Rev. Dr. Rohmingliana pawhin hemi chung chang hi sawiin, “…rinna dik tak chu Pathian thu nung, Isua Kristaah a awm,” [2] a ti. A duhthawh chho zel a, “Rinna tak tak chu Pathian hnathawh, Pathian nungchang mihringa lo lang chhuak…mihring thiltih a tel lo va, ringtuah Pathian a tel bawk hek lo. …Ringtu (believer) chu mihring a ni a, rinna (faith) erawh chu Krista nungchang, mihring chhungril nuna lo che chhuak thin..”[3] tiin a sawi chhunzawm a. A uar luatah Isua pawhin rinna chu nei hialin a chhuah ta, “RINNA thu nung chu Isuan a thihna thisen avangin min pe a. A tisa put lai ni khan amahin a neih ang rinna nei tumah an la awm lo, a nun a la pek loh avangin (Joh. 6:53-58; 17:19, 22, 23). A thih hnuah erawh chuan khawvela taksaa a awm laia amahin a neih, PA a rinna nung kha min pe ta zawk a ni. Chu chu rinna tak tak, Isua nen nun pakhat, rinna hmunkhat, baptisma hmunkhat, thlarau pakhat kan lo chan tlanna chu a ni,” (Eph. 4:5, 6)[4].

            TMEF hrilhfiahna hi hriat thiam har thawkhatin,  suangtuahna (speculative theology) tam deuh mah se, ringtu nun a taka lan chhuah tirna kawng lam atan chuan a pawi lutuk lo tih hre hmasa ila[5]. ‘Ring’(believe) leh ‘rinna’(faith) han then ngial te[6], ‘rinna chu Isuaa awm’ han tih daih te, ‘Isua nun, Krista nungchang, Thlarau nun’ tia minung (person) ang maia han hrilhfiah hi chu Bible tum piah lam daih a ni. Pathian leh ringtu inkarah hian ‘minung’ dang a awm ta em ni ang? Hei hi he zirtirna khawhawi lam leh a zeh tel a ni tlat. Chuvangin, Isua meuh pawh rinna nei, a Pa ring angin a sawi ta hial a nih hi. Isua kha a Pa nen pumkhat an nih avangin a rin a tul lo tih chu kan hre tlang vek awm e.

            Rinna an hrilhfiah dan hi pawl chhuak hmasa Lalchhungkua-Unity te zirtirna nen a inhnaih ngawt mai. Lalchhungkua-Unity Dogma 5 chuan rinna chungchang hi ti hian a sawi a: 1. Pathianin mihringte tan Rinna min siamsak a, chu chu Isua Krista hi a ni. 2. Pathianin Isua Krista a rinna chu mihringte rinna leh thiamchanna a ni. Chutiang bawkin, mihring chuan Pathian mirin Isua Krista nihna leh thiltih chu a nihna leh tiha a rinin, mihring pawh chu ringtu a ni a, a rinna chu Isua Krista bawk chu a ni. Chutianga rinnaa mi a lo din tawh hnuin, mihringin ama tih leh thawh rim tumna a nei ve tawh ngai lo va, Rinna tak Isua Krista nihna leh thawhsak chu ringin thlamuang takin a awm tawh zawk a ni.”[7] Hei phei hi chu ‘thu thluang’ zirtirna, rinna huang chhunga thiltih hnawl fikthlak thakna a ni. “Isua thihna avanga Pathian lungawina hi mihringin kan rin duh leh duh loh emaw, kan pawm duh leh duh loh vin a tidanglam chuang lo…Pathianin Isua kaltlanga rinna min siamsak hi mihringte chuan kan ring lo thei lo ni zawk,” [8] tiin, mihring aiawh atan Isua Pathianin a rin (a hman) tawh avangin, “chhandamna chang lo thei lo” niin an sawi hial zawk a ni. Hei hi Biblein rinna a sawi dan nen dang tak a nih laiin, Lalchhungkua-Unity hi chuan Bible hi thuneitu berah an ngai chuang lova, an buai chuang lo.

            Chik taka heng zirtirna pahnihte hi kan en chuan an inzulna kan hmu ngei ang. Rinna chu Pathian siam sak/thilthlawnpek an ti a, Rinna leh Isua chu thil thuhmun ang deuhthawha ngaiin,  an hmer kawp ve ve bawk. Tin, Dogma 5-naa, “Pathianin Isua Krista a rinna chu mihringte rinna leh thiamchanna a ni,” tih leh TMEF zirtirnaa “simna ni lovin min simsakna zawk” tih te, “…kraws-a Isua thihna hi kan vaia thih nan keinin kan ring a ni lo, Lalpan a ring a ni zawk, nang aiin Pathianin a ring..”[9] tia uar taka a sawi ten en hian huang khata dah theih an ni ang.

            Misualin Lal Isua kan lo ring ta mai hi Pathian khawngaihna hnathawh ringtu chunga lo lang a ni tih hi hnawl theih ngaihna a awm lo a (Eph. 2:8). Westminster Confession Bung 14:1 chuan, “He rinna khawngaihna thilpek, mi thlanten an thlarau chhandamna tura an rin theihna hi, an thinlunga Krista thlarau hnathawh a ni,” tih kan hmu. Tin, ringtuin Isua Krista a rinna avanga a chawlh hahdamna duhawm tak pawh hi a dik lohna a awm chuang lo. Krista nghawngkawl nuama chawlte chu kan hah a dam reng a ni. Sakramen Pawl zirlaiah chuan rinna chu kawng thuma hrilhfiahin ‘chawlh hahdamna’ pawh a tel ngei a, a sawi dang pahnih ‘thu awihna leh innghah ngamna’ te hi an sawi tel ve ta lo a ni.

            An tihsualna lai tak nia lang ta chu rinna hi ‘chawl, ti ve lo, tih sa rin’ tih lai chauh kha an sawi a, an zirtir thin vang a ni. Rinna kawnga kal sual tam tak hi zirtir dik loh hrim hrim vang aiin uar bik nei a, a lo buk diktu (balance tu) zirtirna dang pawimawh ve tho kha an hlamchhiah tak thin vang a ni chawk. Rinna kawngah pawh kan thianten an tihsual lai chu hei hi a ni awm e. Rinna tak chuan ‘chawlhna, thuawihna leh innghahna,’ a ken tel vek si zia Hebrai 11-ah kan en dawn a ni.

Hebrai 11 leh Rinna

            Bible hian rinnaa nun te, a pawimawh zia te, chhandamna nena a inzawm dan, etc.,  te sawi nasa viau mah se rinna nihna tak sawifiahna (definition) kan hmuh awm chhun chu Hebrai 11:1 chauh hi a ni. A mala lakah chuan hei pawh hi a la famkim lo hle a ni. Sawifiah lam aiin a taka nunpui a uar nasa zawk hle tih a lang. Tin, ring leh ring lo chu thil chiang sa, sawifiah tehchiam pawh tul lo a ni mah zawk bawk. Bung 11 pumpui hian rinna ropui leh chungnun zia a sawi a. Kum zabi 1-na Pharisai ho thu kalpui dan; sual ngaihdamna te, felna te leh chhandamna chu beih nasat vanga hlawh chhuak tura inzirtirna chu a chaltauh a ni ber.

Krista thubul hrilh an nih nual tawh hnuah pawh rin vanga khawngaihnaa chhandam tih thu hi an man tak tak thei lo va. Rinna chu Pathianin a tir atanga mi chhandamnana a hman, thil tha tih chu rinna rah chhuah mai a nih zia hrilhfiah a tum a ni. He  ‘Rinna Kungpui Mual’ (Hebrai 11) hi kan bih chian hnuah, Lal Isua Krista rin awmzia hi a chian lehzual ka beisei.

            Rinna chu kan beiseite hriat chianna a ni (Heb. 11:1a, lt). He tawngkam hi tun hun sawina (present tense) a ni a. Hun kal tawh (past) leh lo la awm tur (future) kaihhnawih kan thil beisei tun huna (present) kan hriat chianna a ni. Rinna chuan hmana Pathian thutiam kha tun hunah min hmantir ta a. A thutiam chu pawmin kan lo awih ta a ni. Hun kal tawh leh lo la awm tur inkarah tun hunah hian Pathiana kan beisei chu kan hre chiang a. Tuna kan nun tidanglamtu a lo ni ta.

            Heta ‘hriat chianna’ tih hi Greek tawng chuan hupostasis (assurance) a ni a, Hebrai lehkhabuah hian vawi hnih hman a ni. 1:3-ah chuan  ‘anpui’(lh) leh ‘putu’ (lt) tia lehlin an ni.  Isua chu Pathian ‘atak anpui’ (lh) leh ‘zepui putu’ (lt) a nih sawinan he thumal hi hman a ni. 3:14-ah thung chuan ‘ kan rin chhan tantirhna’(lh) leh ‘a tira kan rinna’(lt) tia dah a ni. ‘A ziarang, a tak, chhungril, a nihna ril’ kan sawina a ni ang. A ‘foundation’ kan tih, thildang zawng zawng kan nghahna hi a ni. Chuvang chuan, rinna chu kan thil beisei anpui leh a zepui putu; kan beiseina innghahna a ni. Chanchintha leh Isua Krista rintlak a nihzia hriat chianna Pathian khawngaihna avanga kan neih sawina a ni.

Greek tawnga hupo chu ‘a hnuaiah’ tihna a ni a stasis chu ‘ding’ tihna a ni thung. Hupostasis chuan thildang hnuaiah tanhmun nghet takin a lo rem thin . Greek dictionary thenkhatah chuan he hupostasis hi hmasanga ‘thil neitu nihna’  lehkha ziak sawi nan an hmang thin bawk. “Rinna chu neitu kan nihzia ziakna lehkha a ni,” tia he chang letling te pawh an awm reng a ni.

Thil kan hmuh lohte hriatfiahna a ni. (Heb. 1:1b). Hei hian a thu ngai tho kha a kal thuipui deuh a. Mizotawngah chuan ‘hriat chian’ leh ‘hriat fiah’ chu inhnaih viauin lang  mah se Greek tawngah chuan hupostatis leh elegchos a ni daih. Elegchos chu ‘nemnghehna, finfiahna (proof) leh chiang taka awihna leh fiahna (conviction)’. He rinna neitute chuan an rin chu an nunpui tawh thin a. An thinlunga a chian tlat avangin eng pawh an hmachhawn ngam a ni. An nunah chuan an ‘hriat chian leh hriatfiah’ chu  a dik zia a lo langin, a ‘nemnghehna’ an ni nghal. Nakina an lawmman hmuh tur chu an chian em avangin tunah pawh hmu tawh ang maiin an nung thin (Heb. 11:7-13; cf. Rom 4:17-21). ‘Hmuh lohte hriatfiahna’ hi a Peteran tawngkam dangin a sawi, “Amah hmu lo pawhin in hmangaih a, tunah hian ani chu hmu rih lo mah ula in ring a, hlimna nasa tak sawi hleih theih lohin in khah hi; in rinna rah in thlarau chhandamna chu in hmuh mek avangin,”(I Pet. 8,9). Hetiang rinna hi tih chet rual loh a ni. He bungah hian harsatna nasa tak tak kara nghet taka ding tlangte chanchin kan hmu.

            Pathian Thu zirnaa kal hmasate chuan rinna sawifiah nan tawngkam pathum an lo hmang thin: (i) hriatna (knowledge, notitia), (ii) pawmna (assent, assensus), leh (iii) innghahna (trust, fiducia)[10]. Rinna chuan rilru, duhna leh tumna a khawih tel vek. Rilru chuan Krista Chhandamna Chanchintha chu a lo hria a, duhna chuan ama tan a lo pawm hmak a, tumna chuan Krista mila, a thu awiha nun a lo tum ta thin a ni. Fiducia , innghahna leh tumna hi Biblein rinna a sawina tam ber a ni a. Kan rinna kan nghahna atana kan inpumpekna a kawk. Miin Isua Krista ama Lal leh Chhandamtu atana a lo pawmna chiah kha a ni. Kristian zirtirna tluangpui chuan hei hi a pawm vek a ni.[11] Chhandam  tura rinna chuan ka nihna zawng zawng hi a kuahkep vek a, inpekna nen then hran theih a ni lo. Heng thil pathum te hi Hebrai 11-ah hian chiang takin a lang vek mai: notitia: “Rinnain a ni…kan hriat ni,” (v.3); assent: “rinna hi thil beiseite awm ngeia hriatna,”(v.1); fiducia: “rinna hi…hmuh lohte hriat fiahna (awihna chiang tak),”(v.1).

Rinna chu Pathian a awm tih rin leh Amah zawn a ni (Heb. 11:6). Mizote hi Pathian awm ringtu kan ni deuh vek mai. Isua Krista chanchin pawh kan hre thawkhat viau a ni. Chu chu rinna atan a tul bawk. Amaherawhchu, rinna dikah chuan Pathian zawn a tel tlat a ni tih chang 6-ah hian kan hmu, “Nimahsela rinna lovin ama lawmzawng mi nih rual a ni lo; Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni.” Rinna- Pathian- Zawn te inzawm dan a lo chiang ta. Tilai thu hi ngaihtuah chian a tha e. Lawmman chu Amah zawngtute a pe dawn, mahse, rinna lovin Pathian tihlawm theih a nih loh thu a sawi hmasa si. Chuvangin, rinna leh zawnna chu thil inang a ni tih a chiang a ni. Pathian dik a awm tih rilrua lo rin hriat ve ngawt pawh a tawk lova, amah zawngtute hnenah lawmman a pe thin tih rin tur a ni. Pawmna leh innghahna a kal kawp ta. A thu kan rin chuan kan zawn a ngai ta. Ringtu chuan a zawng thin bawk.

Rinna chu a thil pawmah khan a innghat a. Pathian chu lawmman pek hmang a ni tih a pawm avangin he thua innghat hian Amah chu a nunin a lo zawng ta a ni. Rinna dik tak chu Pathian zawnna nun a ni. Bible chuan rinna leh zawnna hi a hman pawlh fo (Isaia 55:6; Jer. 29:13; Amosa 5:4; Mt. 6:33). Rinna lovin ama lawmzawng mi nih theih a ni lova, a zawngtu chu lawmman a pek dawn si chuan Pathian zawn chu rinna thiltih dik tak a ni ang. Chuvangin, nun kawng engkima ‘Pathian zawn’ hi Biblein a sawi rinna dik tak lan chhuahna mawi leh chiang tak a ni e.

Rinna chuan engnge a tih? ‘Engmah a ti lo, a chawl tawp’ tih hi Hebrai 11 chhiartu tan chuan chhanna dik a ni thei ngai lovang. Rinna chuan Pathian Thu a awih tawh a ni. Pathian biakna nun (4), Pathian nena len dun (5), Pathian tana thiltih (7), Pathian thu zawm (8-10); chinna leh thihna meuh pawh hnehin a awm (11,12).

Thih thlenga rinawm turin rinna chuan a bei hram hram a (13-16); thil neih hlu ber chan huamin Pathianah a innghat (17-19); hmalam hun atan Pathian a ring (20-23); lei ro hnawlin van ro a ban (24-26); hmuh theih lohva chu a hmu (27); Pathian thil tih mak a hmu (28-30); hlauhawm hmaah huaisenna a nei (31-33); ramte an la, thil fel an ti, thutiamte an chang, sakeibaknei khate an tihchihsak, mei thiltihtheihna an timit, khandaih hriam lam an pumpelh, chak lohna ata chak taka siamin an awm, indonaa mi hrat khawkheng an ni, hnamdang indo pawlte an tlanchhiattir, mitthi tho leh an hmu, thawhlehna tha lehzual an chan theihna turin sawisakna ata chhanchhuah an duh lo, tihnawmnah leh vuak an turar, kawl bun leh tan ina khung an tawk, lunga denin an awm, thingzainaa zaibunin an awm, thlemna an tawk a, khandaiha sahhlumin an awm, beram vun leh kel vun sinin an vakvai, rethei takin, hrehawm takin, tihduhdahin an awm, thlalerah te, tlangah te, pukah te, khuarkhurumah te an vak an vak thin (38-39). Hebrai 11-in rinna chungchanga a sawifiah ber chu ‘thih thlengin a bei hram hram’ tih hi a ni. He khawvel tihduhdahna, tihhrehawmna, sawisakna leh hipna hian a hneh ve tawh ngai lo.

Rinna: Hnai lehzualin

            Rinna awmzia hi, kan sawi kawi hnawk thin e tih lovah chuan, hriat thiam har lo tak a ni. Pathian chungchanga ‘rinna’ tih tawngkam kan hman chhan chu kan taksain kan hmuh loh, kan khawih loh leh a rim pawh kan hriat loh a nih vang a ni mai a. Chhun pachangah ni a sa vawl vawl a ni tih hre tur chuan rinna a ngai lo. Kan hmu a, kan hre tlang vek. Hetianga tihlan hleihtheih loh thil a nih hian ‘rinna’ tih tawngkam hi kan hmang ta mai chauh a ni. Pathian a awm tih hi ring lo pawh an awm, a ring duh lotute chu a hring a hranin kan entir ngawt thei lo bawk. Lantir (demonstrate) theih a nih tak loh avang hian keimahniah chuan chiang viau mah se ‘rinna’ a nih a lo ngai ta a ni. Ringlo tan chuan hei hi ‘rin thu’ mai angah ngaih theih ni mah se mi tin rilrua thil awm tlat a nih avang hian he ‘Pathian hriatna’ hi Pathianin a dah ngei niin a ngaih theih a ni. Hei hi ‘rinna hmasa’(original faith) an ti thin.

            Chhandam leh chhandam loh, Pathian hmaa thiam chan leh chan loh hriltu rinna erawh chu hei hi a ni lo. Inzawmna erawh chu a awm ngei thung. ‘Rinna hmasa’-ah chuan lei leh van siamtu chu Pathian a ni tih kan hria a, Pathian khawngaihna hnathawh avangin Isua Krista chanchin hrilh hriatin kan lo awm ta bawk a. Chhandamte rinna chu Isua Krista an lo ‘pawmna’ leh ‘dawnna’ tak kha a lo ni ta. Isua Krista Lal a nihna leh misual Chhandamtu a nihna miin a lo pawm a, a nuna a lo dawn chiah khan a ‘ring’ kan lo ti thei ta a ni. A rin chiah khan rinna a nei a ni bawk.

Ringtu nunah chuan thil danglam a lo lang ta nghal a. A nun chhungah Pathian Fapa nihna zawng zawng leh hlawkna zawng zawng chu seng luh a lo nih tak avangin danglam lo chi pawh a ni ta lo. Miin a taksa chhungah zu um khat chauh pawh la lut se a danglam lo thei lo ang hi a ni mai awm e. Pathian Fapa taksa ei a, a thisen in chu a danglam lo a nih chuan dawt a sawi a ni ngei ang. Westminster Confession 14:1 chuan: “He rinna hmang hian Kristian chuan amah Pathian ngei thuneihnain a rawn sawi angin Pathian thua tihlan apiang chu thutakah a pawm a, chuta thu hlawm tinte thu ken a danglam ang zelin a thawh dan pawh a hrang a; thupekte chu a zawm a, vaunate chu hlauvin a khur a, he dam chhung leh hun lo la awm tura Pathian thutiamte chu a pawm a. Amaherawhchu chhandam nih nana rinna thiltih pui ber chu, khawngaihna thuthlung avanga thiam chan nan leh tihthianghlim nan leh chatuan nun nana Krista pawm a, amah chan leh a chunga innghahna chauh hi a ni,” a ti ta mai a ni.

Ringtu tan chan sual sim theih loh tlat emaw, sual kalsan duh loh tlat emaw hi thil awm thei a ni lo. Pathian aiin Setana a chak a ni mai dawn si a. Isua erawh chuan, “Pathian nen chuan engkim tih theih a ni,” (Mk. 9:23) a ti tawp mai. “Antam mu fangkhat ang rinna in neih chuan, he tlang hnenah hian ‘heta tang hian sawtah sawn insawn rawh,’ in ti ang a, a insawn mai ang. Tih theih loh reng in ngei lovang,” a ti bawk (Mt. 17:20).

Super-power neiin, dawi thiam angin kan duh duh kan ti thei tihna lam chu a ni lo. Sual hnehna thiltihtheihna chak tak kan nei dawn tihna a ni. Pathian thiltum leh duhzawng huang chhungah chuan engkim kan ti thei ta a ni. Rinna chuan a rin Pathian duhdan piah lamah hna a thawk ngai lo. Pathianin ni tura min duh ang chu kan ni thei tawh dawn. Chu chu Pathian nen chauha kan nih theih a ni.

Rinna chu Pathian nena thawh dun a ni. Isuan, “…mihring tan tih rual loh a ni lo; Pathian nen engkim tih theih a ni si a,” a ti a (Marka 10:27). Mihring chuan kan ti thei lo. Mahse Pathian nen chuan engkim tih theih a ni. Rinna kaltlangin Pathian nen kan thawk dun a, rinna kaltlang chuan Pathian chakna chu kan hmang ta a ni. Samuel Chadwick chuan, “Pathian nen, Pathian thiltum huang chhungah chuan mihring hi engkimtithei kan ni mai. Pathian nen chuan Ama duh ang tak a ni thei a; a tih tur apiang a ti thei zel a ni,” a lo ti hial. Hei chiah hi a ni Paulan, “Min tichaktuah chuan engkim ka ti thei,” (Phil. 4:13) a lo tihna chhan kha a ni. Tichuan, “Ama chakna chu kan chakna atan a siam tak avangin Pathian duhdanin kan awm thei ta a ni.”[12]

Hei hi rinna a pawimawh em em chhan lai tak chu a ni mai awm e. Judate leh Jentailte chhandam nih theihna kawng awm chhun chu Rinna a ni. Tin, rinna a nihna chhan pawh kan chawlh emaw, innghah emaw vang ni ber lovin he rinna hi Pathian nena kan ‘inzawmna’ a nih vang a ni zawk. Pathian chu mihring a ni lova, mihring hi Pathian a ni bawk hek lo. Thianghlim leh bawlhhlawh zawmtu chu ‘rinna’ chu a ni. Chu rinna kaltlang chuan Pathian chakna leh  thiltihtheihna chu kan lo chang thei ta a ni.

Rinna avangin mi tupawh Pathian mi an lo ni ve thei ta. Pathian a zawm thei ve ta tlat. Hei hi Paula Chanchintha hril chu a ni. Tun hma chuan Juda hovin serh an tan avang leh Dan an neih avangin Pathian ta bik niah an inngai thin. Paulan he zirtirna hi thiah darh a tum nasa hle. Isua Kristaa Pathian khawngaihna avangin a duh apiang chuan Pathian palai awm chhun Isua Krista chu ring a Pathian zawmin ‘Pathian mi’ a lo ni ve thei ta a ni, “…tupawh a ring apiangte tan chhandamna  tura Pathian thiltihtheihna a ni si a; atirin Juda mi tan a ni a, tin, Grik mi tan pawh a lo ni leh a,”(Rom 1:16). Pathian mi nihna atan Mosia Dan serh leh sang chu hnawl a ni, amaherawhchu, nunphung thlahdah leh thil tha tih hnawl a sawi ngai lo (Eph. 2:8). Pathian rilru leh duhzawng felna dan chu a pangngai reng. Miin Pathian a zawm tawh chuan ‘Pathian mi thlan’ a ni a, Isua Krista felna chu a felna atana chhiarsak a ni a, Krista thianghlimna pawh a thianghlimna atana chhiar a lo ni ta. Felna leh thianghlimna a neih tawh chu inzawmna mak tak mai avang chuan ama nunah a rawn lang ta tuam tuam mai a ni. A duhna leh tumna te kaltlang zelin a ni lehnghal.

            Rinna hi Pathian leh mihring inkungkaihna sawina tawngkam (relational term) mai a ni a. Amaha awm leh nun nei a ni lova, thenkhat sawi dan anga hmun danga mi mihringa lo lut ta leh lo thawk ta pawh a ni lem lo bawk. ‘Hmangaihna’ kan sawi dawn chuan hmangaihtu leh hmangaiha an awm a, an inkungkaihna sawina chu hmangaihna kha a ni. Chutiang chiah chuan rinnaah chuan ringtu mihring leh a rina Pathian a awm. Ringtuin Pathian a zawmna, a pawmna, a dawnna, leh Pathiana a innghahna sawina tawngkam chu ‘rinna’ a lo ni ta mai a ni. Rinna a nih chhan pawh engkim a fiah vek hmaa pawmchilhta leh inpe ta a nih avang kha a ni mai e.

            Tin, Pathianin min rinsak a ngai lo bawk a. Pain a Fapa a rin nachhan tur a awm lo. Chatuan ata pumkhat an nih avangin ‘rinna’ hi an inkungkaihna sawina tur a ni ve awm lo ve. Isua Krista kan rin theih nan Thlarau Thianghlimin min buatsaih vek mah se a ringtu chu keimahni kan ni. Kan rinna chu Pathian avanga awm thei a ni ngei a, mahse keimahniin kan ‘rin’ ngei a ngai a ni. Kan lo chet vena a ni. Chu kan lo chet vena chu Chhandamna kan hlawh chhuahna a ni lo va, chhandam kan nihzia a lan chhuahna a ni zawk.

            Tunlai Thuthlung Thar zirtu thenkhat, Grik tawnga rinna sawina pistis chu ‘ringtu rinna’ ni lova ‘Isua Krista rinawmna’ sawina ni zawka zirtir mek an awm. Isua Kristan Chhandamna hna a thawh chhuahna kawng leh misualte tana a rinawmna hi niin an ngai. Kan Lalpa chuan a chhandamna chu rinawm takin a thawk chhuak ngei a, amaherawhchu, rinna chungchanga amah lam han kawhtir daih hi chuan Prostestant lo inzirtir dan zawng zawngte kha a hnawl a ni deuh ber mai. He ngaihdan hi hneh taka thiatin Moises Silva chuan, “Rinna (pistis) hi Paulan Krista ta angin a sawi ngai miah lova… heti zawng hian a ngai lo hrim hrim a ni.”[13] Paulan ‘ring’ tih a sawi reng reng hian keimahni lam a sawina a nih zel bakah Thuthlung Thar hian a ringtu tur chu Krista ni lovin mihring zawk kha niin a sawi zel. Hei hi chik deuh hleka chhiartu chuan an man mai ang.

            Chu rinna chu mihring chhandam kan nih theih nana kan tana Pathianin a ruat bik a ni a. Pathianin a tanpui hmasa a nih loh chuan mihringin amah mai chuan hei hi a nei thei lo (I Kor. 12:3). Thil hote ang ni mah se, rinna chuan mihring nihna zawng zawng a huam tel vek a. A hnena thleng Chanchintha chu lo pawmin a awih a. Chu Chanchinthain a pho chhuah Isua Krista chu Lal leh Chhandamtu atan a nei ta hmak a (Rom 10:9). Isua nihna tak a pawm thei ta a ni ber.  A neih tak Isua Krista chu a ropui em avangin Ama tana inpekna nung leh dam chhung daih chu a keng tel ta a ni. Kum 100 liam dawn tawhah khan USA-a Presbyterian Kohhran theologian ropui tak Gresham Machen-a chuan ti hian ropui takin a lo hrilhfiah tawh a:

                        Rinna chu Krista kuta thilthlawnpek dawnna a ni.…Thil mak tak a ni a;

mihring nihphung zawng zawng tihdanglam a ni vek a; sual huatna leh

felna chaka riltam leh tuihal a keng tel. Chutiang danglamna mak chu

mihring tih theih a ni lo; rinna chu Pathian Thlarauvin a pek a ni.

Kristiante chuan anmahni leh anmahni Kristianah an insiam thei ngawt

lo va; Pathianin Kristaah a siam a ni.…Miin he Kristaa thilthlawnpek

hi dawng chungin sual nawmna duh takin a chen chhunzawm theiin a

rinawm loh. Kristan min pek chu sual laka chhandamna a ni a, chu chu sual

thiam loh chantirna ata leh sual thiltihtheihna ata chhandamna a ni. Tichuan,

Kristianin a tih hmasak ber chu Pathian dan zawm a ni; a chhandamna hlawh

chhuak tura he dan hi zawm erawh chu a ni lo; chhandamnaa chu Pathian

thilthlawnpek a ni; Chhandamna lailum luahtu a nihna angin dan chu hlim

takin a zawm mai a ni. Paulan rinna a sawi chu hmangaihnaa thawk chhuak

thin rinna a ni a, chu hmangaihna chu dan zawm famkimna a ni bawk…

Paulan rinna avang chauha thiamchantirna a sawi a ‘rinna’ hi rah chhuah

thin rinna a ni.[14]

---

[1] Ringna Hrilfiena (Churachandpur: Manipur Zonal, ___), 1. Evan. Rohmingliana, An La Varpawh Rih Loh(1997), phek 32-na atanga an lak a ni tih a hriat theih.

[2] Rev. Dr. Rohmingliana, Zion Panna Lamlian (Aizawl: Literature and Publication Board, TMEF, 2007), 88.

[3] bu ngai, 92.

[4] bu ngai, 95.

[5] Rinna leh Isua Krista hi an kalkawp tir tlat hi a himna lai tak a ni a. Rinna sawifiahna ngau ngau erawh hi chu sawiselna tur a tam thei ang.

[6] Ring =believe, rinna=belief, faith. Thiltih sawina (verb, ‘ring’ hi mental act a ni) leh noun (thil nihna sawina) a ni mai e. Thuthlung Thar hian ‘faith’ hi ‘Kristiante Thurin’ Paula ten an hril thin sawi nan a hmang fo bawk. A sawi danah a rawn hriat mai thin a ni.

[7] Rev. R. R. Chungnunga, Dogma Hrilhfiahna (Churachandpur: Lalchhungkua Unity Church, 2001), 46.

[8] bu ngai, 50, 53.

[9] Evan. R. Lalthantluanga, Thlarau Ro Bawm (Aizawl: TMEF Publication Board, 2009), 90.

[10] Augustus H. Strong, Systematic Theology (Philadelphia: Judson, 1907), 837-838 leh Louis Berkhof, Systematic Theology (Grand Rapids, Mich.: Eerdmans, 1939), 503-505. Heng pathum hi Latin tawngin notitia, assensus, fiducia. Fiducia (innghahna) phei hi chu Biblein rinna a sawi dan tam ber a ni.

[11] John F. MacArthur, The Gospel According to the Apostles (Pune: Grace to India, 2000), 44.

[12] J. Oswald Sanders, Effective Faith (Singapore: Overseas Missionary Fellowship, 1990), 40.

[13] Moises Silva, “Faith Versus Works of Law in Galatians,” in Justification and Variegated Nomism: Volume 2 – The Paradoxes of Paul, eds. DA Carson, Peter T. O’Brien, and Mark A. Seifrid (Grand Rapids, Michigan: Baker Academic, 2004), 40.

[14] J. Gresham Machen, What is Faith? (New York: Macmillan, 1925), 203-4.