Rinna avang chauha Thiamchanna

He thu ropui tak, 1517 AD atanga Protestant hovin an uar tak em em, tun thlenga kan la hril avang hian mi tam tak chu an buai ta. Chanchintha laimu a nih tlat si avang hian hriat sual fo pawh a mawh lo ve. Lehlam kan uar lutuk laiin a lehlam hlamchhiah a awl fo mai. Thiltih uar luata Khawngaihna awmzia man fuh loh a awm theih laiin, khawngaihna uar tum luatah Pathian khawngaihna dik tak kan thelh fo bawk a ni.

            Rinna avanga thiamchanna awmzia kan hriat chian theih nan he thurin tlakna leilung pawimawh zual pahnih kan belhchian tura han thur chhuah duh ka nei. Siamthat Kohhran (Reformed/Protestant) leh Roman Catholic danglamna, leh 1990 chho vela USA-a Lordship Controversy an tih chungchang hi a ni.

Rinna avanga Thiamchanna: Catholic Kohhran zirtir dan

            Kristian inpumkhatna hi a pawimawh em avang hian mi tam tak chuan Catholic Kohhran nena Protestant danglamna pawh hi kan hre tam lo viau awm e. Mari biak, Pope thuneihna, Pathianni apianga Mass (Lalpa Zanriah Sakramen) neih, in thiam chuan zu in pawh phal, etc. vel hre pawl chu kan awm mai thei. Protestant an lo hran takna chhan bulpui ber pakhat chu he  thurin ‘Rinna avang chauha Khawngaihnaa thiamchanna’ hi a ni. Catholic Kohhran khan he thu hi pawm thei ngat se chuan Martin Luthera meuh pawh khan Kohhran inrelbawlna leh thil dangah chuan Pope thuhnuaia intukluh kha a duh hle a ni awm e.[1] Catholic kohhran thiltih dan tha lo tak tak te pawh kha he thu pawm loh vangah hian a ngai hmiah mai.

            ‘Isua Krista ring theuh theuh a danglam chuang lo,’ tih hi kan sawi dan a ni fo. A dikna chin pawh a awm. Mahse, kan rin dan a inan loh chuan, kan hmuh dan leh chet chhuah dan a dang dawn chu a ni mai a. Tin, kan Chanchintha hril a danglam bawk ang. Chuvangin Catholic kohhran nen hian kan thil thluk dan a danglam viau reng a ni.

            Kum 1545-63 chhunga Catholic Inkhawmpui lian Council of Trent-ah khan ‘Rinna avanga khawngaihnaa thiamchanna’ thu hi an hnawl chiang hle a. Canon 9 chuan; “Mi tupawhin misual chu a rinna avang chauha thiamchang, thiamchantirtu khawngaihnaah hian thildang engmah telh ngai lo, a thiltiha innghat miah lo,  tih thu a sawi a nih chuan, anchhedawngin awm rawh se,” a ti hmiah mai a ni.[2]

            Council of Trent hian rinna avanga thiamchanna thu hi hnawl hlawm tawp lovin pawm dan a nei tho va. “Krista Isuaa tlanna awm avang chuan, a khawngaihnain misualte chu thiam chantirin an awm,” tih Rom 3:24 behchhanin an puang chhuak a ni. Amaherawhchu, Rom 11:6 “Khawngaihna avang a nih chuan thiltih avang a ni tawh lo vang; chuti a nih loh chuan khawngaihna hi khawngaihna a ni tawh lo vang,” tih hi an thleng pha lovin a lang. Pathianin misual thiam a chantirnaah hian mi sual thiltih an telh ve tlat a, khawngaihna chu khawngaihna angin an pawm lo, tih theih a ni. Catholic-in thiamchantirna an zirtir dan han zir chiang ila:

1.      Thiamchanna chu mihringa innghat; khawngaihna ni vek lo

Catholic kohhran chuan thiamchanna chu misual mi fela siamna kawng ni maiah an ngai. Chumi awmzia chu, Pathianin misual thiam a chantir danah chuan Krista tlanna avanga mi fela puan ni lovin, khawngaihna avanga a fel telh telhna kawng inher chho zel kha a ni ta a. Thiamchannaah chuan tihthianghlimna a inphum tlat a, chu thiamchanna chu “sual ngaihdamna chauh ni lovin, felna nei lovin ama duhthu ngeia khawngaihna leh thilpek pawma, a chhunglam nun tihthianghlim leh tihthar a lo nih zelna hi,” a lo ni ta. Chuvang chuan thiamchanna chu nun pum thil chauh ni lovin, thih hnu khawvel pawh a tel ta zel a, sual zawng zawng tlen fai nan purgatory (thih hnua sual kan faina) pawh tel hial:

Tu pawhin, khawngaihna avanga thiamchanna kan chan tawh chuan kan thiam lohna zawng zawng dah bo vek a ni a, chatuan hremna chang tura kan bat zawng zawng thai reh a ni a, kan dam chhung leh kan thih hnuah pawh vanram kawngkaa kan luh hmain purgatory-ah kan inthen fai a ngai lo, tih thu a sawi chuan, anchhedawngin awm rawh se.[3]

He zirtirna atang hi chuan a tawp thlengin ringtu chu rinawm takin a awm ang tih theihna kan nei lo va, chatuana bo hlen pawh an awm ngei ang. Ringtu a lo sual chuan ‘penance’ sakramen (sual ngaihdam nana tih tur) avangin ngaihdamna a chang thei leh dawn a ni. Thiltih chu thiamchanna vawn him nan tul a, sual palh pawhin sakhaw serh leh sang hmangin ngaihdamna a chan theih a ni.

2.      Rinna leh Thiltih tang kawp: Rinna chauh ni lo.

Rinna pawimawhzia an sawi mek laiin, mi sualin thiam a chan theih nana hmanrua chu rinna ni lovin baptisma sakramen a ni. Chutiang zelin, “Mi tupawhin, felna kan chan chu thil tha tiha humhim leh tihpun zel ni lovin, thil tha tih chu kan chan tawh thiamchanna rah leh chhinchhiahna chauh, a pun leh zelna chhan ni lo, anga a sawi chuan, anchhedawngin awm rawh se,”[4] a ti. Thil tha tih chu thiamchanna neih, vawn him leh tih pun nan a tul a ni. Thiltih hi rinnaa telh a nih loh chuan, thiamchanna chuan a tum a hlen thei dawn  lo a ni. Catholic zirtirnaah chuan khawngaihna meuh pawh hi thiltih kal tlanga pek a ni zel: “Mi tupawhin, sakramente kal tlang ni lovin, Pathian thutiam rinna hi Pathian khawngaihna dawnna tur atan a tawk a ni tih a sawi chuan, anchhedawngin awm rawh se,”[5] an ti mai a ni.

3.      Mihringa khawngaihna hnathawh: ringtu-a Krista felna bel ni lo

Thiamchantirna leh tihthianghlimna kan pawlhsawp chuan mi sualin thiam a lo chan tak chhan bul chu Krista felna famkim ni lovin, famkim lo mi sual felnaah a innghat dawn a ni. Trent inkhawmpui khan hei hi a zep lo hle: “Mi tupawhin, mihring chu Krista felna amaha bel a nih vang emaw, sual ngaihdamna avang emaw chauh, Thlarau Thianghlimin khawngaihna leh hmangaihna an thinlunga a leih luh leh anmahnia tiak ta vang ni lovin; thiam chantir kan nihna chhan chu Pathian duhsakna vang chauh anga a sawi a nih chuan- anchhedawngin awm rawh se.”[6]

      Pathian khawngaihna chu baptisma sakramen hmangin mihring thinlunga kui tiahin a awm a, chu chuan mihring chu mifel Pathian pawmtlakin a siam ta a ni. Pathian khawngaihna a lo dawn chuan mihringah zung a kai a, ama felna a lo ni ta hial a. Mihring chuan a chhandamna chu a thawk chhuak ta a - tihthianghlimna leh purgatory hmangin Pathian hmaah pawmtlak atan a chher ta a ni. Hei hi a ni Catholic pawm dan chu.

Catholic leh Protestant Danglamna lai tak chu engnge ni?

He thu hi kum 450 vel kal taah kha chuan Kristian chhungkuaa thu ‘hot’ ber a ni hial a. Keini ho erawh chuan kan pawm thui viau tawh hial ang. Mahse Protestant zirtirna, kan kohhranin kan lo chhawm chhoh reng hi kan hriat chian a tha awm e-

1.      Thiamchantirnaah chuan Kristian chu mifela siam ni lovin mifela puan a ni. Ama nihphung siam danglam aiin ama dinhmun tihdanglam a kawk zawk.

2.      Pathianin pawn lam atanga mi thiam changa a puan, leh Thlarau Thianghlimin chhung lama a tihnunna leh tihthianghlimna hi chiang taka sawi hran a ni. Amaherawhchu, Pathian khawngaihna hnathawh chhandamna changtua awm ve ve, lak hran chi a ni lo thung.

3.      Ringtu felna chu ama pawn lama awm Krista felna a ni, chu Krista felna chu ama tan puh leh bel a ni ta. Amaha awm leh amaha hmuh a ni lo va, ama neih a ni lo.

4.      Rinna chu Pathianin thiamchantirna hmanrua atana a pek a ni a, Krista felna chauh chu thiamchantirna innghahna, thiamchanna awm theihna awm chhun a ni.

Catholic Kohhran chuan ‘felna bel’ (imputation) thiamchantirna chu an pawm thei lo. Mi fel lo fel anga pawm chu Pathianin a ti thei lovang, an ti tlat.  Fela min puan dawn chuan keini pawh kan fel tur a ni.    He thu hi kan rin mai aiin a lawk a. Chanchintha awmzia kan pawm dan a hril pha daih. RC Sproula chuan, “Biblea kan hmuh Chanchintha hi ‘felna bel’ thuah hian a tlu emaw a ding emaw a ni ang. Krista felna hi misualin kan inbel a nih ngawt loh chuan keimahniah khawngaihna kui tiah ni ngawt mah se chhandam kan nihpui thei lovang. Pathian tihnun leh Thlarau Thianghlim awmpui tawh zawng zawng pawh kan la sual fo si a,”[7] tiin ‘felna bel’ pawimawhna a sawi. Sakrament te chu hlu eng ang mah se, heng thil kaltlang hian Pathian dikna leh thianghlimna famkim hmaa thiam channa khawp felna chu kan nei thei ngai lovang. Keimahni felna aia ropui leh tha zawk felna kan mamawh a ni. Hei vang tak hian a ni Martin Luthera leh Reformerte chuan thiam kan channa ‘felna’ chu keimahnia pawna awm ‘felna’- iustitia extra nos[8], Pathianin Krista ‘felna’ keimahnia min belsak kha a ni. 

Chu felna chu keimahniaah hmuh tur a awm miah loh laiin, rinna avangin keimahni felna angin Pathianin min puan sak ta a ni. Tichuan, kan thiamchanna chu eng dangah mah a innghat lova, Krista felnaah chauh chuan a innghat ta a ni. Fela puan ka nihna felna chu ka pian hma hauha Krista felna kha a ni. A felna chu keima felna a ni mai lova. Keimaha min belsak tak avangin ka felna a lo ni ve ta chauh a ni. He felna hi ka tana chhiar, ka ta, ka nunpui, chhandam ka nih chhan lo ni mah se, ka thawh chhuah leh ka hlawh chhuah a ni lo. [9]

Catholic kohhran chuan Krista felna avanga thiam kan channa chu a hnawl chuang lo va. Krista felna chu mifel kan lo nih theihna atan ‘loh theih loh’ angin a ngai tho a. Mahse a danglamna chu hei hi a ni. Catholic zirtirna chuan Krista felna chu ringtua bel ni lovin ringtua kui tiah a ni. Kui tiah a lo nih chuan mihring khan a lo pui a, a lo tang ve a, chu khawngaihna leh thiltih tankawpna chu a thiamchanna innghahna a lo ni ta a ni. Felna bel sak nen chuan a danglam hle a ni.

He Catholic zirtirnaah hi chuan Pathianin mi fela a puan chu a fel ve reng a. Amaha awm felna avang khan mi felah a puang ta a ni. Mifel chu mifela puan a ni ta. Pathian khawngaihna kha amahah kui tiahin awm lo se chuan a mifel a ni thei bik chuang lovang. Kui tiaha awm a, amah pawhin a lo zawm that tak avangin khawngaihna leh thiltih avang chuan mifel a lo ni ta a ni. Reformers ho erawh chuan Pathianin mi fela a puan hian amaha awm felna leh thatna vang a ni lova, Krista felna kha a felna atana a chhiar sak vang a ni. Ringtu-ah chuan felna a awm lova, Krista felna kha bel a ni a. Kha Krista felna chauh kha Pathian hmaa ‘mi fel’ a lo nih theihna chu a ni. Pathian chu a fel a, misual fela pawmtu a ni bawk- Krista felna vang chauhvin.

Rinna leh Thiltih inzawmna lai tak chu

Kan fimkhur ngaihna lai tak chu hei hi a ni. Pathianin misual, danglam duh chuang lo, sual kham lo reng kha ‘mi fel’ ah a puang em? tih a ni. Ringtu chu mifela siam ni lovin, mifela puan a ni zawk kan tih chung chang hi sawiin, America Pathian thu thiam John Gerstner chuan he felna thupuan hi an nihna danglam lem lote chungah chuan puan a ni lo, a ti tlat mai. Pathianin thinlung danglam miah lo chu dinhmun danglamah a dah lo a ni.

He thiamchantirna hian, kan sawi tak angin, misual chu mifel anga puan mai ni mah se, mihring thinlung tihdanglam hi a hmer tel tlat a.   Pathian khawngaihna kan sawi changa thiamchantirna kan sawi laiin tihthianghlimna hi a tel zel a ngai ang. A inchhun tlang tawn. Tihthianghlimna leh tihnunna tel lo chuan thiamchantirna a awm lo a ni. Rinna leh thiamchanna hi thil hrang a ni a, mahse thiam kan channa-ah hian rinna a tel tlat tho ang hi a ni.

Mei leh a khu chu thil hrang daih an ni a, mahse a inzawm tlat. A chhan(cause) leh sawhkhawk (effect) inzawm tlat hi ‘causal nexus’ an ti thin. Chutiang chiah chuan thiamchanna hian zawmpui thlauhthlak hleih theih lo a nei. A huam zim zawnga sawi chuan thiamchantirna chu Pathianin mifel anga misual a pawm hi a ni mai a, a zau zawnga sawi erawh chuan thil dang pawh a fawmkem nual a ni. Chhunglam leh pawnlama danglamna nun hmuh tur awm lo te pawh chhandam an ni zel ang kan ti ngawt a nih loh chuan hei hi kan hriat thiam a tul a ni.

            Tihnunna (regeneration) chu mihring nihphung (nature) tihdanglamna a ni. Ringtu zawng zawng hi tihnun tawh an ni. Hei hian thiamchantir tawh zawng zawng hi tihnun tawh an ni tih a kawk nghal. An nihphung tihdanglam ni mah se famkim erawh chu an la ni lo. Chu tihnunna emaw, tihdanglamna emaw, leh chumi atanga lo zi chhuak rinna emaw chu thiam an channa innghahna a ni lo. Thiam chang an nihna chhan chu Krista felna chauh a ni. A awmzia chu, Krista felna chu ringlo emaw, tihnun ve lo-ah emaw chuan bel a ni lo tihna a ni. Gersner-a bawk khan, “Isua Krista chu Pathianin a thlan tawh thlarau nena pumkhat an nih chiah chuan, an inpumkhatna chu a nghetin a chak lutuk a, piangthar thlarau chuan a chatuan chhandamna turin Kristaah chuan a innghat ta a, a sual zawng zawng lak bo sak a ni a, chung lam felna chu a dawng ta a ni. He thil thlengah chiah hian chatuan atan a nunna chuan Krista chu ringin a thu a awih ta a ni.”[10]

Thiltih leh Thawh-hlawh Danglamna

Rinna leh thiltih inzawmna kan chian theih nan, thil inhnaih tak tak – thiltih, hlawh leh hnathawh danglamna hi a ni. Mizo Bible pawh hian a rawn hmer kawp vekin a hriat a.Thiltih chu kan rilru leh taksa chet chhuahna zawng zawng hi a ni mai a. Hna leh hlawh erawh chuan ‘hlawh chhuak tura thiltih’ a kawk bik. Thiltih rau rau a inang lo. Mi pahnihnin huanah hlo an thlo ve ve a. Pakhat chuan tlai lama Rs. 200/- a hlawh theih nan kha thil kha a ti a ni. Kha pa thiltihin a tum chu hlawh chhuah a ni a, a thiltih kha a tan hna a ni. Pakhat zawk pawh khan hlo thlawh thiltih kha a ti ve tho. Hlawh petu kha a pa a ni a, a fa a nihna kha hlawh chhuah a tum lova, kha thiltih khan a hlawh chhuah theih bawk lo. Hlo a thlawh (thiltih) chhan chu a pa duhzawng a nih vang leh a pa huanah hlo a tam vang a ni. A pa thil chu ama thil a ni tlat tawh si. Thil tih chu a awm a, hlawh chhuah erawh chu a awm lova, hlawh chhuak tura hna thawh pawh a awm chuang lo.

Kan hriat fiah theih nan chang lar tak Rom 4:4-6b i han bel chiang teh ang:

LH –  “…hna thawktu hlawh chu khawngaihnaa ruat a ni lo va, bata ruat a ni zawk e.

Amaherawhchu hna thawk lova, Pathian ngaihsak lo, thiam chantirtu ring zawka rinna chu, ama felnaa ruat a ni. Mi, a thiltih ngaihtuah lova Pathianin fela a ruata chu mal a sawmsak…”

LT –    “Hna thawktu hlawh chu khawngaihna thilpek a ni lo va, bat anga ngaih a ni zawk. Mi

sual thiam chantirtu chu miin a rina, thil tih vang ni lova thiam chantira a awm hian, a

rinna avangin thiam a chang kan ti a ni. Thiltih vang ni lova Pathianin thiam a chantirte nihlawhzia…”

NIV – “ …when a man works, his wages are not credited to him as a gift, but as an obligation. However,

to the man who does not work but trusts God who justifies the wicked, his faith is credited as righteousness. David says the same thing when he speaks of the blessedness of the man to whom God credits righteousness apart from works.

Saptawng Bible nena kan khai khin chuan kan sawi duh tak chu a chiang kuar mai awm e. Saptawng Bible  chuan mihring lam thiltih a rawn sawi reng reng hian ‘work’ a rawn ti zel a. ‘Work’ chuan  ‘thawh-hlawh’ a kawk a,  ‘deed’, ‘action’ (thiltih) nen a dang deuh a ni. Chuvangin Chhandamna chu ‘thawh-hlawh’ ni lo Pathian khawngaihna liau liau a ni tih a chiang. Amaherawhchu, Mizo Bible duhthawhawmna leh hriat sual awlsamna a lo lang ta. LH-ah chuan ‘hna,’ vawi 2 leh ‘thiltih’ vawi 1 a rawn lang a, LT-ah phei chuan ‘hna,’ vawi 1 leh ‘thiltih’ vawi 2 a rawn hmang a. Thiltih hi a hnawl fihlim a ang ta hle mai. A ni hauh si lova. Thiamchanna chu mihring hlawh chhuah a ni lo, tih a sawina mai a ni. LH-a ‘Pathian ngaihsak lo’ tih phei hi chuan Pathian engah mah ngai lo chung chung pawh chhandam ni theiin a rawn sawi deuh thaw mai a, a pawi hle. ‘Misual’ tih mai hi a tawk awm e.Tilai changah hian thil 7 chiang tak tak kan hmu:

1.      Thiamchang chuan ‘hna a thawk’ lo.

2.      Thiamchang chuan a ‘ring,’ /a ‘innghat.’

3.      Thiamchang chuan amaha thil awmah ni lovin, ‘Pathian’ –ah a rinna a nghat.

4.      Thiamchang chuan ‘misual’ a nih a pawm.

5.      Thiamchang chuan ama rinna a ring zo lo.

6.      Thiamchang chuan ama rinna chu ‘ruat sak’ mai a ni tih a hmu thiam.

7.      Thiamchang chuan ama rinna chu a ‘felna’ anga ruat sak mai a nih chauh a hmu.

Chik taka sawi chuan kan rinna hian min chhandam lo, a tih hial theih. Min chhandamtu, kan thiamchanna chu Krista Isua zawk a ni. Rinna chu engnge a tangkaina? Isua Krista nena kan inzawmna leh kan inpumkhatna a ni. Chutiang rinna chuan ‘thiltih’ a pe chhuak ngei ngei thung. Isua chu mite an thiltih sual laka chhandamtu a ni si a, an thiltih sual nena chhandamtu ni lovin. Pathian Fapa nena pumkhat ni tawh leh inzawm tawh nunah chuan a thiltihtheina leh ropuina a lo luang chhuak thin. Chuvangin a ni Jakoban, “… thiltih te tel lovin rinna pawh chu thi a ni,” a lo tih ni. Rinna a tling lo.

“Thiltih vang a ni love…”[11] kan tih hian ‘thiltih’ a tel lo kan tihna a ni lova, ‘thiltih-in a hlawh chhuah thil tha’ vang a ni lo kan tihna a ni. Chuvangin rinna avang chauha khawngaihnaa thiamchanna kan sawi hian ‘thiltih’ sawi bo chi a ni lovang. Chhandamna chu mihring thiltihin a hlawh chhuah a ni lo va, thiamchannaah chuan ‘thil tha tih’ a tel zel, kan tihna a ni zawk. He zirtirna man sual deuh ho chuan thiltih ‘tel miah lo’ thiamchanna an hril thin. Keini chuan thiltih ‘vang ni lo’ thiam channa kan hril mai zawk a ni.

Ti hian sawi teh ang. Kohhran chuan thiltha tihin a hlawh chhuah ni lo thiltih tel chhandamna kan sawi a. Mi thenkhat chuan thiltha tih tel lo chhandamna an sawi thung. Thiltih tello rinna chu ‘thi’ a ni tih kan hria, amaherawhchu, thiltha tiha innghat thiamchanna chu ‘dan’ rama kirna a ni thung si. Rinna avang chauha khawngaihnaa thiam chang kan ni a, thiamchanna thlentu rinna erawh chu amah chauhvin a awm ngai lo a ni.

Isua Krista hi Lal atan ni lo, Chhandamtu atan chauh a pawm theih em?

Kum 20 liam taah khan United States Kristian ho zingah debate nasa tak, ‘the Lordship controversy’ an tih a awm a[12]. Tawngkam pawh an duh hriam hrak hrak hle. Ram dangah chuan an buaipui ve miah lo a ni awm e. An thu inchuh chu ‘Isua hi Lal atana pawm lovin Chhandamtu atan chauh a pawm theih em?’ tih a ni. “Chhandamna atan Isua Krista hi Chhandamtu atana rilrua pawm mai hi a tawk, nun danglam a pawimawh ber lo,” ti pawl awka a lo rin tak vang a ni.

He zirtirna hian Lal Isua Krista, Lal a nihna leh Chhandamtu a nihna a then hrang a. Kan rama Camping leh Crusade vela kan la zirtir tlat (TMEF, Lalchhungkua, Thiangzau, etc., tih loh chuan) Chhandamna chang (piang thar) tura ‘Isua Krista Lal leh Chhandamtu’ atana pawm a tul thu (Lordship Salvation) hi pawm lo an lo awm ta a  ni. Isua nihna ‘Lalpa’ leh ‘Chhandamtu’ tih chu then hrangin Chhandamna atan chuan Isua Krista hi ‘Chhandamtu’ atana pawm a tawk a, kan nuna ‘Lal’ atana pawm a tul kher lovah an ngai. Engkim kalsana Kraws pu a zui te, kan nuna ‘Lalpa’ atana pawm te chu a ‘zirtir’ (disciples) ni turin a tul chauh a ni (TMEF-in ‘lei malsawmna dawn nan,’ an tih ang deuh). Hetah pawh hian ‘ringtu’ leh ‘zirtir’ hi an then hrang leh a.  Chhandamna atana ‘loh theih loh’ a ni lo, tih hi an zirtirna tlangpui chu a ni. Dan leh Khawngaihna, Rinna leh Thiltih te an then hran dan hi kan kohhran zirtirna nena an danglamna tak a ni awm e.

He zirtirnaa hmuipuipu pakhat Zane Hodges-a chuan chhandam nihna tura rinna chu Chanchintha thu lo awihna pangngai mai kha a ni. Mi tupawhin Krista chanchin Pathian Thua inziak ang hi a lo ring a nih chuan chhandam a ni nghal. Simna te, inhlanna te, nun danglamna te, leh rah chhuah chung changte kan belh chuan Chanchinthaah thil dang kan belh tihna a ni, a ti hmiah mai. Hodges-a ngaihdan hi chuan miin Isua hi vawi khat a rin tawh chuan, a nun pum puiah sualin nung chho mah se, chhandam a ni tho vang, tih hi a ni. A phal zau hle mai. [13]

Tlema dam deuh zawkin Charles Ryrie-a chuan simna pawh a rawn pawm ta a. Amaherawhchu, simna chu “thil tih sual sim ni lovin, Isua Krista kan lo ngaih dan thin thlak danglam” a ni.  Sual kalsan hi chhandam nihna atan loh theih loh a ni lem lo. Ryrie-a ngaihdan chuan chhandamna chuan mi a tidanglam tur a nih laiin, dam chhunga ‘ringtu tisa mi’ nih hi thil awm thei a ni. Piangthar dik tak nunah erawh chuan thil danglam eng emaw tal chu a lang ngei ngei ang, tih erawh chu a ring thung.[14]

Heng mithiam pahnihte ngaihdan hi Dallas Theological Seminary dintu Lewis Sperry Chafer-an a hruai hle tih a hriat. Chafer-a leh dispensationalist rual u zawk C.I. Scofield-a te khan chhandamna chung changah Dan leh Khawngaihna thliar hran an tum nasat luat vanga lo awm a ni awm e. Anni ho hian chhandam nih leh Isua zuitu nih hi an thliar hrang a, chhandamnaa thiltih (nun dan tur) uar lutuk chu khawngaihna avang chauha chhandam kan nih zia hnawlnaah an ngai a ni.

Hriat sual a awm thei ang em le?

            Kan sawi tak ang khan he zirtirna hlimthla hi kan ramah hian theh darh a ni mek a, kohhran mi mi tam takin kan lo tuipui bawk thin a. Kohhranin kan auh lawm lawm pawhin an ngai pawimawh zo lo fo ta mai. Pathian Thu-ah hmaih palh leh hriat fuh loh palh an lo nei hlauh em, i han chik teh ang.

Krista nihna hi then hranin a awm em? Zawlnei (zirtirtu), puithiam (tlantu) leh Lal (Lalpa leh Hotupa) nihna hi a Fapain mihring leh Pathian inkara remna rawngbawlna a thawhna-ah hian Pathianin a pe a ni lawm ni? Bible thuchah hian heng a nihna zawng zawng pawm a, awih tur hian min zirtir a ni lo maw? Isua ngei khan chhandamna leh amah zuitu nihna kha, Chhandamtu a nihna leh Lalpa a nihna thliarin, a then hrang em? Isua Krista nihna hi then hran a, pawm hran chi niin a lang lo.

Simna awmziaah buai loh a tha. Bible zirtirnaah chuan simna leh rinna hi a kal kawp zel a. Simna chu sual kalsan, rinna chu Isua lam hawi a ni. Charles Ryrie leh Dispensationalist dangte pawhin he inzawmna hi an ngai pawimawh lo fo. Thenkhat chuan Greek tawngkam metanoia (simna) chu, nichina kan sawi tak ang khan ‘ngaihdan thlak’ ang lekah an ngai a ni. Hodges-a thung chuan ‘nun thlak’ a ni tih a hre chiang a. Chu chu chhandam nih hma emaw, hnu emawa lang turah a ngai a, lang miah lova awm theiah a ngai bawk.

Piantharna (regeneration, tihnunna) nihna hmuh fiah loh a awm thei. Pathian Thu-in piantharna a tih chu thi tawh tihnun lehna a ni a, chu mihring thinlung chu siam tharin nunna nei leh piang thar a lo ni ta. Mi thar a lo nih tak avangin sual bawiha luh leh chu a duh ngai tawh lova; chu piantharna avang chuan a thinlung takin Pathian hriat chian leh zual, hmangaih, rawngbawl sak, rin, a thu zawm a lo duh ta a, thu awih taka a hnung zuitu nih chu a lo duh ta mai a ni. Hodgesa ngaihdan tawmpuitute chuan Rinna hi Pathianin thinlung a siam thar par chhuahna mai a ni tih hi an hre thiam lo a ni.[15]

Thenkhat chuan Pathian khawngaihna leh sual phalrai hi an hre hrang lo fo thin. Pathian khawngaihna chu sual en liam mai mai a, sual nena awm kawp thei reng a ni lo. Khawngaihna tak chu Pathian thatna misualte hnen lama lang; sual thiltihtheihna leh sual hremna atanga chhan chhuaktu hi a ni (Rom 6:14). Khawngaihna chu che na tak a ni, “Tunlai hunah hian Pathian ngaihsak lohna leh khawel lam thil bansan te, mahni invawng fela, dik taka awma sakhaw ngaihsak nun te min zirtir a,” (Tita 2:12) tih kan hmu.

Khawngaihna chu mi sualin thuthlukna siam lo dawnsawn a ni mai lo. A khawngaihna avangin Pathian chuan mi sualte a hip hmasa a (Johana 6:44, 65), simna a pe a (Tirh. 3:26; 5:31; 11:18),  Isua Krista rinna lamah an thinlung a tivar (Tirh 13:48; 16:14). Ringtu a lang chhuak – sual inhriatna, simna leh rinna- te hi a thinlunga Pathian khawngaihna hna thawh a ni- “Rinna avanga khawngaihnaa chhandam in ni, chu chu in thawh chhuah a ni lo, Pathian thilpek a ni,” (Eph. 2:8).

Phalrai zirtirnain a ken tel tlat pakhat chu – Khawngaihna chuan thiam min chantir (min ngaidam) a, kan ni tin nun dan chu keimahniah a innghat, tih hi a ni. Thiamchanna chu Pathian thilthlawnpek, tihthianghlimna thung chu keimahni  chan, duha kan neih leh duh lohva kan neih loh maiah an ngai a ni. Mahse, hei hi hria ila. Khawngaihna avanga rinna kaltlanga thiam chang tawh chu khawngaihna avang bawkin a nun ni tin tihthianghlimin a awm zel a ni. Chu chu rinna avanga khawngaihnaa chhandam a ni. He Pathian tihthianghlimna hi ringtu nunah pianthar tirhin a lo lang tan a, thinlung thar leh thu awihna thlarau a pe (Ezekiela 11:19-20; 36:26-27; II Korinth 5:17). Piantharnaah tihthianghlimnaa bul tan a ni a, tihthianghlimna chu ropuinaah a tawp thung. He ringtu tihthianghlim zelna hi a hring a hrana Krista kan hmuh a, Amah anga kan awm hunah a tawp dawn a ni (I Johana 3:2; I Korinth 13:12). Tunah rih chuan ringtu zawng zawng hi tihthianghlimin kan awm mek, Krista anna kawngah kan kal mek a ni (I Korinth 3:18; Rom 8:29). Nun danglam lo leh sual phuarna nghawngkawl tihchhiatsaka awm lo te hi chuan Krista hriatna tak tak hi an nei lo (I Johana 3:6).

Ringtu nunah thiltih hi ‘loh theih loh’ a nihzia hnawltute chuan ‘rinna avanga khawngaihnaa chhandam’ tih hi tidalah midangte chu an puh thin. Heti lai thu hi a pawimawh khawp mai. Thiamchantirna chauh hi Pathian hnathawhah ngaiin, chhandamnaa Pathian hnathawh dang tihnunna leh tihthianghlimna hi an hmaih palh fo.

Thiamchantirna chu Pathianin misual chu mi fela a puanna a ni. Chu thiamchantirna chu tihnunna  leh tihthianghlimna nen a danglam a, mahse thil inkawp tlat leh then hran theih loh a ni. Pathiana thiam chang tawh tihnun loh leh tihthianghlim loh a awm theih loh. Kan thianghlim tak zel avanga chhandam ni ta kan ni tihna  a ni lova, rinna chuan min chhandam bawk lo. Kan  rinna chu chhandam kan nihna atana Pathian ‘hmanrua’ chauh a ni, kan chhandamna ‘innghahna’ a ni lo.

Krista felna, Pathianin kan felna atana min pawmsak chauh chu kan chhandamna innghahna chu a ni. Mi fel lo rinnaah  chuan Krista felna chu Pathianin a belsak a ni si a. Kan nuna tihthianghlim kan nih zel avanga thiamchang kan ni hauh lo. Krista avang chauhvin Pathianin min pawm a, Krista nen chuan ‘pumkhat’ kan nih tak avangin  ‘Krista-ah’ chuan mi fel kan lo ni ta chauh a ni. Kan rinna tak leh chak emaw, kan simna nasat vanga chhandam kan ni lo. Keimahni lam thiltih a awm ngang lo a ni. Hei erwh hi chu hria ila, Reformer-te lo sawi tawh thin angin, rinna avang chauhvin thiamchanna a awm a; amaherawhchu thiamchantirtu rinna chu amah chauhvin a awm ngai lo. Rinna tak a awm chuan nunah rah a lo awm ngei ngei. Thiltih chu rinna zung ni lovin, a rah a ni. Catholic Kohhran zirtirna anga tihthianghlima kan awm zel chuan chhandam kan ni ang tih ni lovin; thiamchanna chu kan rin veleh khan, rah pawh a chhuah hma khan a awm daih tawh a. Chutiang rinna chuan rah a chhuah ngei ngei thung a ni.

---

[1] Martin Luther, Table Talk, in Helmut T. Lehman, ed., Luther’s Works, 55 vols. Theodore G. Tappert, trans., (Philadelphia: Fortress, 1967), 185.

[2]If anyone says that the sinner is justified by faith alone, meaning that nothing else is required to cooperate in order to obtain the grace of justification, and that it is not in any way necessary that he be prepared and disposed by the action of his own will, let him be anathema.

[3] Trent Session 6, Canon 30 : If anyone says that the guilt is remitted to every penitent sinner after the grace of justification has been received, and that the debt of eternal punishment is so blotted out that there remains no debt of temporal punishment to be discharged either in this world or in the next in Purgatory, before the entrance of the kingdom of heaven can be opened –let him be anathema.

[4] Trent Session 6, Canon 24. If anyone says that the righteousness received is not preserved and also not increased before God by good works, but that those works are merely the fruits and signs of justification obtained, but not a cause of its increase, let him be anathema.

[5] Council of Trent, sess. 7, Canon 8. If anyone says that by the said sacraments…grace is not conferred through the work worked but (says) that faith alone in the divine promises is sufficient for the obtaining of grace, let him be anathema.

[6] Council of Trent, sess. 6. Canon 11. If anyone says that men are justified either by the imputation of the righteousness of Christ alone, or by the remission of sins alone, to the exclusion of the grace and love that is poured forth in their hearts by the Holy Spirit and is inherent in them; or even that the grace by which we are justified is only the favor of God- let him be anathema.

[7] RC Sproul, Faith Alone: The Evangelical Doctrine of Justification (Secunderabad: OM Authentic Books, 2006), 106.

[8] a righteousness outside of or apart from us.

[9] He felna hi iustitia alienum , felna mikhual , (alien righteousness) an ti bawk.

[10] Quoted by Robert R. Reymond, The Trinity Review, May 2001. “when Jesus Christ unites Himself with an elect soul, that person is so united with Him that his regenerated soul trusts Christ for eternal salvation, his sins’ guilt is remitted, and divine righteousness received. In this act [!] instantly and forever after, the soul believes and obeys Jesus Christ.”

[11] Thawh-hlawh a ni love.

[12] He debate hi Evangelical chhungkua-ah a ni ber.

[13] See, Zane Hodges, Gospel Under Siege(1981) and Absolutely Free(1989).

[14] Charles R. Ryrie, Balancing the Christian Life (Chicago: Moody Press, 1979) and So Great Salvation.(Haperden: Scripture Press Foundation, 1990)

[15]  Tabletalk, May, 1991, published by Ligonier Ministries, Inc., P.O. Box 547500,Orlando, FL 32746.