Mizote nuna Rinna leh Thiltih

Mizo Kristiante nunah hian mite aia hre thuk bik nih leh thlarau lama chang sang bik nih duhna hi a lian hle a ni awm e. Nitin kan nun dan leh rilru put hmang ai chuan thlarau lama tawnhriat leh dawn san lam kan ngaisang a. Thuawihna leh invawn felna lam aiin ‘thlaraua sang’ nih kan duh fo mai. Chutiang mite chu kan ngaisang zawk chawk bawk. Thlarau lam thil chu game chi khat, nun phung pangngai laka hrang, thenkhatin an khelh thiam riau leh fuh riau; Kohhrana mi tam tak, thahnemngai leh fel awm taka lang te pawhin an man fuh hleih theih loh nia hriatna pawh a awm nasa hle a ni.

            Hetianga ngaihdan lo awm thin hi chhan nei lo chu a ni ngawt lovang. Hringnunah hian ‘harhna’ kan tih ang chi, a khawtlang huapa hlim hona te, vei leh tui zawng inan tlan deuh thup chang te, a lo awm thin. Boruak thar, danglam deuh tak, min hneh thei tak a lo tleh a, rilru leh ngaihtuahna a tithar thin. Mizo Kohhran chuan hetiang ‘harhna’ hi kan thatpui viau a ni awm e. Min nuai nawn awn awn tur pawhin kan duh thin. Kohhranin Pathian khawngaihna vanga hlim harhna kan chang leh thin hi a hlu a ni.

Fimkhurna tur erawh chu kan nei. Hetiang thil hi thlarau lam leh tisa thilah pawh awm thei a ni tih hria ila. Kan tih sual fo chu a dinhmun tur dik tak aia kan dah sang thin mah mah hi a ni. Sakhaw thila thleng thin  chi khat ‘religious phenomenon’ a nih ve avangin sakhaw dang leh hnam thilah pawh harhna hi a awm thin tih hriat reng a tha. Hetiang a thlen loh chuan kan kohhran ‘ro’ niin kan inhria a, phul hlut kan awm loh chuan thlaraua ‘hniam’ niin kan inhre tlat a, nung lovin kan inngai hial thin a ni. Mimal nunah pawh hei hi a dik tho mai.

Thlarau thil hriat thiamna

Hlim-harhna thleng lo pawhin kan tha tho tihna ni lovin, revival kan tih tel lo hian a ‘thlarau mi’ theih a, thlarauvin nasa takin a thawk thei tih hriat thar a tha ngei ang. Hetiang taka hlim-lam leh ‘thlarau’ thil kan ngaih pawlh thin avang hin Kristian nuna ‘thiltih’ pawimawh zia kan haihchham fo va. Kohhrana mi puitling tak anga lang tam tak pawhin thiltih hi han dah sang viau thin mah ila, a pawimawh pahnihna (secondary) angah kan ngai deuh chawk a ni.

Chhandamnaah Kristian nun (thiltih) tel tlat hi phur ritah kan ngai a, kawng dang kan zawng fo a nih hi. Thenkhat chuan an nunah sual hnehna tak tak chan harsa an ti a, zak kep neiin an nung a. Kraws thiltihtheihnaa suala fihlim tak tak si lovin ‘thlarau mi’ nih an chak tlat si a. A nih loh leh duh ang anga awm theih chunga ‘thlarau mi’ nih emaw, ‘chhandamna hloh loh’ emaw an duh a, zirtirna mak tak, nitin nuna thiltih piah lam chanchintha, an zirtir ta a. An anpuiten an lo tuipui a, thlarau thil ber emaw tiin hre fiah bikah an inngaia, Kohhran mi tam tak an buai thin a ni. Hei hi khawvel hmun danga thil thleng thin pawh a ni tho mai. Tunlai khawthlang ram mi tam tak zingah spirituality a lar hle a, mahse Kristianna chu an hnawl thung. Hindu zirtirna zuitu pawh tam tak an awm ta. Thlarau lam thil malmak thak chuan hlimna tak a thlen lo tih an hmu pha a, sual kalsan erawh chu  an harsat si. Thiltih tel lo ‘thlarau nun’ an zawng a ni. Hei chiah hi hman atanga Mizo Kristiante tibuai thintu rilru tho a ni.

Mizote thlarau nun atanga ‘thiltih’ vawrh chhuah tum dan hrang hrang

            Kum 100 chuang awrh chauha upa kan ni chung hian zirtirna danglam tak tak a lo chhuak a, min tibuai deuh rap rap reng mai a ni. Phurpui pawl kan lo awm reng bawk.

Tlira

Thiltih piah lam thlarau nun zirtirtu hmasa ber chu Tlira (1876-1952) a ni. Ani hian zuitu engemaw zah a nei hial. A zirtirnaah chuan mihring zinga sualna lo awm thin – inngaih leh rukruk te, zu ruih leh zu hmun hlimna te, sualna chi dang zawng zawng pawh hi, sual chu a ni ngei; mahse heng hian chhandamna a khawih pawi phak lo. Chhandamna khawih pawi phak chu, rin lohna leh rinhlelhna hi a ni e, tiin a zirtir.[1] Ho nei khawpa rinna leh thiltih kalkawpzia hnawltu leh zirtirtu hmasa ber a ni awm e.

Thiangzau

Thiangzau an tih thin ho erawh kha chuan mimal hmu chhuaktu an nei lo va. Hlim harhna kara Setana rawn inrawlhna chiang tak pakhat a ni awm e. Mizoram harhna chuan hmun tam takah ‘hlimsang’ a rawn hring a. Chu hlimna chu an chan thuk (sang) deuh deuh avang chuan an thu lak dan pawh a zau ve tial tial a. Pathian hmangaihna thuk leh zau tak pawh chu hre fiah chho zelin an inhria a. A tawpah phei chuan engkim hi thianghlim vek leh sual tel lo, Pathian ropuina tak vek ni-a ngaihna an lo nei ta a ni.[2] Rin lohna thinlung leh Pathianin tih tur a hrilh tih loh chauh ‘sual’-ah an ngai a. Zu hmun hlimna leh hmeichhiat mipat lam pawh miin suala a ngaih loh a, thiam loh inchantirna reng a neih loh chuan a thianghlim lohna a awm lo ve, an ti mai a ni. ‘Rin lohna’ sual nia an hriat hi an rilrua thil lo lang Pathian thu a nih rinhlelhna hi a ni awm e. Anmahni ngaihdan pawn lam tehna Bible emaw, Kohhran inkaihhruaina emaw, khawtlang dan emaw hi an hnawl thak niin a lang. Mahni chakna leh hriatna ang anga khawsaka,  pawn lam dan laka zalenna an zawng a ni ber awm e.

Khuangtuaha/Chana/Ziona Pawl

            An ni hi thiangzau chi khat, pawl chhuak zingah chuan daih rei leh tam ber an ni hial awm e. Khuangtuaha (1891-1955) hi a nau Chana’n a thlak a, Chana thih hnuah Ziona hi hotu atan tun thlengin an nei ve ta a ni. Kum 1935 harhnaah khan ze mak tak tak a tel ta tlat a, Khuangtuaha pawh hian chang vein hlim sang kal thui ber berte zinga mi a ni ta.

            Ani ngaihdan chuan, inngaihna sual chu, Tlira Pawl sawi dan anga thlarau lam nun khawih pawi phak lo, ni mai lovin, thlarau lam thil a ni zawk. Thlarau an ngaisang a, mihring taksa thil hi chu, Thlarau lam dinhmun entirna atana pawimawh niin an hria. Inngaihna sual nawmna thlengin hmangaihna entir nan an hmang a; chuvang chuan an thiangzau ta em em mai a. Mipat-hmeichhiatna lam thil bakah, Kohhran thil serh leh sang hnawla, pipu tih dan zuiin, zu leh sa nen lam, ‘thlarau lam thil’ chu an chen ta a ni. ‘Sawn thianghlim’ te pawh an lo awm thei ta hial a ni.

            Khuangtuaha/Chana/Ziona pawl hian Vanram te, Kum sang lalram, zalenna famkim tih te an buaipui a, an zirtirna thupui ber pawh ‘Ram Thar Luah’ tih te ‘Hun Thar’ tih te a ni. Amaherawhchu, chutiang thil chu hun leh hmun danga lo thleng tur ni chuang lovin, thlarau nun, tuna kan chan mek hi niah an ngai hmiah. Isua lo kal lehna pawh an ring lem lo. An hmingthanna ber chu ‘khurbing’ a ni a, anni chu kum sang ram nun, hun tharah an ngai. An hlaah pawh ti hian an ti;

            Chutah zet chuan e vulmawi kan lawmna a sang tawh ang,

Kan in-kis ner ner mai dawn zu nia maw le!

Ka sawi thei lo ka hril thiam lo,

Van nun thar kan tem ta a, lei ram nawmna hian,

A sawi thei lo ve, Beram No lalna ram thar dan a ni.

Mizo Kohhran hruaitu pawimawh tak pakhat Rev. R. Lalthanmawia chuan, “Khuangtuaha kum sang lalram luah tum dan hi, sakhaw hminga hmeichhiat-mipat nuam chenna a ni ringawt,”[3] a ti a ni. Sakhua, Thlarau, nuam tawl, leh mahni duhzawng um kaihkawpna a ni ber e.

Van Mi

Van Mi kan tih kaihruaitu ber chu Zathangvunga (p. 1943) a ni. Ani hi tunah Kawnpui khuaah a cheng mek. A hote hi tih tham an awm tawh lo. A lar lai chuan Mizoram, Meghalaya leh Manipurah hriat hlawh tak a ni a. A zirtirna pawh danglam tak, “Isua ka ni, Pathian ka ni, Van mi kan ni” tih te hi a ni. Zathangvunga hian a pianthar tawh hnuah mihring hlui thihna leh a thara nun chu chhar tain a inhria a. Isuaah chuan mihring nihna chu a bo vek a, Isua nihna chu a nihna ni zo ta vekin a hre ta a ni. Krista nihna chu tawmpui main i lovin, “Isua ka ni’, ‘Pathian ka ni’ tiin a kalsualpui ta a ni.[4] Isua nih ang tawmpuitute an nih avangin, Chawlhni Ropui Isuaa chawl tawhte an ni a. Isua chu Thianghlim famkim a nih avangin, Amaha awm ringtute chu thianghlim famkim an ni ta mai a ni…chung mi thianghlimte chu, Isuaah tih theih loh reng a awm loh avangin kan sual thei tawh lo va, thianghlim famkim kan ni tawh. Isua nihna zawng zawng chu kan nihna a ni vek a ni, an ti. Sual theih tawh loh dan theology zawngin ‘thiltih’ an sawi bo leh ta kan ti thei ang.

Lalchhungkua

Lalchhungkua hi 1978-a Mizoram Evangelical Association tia din tan, 1985-ah Lalchhungkua lo ni ta a ni. An hotupa ber chu Rorelliana, Mizoram Biate khaw chhuak a ni. Tunah chuan pawl hnihah an inthen a- Lalchhungkua tih leh Nunna Lalchhungkua tih an lo ni ta. Lalchhungkuate khan Sapram Unity kohhran nen an inhriat pawh tak avangin Lalchhungkua-Unity an ni ta bawk. Lalchhungkua-Unity hi Trinity ring lo (UPC ang) an ni a. Theology mak tak nei mah se, Isua Krista hming an la chhal ve avang hian Kristian chu an la ni ve hram awm e. Nunna Lalchhungkua erawh hi chuan Isua Krista pawh an malmak ta thak a, Kristian tih theih pawh an ni ve ta lo.

Lalchhungkua-Unity pawhin Chhandamna huang chhungah thiltih hi an hnawl chhuak chiang khawp mai. An thurin bu Dogma Hrilhfiahna chuan,“Mihring tisa taksa hian chatuana nung reng tur thlarau (spirit) hi a pianpui lo va, nimahsela, naute chu nu chhula a insiam atang tawh rengin thlarau (spirit) chu pek a ni a. Chu thlarau Pathian atanga chhuak chu, kawng engkima Pathian anpui a nih avangin, sual pawh sual thei lo leh, mihring thiltih leh nun dantein a khawih danglam ve ngai bawk hek loh chu a ni. Chutiang chu a nih avangin, mihring thil tha tih emaw thil sual tih vang mai maia van rama kal tur emaw, hremhmuna tla tur anga ngaih chi a ni lo. A nihna takah cuan, tlan pawh ngai lo leh chhandam pawh ngai ve lo chu a ni zawk a ni. Tlan ngai leh chhandam ngai chu kan lei nun (soul) chu a ni a, chu mi chu tlan leh chhandam tur chuan, Lal Isua kha a lo kal a ni reng a ni.[5] Hetianga an inzirtir avang hian ‘mi zawng zawng’ chhandam an ni ang, tih te chu an tan chiang sa a ni. Nunna Lalchhungkuate phei chuan, “Mihringin thlarau kan nei lo va, keimahnia thlarau awm hi Pathian a ni. Chatuan ata mi nung kan ni a, chhandam ngai ve lo leh tlan pawh ngai chuang lo, pian tir atanga sualna nei lo kan ni,”[6] an ti tawp mai.

Truth Mission Evangelical Fellowship

            Tunlaia min chenchiltu lar ber chu TMEF hi an ni a.[7] An zirtirna thenkhat Lalchhungkua zirtirna nena inhnaihna lai tak te (e.g., thlarau chung chang) pawh awm mah se, a chunga kan sawi tak zawng zawngte lakah chuan an hrang deuh. An ni phei chuan Protestant/Evangelical zirtirna thlungpui zawk niin an inchhal a, mahse John Calvina zirtirna zulzui deuh, Westminster Thurin leh Dort Thurin te nena inkalh si a ni. Presbyterian thurin puanchhuahte  nen hian Thlarau Thianghlim tel lova mihring dinhmun an sawina nen thui tak a inmil a. TMEF hi chuan an duh tawk lo va, a hrulah an duh dan theology an phuahchhuak ta a ni ber.[8] Rinna leh Thiltih inzawmna laiah chauh han sawr bing ila.

            Thutak (TMEF) zirtirnaah chuan, tluknaa bum a nih avangin mihringin sualah mawh a phur lova, chhandamnaah pawh khawngaihna a nih avangin mawh a phur chuang lo. Sual chu Setana hnathawh, Chhandamna chu Pathian khawngaihna a ni tawp mai. Khawngaihna a nih avangin thiltih a tel ve lo a ni. Rinna pawh mihring rinna ni lovin (ring thei kan ni lo), Isua Krista rinna zawk (faith of Christ, faith that belongs to Christ, not human’s faith in Christ) a ni a. Chu Isua a awm, Isua rinna chu khawngaihna changtute hnenah chuan a thlawnin pek a ni ta a. Rinna chuan misual nunah a rawn thawk mai dawn a ni, an ti.

Hetiang a nih avang hian thiltih chung changah uar lutuk leh sawi sual an nei fo a ni. Sual doa tan lak te, sual kalsan te, Kraws pu-a Isua hnungzuite hi ‘Isuan ama rinna a pek’ te tan chuan harsa lo taka awm zat tawh turah an ngai a. Sim tura inhrilh te pawh an hnawl hial.[9] Tun hma deuh phei kha chuan mihring nihnaah hian taksa, rilru leh thlarau an then hrang a; thlarau chhandamna chu Pathian hnathawh a nih avangin danglam thei tawh lo Krista a thuhruk a ni tawh a, kan taksa sualin a tibuai thei tawh lo, an ti hial a ni. Ringtu a lo sual pawhin a titu sual ni lovin, ‘amaha awm sualin’ a tih angah an ngai hmiah a ni awm e[10].Tunah erawh chuan heti zawnga uchuak taka sawi hi an kalsan ve tawh a ni mai thei. Thlarau nunah thiltih paih chhuah duhna lian tak a lang ruak mai. Hei hi mi tam takin an tuipui chhan pawh niin a hriat. Mahse, zirtirna tluantling lo tak a nih zia a lang zel ang.

Rinna & Thiltih leh PCI Thurin

PCI Thurin chuan rinna avang chauha khawngaihnaa thiamchanna a kalpui laiin, a thurin puan chhuah zawng zawngah hian a ruh lang rawtin a sawi hauh lo mai. Hriat sual palh theih niin a hria a ni mai thei. Isua Krista rinna dik takah chuan thiltih a tel zel zia chiang takin he thurinah hian kan hmu. Tin, he thurin hian a phut tlat bawk a ni.

Kan thurin hian Chhandamnaa Pathian hnathawh hi a zep lo hle a ni, Thurin VI-ah chuan “Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam a…” tih kan hmu. Chu chu rahbi 6-in sawifiah a ni: (i) an sualzia leh chungpikziate a hriat chiantir a, (ii) Krista hriatna kawngah an rilru a tivar a, (iii) an duhthlanna te chawk thovin, (iv) Isua Krista chu an Lalpa leh chhandamtua pawm tura ngenin, (v) pawm thei turin a pui a, (vi) anmahniah felna rah chi tinreng a thawk chhuak thin. He rahbi zawng zawng hi Chhandamna rahbi kim a ni a,[11] rahbi 5-naah tawp theih ngawt a ni lo. Hei hi kan Kohhran ordo salutis (order of salvation); Pathian khawngaihna changtu chhandamteah heng zawng zawng hi lang ngei turah kan ngai a ni ber mai.

Tin, Thurin VII chuan ti hian a sawi zawm a, “Pathianin Kristaah chuan mi zawng zawng hnenah chhandamna famkim chu a thlawnin a rawn hlan a, an sualte sim tur leh Lal Isua Krista chu an chhandamtu atana ring tur te, Amah entawn a, Pathian duh ang taka inngaitlawm leh thianghlima nung tur tein thu a pe a. Krista chu ringa a thu zawmtute chu chhandam an ni a, sual ngaihdamna te, thiam chantirna te, pathian fa nihna te, Thlarau Thianghlim chenpuina azara tihthianghlimna te, chatuan ropuina te an chang a,” a ti leh mai bawk.

PCI Thurin X-naah chuan Rinna leh Thiltih inzawmna, rorelna ni atan a pawimawh zia,  tihian kan hmu: “Ni hnuhnungah chuan mitthite chu kaihthawhin an awm ang a, mi zawng zawng Krista rorelna thutphah hmaah an lang ang a, he dam chhunga an thiltih that leh that loh ang zelin relsak an ni ang. Ringlote leh mi sualte chuan thiam loh changin an sual hremna an tuar ang; Krista ring a, a thu zawmtute erawh chu a langchanga thiam chantirin an awm ang a, ropuinaa lawm luhin an awm ang.

            Chipchiar zawka ziak, kan Thurinah pawh kan pawm thu kan ziak tel, Westminster Confession of Faith, Bung 13:1 chuan, “Hlawhtling taka koh, tihnun leh thinlung thar nei a, anmahnia thlarau thar siamsak te chu, Krista thihna leh thawhlehna thiltihtheihna leh Pathian Thu leh anmahnia cheng Thlarau chuan an mimal nunah a takin a tithianghlim zel a: taksaa sual bawihna nghawngkawl chu chhut chhiat a ni a, anmahnia sual tinrengte chu tihnep leh tihchak lohin a awm zel bawk; chhandamte nun dan thaa nung turin tihharh leh tihchaka awm zelin thianghlimna kawng an zawh zel a ni; chumi thianghlimna tel lo chuan tuman Lalpa an hmu thei lo.” [12]  A fiah fek fawk hle a ni.

He Confession vek Bung 17:1-ah “Mi tute pawh Pathianin a fapa Duhtaka-ah chuan pawm a, a Thlarauva hlawhtling taka a kohva a tihthianghlimte chu khawngaihna hmun atangin an tlu bo hlen thei lo; a tawp thlengin an bei hram zel ang a, chatuana chhandamin an awm ang.” Bung 18:1, “Mi vervekte leh siam thar lohten tisa takin Pathian duhsakna leh chhandamna chang inhriatna leh beiseina dik lo neiin mahni an inbum thei, mahse an beiseina chu a thlawn ang. Mahse Lal Isua tih tak zeta ringtu, tih tak zeta hmangaihtu, a hmaa chhia leh tha thianga awm tum mi chuan, he dam chhung hian khawngaihna hmunah an awm tih an hre ngei ang a, Pathian ropuina beiseiin an lawm thei ang, chu beiseina chuan a timualpho lo vang.”

A.A Hodge-an Westminster Confession hrilhfiahna ziakin rinna leh thiltih inthlunzawmzia hi ti hian a sawi: “Ringtute nghehzia kan sawi hian suala chung chung pawhin kan chhandamna a bo tawh lo kan tihna a ni lo. Kan sawi tak zawk chu hei hi a ni – (i) Kan  lo ring ve tawh a nih chuan, engang pawhin awm ila chhandamna hi kan tan a chiang sa ni lovin, ringtu tak kan nih chuan thianghlim tura  beih hram hramna hi kan nunah a chiang a ni zawk, (ii) Chhandam leh chhandam loh chu thianghlima nung tura beih hram hramnaah chauh hian a lang a ni.”[13]

---

[1] Rev. Z.T. Sangkhuma, An Danglamnate (Aizawl: Rinzawna, 1991)

[2] James Dokhuma, Zoram Tualto Kohhran Chanchin (Aizawl: James Dokhuma, 1997), 29.

[3] Rev. R. Lalthanmawia, “Mizorama Pathian Thu buaipui langsar zual te,” Kum Za Mel Lung (Aizawl: Aizawl Theological College, 2007),130.

[4] Ibid., 133.

[5] Rev. R.R. Chungnunga, Dogma Hrilhfiahna (Churachandpur: Lalchhungkua- Unity Church, 2011), 38f.

[6] H. Liandawla, Mizo Kohhran Hrang Hrangte Chanchin (Shillong: Ell Cee Hnamte, 1989), 118.

[7] An pawl hi an phel a, Grace Ministry intia ding pawh an awm.

[8] Kum Za Mel Lung, p. 134.

[9] Simna chanchintha chu Thuthlung Hlui hun atan a ni, an ti.

[10] Kolosa 3:3 leh Rom 7:17-20 hi an lalawk a ni awm e.

[11] No (vii) belh a, ropuinaah a seng lut thin, tih telh a chakawm hle.

[12] They, who are once effectually called, and regenerated, having a new heart, and a new spirit created in them, are further sanctified, really and personally, through the virtue of Christ’s death and resurrection, by his Word and Spirit dwelling in them: the dominion of the whole body of sin is destroyed, and the several lusts thereof are more and more weakened and mortified; and they more and more quickened and strengthened in all saving graces, to the practice of true holiness, without which no man shall see the Lord.”

[13] A.A. Hodge, The Confession of Faith (Edinburgh; The Bannaer of Truth Trust, 1998), 235.