Chhandamnaa Pathian Hnathawh

Philipi khuaa tan in vengtu khan, “Pute u, chhandama awm turin engnge ka tih tur?” a ti a, Paula leh Sila ten, “Lalpa Isua Krista ring la, tichuan chhandamin i awm ang, nang leh i chhungte nen,” tiin an hrilh a. A ring a, a chhungten an ring ve nghal a, chhandam an ni ta a nih kha (Tirh 16:30). Hetiang taka fel fai hian vawiinah he thu hi sawi thei ila a va lawmawm dawn em! Ngaihdan leh sawi dan a tam luatah he thu mawlmang tak, ngaihtuahna tlem ber tan pawh hriat awlsam, hi sawifiah tum tan harsa fea beih a ngai ta a ni.

            Bible-ah hian chhandam nih theihna chu ‘Isua Krista rin’ hi a nih zia chiang takin a inziak a, a sawi nawn fo bawk. Pathian thil thlawn pek chhandamna hi mihringa a lo lan chhuahna chu he rinna hi ni mah se, thil tam tak a keng tel a, Bible ngei pawhin he Chhandamna ropui tak hi tawngkam tam takin a sawi thin a ni. Tin, kal hmang fel tak pawh a nei a. Pathianin misual a chhandamna kawngah hian fel takin a thawk a, a hna thawh dan hi a inrem fel thlap a ni. Chu chu ordo salutis (order of salvation) an ti thin. He ordo salutis hi a vaiin a pawimawh a, a tawngkam tin hi Chhandamna sawina vek a nih avangin thlauhthlak bik tur a awm lo tih hriat a tha. Tin, he ordo salutis hi Chhandamnaa Pathian hnathawh inher vel, Pathian khawngaihna mak leh ropui vek a nih hre bawk ila:[1]

                                                       Ordo Salutis (Order of Salvation)[2]

PATHIAN KHAWNGAIHNA	Thlanna (Mihring tana Pathian thiltih)	Rin hma thil
PATHIAN KHAWNGAIHNA	Kohna (Mihring tana Pathian thiltih)	Rin hma thil
PATHIAN KHAWNGAIHNA	Tihnunna (Mihringa Pathian hnathawh)	Krista kan zawm chiahin a thleng
PATHIAN KHAWNGAIHNA	Simna (Mihring tih)	Krista kan zawm chiahin a thleng
PATHIAN KHAWNGAIHNA	Rinna (Mihring tih)	Krista kan zawm chiahin a thleng
PATHIAN KHAWNGAIHNA	Piantharna (Mihring tih)	Krista kan zawm chiahin a thleng
PATHIAN KHAWNGAIHNA	Thiamchantirna (Mihringa Pathian thiltih)	Krista kan zawm chiahin a thleng
PATHIAN KHAWNGAIHNA	Fa nihna (Mihring tana Pathian thiltih)	Krista kan zawm chiahin a thleng
PATHIAN KHAWNGAIHNA	Tihthianghlimna (Mihringa Pathian hnathawh)	Rinnaah leh rin hnuah
PATHIAN KHAWNGAIHNA	Beih hram hramna (Mihringa Pathian hnathawh)	Rinnaah leh rin hnuah
PATHIAN KHAWNGAIHNA	Tihropuina (Mihringa Pathian hnathawh	Lei nun piah lam, Krista lo kal  leh hunah

            He table hian Chhandamna rahbi zawng zawng- Pathianin min thlanna atanga vana ropuina hmun min thlen thleng hian Pathian khawngaihna hnathawh vek a ni tih a tilang. Hetiang taka indawt fel hian Bibleah kan hmu lem lo, Rom 8:28-30 leh Ephesi 1:3-14 hi a hnaih ber a ni mai awm e. Amaherawhchu, chik duh mi tan heng thu dikzia chu te hian hmuh theih a ni ang – Rom 5:15,20,21; Ephesi 2:8; Rom 11:5; Galatia 1:15; Tirh. 18:27; 20:24; Tita 3:5; Rom 5:2; Ephesi 1:7; I Thess. 2:16; II Tim. 2:1; II Kor. 12:3, 9; Ephesi 3:8; Heb. 12:28; I Per. 3:19; I Kor. 15:10. Kan Chhandamna chu ‘Krista-ah’ zel a nihzia leh Amah nena kan inpumkhatna chu heng changah te hian a chiang hle bawk – Rom 6:1-11; 7:4; 8:1; Eph. 1:6; 2:10,13; Kor. 1:4, 5; 6:53-56; 10:16-18.

            He ordo salutis-a tawngkam ka hman dan hi a danglamna hriat a tul ang. ‘Mihring tana Pathian thiltih’ kan tih hian ‘mihring tel lova Pathiana zawh fela awm’ tihna a ni a; ‘mihring tih’ kan tih hian ‘mihring chet vena’, thawh-hlawh ni lem lo kan sawina a ni. A lo tih avanga hlawh chhuak a ni lo.  ‘Mihringa Pathian hnathawh’ tih hian ringtu nuna Pathian khawngaihna hnathawh lang chhuak leh lang mek sawina a ni. Hetah hian mihring a telin Pathianin hna a thawk. Thenkhat hi mihring tana Pathian thiltih a nih laiin thenkhat thung chu mihringa Pathian hnathawh a ni. Mihring tih (act) awm mah se mihring thawh chhuah(work) chu a awm lo a ni. ‘Thawh’ chuan ‘hlawh’ a keng tel tlat a, engemaw ‘hlutna’ a tel thin. Mihring thiltih kan tih hian thiam chang tura ‘hlutna’ engmah a tel lova, engmah a ‘phu’ phah lo. ‘Hna thawh’-ah chuan ‘thiltih’ a tel ngei e, mahse ‘thiltih’ zawng zawng hi hlawh chhuak tura ‘hnathawh’ a ni kher lo.

Miin Isua Krista a lo rin chiah hian Pathian khawngaihna chu che ta deuh rum rum tura hriat mai a awl hle. Ringtu nih hma hian chu khawngaihna hnathawh chu kan tan hmuh thiam a har fo thin. Chutiang chu a ni lo tih hria ila. Pathian khawngaihna thuthlung hi chatuan thuthlung a ni a. Amah ringtute chu a lo buatsaih sak diam tawh zawk a. Chu chu simna leh rinnain a rawn par chhuak ta a ni ber. Pathian khawngaihna thuthlung chu ‘ni se’ tih thu mai emaw, zawm leh zawm loh thil mai pawh a ni lo; khawngaihna thiltihtheihnain hna a thawhna huang chhunga inpawlna nung a ni a. Miin a rin veleh a tak a lo chang ta thin a ni.

Chu thuthlungah chuan ringtu chu Pathian nena inzawmin a lut thin a ni. A rinna avang chuan chu thuthlungah chuan a awm a. Rinna chuan thil tam tak a rawn hmer tel ta a, a chunga kan hmuh ang khian, Chhandamna huang chhunga thil awm pakhat (e.g, thiamchanna) mai ni lovin Kristaa awm malsawmna zawng zawng leh hlawkna zawng zawng chu a lo tel ta ni. Reformed theologian ropui tak Geerhardus Vos chuan, “Ringtu chu ‘thuthlung palai’ Krista nena inzawm leh inpumkhatin a awm phawt a, miin lo rin chiah khan chu thlarau lam inpumkhatna chu hriat leh hmuh theih a lo ni ta a ni. He inpumkhatnaah hian Kristaa awm zawng zawng chu ringtu hnenah pek a lo ni ta bawk. Rinna chuan chung zawng zawng chu a lo pawm a; thiamchantirna chauh ni lovin Krista chu a Mesia dik tak, Zawlnei, Puithiam leh Lal atan a lo vuan ta a ni,”[3] tiin helai thu hi fiah takin a sawi.

Ringtu Hlawkna Ropui Ber: Krista Nena Inzawmna

Ringtu tana thil ropui ber mai- heng thiamchanna, thianghlimna, felna, fa nihna, ropuina, chhandamna te pawh, kan ta a nih theihna chhan chu Krista kan zawm tak vang a ni. Paulan Kristian nihna a sawi apianga a uar em em, a tawngkam hman tam ber pakhat chu ‘Krista-ah’ tih hi a ni. ‘Chhandam ka ni,’ kan tih theih chhan chu Kristaa ka awm tawh vang a ni a. Kristian nun chu ‘Kristaah’- Krista mamawh, Krista ngai, Krista hria, Krista chen, Kristaa innghat, engkim dang aia Krista thlahlel nun a ni. Thil dang zawng zawng hi kan chan theih nachhan chu Krista kan zawm tak vang kha a ni chauh: “Chanchintha thilpek, chhandamnaa chanvo tha zawng zawng- thiamchantirna, tihthianghlimna leh Pathian fa nihna zawng zawng pawh telin- hi khenbeh leh tholeh Krista rinnaa a zawm vang chauhvin ringtu tana siam a ni.”[4] Paulan Ephesi khua ringtute hnenah khan, “Kristaah chuan thlarau lam malsawmna tinreng…” an nei tih a hrilh a nih kha. Vawiina malsawmna kan chan zawng zawng pawh hi ‘Krista-a’ kan neih vek a ni e.

Pathianin ringtu khawngaihna hna a thawh hi a ropui teh a nia. Ringtute chu Kristaa thlan leh ruatlawk an ni (Eph. 1:4,5), Kristaah an thi a, an tho leh (Eph. 2:4-6; Col. 2:11-13; 3:1-4), Kristaa koh an ni (I Kor. 1:9; II Tim. 1:9), Kristaa tihnun (Eph. 2:5; Kol. 2:13), Kristaa thiam chantir (Rom. 8:1; Gal. 2:17; I Kor. 1:30), Kristaa tihthianghlim (I Kor. 6:11; Rom 6:5ff), Kristaa bei hram hram (Rom 6:4; I Kor. 4-9; Phil. 1:6), Kristaa thi (Thup. 14:13; I Thess. 4:17), Kristaa kaih thawh leh tihropui tur (I Kor. 15:22; Rom 8:30). Herman Bavinck-an fiah takin ti hian a sawi:

Kristaah kan tel ve a nih loh chuan Kristaa malsawmna awm te hi engtizawng pawhin kan chhawr ve thei lovang; chu malsawmna chu Amah nen then hran theih a ni si lo.  Chung hlawkna zawng zawng chu midang tu emaw, puithiam emaw, sakramenah emaw a awm lo va…Krista chauh chu Kristaa hlawkna awm kawltu a ni…Amah nena inzawm lovin Amah nen inkungkaihna a awm thei lo…Krista leh a malsawmna zawng zawng chu Thlarau Thianghlim kal tlanga Kohhran ta a ni e.[5]

            He inzawmna hi thlarau lam inzawmna a ni. Rom 8:9-ah, “Nimahsela Pathian thlarau nangmahnia a awm tak zet chuan tisaa awm in ni lo va, Thlarauva awm in ni zawk e. Amaherawhchu tupawh Krista Thlarau nei lo chu amaha mi a ni lo,” tih min hrilh. Ephesi 3:16,17-ah a thlarau zara kan chhung lam nun tihchak nan a ropuina nasa tak ata thiltihtheihna min pe a, chu chu rinna avangin Krista chu kan thinlungah a cheng a, hmangaihnaa zungkaia phun ngheh kan ni tih kan hmu bawk a ni. ‘Thlarau taksa’ chu ‘tholeh taksa’,  kan tisa leh ruh pangngai Pathian thlarauvin a tihdanglam, a tihchak leh kaihhruai tak, a nih ang bawk hian ‘thlarau mi’ chu Thlarauvin a kaihhruai leh thunun a ni (I Kor. 2:13, 15, 16; 12:13; I Johana 3:24; 4:13).[6] Chu inzawmna chu ringtu thlarau leh Krista Thlarau inzawmna, Krista Thlarauvin a chenchilh avanga awm a ni. Hei hi Siamtu leh thilsiam inkungkaihna pangngai te, mihringin thu khat vuaa thil tum thuhmun vanga kan inpumkhatna nen hian a inang lo a. Tin, Krista nen kan inzawm, kan inpumkhat kan tih hian kan nihna a inang ta, kan intluk ta, kan tihna a ni bawk lo tih erawh chu hria ila.

            He inpumkhatna hi inzawmna nung, rah chhuah lo thei lo a ni. Ringtu bawhkanin van lamah emaw, Pa-ah emaw zawh fel mai a ni lo. He leiah hian a taka hmuh a ni thin. Petera fuihna (I Peter 1:3-10)ah hian hei hi a chiang thei ang:

A ropuina leh thatna chang ve tura min kotu kan hriat tak avanga Pathian tiha kan nun theih nan, Pathian thiltihtheihna chuan kan mamawh engkim min pe ta. Tichuan, thilpek a tiam, ropui tak leh hlu tak chu min pe ta a; chuvang chuan, khawvel sual chakna, min tichhe thei lak ata in chhuak a, Pathian zia in tawmpui thei ta a ni. Hei vang hian theihtawp chhuahin, in rinnaah chuan thatna telh ula, in thatnaah chuan hriatna, in hriatnaah chuan mahni inthununna,m mahni inthununnaah chuan chhelna, in chhelnaah chuan inserh thianghlimna, inserh thianghlimnaah chuan unaute lainatna, unaute in lainatnaah chuan hmangaihna belh rawh u. Chung chu in neiha, a pun zel chuan kan Lalpa Isua Krista in hriatnaah taima tak leh tangkai takah a siam ang che u…Tichuan, kan Lalpa leh Chhandamtu Isua Krista chatuan ramah lawm takin an luhtir ang che u. (lt)

He inzawmna nung hi awm ngei si, mihring hriat thiamnain a man kim phak loh leh tawngin a sawi fiah hleihtheih loh ‘thuruk’ a ni. Hei vang hian Paula chu a tuarnaah pawh a lawm ta hial, “Nangmahni avanga ka tuarnaah tunah hian ka lawm a ni. A taksa, kohhran tana Krista tuar bakte chu ka tisain ka chhunzawm zel a ni si a. Pathian thu leh a remruat in hnena kim taka puang turin Pathianin hna mi pe a, kohhran rawngbawltuah kei hi mi siam a ni. Mi zawng zawng laka a lo thup kumkhua thin thuruk kha, tunah hian a mi thianghlimte hnenah a tilang ta. Chung mite hnenah chuan hnam tin tana a thuruk ropui leh hlu tak chu Pathianin hriattir a duh reng a ni; chu thuruk chu Krista, nangmahnia awm, ropuina beisei chhan chu a ni. Krista thu chu mi zawng zawng hnenah kan hril a, Kristaa kan puitlin theuh theih nan finna tinrengin mi tin kan zirtirin kan kaihruai thin a ni. Chumi ti tur chuan Krista chakna, keimahnia thawk thin chu hmangin kan bei a, rim takin ka nthawk a ni,”(Kolosa 1:24-29, lt).

            Ringtu mimal, Kohhran (ringtu thi tawh leh dam zawng zawng) leh Krista chu pumkhat kan ni ta. Hei vang hi a ni ang Johana chuan tilai inkungaihna chung chang a Isua thusawi a rawn ngai pawimawh ta hle, “Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang. Kei grep hrui chu ka ni, nangni a pengte chu in ni; tupawh keimaha awm renga kei pawh amaha ka awm rengna chu, chu mi chu tam takin a rah thin; keimah lovin engmah in ti thei si lo.” (Joh. 15:4,5). Rah lo chu zawm lo tluk an nih avangin paih leh halral an ni mai dawn a ni (15: 2, 6). Lehkhathawn lamah duhthawh taka sawi chhunzawmin,”Pathianin chatuana nunna min pe a, chu mi nunna chu a Fapaah a awm a ni. Fapa chu neitu chuan nunna chu a nei; Pathian Fapa nei lotu chuan nunna chu a nei lo,” (I Joh. 5:11f). Kan inzawmna chu thingkung leh a zar ang hialah a ngai a ni.

            He inpumkhatna mak tak hi Bible chuan Pathian temple thianghlim angin a sawi bawk. Chu templeah chuan Amah Krista ngei chu a kila lung tangkai ber a ni a, tirhkohte leh zawlneite chu a innghahna lungphum an ni a, chutah chuan Pathian a cheng a ni (Eph. 2:20-22; I Peter 2:4, 5). He inzawmna hi member tam tak chunga hotu pakhat awm ang te (I Kor. 12:2) leh nupui leh pasal  ‘tisa pumkhat’ anga an inkungkaihna ang hiala thuk leh ril niin a sawi (Rom 7:4; Ephesi 5:22-33).

            He inzawmna hi chatuan atan a ni a, inzawmna famkim a ni bawk. Lalpa leh ringtu rilru, thlarau leh taksa chu pumkhat an ni ta a nih chu. Thlauhthlak bik tur a awm chuang lo. Pathian thlarau chu keimahniah a cheng a nih chuan, kan nihna zawng zawng a luah a ni. I Kor. 6-ah Pathian lama taksa a pawimawh zia a sawi nasa hle. Korinth mite chuan an taksa tibawrhbangin inngaih an ching ta tlat mai. Paula hian a haw hle. Taksa chu Lalpa tan a ni a, Lalpa pawh taksa tan a ni. Ringtu taksa pengte chu Krista taksa pengte an nih avangin nawhchizuar pengah siam chi a ni lo. Inngaih hmang chuan ‘ama taksa chungah thil a tisual’ a ni tih a hrilh. Nawhchizuar ngaitu chuan ngawhchizuar chu a zawm a (Lalpa a zawm lo a ni ngei ang). Inngaihna, mahni taksa chunga thil tih sualna a ni. Thlarau Thianghlim in an nih avangin, mahni ta an ni tawh lo va, ‘…in taksain Pathian chawimawi rawh u..’ (I Kor. 6: 12-20) a ti tawp mai.

---

[1] A indawt dan hi ngaihdan a inang lo thei ang. Tin, a thleng hmasa a thleng hnu hnung (chronological order) ni vek kher lovin awmze neia a inrem fel dan mai (logical order) a ni tih hre bawk ila. A then hi chu ziak hrang mah ila a thleng rual te pawh a awm bawk.

[2] Robert Duncan Culver, Systematic Theology: Biblical & Historical (Fearn, Ross-shire: Christian Focus Publications, 2008),653. Tlem ka siam danglam.

[3] Richard B. Gaffin Jr., ed., Redemptive History and Biblical Interpretation: The Shorter Writings of Geerhardus Vos (Phillipsburg, N.J.: Presbyterian and Reformed Publishing Co., 1980), 256.

[4] Lane G. Tipton, “Union with Christ and Justification” in K. Scott Oliphint (ed.) Justified in Christ: God’s Plan for Us in Justification  (Fearn, Ross-shire:Christian Focus Publications, 2007), 25.

[5] Herman Bavinck, Our Reasonable Faith: A Survey of Christian Doctrine (Grand Rapids, Michigan: Eerdmans, 1956), 399-400.

[6] Culver, 667.