DAN LEH KHAWNGAIHNA

                                                   

Rinna leh thiltih inzawmna chung changa kan buaina chhan ber pakhat chu Dan leh Khawngaihna Chanchintha inzawmna hi kan hriat chian loh vang a ni. Dan chu Thuthlung Thara tel tawh lo, kan chhandamna khawih buai pha lo, thil tha tak lo ri satliah mai maiah kan ngai thin a ni ber. Dan zawm pawh leia malsawmna kan dawn nana thil tha, Pathian nena kan inkar thilah chhawrnahawmna tur awm lo, Pathianin a hnawl fihlim tawh niin kan hre thin. Heti zawnga han hriat pelh theih tur hian Bible chang thenkhat- Tirh. 13:38; Rom 3:29; 8:3,4; 10:4; Gal. 3:24,25 a lo awm ve bawk a ni.

Thuhriltu pakhat chuan a duhthawh ve hlaih hlaih hle:

Kan Bible-ah hian ‘Dan’ kan tih thin hi pali a awm a..thlarau dan…tisa dan…thu sawm pek dan…serh leh sang dan….Hengte nen hian kan Bible-ah Dan tesep nepnawi zawng zawngte nen Dan 615 lai a awm a ni. Heng dante hi Krista nun nei lote tan chuan, Dan ding lai an ni vek a, Kristaah erawh chuan ringtute tan tihbanin a awm thung a ni.

Pathian thianghlimzia leh sual pawlh loh thinlung thianghlimzia tarlanna darthlalang chu Thu sawm pek Dan hi a ni Pathian nungchang leh mihring tlu chhe tawhte sualzia hai langa kawhmuh turin Sinai tlanga Mosia hnena pek chu a ni..Chuvangin Thu sawm pek Dan thianghlim chu zawm theia inngaite tihmualphona a ni a, tlinga inngaite tlin lohzia tarlangtu a ni zawk.

…khawngaihna mak tak mai chuan, a chhan chhuah mihringte chu a tana nungturin a phut lova, an tan a nunsak ta zawk a…

Chu khawngaihna chuan a tan nung turin min kova, khawngaihna bawkin min nunsak a. ama thatnain kan thatna a timualpho va, tha famkimin keimahniah a cheng zawk a. Ngaihdam dil turin min phut lo va, ngaidamtu chu keimahniah a cheng zawk a; a ngaihdamnain ka nsual a um bo va; thupha kan chawi hmain amah ngaiin pathian hmaah thupha min chawi sak a. Kan thinlungin thiam a chan mai lohna turin kan chhungril nun ngeiah hian amah ngei chu a cheng hlen a, kan thinlung chu thiam loh a chantir ta zawk a. Kan thatchhiatna timualpho turin, mi taima tawpkhawk chu keimahniah hian a lo che chhuak ta a ni.

Beih tang tangna a chawlhtir a, tan lak ngai lovin kan taksa ngeiah hian tan latu a lo che chhuak a; kan hlim loh laiin hlim takin a au chhuak zawk thin a ni. Amah hriat reng kan tumna a chawlhtir …

…ringtuah Thlarau Thianghlim dik tak a lo awm chuan mihring thinlung thiltih aiawh zo vekin, Krista mizia chu ringtu nungchang a lo ni nghal thin a ni…chu chuan thlarau thilpek chi kua leh thlarau rah chi kuate hi, mahni taksa pengte anga a pawimawhna hmun apiangah a hmang chhuak mai thin a ni. Chu mi awmzia chu….a tulna hmun apiangah mahni mize pangngai ang maiin an lo che chhuak thin a ni zawk.

…Ringtuin Krista Thlarau nung a kawl tawh chuan thinlunga tihsualna leh taksa ngeia tihsualna chu Pathian khawngaihna tihlutu leh faktirtu a ni hlauh thin…Dan leh khawngaihna chu Pathian atanga chhuak ve ve a ni a. Dan chuan Pathian thianghlimzia tilangin mihring bawlhhlawhzia a hai lang a. Khawngaihna erawh chuan mihring bawlhhlawhna thai bovin, khawngaihthlak ena min entu leh min hmusittute khawngaih letnaah min hlang lut…

Rev. Dr. Rohmingliana, TMEF Founder, hian a uarna lam chu a uar thiam hle nachungin, a hmaih lam hi a pawi phak tlat. Sual phalrai ta mai a nih em loh laiin, Dan chu sual timualphotu ang lek fangin a hmu a, zawm a tulna leh ringtu tan a hlutna a sawi miah lo tluk a ni. Chu mai bakah Kristian nunah hian mahni inphata beih vena lam sawi aiin automatic-a lo awm mai anga a lantir avang hian Bible thu atangin a tling lo hle a, ringtu tam tak nunin a mil lo bawk a ni.[1] Thi lo chu kan ril a tam a chaw kan zawng mai ang hian, Kristian chuan thianghlimna chu a zawng maiah a ngai a ni ber.

Dan chu engnge ni?

‘Dan’ kan han tih mai pawh hi engnge a nih chiah hriat thiam a tha hle. Thuthlung Tharin a hman dan hi kan tana pawimawh chu a ni ang. Chanchintha Matthaia ziakah vawi 8 chiah a lang a,[2] Luka ziakah vawi 9,[3] Marka ziakah lang miah lovin Johana ziakah thung chuan vawi 14 lai hmuh tur a awm. Greek tawnga nomos (dan) hmanna zawng zawng, Luka 2:23 tih lovah chuan, thil bik sawina (definite article ‘the’ ang chi) nena hman kawp a ni vek a. Nomos chuan Mosia bu 5-te a kawk tlangpui. Mahse, oi profetai, tih nena hman kawp a nih erawh chuan Thuthlung Hlui zawng zawng sawina angin a ngaih theih. Chik taka sawi chuan nomos chu Mosia dan leh Mosia lehkhabu 5-te (Pentateuch) a ni a. Matthaia 12:5 tih lovah chuan Chanchintha bu hmasa 3 te hian nomos hi Thuthlung Hlui zawng zawng sawi nan an hmang ngai lo.[4] Johana thung chuan Pentateuch a kawhtir deuh ber laiin Thuthlung Hlui pumpui pawh a kawk thei tho.

Tirhkohte Thiltih bung 15-a Jerusalem Inkhawmpuiah khan thil 3 an sawi chiang hle: (i) Pathian pawm tlak nihna hi dan zawm vang a ni lo; (ii) Judate leh Jentailte chhandamna kawng awm chhun chu Isua Krista rin a ni; (iii) Dan chu Judate tan chuan a la pawimawh zel a ni, tih hi. Paulan a lehkhathawna nomos a hman dan zawng zawng erawh chu a inang vek lem lo, Mosia dan a sawina a ni deuh ber zel a,[5] Thu Sawm Pek leh dan dangte hi a hmer kawp zel niin a hriat. Pentateuch a kawhtir fo bakah ‘dan leh zawlneite’ a tih chuan Thuthlung Hlui pumpui a sawina a ni thin. Tin, Mosia dan piah lamah pawh hian dan a awm thu a sawi tho mai (Rom 2:14). Chu chu, ‘thinlunga pianpui Dan’ mi zawng zawng chunga Pathianin a dah a ni. Rom 8:2-ah ‘Krista Isuaa Nunna Thlarau Dan,’ tih kan hmu bawk a nih kha.

Kan thuchai mekah hian hei hi fiah sela. Thatna dan, sakhaw serh leh sang dan, leh dikna dan kan sawi hrang dawn a ni. Thatna dan chu Thu Sawm Pekah kan hmu a, Thuthlung Hlui leh Tharah hnawl a ni ngai lo. Thuthlung Tharah pawh nun dan tur tam tak a inziak bawk. Kristianten Dan pawimawhna kan sawi hian Thuthlung Hlui serh leh sang dan kan sawi lova,  ‘thatna dan’ hi a ni tih hre tlat ila tha awm e.

Dan awm chhan pathum

Bible-ah hian Pathianin Dan a pek chhan leh a hmanna tur a tlangpui thuin kawng 3-in a thliar theih a. Ringtute tan Dan tangkaina leh hmanna tur kawng 3 John Calvin-an a thliar fel hle a.

1.      Dan hnathawh kan hmuh hmasak ber chu Pathian felna famkim leh kan sualzia leh tlin lohzia tihlan hi a ni. Augustine-a chuan, “Dan chuan min ko a, a phutte zawm kan tum a, kan chaklohzia hmuin chu chuan min tina a, khawngaihna tanpuina kan mamawhzia kan hre ta a ni.” Dan chuan sual a hriattir (Rom. 3:20; 4:15; 5:13; 7:7-11), ngaihdam kan mamawhzia min hriattir bawk a; simna leh Isua Krista rinna nuna min hruai luh theih nan kan chung pikzia min hriattir thin a ni.

2.      Dan chuan sual a khuap bawk a ni. Thinlung thlak danglam thei lo mah se mimal leh khawtlangah sual punlun tur vaukhanna leh hremnain a veng a (Deut. 13:6-11; 19: 16-21; Rom. 13:3, 4). Nun hona thilah misual lakah mi thate a veng a ni.

3.      Dan chu Pathian nihna leh a rilru hlimthla a ni. Ringtute chu Pathianin an tana a lo ruat tawh thil tha tih nunah a hruai lut a ni (Eph. 2:10). Dan chuan Pathian fate chu an Pa duhzawng a zirtir a, an chhungkaw inkaihhruaina a lo ni ta. Matthaia 28:20-a Isuan a thupek zawng zawng pawm tura zirtir tura a tih khan hei chiah hi a sawiin a lang. Chu thupek awihna chuan Amah hmangaihna a lantir ang (Johana 14:15). Chhandam nih theihna turin ringtu chu Dan lakah a zalen chiang a (Rom. 6:14; 7:4, 6; I Kor. 9:20; Gal. 2:15-19; 3:25), mahse “Pathian dan zawm lo ni si lovin, Krista dan zawm tlat siin,” tih hi a nunah a lo lang ta thin a ni (I Kor. 9:21; Gal. 6:2).

Dan leh Khawngaihna Inlaichinna

Kan mamawh tak chu Khawngaihna huang chhunga Dan lo awm ve tlat mai hriat chian hi a ni. Heng thil pahnih hi kal kawp hlei thei lo, inhal leh hmer kawp theih loh niin mi tam takin an sawi thin. Awih pawh a awl viau awm e. Amaherawhchu, Bible zirtirna kan en chiang ang a, a tan kawp dan a lang fiah mai awm e.

Isua Krista zirtirna

            Isuan Dan chungchang a zirtirna atangin Mosia dan a la pawm zelzia a lang. A zirtirna chuan Dan a hnawl ngai lova (Matt. 5:17; 17:27; 23:23), Mosia leh Zawlnei dangte zirtirna ngai pawimawh turin mite a zirtir thin (Luka 24:27, 44; Johana 5:39-40, 46). Juda Rabbi ho aiin Mosia dan zawm chung changah a khermei zawkin fo. Pawn lam lan dan mai a duh tawk lova, chhung lam atanga zawm turin a zirtir a ni. Dan petu Pathian rilru atang zawkin Dan thu a zirtir a. Hei hi hengahte hian chiang takin a hmuh theih – Pathian zah (Mt. 22:18-22), Sabbath (Mt. 12:1-14; Mk. 2:23-28; 3:1-6; Lk. 13:10-21; 14:1-24, 43-48), Nu leh pate zah (Mk. 7:1-13), tualthahna (Mt. 5:21-24, 43-48), inmak leh uire (Mt. 5:27-32; 19:3-12), chaw nghei (Mk. 2:18-22),  sakhaw thil serh (Mt. 15:1-30; Mk. 7:1-23; Lk. 11:37-54). Isua khan Dan a hnawl lo chiang hle. Zawm dan ril leh nasa zawk a zirtir a nih kha (Mt. 5:19; cf. 7:17; Mk. 10:17-22; Lk. 6:45; 12:36). G.E. Ladd-a chuan, “Isua khan pawlh dal miah loh Pathian duhzawng chu thlah dul hauh lovin mi zawng zawng tan a zirtir mai a ni,”[6] a ti.

            Isua khan Pathian Ram leh Dan kha a suih kawp tlat bawk a. Ani khan Pathian Ram hun tharah min chuan kaipui a. Baptistu Johana a thih khan hun hlui  chu a ral a (Mt. 11:11-13 = Lk. 16:16-17), tichuan Amah Kristaah chuan Pathian Ram ropui zawkin kan lo hmu ta a (Lk. 10:9). A rawngbawlna a sawifiahnaah chuan, “Dan leh zawlneite thu chu Johana lo awm thleng khan a awm a; chu mi achinah chuan Pathian ram Chanchin Tha hi an hril a, mi tin an lut lui theuh va. Nimahsela Dan thu chhun han te tak te bo ai pawhin van leh khawvel boral a awl zawk e.”(Lk. 16:16,17).

            Hei hian mite an sual sim thuai thuai tura a zirtirna te, amah ring tura a zirtirna te, dan zawm tura a zirtirna te leh Pathian Ram lo thleng tur atana lo inpuahchah tura a zirtirna te hi a sawifiah hle. Isua zui aia pawimawh he khawvelah hian a awm tawh lo va (Mt. 6:33; 10:32 – 39; 16:24; Lk. 9:58 – 61; 14:26, 33). Isua zuitu nih man chu a tam e, mahse, a lawmman a tam zawk daih (cf. Lk. 6:35; Mt. 5:19).

           

Mosia dan kawi hnawk tak mai kha mawlmang leh hriat nuam takin ‘hmangaihnaah’ a rawn chhung lut ta vek a. Dan leh Zawlneite thu tifamkim turin a lo kal a (Mt. 5:18; Lk. 24:44). A chhan chu Mosia aia a ropui zawk avangin (Jn. 5:36-47) Mosia dan chu thu nei takin a hrilhfiah mai a ni. Pathian Fapa a nih avangin dan thupek zawng zawng chu thupek pahnih – Pathian leh thenawmte hmangaih (Mt. 22:37-40; cf. Lv. 19:18; Dt. 6:5)-ah a chhung khawm ta a ni. Chu mai ni lovin, Amah zui mai turin a zirtir ta bawk. Dan zawm chu Isua zuiah a khaikhawm ta. Amah kha Dan famkimna a ni a, amahah chuan Pathian Dan thlarau chu kan hmu ta a ni.

Isuan, “Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni,"(Mt. 11: 28, 29) a ti mai a. Isua nghawngkawl nuam chu thil dang ni lovin, hmangaihna dan a ni (Jn. 15:17). Kristian chu hmangaihnaa Pathian zawmtu, Pathian hmangaihna a nuna lantirtu a lo ni a. “Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u. Nangnin ka thupekte in zawm chuan ka hmangaihin in awm reng ang; keiin ka Pa thupekte ka zawm a, a hmangaihin ka awm reng ang bawk hian….Hei hi ka thupek a ni, keiin ka hmangaih che u ang bawkin nangni inhmangaih ula.” (Jn. 15: 9-10, 12)

Hmangaihnaa Pathian nena nghet taka inkungkaihna leh Isua Krista chauh en rengna chuan ringtu chu Pathian Dan zawm leh hriatfiah kawngah dinhmun thar a pe ta a ni.

Paula zirtirna

Paula chuan Dan hi Isua Krista Kraws atangin a thlir a, a sawifiah thin. A hnawl zawng leh a pawm zawngin a sawi fo. Pawm kawp thiam a tul khawp mai. Thiam channa hmanrua atan Dan chu a hnawl hmiah a, “Dan zawm avanga Pathian hmaa thiam chan theih a nih chuan, Krista thihna hi a thlawn mai a ni ang,” (Gal. 2:21 lt). Amaherawhchu, Dan chuan sual a khap a (Rom 6:15), Isua Kristan kan tan Dan chu zawm famkimin, “Keimahniah hian Danin a phut chu hlena a awm theih nan,”(Rom 8:4) Amah avang chuan Thlarau Thianghlim, thiltihtheihna thar mak tak, Krista Isuaa nunna Thlarau dan chu kan nei ta a ni. Ringtu chu Dan zawm avanga thiam chang a ni lo chungin Pathian duhzawng umin Dan chu a zawm thin a ni. Khawngaihna avanga thiamchantirna thilpek hlu tak chuan Pathian Thu awihna nun a keng tel a, chumiah chuan a hruai lut ta a ni.

Paula hian Krista, Dan, Thlarau leh hmangaihna hi a hmer khawm tha hle a. Krista nena inzawmna (union with Christ) dan zawm chung changah thil a tidanglam nasa hleah a ngai a ni. Kristian nun chu mihring hlui thih san zel nun a ni: “Krista Isua, Lalpa chu in lawm ang khan, amaha zung kai leh rem chhoh deuh deuhva awmin, an zirtir che u ang khan in rinnaah chuan nghet taka awmin, lawmthu sawi lo ngahin, amahan chuan awm rawh u.” (Kol. 2:6b-7). Chu thatna Dan chuan Pathian famkimna darthlalang anga kan sualna min hriat tir leh thin avangin a la tangkai zel a. Kristian chuan mihring hlui zia la chambangte chu a dova, a tihlum zel thin a ni. Mihring hlui chaknate (thatna danin a khapte chu) lakah ringtu chuan indo a puang ta: “Chutichuan, in taksa peng leia awmte hi tihlum rawh u, inngaihna te, bawlhhlawhnate, hurna te, chakna sual te, duhamna te hi (duhamna chu milem biakna a ni si a); tauhna te, thinurna te, huatna te, sawichhiatna te, in kaa chhuak tawng zahmawh te,” (Kol. 3:5, 8, 9; cf. Gal. 5:19-20). Misual chuan thil chak thar, “lainatna thinlung te, ngilneihna te, inngaihtlawmna te, thuhnuairawlhna te, dawhtheihna,” (Kol. 3:12) a lo nei ta bawk a.

Krista Thlarau chuan ringtu chu thutak zawng zawng leh Pathian ngaihsaknaah a hruai lut a. Amaherawhchu, boruakah Thlarau chuan a thawk mai lo. Pathian Thu chu Krista nena inzawm tawh ringtu thinlungah a hmang thin. Hetiang hian ringtu chuan nun thar lo neiin Pathian rilru nena inrem tumin Pathian duhzawng chu zawm a lo tum ta tlat thin a ni (Gal. 5:18; cf. vv. 22-23). GE Ladd-a bawk khan, “Paula khan vawi tam tak Thlaraua nunna tharin ringtu chu Dan chu dik takin a zawmtir thei ta tih a sawi (Rom 8:3-4; 13:10; Gal. 5:14).

Fel taka Pathian Dan hmang thiam si lova Thlarau hruaina chan tum tlatna hian Kristian nunah min tithuanawp thei hle. Dan leh thuawihna kan tih hi Thlarau nun tak lan chhuah dan mai a ni a… a lan chhuah dan hi kan hnawl palh vaih chuan intithlarau mi nun dik lo, tisa thil khuh mawina hmanruaah a lo chang mai dawn a ni.[7]

Dan thiltum chu khawngaihnaa Kristian thanlenna a ni a, thiamchanna leh felna a ni lo. Galatia 3:21-ah Paula chuan Dan leh thutiam danglamna a sawi: “A nih loh leh, Dan chuan Pathian thutiamte chu a dodal em ni le? Hnai lo ve, Dan mi tinung thei reng pekin a awm tawh si chuan, felna chu Dan avangin a awm ngei tur a ni.” He chang hi Paulan Dan leh thutiam (khawngaihna) a pawm dan tilangtu tangkai ber a ni thei mai awm e. Thutiam leh Dan chu a hnawl lo ve ve a, thutiam leh dan zawm chu Pathian thutiam (khawngaihna) channa a nihzia a sawi zawk a ni. Tichuan, Dan chuan Kristaa nunna leh felna nei tawhte chu a hruai a, mahse khawngaihna tel lo chuan nunna a pe thei lo a ni. Khawngaihna chu Dan kan zawm theih nana thil tul a ni ngei a, mahse khawngaihna chauh chawi lar a, dan zawm tumna awm lo chuan thiangzau nunah min hruai lut thin. Hrang hlui John Murray-a chuan he mi chung chang hi a sawi fiah hle, “Thiltiha chhandamna hlawh chhuah tumna atanga Khawngaihna Chanchintha humhim chauh hi kan tum tur a ni lova, Dan hi Khawngaihna chungchang zirtirna dik lo atanga humhim pawh kan tum tur a ni. Khawngaihna hi thil tha tia Chhandamna hlawh chhuah tum ho laka humhim leh Dan hi thiangzau zirtirna kal sual laka humhim a tulzia kan sawi hian Jentailte zinga Pathian tirhkoh, Khawngaihna Chanchintha hriltu thu sawite kha kan sawi chhawng mai a ni zawk.”[8]

Ringtu chu Thlarauva mihring hlui zia  kheng bet zelin leh mihring thar nun Isua Krista anna kawngah a kal zel a. Timothea hnenah Paulan Pathian lehkha thu, Thuthlung Hlui, zawma Khawngaihnaa thang zel tura a zirtir thu kan hmu (II Tim. 3:16-17). Hmangaihna chu Pathian zawmna a nih thu te, zalenna Chanchintha hriltu chuan Dan zawm chu hmangaihna avanga kan bat a nih zawkzia a sawi: “Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan Dan a zawh famkim tawh a ni. Heng, “Uire suh, tual that suh, ru suh;’ awt suh” tih leh thupek dang reng rengte hi, “Nangmah i inhmangaih angin i vengte i hmangaih tur a ni,” tih hian a khai khawm vek si a. Hmangaihnain vengte a tikhawlo ngai lo va; chuvangin, hmangaihna hi Dan zawh famkimna a ni.”(Rom 13:8-10)[9]

            Hmangaihna chuan Dan zawm duhna min pe (Phil. 2:12). Kristan thih thlenga thu  a awih ang khan (Phil. 2:5-11; II Kor. 8:9) Kristiante pawhin Pathian Thu awihna nun (Phil. 2:12)  leh Pathian duhzawng ti tura inhlanna (Phil. 2:13) kan neih theuh a tul. Anmahnia Pathian hnathawh chuan a tichak a (Phil. 2:13), Pathian laka inngaihtlawmna nunah Thlarauin a hruai a (Phil 2:14), Krista anga ‘sual nei lo, nun tlang, sawiselbo, khawvel tiengtute’ (Phil. 2:15) ni zel tura ‘nunna thu vuan zel tur’ an lo ni ta a ni (Phil. 2:16).

Paula khan Isua thawhlehna atang khan hun thar a thleng taah a ngai (I Kor 15). Ringtu zawng zawng nihna ‘Krista nena inzawmna’ chuan mihring hlui atanga mihring thar inthlakna chu a sawifiah a (Eph. 2:1 – 22; 3: 1-4), hun thar atanga hun hluia zuan luh nen. Krista chuan thuthlung hlui serh leh sang zawng zawng chu a thihnaah a tibang vek tawh a (Kol. 2:11-15), ‘chung thil lo la awm tur hlimthla mai’ atang chuan min chhuah zalen tawh (Kol. 2:17). Kristaah chuan amah zuitu zawng zawngten hun thar nun (II Kor. 5:17), hun thar atana thilpek Thlarau Thianghlim, leh mithianghlimte inpawlkhawmna (‘Pathian mi thlan, mi thianghlim leh duh takte’ Kol. 3:12) te chu an chen a. Chu Thlarau hruai nihna thar chuan taima takin felna a um a (Rom 8:10), ral mek khawvel thilte chuan a lem zo ve lo( I Kor. 7:31). Sual bawih doulos (Rom 6:16) atangin felna bawih (Rom 6:18)ah a lut tawh a. Kristian nunah chuan Pathian Ram a thleng tawh a, a la thleng zel dawn bawk. Hei hi a inpawt reng dawn a ni. Paulan Rom 7:6-ah: “Tunah erawh chuan min chelhtu lakah thi tawhin, Dan ata thlahin kan awm ta, lehkha ziak hlui ang mai ni lova, thlarau thara rawng kan bawl theih nan,” a lo tih ang khan.

Paula hian he hun tharah hian Dan pawimawhna a la hmu zel a, a sawi bo mai lo a ni. Hun thara Thlarau rawn thleng chuan ringtute chu hmangaihna dan tifamkim turin theihna a pe ta a ni.[10] Hei hi Thuthlung Hlui zawlneiten hun hnuhnung chung chang an zirtirna nen a inrem hle. Messia lo thlen hun leh Dan a inzawmzia an sawi thin: ‘Tin, chi tam takte chu an kal ang a, "Lo haw ula, LALPA tlângah, Jakoba Pathian inah chuan i chho vang u; tichuan ani'n a kawng chanchinte chu min zirtir ang a, a kalkawngahte chuan kan kal ang," an ti ang: Zion atang chuan dan thu chu a lo chhuak dâwn si a, lalpa thu chu Jerusalem atangin a lo chhuak dawn a ni.’(Isaia 2:3). Jeremia pawhin hun thar Dan chu chhungril lam thil a nih hun tur a sawi bawk: “chung ni hnua Israel chhûngte hnêna thu ka thlun tûr erawh chu hei hi a ni, tih hi LALPA thu chhuak a ni: an chhûngrilahte ka thupêk ka dah ang a, an thinlungah ka ziak bawk ang a, kei hi an Pathian ka ni ang a, anni chu ka mite an ni ang.” (Jer. 31:33).

He hun tharah hian Dan chu Thlarauvin a luahlan lo va. Thlarau chuan mite chu Dan lamah an rilru a tivar a, Dan aia sang zawka nung turin a siam thar zawk a ni. Hun thar thatna dan, tun huna ringtu zawng zawngin Pathian Ram lo thleng tur beiseinaa thlir renga an nun chhuahpui chu a lo lang ta a ni. He dinhmun hi Paulan I Kor. 9:21-ah a sawifiah hle mai: “Dan nei lote ka lak theih nan an zingah Dan nei lo angin ka awm thin, Pathian dan zawm lo ni si lovin, Krista dan zawm tlat siin.” Dan chu Pathian Ram bawi a nih theih nana Pathian hmanrua a lo ni ta zawk. Kristian sakhuaa Dan lo danglam tak dan chung changah hei hi hriat a pawimawh hle. Danglam ta chu Dan ni lovin ringlo ringtu lo ni ta zawk kha a ni.[11]

Tlangkawmna

            Pathian khawngaihna huang chhung ata thiltih vawrh chhuah duhna leh, rinna leh thiltih inkalh tlata ngaih hi zirtirna him lo tak a ni tih a lang chiang hle. Thiltih hnawla a awm thin chhan hi Pathian Thu kan man loh hrim hrim vang a ni thei ang a. Tin, sual ngaihzamna nun kan duh avangin kan nun sual leh thlarau nun kaihkawp dan kan zawn vang pawh a ni thei ang. Rinnaa kal hmasate leh Thlarau hruaia lo awm hmasate chuan an sawi hrang ngai lo tih i hre thar ang u. Bible zirtirna dik chuan Pathian khawngaihna chu rinna leh thiltihah a lang chhuak tih hi a sawi mai a ni. Pakhat hnawla pakhat pawm lam thu ni lovin. Pawisa hmai hnih anga kal kawp tlat a ni tih hi Pathian Fate chuan an chiang a ni.

---

[1] Rev. Dr. Rohmingliana, Zion Panna Lamlian (Aizawl: Literature & Publication Board TMEF, 2000), 26-45. Phek 29-ah chuan, “Aman min chawlhtir a, rinna chawl thei tawh lo leh khawngaihna inkawp chu min pe…Thil tha ti thei tawh hi thil tha chauh ti thintu che ziain min chettir a, chu thil tha tih chu kan awmna atan a siam ta a ni,” te pawh a ti ve tho ve.

[2] Matthaia  5:17,18; 7:12; 11:13; 12:5; 22:36, 40; 23:23.

[3] Luka 2:22, 23, 24, 27, 39; 10:26; 16:16, 17; 24:44.

[4] Merrill C. Tenney (ed.) The Zondervan Pictorial Encyclopedia of the Bible, Vol. 3, (Grand Rapids, Michigan: Zondervan, 1976),  894.

[5] Rom 7:22, 25; 8:7; I Kor. 9:9.

[6] “Jesus taught the pure, unconditioned will of God without compromise of any sort, which God lays upon men at all times and for all time,” G.E. Ladd, Theology, 128.

[7] E.F. Kevan, “It must never be forgotten that Law and obedience are merely the form of the moral life…To ignore the form is to lapse into a mystical type of piety which may soon become a cloak for impiety.” (The Evangelical Doctrine of the Law, 28)

[8] John Murray, “It is not only the doctrine of grace that must be jealously guarded against distortion by the works of law, but it is also the doctrine of law that must be preserved against the distortions of a spurious concept of grace. This is just saying that we are but echoing the total witness of the apostle of the Gentiles as the champion of the gospel of grace when we say that we must guard grace from the adulteration of legalism and we must guard law from the depredations of antinomianism.” (Principles, 182)

[9] Cf. Gal. 5:14; Ex. 20:13-15, 17; Lev. 19:18; Deut. 5:17-19, 21.

[10] Frank Thielman, “Paul….reserves a place for the law among the eschatological Spirit enables believers to fulfill the law of love.” From Plight to Solution (see footnote 58).

[11] E.F. Kevan, “Any change in relation to Law that occurs in Christianity is not in the Law but in the believer…To say that Christian conduct is now governed by holy principles is…incorrect…if it meant any withdrawal or modification of the Law.” (The Evangelical Doctrine of the Law, 25).