Temple, Biak In leh Kohhran

Tunlai mi tam takin, Kohhrana mi rinawm tak tak pawh telin, Kohhran nihna hi kan hre chiang lo \hin niin a lang. Mimal leh Kohhran danglamna te, rorel leh inkhuahkhirhna chungchangte, leh Kohhran leh Thlarau Thianghlim inzawmna te hi kan hre buai chawk a ni.

          Mizo Bible-ah, “Pathian in in nih leh Pathian Thlarau nangmahniah a awm reng tih in hre lo vem ni?” (I Kor. 3:16) tih te a lo awm avang leh I Kor. 6:19-ah “Thlarau Thianghlim in,” min lo tih bawk avang hian keini ringtu mimal \heuh hi, “Kohhran in ni,” min ti ta mai emaw tia hriat sual a awl fo mai. Paula hian a sawi tum tak zawk chu, mimal hi Kohhran kan nihna lam aiin, ringtu zawng zawngte hi Thlarau Thianghlim chenna in kan nihzia a ni. Midang kaltlang lova mahni ngeia Pathian pawh a, Pathian nena inkungkaihna \ha neih thu  sawina a ni.

Thuthlung Hlui hunah chuan chu thil chu a thleng hauh lo va. Pathian awmna chu Temple a ni, Pathian nena an inkarah puithiam rawngbawlna, Temple khan awmzia a nei a, chumi kaltlang chuan Pathian an pawh theih chauh a ni ber. Chu thil chu Thuthlung Tharah chuan \hiah a ni tawh a. Kuta in sak temple-ah ni lovin, ringtu-ah chuan Thlarau Thianghlimin hmun a khuar a, a chenna hmun atan a hmang tawh zawk a ni.

Heti lai tak hi mi tam tak hriat sual \hin a ni. Ringtu mimal hi ‘Pathian in’ emaw, ‘Kohhran’ emaw an ti ta mai \hin a ni. Bible-ah ‘Pathian in’ emaw, ‘Thlarau Thianghlim in’ emaw ti mai mah se Paula sawi tak kha chu vawiina kan Biak In ang hi ni lovin temple kha a ni zawk a. Vawiina kan Biak In ang hi chu Paula hunah khan a la awm lo hrim hrim a. Biak In-a inkhawm hi Isua thih hnu kum 200 vela an chin  \an chauh a ni. Vawiinah hian Pathian Biak In (temple) kan nih tawh avangin Biak Ina kal a \ul ta lo, a ni lo va; kan Biak Inah hian ‘Thlarau Thianghlim chenna in’ te kha kan rawn kal khawm a, kan Lalpa chawimawiin chibai kan buk \hin zawk a ni. Chu chu Thuthlung Thar a nih tawh avanga thlahthlam theih a ni chuang lo –‘Inkhawm bansan mai lovin’ (Heb. 10:25) tih a nih kha. A huhova awm a, rawngbawl ho va, intichak tawn turin Pathianin min ruatsak a ni.

Kan zinga mi \henkhat chuan mimal tinte hi kohhran ni mai a, kohhran kan han tih tak pawh hi intichak leh intihlim tawn tura awmkhawm (fellowship) angah ngaiin chutiang intiphur awm khawm apiang chu kohhran angah an ngai mai a ni awm e. Chuvang chu a ni ang kohhran rorelnate, inkhuahkhirhna te, leh a thuneihnate hi an hrethiam \hin lo niin a lang. Kohhran chu intihchak tawn aia lian fe a ni a, intihhlim tawnna mai a ni lo. Pathian Thu-a innghat pawl ropui tak a ni a, chutah chuan thil chi hrang hrang a awm-

1.    Thurin: Bible zirtirna dik tak a ni em? tih hi a enfiah reng a, zirtirna dik lo chu a hnawl \hin. Do a \ul a nih pawhin a dotu tur a ni ang.

2.    Rorelna: Kohhranah hian rorel a ngai tih chu a tir a\angin Bible-ah kan hmu a, chumi pawimawhzia chu Pastoral letters (Timothea & Tita) ah te hian a lang a ni. Paula lehkhathawn dangah pawh hian chu thil chu kan hmu a ni. Kohhran memberte pawh he rorelnaa intulut tur an ni.

3.    Inzirtirna leh Inthununna: Kohhran chhungah hian Pathian Thu inzirtirna hi a tam em em a. Chhandamna chang tura inthlemna main i lovin, chhandamte nun dan tur inzirtirna hi a tam a, mi tam takin kan hmu ‘thlarau’ lo mai \hin. Thlarau Thianghlim hian kan duh zawng leh lawm zawng chauh sawi turin an ring emaw ni dawn ni? Inpawl, indawm, in\anpui, inkhuahkhirh, inzilh, inthunun, leh inhnawhchhuah thleng pawhin a awm vek tih Bible-ah kan hmu chiang em em a ni.

|henkhat chuan rorel, invawn, inkhuahkhirhna leh inhumhalhna an zui zawh \hin loh avangin “Hmuh theih loh Kohhran” lam sawi uarah an ram\ang a, an ngaih a la \ha ta fo a ni. Chumiah chuan tel ve thovin an inhria a ni ang. Hmuh theih loh Kohhran hi ‘ringtu zawng zawng sawina a ni,’ tih hi kan pawm thlap a ni. Kan Kohhran bika awm te chauh hi chhandam tur angin kan inzirtir ngai lo. Hmuh theih loh kohhran memberte chu Pathian chauhvin a hria. Amaherawhchu, mahni awmna Kohhranah pawh intulut zo lo kan nih chuan  hmuh theih loh kohhran member dik tak kan ni chiah ang em? Hmuh theih loh Kohhran chu Isua Krista ringtu, Lal leh Chhandamtu a nihna pawmtute an ni mai. Hmuh theih kohhran a\anga tlan chhiatna tur thil a ni lo. Hmuh theih kohhran memberte chuan hmuh theih loh kohhran an siam \hin. A inzawm reng a ni. Hmuh theih Kohhran tel lovin hmuh theih loh kohhran a awm lo a ni.

Rev. H. Zalawma leh Rev. Vanlalzuata te buatsaih Sakramen Department  zirlai chuan, “Mi \henkhatte chuan hmuh theih Kohhran hi ngainepin, hmuh theih loh Kohhran mi leh sa an nihna chu an duh tawk mai \hin a. Chutiang mite chuan hmuh theih Kohhran chu an hmu khawvel a, thingzai rem khawm chhunga mihringte inpawlhona mai mai angin Kohhran hi an ngai bawk a….Hmuh theih Kohhran leh hmuh theih loh Kohhran hi a hrangin a awm lo va, rinna leh thiltih a inzawm tawn ang hian a inzawm tawn tlat a ni ….Hmuh theih loh Kohhran member dik takte chuan hmuh theih Kohhran an ngainep thei lo. Lal Isuan Kohhran a din khan hmuh theih loh lama amah ringtute zawng zawng chu hmuh theihin an inpawlkhawm a, hmuh theihin rawng an bawl a, hmuh theihin Kohhran hruaitute an thlang a, inrelbawlna hna zawng zawng pawh hmuh theihin an kalpui vek a ni.” (p.17&18)

          Ringtu mimal chu Kohhran ni lovin, Thlarau Thianghlim in (temple) a ni a, he Pathian in, Thlarau Thianghlim chenna hi amah chauhva chetla mai tur a ni lo va, kaihhruai leh zirtir zel leh dawm ngai a nih angin rawngbawl zel tur bawk a. Chuvangin, ringtu inpawlkhawm Kohhranah ringtu chu Pathianin a dah a, chu Thlarau Thianghlim in/Pathian in chuan Kohhran hovin Pathian biak ho nana an serh hran in, Biak Inah, Pathian in dangte nena Pathian Engkimtithei chibai buk ho turin an kal khawm \hin a ni. Chu Kohhran ‘Krista Taksa’, ‘Hmuh theih Kohhran’ ah chuan intulut a, Thlarau Thilpek a dawn zawng zawngte hmang \angkai zel tura koh a ni e. PCI Constitution chuan, “Huapzo Kohhran hmuh theih chu Kristian thurin pawm, ringtute leh an fate awmna Kohhran chu a ni. He hmuh theih Kohhranah hian Pathian thu puan chhuah a niin, Lalpa Sakramen uluk taka buatsaih a ni a, Dan leh Inthununna te vawn leh kenkawh tlat a ni,” tiin hmuh theih Kohhran chungchang a sawi a ni.

                                                *****RE12122014*****