Secularim leh Kohhran

  SECULARISM LEH KOHHRAN

English-Mizo Dictionary ‘standard’ anga kan lo chul tawh, tun hnua a famkim lohna ka hmuh ve tak fo JF Laldailova Dictionary chuan Secularism chu, “Tisa leh khawsak relbawlna leh sakhua hi inkaihhnawih lo se tia duhna,” tiin a sawi a. He hrilhfiahna anga hman dawn chuan mi tam takin sorkar thilah hian sakhua emaw, kohhran emaw-in a duh dan sawi ve thiang miah lo tur leh, chu chu Indian constitution bawhchhiatna ang hialin an ngai mai thei ang. Mahse, he sawifiahna hi khawthlang lama an hman dan a ni chauh a. Indian secularism chu a dang daih thung a – sakhaw zalenna, tupawhin a duh sakhua chu a zui, a zawm leh a zirtir phalsakna zawk a ni. Sorkar chuan sakhua zawng zawng hi ang khatin a en a. India secularism-ah chuan sakhaw dan te zahsak tur a nihna leh sorkarin duhsak bik nei lovin inangtlang takin a en tur a ni, tih inphum a. Sorkar hotuten sakhua zawng zawng an zahsak anga, zalenna an pe ang a, anmahni sakhua \heuh an zawm thiang tihna a ni zawk. Chal hnawih sen ve kher ni lovin, Indian secularism chuan mi tupawhin chal hnawih sen lo turin zalenna a nei tih a sawi zawk a ni (hnawih sen sen chu Kristian an ni ve ta lo, tihna ni lovin). Sakhaw pawl hian sorkarah thurawn emaw, a duh dan emaw a sawi thiang lo, tihna a ni lo a ni.

          Sap ho ngaisang ta na na na chuan sap ho hriat thiam dan pawh kan man thiam zung zung mai a ni awm a. Tichuan, sakhua leh kohhran chu hrang hlaka kal turin kan duh \hin. Rorelna lamah chuan a hranga kal tur pawh an ni e. Mahse khawtlang leh thil \ha zawnna lamah erawh chuan hrang thei an ni lo hial ang. Mizoram anga kohhran pawimawhnaah phei hi chuan zawlnei hna thawkin kohhran hi a ngawi mai mai tur a ni lo hial zawk a ni. Amaherawhchu, secular state a nih angin sakhaw dangte tana \ha lo tur chiang bangah chuan inrawlh turah ngai lo ila.

          Sorkar leh sakhua in\hen fel se, sakhaw thil (abik takin Kristianna) hi sorkar policy-ah inrawlh miah lo se tih duhna lian zel hi khawthlang lam Kristian thinker tam tak \ah aw a ni a. Abortion, homosexual marriage, euthanasia, etc., vel chungchangah pawh Kristian ‘aw’ an ning hle \hin a. ‘Christmas Tree’ pawh ‘People Tree’ tih duh pawl te an lo awm a, an pawisaa ‘In God We Trust’ inziak pawh hnawksak titu an tam a ni awm e. Tunah phei chuan ‘the New Atheist’ ho khuan Kristian evangelist-te style lain Pathian awm lohzia leh Pathian kan mamawh lohzia \hahnemngai takin an sawi hep hep mai a ni. Secular state-ah Pathian an ning a ni deuh ber.

          India rama piang, US-a cheng ta, khawvela Evangelist lar tak Dr. Ravi Zacharias chuan sap ram nunphung chungchang ti hian a sawi a: “Kan culture hian buaina (crisis) a tawk a ni….secularization…buaina…secularization chu sakhaw thu (religious ideas), sakhaw pawl (institutions) leh sakhaw thil sawi (interpretations) ten khawtlanga ngaih pawimawh an hlawh loh telh telhna hi a ni. He thil hian nun chawlawlna a hring a, nun dik lo taka nun pawha zahna a tihniam a, rinna leh sakhaw zirtirna ten mimal nuna thu a neihna a hnawl a ni.” Hei hi kan kawng zawh mek emaw, kan awh emaw  a ni palh ang tih a hlauhawm ta hle mai.

Sapho leh Zu

          Sap Kristiante hian zu in hi an pawisa lo viauin an sawi \hin a. Pawisa lo fe fe pawh an awm tih chu a chiang sa mai a. Zu vanga thi leh buai an tam a. Mite zu nghei tura \anpuitu pawl Alcoholic Anonymous (AA) tih pawh America ram a\anga din \an a ni. Sual anga ngaih avanga in lo pawh an tam hle tih hriat tho tur a ni. Mizoten sap Kristian kan hriat lar ber tia chhal ngam tur rawngbawltu ropui Billy Grahama’n  1954-a London Crusade a neih khan English Journalist pakhatin zu dawra inmuh pui turin a cho va, Billy Graham a kal ta ngei a nih kha. Journalist Cassandra chuan Daily Mirror-ah, “Zu tem ngai miah lo (teetotaler) leh insum tlat mi (abstainer) a ni, hetiang hmun, an ni ang tana \awp tak hmunah tlangnel tak leh lai miah lovin a khawsa thei a…nelawmna hian heti takin mi a hneh thei ang tih ka hre ngai lo va, mawlmang taka chet ve maina hian misual a sut nat theihzia hi tunhmain ka lo hre ngai lo,” a ti hial a nih kha. Zu chu a in lo tih a chiang hle mai.

          United States-a protestant kohhran pawl lian ber chu Southern Baptist Convention khu an ni a, member maktaduai 15.98 an awm a ni. June 2006 khan zu chungchangah thuchhuah an siam a: Rilru, taksa leh nun tichhetu a nih vang te, natna leh thihna thlentu a nih vang te, chhungkaw tichhetu a nih vangte, in thiam inti te ruih theih dangah mi a hruai luh fo \hin avang leh ‘sakhaw rawngbawltu \henkhat Kristaa kan zalenna tlawhchhana zu in pawisa lo an lo awm tak avangin’,- “Greensboro, North Carolina, June 13-14, 2006 meeting chuan zu siam te, thehlar te, sem darh te, leh in hi kan do a ni; tin, Zu in mi reng reng Southern Baptist Convention hnuaia committee member atan thlan loh tur; tin, Southern Baptist member zawng zawng kan ram leh khawtlanga zu a bo theih nana dan siamna kawngah taima taka hma la turin kan ngen a; tin, Southern Baptists memberte zawng zawngin zirlai leh puitling tawh pawh zu in hlauhawmzia \hahnemngai taka zirtir zel turin kan infuih a; tin, rawngbawlna leh pawl ho zawng zawng ten zu vanga harsatna thleng mekte hi Bible zirtirna a\anga thlir thiam a, zu in miah loh (abstinence) \hatzia zirtir zel tur leh tualchhung kohhran zawng zawngte chu chutianga rawngbawlna chu \anpui nghal/\hin turin a rawn a ni.” Sap \henkhat chuan zu hi an lo duh lo ngar ngar hle mai. Mizoram Kristiante hian kan la duh lo na zo lo fe zawk a ni hial lo maw? Sap \henkhatin an lo phalrai emaw, neih inang an lo innei emaw, Pastor atan MKH hial lo ordain pawh ni se, Mizo Kristiannaah hi chuan zu hi palzam theih a ni tlat rih lo a nih hi. Hnam dang Christianity chu hnam dang tan lo ni se, Mizo Christianity chu Mizo tan ni zel rawh se.

Sap \henkhatin an lo phalrai emaw, neih inang an lo innei emaw, Pastor atan mkh hial lo ordain pawh ni se, Mizo Kristiannaah hi chuan zu hi palzam theih a ni tlat rih lo a nih hi. Hnam dang Christianity chu hnam dang tan a lo ni pawh ni se, Mizo Christianity chu Mizo tan ni zel rawh se.

(Not so) Hidden Agenda

Zu khap burna dan thlahdul chungchangah hian keini ang mimawl deuh chuan thu inthup awmin ka han hre ve thla ngawt a. |henkhat tan chuan saruak leh inhawng sa a nih ka ring. A \hatna leh \hat lohna chhan sawi tam tak zingah hian MLTP Act hlih duhtu leh tumtute-ah hei hi a langin ka hria:

1.    Mi changkang ve tak, mite ngaihsan leh vengva tak zu in duh tho si te tan hian MLTP Act hi a hnawk em a ni. Zu man tam chu thukhat, zu zawnga vah ruk ruk leh nam chem chem a ngai \hin hi a zahthlak a. Sorkar phal loh thil a lo ni bawk nen. Police man hmingchhiat nih mai theihna chance a tam em a ni. Ning awm reng pawh an ni e. A in mi tan chuan huatthlala tak a ni lo thei lovang.

2.    Sorkar hian engvangin nge maw a nin em em le? Kan khawtlang nunin a \hatpui tur nia an hriat vang a nih ka ring thei miah lo. Sum leh paiah \hatpui dawna an inhriat vang a ni ang. Zu man an thlahlel a ni ber mai. Engvang nge, NLUP-a sem atan em ni? State rethei kan nih kan hre tlang a, sum leh nuna retheihna inkawp chu duh tur a awm thei dawn em ni?

Wealth Tax/Income Tax la zawk mai ila

Zu chhiaha sum hmuh tum ngawt ai chuan kan sorkar hian Wealth tax te, Income tax te hi la ve tawh mai se a \ha zawk lo vang maw? Keini ang income a\anga thlir chuan a sing bi tak meuh hlawh chin te hi chuan ram tan hian engemaw zah an thawh phal ngei ngeiin ka ring tlat a ni. Zu phalrai lohna a nih dawn phei chuan a nuam lehzual ang. Hei hi ram changkang zia a ni a (zu in ni ber lovin), uikawm deuh kan lo awm pawhin  i inphal ang u.

Sorkar hnathawk pakhat ka sawipui chuan min tiphur hle: “Kum khatah sorkar hnathawk chuan professional tax Rs. 2500 vek kan pe ... Sorkar hnathawk ho chu hetiang hian min hrut rual vek. Income tax pek hi \hangthar responsible chin chuan kan duh deuh vek. Sorkara contribution neih hi kan hreh hran lo. Mahse an la ti mawlh si lo. State pawh hian state revenue atan tax hi chu tisang se ka ti khawp mai. Kan zak ve a… Zu chhiah beisei hi chu a chhiah ai khan a zu zalenna hmu lian ho sawi a ni. Zu chhiah lak a zu zawrh ai chuan chawi belh paw’n zu khap ka la thlang… Zu chhiah te mai mai hi chu zu vanga natna thlen medical reimbursement ah a kal ral vek tho ang,” a ti siah siah mai. Ka lawm hle. Sorkar hian kan \hangthar \henkhatte rilru hi hrethiam tak maw?

Tih tak emah chuan, building khir en un nei a, sumdawnna a nuaia nuai za tel tiche vel reng thei ho hi engvangin nge kan tax loh lem ang le? Delhi, Mumbai, Bangalore,… tih vela an fate pocket money pawh kan chhungkaw income-in a phak lohte hi sorkar hian hlau lo sela, kan rama sum leh pai kan insem tlangah ngai mai teh se. Zu chhiaha indaih tum ai chuan NLUP atan pawh, a \ul a nih chuan, lo hmang \angkai mai rawh se.

Kohhran Ngaihdan leh Sorkar Policy

          |henkhat chuan MLTP Act chungchanga kohhranin ngaihdan mumal tak a neih leh chumi chu zah tura sorkar zawk pawh an duhna an sawi hian constitution kalh hialin an hria a ni awm e. Constitutional expert chu ka ni lo nang a, inhmeh lohna awmin kei chuan ka hre thei lo. Pressure group anga sawi pawhin group lian tak a ni hrim hrim a, membership anga sawi pawhin kan sorkarna fawng chelhtute hi kohhran member an ni vek tih theih a ni hial bawk. Tin, thurawn leh control danglamna kan ngaihtuah lo a ni mai thei. Ni e. Kohhran chuan sorkar a control ngawt thei lo va, a control tur pawh a ni lo va, a control ngai lo bawkin ka ring. Mahse, kohhran chuan socio-ethical issue chungchangah chuan a sawi thiang a, a sawi tur pawh niin ka hria. Sorkar fing tak chuan ngaihthlak pawh a thiam tur a ni ang chu. Tin, Orissa state sorkar khuan a statea Hindu ho ngaihdan a lak a thian lohna ka hre lem lo a. Amaherawhchu, constitution kalh leh minority te rights palzutna thleng thlengin Hindu ho ngaihdan a lak zel chu thiangah ka ngai lem lo bawk. Chu chu kan rama Kohhran role ka hmuh ve dan chu a ni.

          Secular democracy-ah chuan tupawhin voice an nei thei a. Pawl chak dan azirin voice pawh a ring mai ang. Sorkar va control lam a ni lo va, duhthu sawi chhuah lam a ni. Khawtlang \hatna tur leh mipui nun khawih thilah chuan kohhran hi a tawmim mai mai tur a ni lo zawk a. Dik tak leh \an bik nei hauh lovin thudik chu puang chhuak sela, a dik lo pawh hnawl ngam tur a ni zawk. Mizoram angah te hi chuan, Kristian vek kan nihnaah, sakhaw dang zuitute chanvo humhalh tlat chungin awka pawh a chhuah zel hi \ha ka ti a, a thiangin ka hre mai ni lovin a tih ngei ngei tur ni zawkin ka hria.

-       RE Ralte

                                                                    

*****18022014*****