DUHTHLANNA HI

Tunlai Pathian Thu chhut peih deuhte ngaihtuah zin tak pakhat chu duhthlanna chungchang hi  a ni. Chhandamna chungchangah hian eng chen chiah nge duhthlan theihna kan neih? Kan duhthlannaa innghat vek em ni? Hemi chhanna fawr deuh hlek nia ngaih theih pahnih a awm thei awm e:

1.    Mihring chu chhe lailet der a ni a, duh thlang thei a ni lo.

2.    Mihringah hian duhthlanna a awm a, chhandam kan nih leh nih loh chu kan thlan leh thlan loh a ni mai, tuma puih kan ngai lo.

Bible leh Kristian zirtirna a\angin fimkhur takin han sawi dawn ta ila. Mihring hian duh mah ila kan thlan theih miah loh a awm. Sava anga thlawh theih te, tui chhunga thawk lak theih te hi, duh teh mah ila kan thlang thei lo. Ke ngatin darkar 1 chhunga Aizawl thlen thlak chu chak viau mah ila, kan thlang thei teuh lo. Hemi kawngah chuan duhthlan theihna kan nei miah lo tih kan pawm tlang a ni. Duhthlanna a ni lo.

Amaherawhchu, sual leh \hat, rin leh rin loh, Isua Krista pawm leh hnawl chungchang chu a dang daih a ni tih a hriat. Mizo\awngah ‘duhthlanna’ tih hi \awngkam pahnih inkawp (duh +thlan) a ni a. Thlan leh thlan lovah chuan mihring hian a thlang thei reng. Evi leh Adama sual hmain a thlang thei a, suala an tluk hnuah pawh a thlang thei bawk. Kan duh lam lam hi kan thlang mai a nih hi. Tuman min dal lo. |ha kan tih leh tih lovah (moral decision) thuthlukna kan siam thei a ni.

Amaherawhchu, ‘duh’-ah tak hian harsatna a lo awm ta. Kan duh zawk zawk kan thlan \hin avangin, eng nge kan ‘duh’ \hin tih chu kan harsatna lai tak a lo ni ta. Kan sualna lai tak chu Pathian duh loh zawng kan duh tlat a, kan duh ngei chu kan thlan \hinna lai tak kha a ni. Pathian duhzawng aia mahni duhzawng ‘duh’ a, ‘thlang’ \hin kha misual nung tlak lo chu a ni. Hei hi mihring zawng zawng sualna chu a ni – Pathian kan ‘duh’ lo \hin hi. |henkhat chuan, “A duh chu kan duh ve tho alawm, kan nunin a zo lo, a \ha thlan turin chakna ka nei lo, kan thlang thei lo a ni…” an ti \hin. Hetiang mite hian duh chin chu an nei ve ang, mahse, an nunin a duh ber chu a la ni lo deuh a ni. Uire pa \henkhat mahni pawm lai nupuite \hen duh miah si lo, nu dang han kuah thuak thuak duh ve tho si, ang deuh hi a ni mai. Pathian duh chin chu an nei, mahse an duh ber a ni lo. An duh ber loh na na na chu an thlang lo mai a ni.

 Kan ‘duh’ chu kan thlan mai avangin kan ‘duh’ kha a pawimawh ta a. Isua Krista thlang tur chuan kan ‘duh’ a ngai ta tlat mai. Hetah tak hian a ni fimkhur ngai chu. Keimahni chakna leh theihna avang liau liau a, Krista hi ‘duh’ theia kan inngai mai a nih chuan chapona chi khat leh chaltlaina chi khat, hriat chian loh vang a ni ngei ang. Pathianin hna thawk hmasa lo se Krista hi kan ‘duh’ thei lovang. Pathianin Chanchin |ha hrilhtu min pe lo se, engtinnge duh pawh kan duh ang? Thlarau Thianghlimin  kan sualzia leh chungpikzia min hriat chiantirin, Krista hriatna kawngah kan rilru min tihvarsak (Thurin VI) lo se, engtin nge kan ‘thlan’ theih ang le?

Tichuan, i thlang thei a nia aw, i duh ber kha i thlang \hin a ni zawk. Sual kawng kha duhin thlang zel tawh suh. Thlarau \anpuinaa Pathian lam ‘duhna’ i nei a nih chuan, i lo ‘thlang’ dawn nia. Duhna kha Pathian pek che a ni a, thlan kha i tih tur a ni e.

                                                                               *****RE270214*****