𝐇𝐄𝐀𝐋𝐓𝐇 𝐀𝐍𝐃 𝐖𝐄𝐀𝐋𝐓𝐇 𝐆𝐎𝐒𝐏𝐄𝐋 𝐁𝐈𝐇𝐂𝐇𝐈𝐀𝐍𝐍𝐀

He ‘Health and Wealth Gospel’ an tih, ‘Prosperity Gospel’ an tih bawk hian kan ramah thawm a nei rei ve ta fu mai. Hnawk tiin kan hnawl mai dawn emaw tih theih a nih laiin a nihna tak kan hrethiam hlawm lo emaw tih theih a ni ta. Ringtu inti tam tak hian Pathian thu dik hi an ngaihtuah peih vak chuang lo niin a lang. Pathian hmangaihtute chuan a thu dik tak kan ngaina tur a ni ang a, tih sual kan hlau tur a ni bawk ang. Chanchin |ha suak angte phei chu kan hnawlin kan do ngei tur a ni. Kohhran hruaitute phei chuan hetiang hi man pha ngei tura inzir a, ngaihtuahna seng turin mawhphurhna sang tak kan nei.

A hming an vuah atang reng hian he ‘gospel’ hi chuan mi tam tak a hip dawn tih a chiang a. Sual chhungkhung mihringin a duh ber sum leh hriselna tawktarhin mite hneh an tum a. He ‘gospel’ hi chuan Isua ringtu nih malsawmna chu he leia hmuingil, sum-paia hausakna leh natna laka fihlim taksa hrisel a ti a nih chu! Speaker thenkhat phei chuan hausak phahna nan an hmang mek a ni. Pathian thu chu ‘hmuingilna’ thu, khawsak nawm leh hriselna thilah an chhuah a, mihring rilru verh zawng tak a nih avangin tuipuitu pawh an tam. Tluangtlam taka ngaihtuahtu leh boruak nei hrim hrim lawmtute tan phei chuan chanchin ‘tha’ tak a ni ringawt. Mahse fimkhur a ngai nasa tih hi hre hmasa phawt mai ila.

𝐋𝐨 𝐜𝐡𝐢𝐤 𝐯𝐞 𝐭𝐞𝐡

Prosperity Gospel hi United States chhulchhuak theology a ni a. American theologian thenkhat phei chuan zahthlak an tih thu an sawi nghe nghe. Hmuingilna theology a nih ang ngei hian Pathian chuan amah ring ngamte chu taksa damna leh sum leh pai hausaknain mal a sawm thin, an ti a ni deuh ber. Chu chu kan banin kan chang ve tur a ni, an ti. An zirtirnaah chuan ‘rinna’ hmangin lei malsawmna a sawr chhuah theih a, he taksa leh thlarauva hmuingilna hi Pathianin amah ringtute tana a duh leh a dah a ni a. Rinna thlai chi pe a, pawisa thawhtute chu Pathianin nasa takin mal a sawm let dawn a ni, tia pawisa damna beisei vanga pawisa inthawntir vak vak te pawh an awm.

Hetianga khawvel khawsak hmuingilna leh Chanchin |ha a suihzawm tlat avang hian he Prosperity Gospel hian Pathian thu thiamte lung a tiawi zo lo va. Bible a hrilhfiah dan dikhlelin Chanchin Tha chu lei malsawmna thlentuah a ngai hmiah mai hi a dik lo nasa hlein an sawi. Hriselna kawnga harsatna tawkte leh khawsak harsa mi rethei zawkte a bum nasa hle tih an sawi thin. He leia tuarna kan tawh ang te hi an ngai ho a, rinna chak lo zia niin an ngai mai. ‘Rinna kan neih chuan kan retheiin kan na lovang’ tih hi an thu kalpui dan a ni. Kristan sual laka min tlanna aiin khawvela taksa hmuingilna an uar zawk thin. Lal Isua chhandamna chungchanga zirtirna danglam viau si kan pawmzam thei fu mai hian ngaih a titha lo a ni.

𝐁𝐢𝐛𝐥𝐞 𝐳𝐢𝐫𝐭𝐢𝐫𝐧𝐚 𝐚 𝐧𝐢 𝐞𝐦?

He ‘Health and Wealth Gospel’ in a sawi chu – Isua min pek chhandamna hian kan taksa hriselna a thleng pha vek a. Chhandamna hi thlarauvah chauh chang lovin, taksaah pawh kan chang ang a, natna zawng zawng a bo vek ang. Taksa damna, sum leh paia hausakna kan la neih loh chuan ‘rinna’ kan la ngah tawk loh vang a ni. Ringtute tan chu malsawmna chu a pe vek tawh, rinna kuta kan ban mai tur a ni. Chu rinna chu thil ti thei tak, thlarau nunna leh lei hausakna min pe theitu a ni a. Taksa leh thlarau damna, thih hnua vanram kai leh he leia hrisel leh sum leh paia hausak dan ‘chanchin tha’ an sawi a ni ber mai. Pawmnahawm a ni em tih hre turin Bible zirtirna nen han khaikhin ila:

PROSPERITY GOSPEL ZIRTIRNA	PATHIAN LEHKHABU ZIRTIRNA
Pathianin sum leh paia hausakna hi ringtu zawng zawng tan a tiam. Rinna leh puang chhuak ngamte tan chu hausakna chu an ta a ni.	Luka 12:15: “Tin, an hnenah, “Fimkhur ula, awhna reng reng lakah inveng rawh u; mihring nunna hi a hausaknaah a innghat lo ve,” a ti a. Philipi 4:12: “Rethei taka awm dan ka thiam a, hausa taka awm dan pawh ka thiam bawk a; engkimah tlai leh riltama awm dan, hausa leh retheia awm dan thuruk ka zir tawh.” I Timothea 6:9-10: “Hausak duh mite chu thlemnaah an lut a, duhamna atthlak, thang hlauhawm takah chuan an awk a, an chhiat phah a, an boral thin a ni. Tangka sum ngainat hi sual tinreng bul a ni, sum ngah an tumna lamah thenkhat chuan rinna hi an pensan a, lungngaih sawi sen lohvin mahni an intina ta a ni.”
Rinna chu hriselna leh hlawhtlinna neih theihna hmanrua a ni. Rinna chak tawk i neih chuan i na ngai lo ang a, i hlawhchham ngai bawk lo vang.	II Korinth 12:7-9: “Thil mi hriattir chu a ropui em vanga ka inngaihhlut luattuk loh nan ka tisaah hian hling mi pe a, chu chu Setana tirhkoh, ka inngaihhlut loh nana mi kap reng tur chu a ni. Chu chu mi lak kiansak turin vawi thum Lalpa ka dil a. Ani chuan, “Ka khawngaihna i tan a tawk e, ka thiltihtheihna hi chak lohnaah asin tihpuitlina a awm thin,” mi ti a. Chuvangin, Krista thiltihtheihna chu keimaha a chen theih nan ka chak lohnate hi lawm takin ka chhuang tawh zawk ang.” I Timothea 5:23: “Tui chauh in tawh lo la, na i nei fo si a, i pum nawm nan uain tlem in thin ang che.” Hebrai 11:35-40: “Hmeichhiaten an chhungte thi lo nung leh an lo lawm a, a thenin tihduhdah an tuar a, thawhlehna nun hlun an neih theih nan chhan chhuah pawh an duh lo.”
Taksa khawsaknaa retheihna hi anchhia, Kristiante hnawl tur thil a ni. Sum leh pai tlakchhamna hi rinna neih loh vang a ni. Pathianin rethei turin min ti lo.	Matthaia 6:20,21: “Pachhiate u, in chan a tha e, Pathian ram in ta a ni si a. Tuna riltamte u, in chan a tha e, in la tlai dawn si a, Tuna tapte u, in chan a tha e, in la nui dawn si a.” II Korinth 8:9: “Kan Lalpa Isua Krista khawngaihna ngahzia chu in hria e; a retheihna avanga in lo hausak theih nan, hausa hle mah se, nangmahni avang ngeiin a lo retheih tak kha.” Jakoba 2:5: “Ka unau duh takte u, ngaithla the u, khawvel ngaiha mi retheite hi rinnaa hausa tur leh, amah hmangaihtute hnena a ram tiam chang atan Pathianin a thlang lo vem ni?”
Tunah thilpek i pek chuan Pathianin mal a sawm let ang che. Ministryah pawisa rawn thawn la, Pathian malsawmna a let tam takin i hmu ang.	Luka 6:35: “In hmelmate chu hmangaih zawk rawh u, an chungah thil tha ti ula, hmuh kir leh beisei kher lovin puktir rawh u; tichuan, lawmman tam tak in hmu ang a, Chungnungbera fate in ni dawn nia; Ani zawngin lawm nachang hre lote leh mi sualte pawh a khawngaih vek a ni.” Tirhkohte 8:18-20: “Tirhkohten an chunga kut an nghahin Thlarau Thianghlim pek an ni tih Simona chuan a hmuhin pawisa pek a tum a, “Hetiang thiltihtheihna hi mi pe ve rawh u, an chunga kut ka nghahna apiangin Thlarau Thianghlim an dawn ve theih nan,” a ti a. Nimahsela, Peteran a hnenah, “I tangka nen hian boral rawh u: Pathian thilthlawn pek tangka suma lei i tum avangin.” II Korinth 9:7-8: “Mi tinin an rilrua an tum ang chu ui lovin, tih luih ang ni hek lovin pe theuh rawh se; Pathian chuan lawm taka petu a ni a hmangaih ni.”
He khawvela hlawhtlinna chi hrang hrang, nuam taka khawsakna, hmuingilna leh taksa hriselna te hi ringtute chanvo neih ngei tura Pathian malsawmna a ni. Chu chu rinnaa ban tur a ni. I chham chhuah ngam chuan i chang mai ang.	Marka 8:34-36: “Mipui chu a zirtirte nen chuan a ko va, an hnenah, “Tui pawhin mi zui a duh chuan mahni inngaihtuah chang lovin mahni kraws puin mi zui rawh se, Tupawh mahni nun humhim tum chuan a chan ang a, tu pawh keimah avang leh Chanchin Tha avanga nun chan chuan an humhim ang. Miin khawvel hi a pumin nei vek sela a nun chan si se, a tan eng nge sawt ang?” Johana 16:33: “Keimahah thlamuanna in hmuh nan heng hi in hnenah ka sawi a ni; khawvelah hian hrehawmin in awm thin; nimahsela, thlamuang takin awm rawh u, keiin khawvel ka ngam ta,” a ti a. Hebrai 13:14: “Leiah hian kan tan khawhlun a awm lo va, kan tan khaw lo la awm tur kan zawng zawk a ni.”

𝐈 𝐦𝐚𝐰𝐡𝐩𝐡𝐮𝐫𝐡𝐧𝐚

He Prosperity Gospel (hausak leh hrisel chanchin tha) hian Isua Krista thuchah a hliahkhuh nasa hle mai. Chatuan nun beiseinaa kraws put chu lei hausakna leh taksa damnain a thlak ta daih mai a. Mihring rilruin a mil zawng tak a ni si a, tuipuitu an tam duh khawp mai. Ngaih ‘thlarau’ a awl! Bible chuan tuarna leh fiahna te hi ringtu kalkawnga awm a nihzia min hrilh zawk a. He kraws kawng hi pumpelh tir tumin Hmelmapa chuan a bei ngar ngar che a. Ngaihtuahna hmangin inthiar fihlim la, mi dang pawh hrilha, zirtir turin inbuatsaih rawh.

He Chanchin Tha Suak hi i rinaiin a hnai a nia. Mizo tawngin Mizo chhulchhuak ngeiin an sawi dup dup thin. Youtube-ah te ngaithlatu an ngah duh phian. I nupui, i pasal, i chhungte ngaihthlak tam tak pawh kha a ni mai thei! Pathian thutak emaw an ti ang tih ka hlau thin. Kan ramah he Gospel Suak hian zung a kaih thuk tak tak hma hian Kohhran ho pawh kan harh a ngai. Pathian thu dik tak humhalh turin mawhphurhna sang tak kan nei si a. I tih tur leh i nih tur hi i hlen chhuah loh chuan a pawi dawn a nia. Tam tak bumin an awm mek a nih hi. An thatpui chuan a tha tia duhsak zel hi a him lo thei, hmangaihna dik a ni ngai lovang.