𝐙𝐀𝐈 𝐋𝐄𝐇 𝐋𝐀𝐌 𝐁𝐈𝐇𝐂𝐇𝐈𝐀𝐍𝐍𝐀
Mizo
Kristiannaa bet nghet tak chu lam hi a ni. Kohhran pawl tin hian kan pawm thiam
em em vek a. Vulh len kan tum theuh emaw tih theih a ni. Thlarau nun tehfung
pawimawha kan hman rim tak mai a ni lehzel bawk a. Kan lam luih luih tawh chuan
thil tha leh ropui tak changa inngaiin kan lungawi tlang a, Thlarau
Thianghlimin hna thawk nasa hleah kan pawm tlang mai thin a ni awm e. Chutih rualin kohhran
inkhawmah lam thlarau a thawh theih mang tawh loh chuan kan beidawng ru a,
boruak thar mamawhin kan inhria a, lunglengin kan khua a har mai thin a ni.
Hlim lam hi kan ngaisang hle a ni phawt mai. Zep rual a ni lo.
𝐇𝐫𝐢𝐧𝐠𝐧𝐮𝐧𝐚𝐡 𝐥𝐚𝐦
Kan pi leh pute atang rengin Mizote pawh hi lam ngaina hnam kan ni, a tih loh theih loh va. Thlarau Thianghlim harhna ni lem lo pawh lam harhna chu a lo awm ve tho mai. Puma Zai te, Tlanglam zai ten chuan ram pum a tuam hlup hlup ve tho a nih kha. Zai leh lam an bei nasa nangiang. He thil hi kan chekin a mil tak thil a ni a, nuam kan tih zawng tak leh kan nunphunga bet nghet tak a ni. Mizo nihnaah hian a tel ve zel lo thei lo vang.
Hei hi hrethiamin Kohhran pawh a inhawng zau zel a. Hmanlai zawka a duh hauh loh khuang chu Biak Inah la lutin hlim lamna chu khawvel tana pe chhuak mai lovin Kristianna nen a hmehbel ta a ni. Hei hi thil tha tak a ni tih loh theih a ni lo va, ‘contextualization’ tiin zirna huang chhungah chuan an sawi thin a ni. Kristianna chu kan culture milin kan her rem tihna a ni ang. Hetiang thil hi tih thiam zel pawh a tha.
𝐙𝐚𝐢 𝐧𝐠𝐞 𝐥𝐚𝐦?
Kan ngaihtuah tur pawimawh ta chu - Kristian nunah zai leh lam hi engti taka pawimawh nge ni ta? tih chhanna hi a ni. Mi nawlpuiin kan hriat hmaih lian tak chu Thuthlung Tharin thlarau nun a sawiah hian Mizo Kristianten kan ngaih pawimawh em em ‘lam’ hian hmun a chang lo tlat hi a ni. Keinin thlarau nun tehfunga kan lo hman thiam tak leh ti ve lote kan duh thawh em emna ki ni fo hi Thlarau Thianghlim lo thlen hnuah kha chuan sawi a hlawh ta mang tlat lo! Phulpui suah lo tur zawk hi kan lo phulpui nasa mah mah em ni dawn ta le? A tul chin piah lam thleng thlengin kan nuam tih zawng hi kan lo leklam em ni ta ang?
Harhna Hruaina 1949 chuan, “Thuthlung Hlui Kohhranah lam thu kan hmu mek a, Thuthlung Thar Kohhranah erawh chuan Thlarau Thianghlim a thlenna hmun tinah, Juda leh Jentail Kohhranah lam thu kan hre ta ngai lo. Lam hi lawm entirna chu a ni ngei mai, mi hlim lawm thei berte pawh lam lo mi tam tak an awm tih hriat reng tur a ni. Mi puitlingte chuan an nun dan leh lan danah an lawm dan an entir zawk ang,” a lo ti hial tawh a ni.
Heta lam kan sawi lai hian Pathian faka zai erawh chu kan sawi lo tih hria ila. Fak hla sak erawh chuan Thuthlung Tharah hmun a chang nasa thung a. Isua leh a zirtirte an zai thin tih kan hria a, Paula leh Sila pawhin tan inah fakna hla an sa ngat a nih kha. Ephesi 5:19 te, Kolosa 3:16-ah te “Fakna hla te, Pathian hlate, thlarau hlate” chu Thlarau Thianghlim hnathawh nena sawi zawm kan hmu a ni. Thuthlung Hlui Sam te, khatih hun laia Kristiante hla leh Pathian pek thar zel te a sawina a ni ngei ang.
Hei hi thlarau nuna thil pawimawh leh Pathianin a miten amah pawl nana a hman nasat em em a ni a. Zofate vanneihna chu Pathian faka zai ho nuam kan ti a, kan thiam riau bawk hi a ni a. Chu mai bakah khuang pu tha, solfa thiam, music instrument hrang hrang khawih mi leh hla phuahtu ropui tak tak min pe zel hi a ni bawl. Pathian chawimawia thiam taka zai ho thup thup thin tur kan ni a, kan zaimiten fakna hla chi hrang hrang an au chhuahpui tur a ni tih chu a chiang.
𝐅𝐞𝐥 𝐭𝐚𝐤𝐢𝐧 𝐧𝐠𝐚𝐢𝐡𝐭𝐮𝐚𝐡 𝐢𝐥𝐚
Tichuan, lam lovin hla chauh sak tur tihna em ni? Ni lem lo ve. Lam loh tur tihna a awm reng reng lo tih erawh kan hriat a ngai. Kan culture mil, mihring ze mil a nih avangin sakhaw thila kan chawk luh hi a pawi reng reng lo va. Tih tak takah chuan Thuthlung Hlui lamah chuan Pathian chawimawi nana lam leh lam tura infuihna a tam em hi! Mizo Kristian fakna hla sa hova kan han lam dap dap mai hi kan ‘special’ -na a ni a, kan uar chhunzawm zel tur pawh a ni ang.
Tunlai khawvelah kohhran tin hian khuangpu tha kan mamawhna a sang hle niin a hriat. |hangthar khuangpu thiam leh zai tui mi kan neih tam a ngai. He rawngbawlna hi kan ngaihlu lo chho deuh palh ang tih a hlauhawm thin a ni. Tin, zaikhawma sak mi hla tha tak takte pawh a chhuah zel a ngai bawk. |hangtharte hi ‘Praise & Worship’ hla chauh ni lo, Mizo lengkhawm hla ngat, kan Sunday Schoolah te kan zirtir tam a ngai a nia.
Hei erawh hi vawng reng thung ila. Thlarau nuna thil pawimawh chu thil inbuk tawk taka kal, thil a invuah rem a, a nih tur ang nih tir zel hi kan tum tlat tur a ni ang. Hlim lam vak mai hi Thlarau nunah a pawimawh ber a ni lo aniang e. Hlima lam ringawt buaipui thei kan ni lo. Chutiang rilru chu khawvel pawhin a nei thei, hmelmapa Setana bumna pawi tak a nih zawk theih dan a awm. Kan nuam tih zawng kan umna kawng hi Pathian kohna emaw tih palh theih a ni. Mihring sualna hi a ril khawp a, thil tha ber anga kan ngaihah te pawh hian sual hi a lo inrawlh hman thin a ni. Bible zirtirna atanga kan in ‘check-up’ a tul fo thin a ni.
Zai leh lamah pawh zai hi a hmasa zawk zel a nia. Chuvangin, lam nasat tum nghal ngawt lovin, kan zai tuiin chawi sela a kal a dik zaih mai ang. “Zai khawm ang, lam theuh tur,” kan tih chuan heng riau a awl khawp a nia. Pathian faka theih patawpa zai thin tur a ni. Zai thiam aw nei tha ten Pathian fak nan an talent hmang thiam bawk se. Thiam tak leh tui taka zai khawm thei tur chuan hla hriat chian a ngai thin tih hre bawk ila. Hmanrua leh chhep chher eng pawh ni se kan Lalpa fak nan chuan a tha em em vek tih te nen lam pawm thiam a tul!
Chawhmeh chhuan sovin kan thil chhum ber a vawrh lan lap lap thin ang hian, puan kawp sawr ang tluk tluka kan zai tuina chuan lam mite a vawrh chhuak dawn a ni. Chutah chiah chuan Pathian faka zai hlutzia kan hria ang a, thlarau nuna lam dinhmun pawh kan man thiam dawn a ni.
Comments
Post a Comment